Keegin naaga ticcianniok cĩk Nyekucak
3
Gõtõõnõga kĩ ngõõnõga, attiyyu niigia kĩ eeta cĩk looc coo, ĩthõng athii na woccia cĩ kothoothicung agiitia kĩ eeta cĩk ayak Ririwac cĩ Nyekuco, nyatarka ngaanĩ attiyyu niigia kĩ doolia cĩk kĩdĩk cĩk nga arittiay kaganoko thõõtha cĩ Kiristo. 2 Ĩnõõnõ thĩ cĩ kalimanung na kĩ doolia cĩk kĩdĩk cĩk nga aam ir dõ, athii cĩ kalimanung kĩ eeta cĩk agaacõ thoothonniok dĩdĩ, nyatarka ngaanĩ niigia ĩĩtõ makatẽ. 3 Ngaanĩ eeginnu niigia eet cĩk looc coo, nyatarka ngaanĩ emederonu niigia, ĩthõng egerenycowu kõrgẽna cunung, athii yoko niigia cĩ attiyyu kĩ eeta cĩk looc coo? Athii yoko niigia cĩ attiyyu kĩ eeta cĩk ollik kaganoko? 4 Nyatarka ma ngĩ athĩ eeti ĩmma ne, “Kowobi na Paulo,” ĩthõng ĩthĩ ĩmma ne, “Kowobi na Apoloth,” athii wõnõ cĩ eeginnu niigia eet cĩk ollik kaganoko?5 Ngẽnẽ wõnõ yoko thẽk Apolothĩ? Ĩthõng ngẽnẽ wõnõ yoko thẽk Paulo? Ẽẽn nẽẽgẽ ticcianniok kaganoko, cĩk anyung agiit ivitia ayait leminit, kĩcĩ da aanyĩk Makayyioiti ĩnõõgõ tiic codoi codoi wo. 6 Aneeta balna cĩ kathaci kinyomoc, ĩthõng ikiyyia utduutik Apolothĩ maam, ngaatĩ anyĩcẽ Nyekuci kinyomoc nĩcẽ kĩtĩlĩth. 7 Ĩthõng thĩ, athii eeti cĩ athacĩ kinyomo, kõdẽ cĩ atduuti maam cĩ tiir, Nyekuc dõ cĩ tiiri cĩ anyi kaal vẽlẽk kĩtĩlĩthĩt. 8 Aduwõy tiici cĩ et cĩ athacĩ kinyomo wo, kĩ tiic cĩ et cĩ atduuti maam wo noko, ĩthõng adũmanni katĩ nẽẽgẽ vẽlẽk gõõla cĩ tiicanẽ cĩgĩk. 9 Nyatarka keeginna naaga ticcianniok cĩk Nyekucak, eeginnu niigia mana kĩ ciith cĩ Nyekuco.
10 Bũnnathĩta cĩ balna anya Nyekuci aneeta, kikiyyia kadaweha na kõlanyac kĩ eeti cĩ agaai tengenyinit, ĩthõng ikiyyia ẽtẽngẽny eeti cĩ rẽẽng ciith nĩcẽ. Ĩthõng thĩ, adiim thẽk ngĩ ẽngẽnyẽt eeta codoi codoi jurrung. 11 Ĩthõng thĩna, athii eeti woccia cĩ adaweei kõlanyac ĩmma naboo tõ, nyatarka Yesu Kiristo dõ cĩ ẽẽn kõlanyac nĩcẽ. 12 Mĩ ẽngẽnycẽ eeti ĩmma kõlanyaca ĩcoo, engenycini nẽ daab, kõdẽ thĩĩk cĩk athĩ kathalkathal,a kõdẽ bĩĩyẽn cĩk õkõmĩ, kõdẽ kẽẽnĩy, kõdẽ kartẽnẽẽĩ, 13 ĩthõng thĩ, kõrra cĩ katĩ ẽtẽẽdĩ Nyekuci thoothonniok, aliba katĩ gua gõõla wũ balna engenycini eeti. Ẽyẽla katĩ gua, ma da balna ngĩ adĩman eeti tiic cĩ abũnna. 14 Ma ngĩ alna ciith cĩ da balna ẽngẽnyẽt nẽ wo, adũmanni katĩ nẽnẽ. 15 Mĩ atũũthĩ ciith cĩnnẽ wo, apĩrna katĩ tengenyioiti õrrõt gõõla ĩcĩ aviri nẽ lanyĩta ĩcĩ guyyio, kõdẽ woyyia ngĩ eliay nẽnẽ.
16 Athii cĩ agayyu niigia ngatĩ ẽnnẽ eleeti cuguk Ciith cĩ Nyekuco, ĩthõng aavĩ Ririwacĩ cĩ Nyekuco ĩcunung? 17 Mĩ athaan eeti ĩmma Ciith cĩ Nyekuco, athaan katĩ Nyekuci ĩnõõnõ buu, nyatarka dĩhĩm Ciith cĩ Nyekuco, ĩthõng eeginnu niigia Ciith nĩcẽ.
18 Nyĩ ĩgoollu eleeti cuguk. Ma ngĩ athĩ eeti ĩmma kõrgẽna ĩcunung ne, kegeenyi, nyatarka thõõth cĩ looc coo, anycĩk ĩnõõnõ kĩĩ giitheeit, kĩĩ katĩ woccia kikiyyia kẽgẽẽny. 19 Nyatarka ẽẽn gẽẽnyĩthĩ cĩ looc coo giithakthẽt nguuma ĩcĩ Nyekuco. Kĩcĩ eheeddi Nyaragawa ĩcĩ Nyekuco athĩ ne, “Aticanini Nyekuci gẽẽnyĩth cĩ muwẽẽnĩt cĩnĩng ẽẽ, vẽlẽk kijiarĩ ĩnõõgõ.”b 20 Ĩthõng naboo, “Aga Makayyioiti muwẽẽnĩt cĩ eet cĩk ẽgẽẽnyĩ, ĩthõng aga ngĩ ẽẽn muwẽẽnĩtĩ cĩnĩng wo cĩ kaganoko.”c 21 Ĩthõng thĩna, athii woccia cĩ kẽngẽrẽnĩ, nyatarka eeta! Ẽẽn kaala vẽlẽk cugunik, 22 kõdẽ woyyia Paulo, kõdẽ Apoloth, kõdẽ Pẽtũrũ,d kõdẽ lõõcĩ, kõdẽ rũgẽtĩ, kõdẽ daaĩthĩ, kõdẽ, thõõth cĩ kõr coo, kõdẽ thõõth cĩ katĩ ngaanĩ aku, ẽẽn nẽẽgẽ vẽlẽk cuguk, 23 ĩthõng eeginnu niigia eet cĩk Kiristo, ĩthõng ẽẽn Kiristo cĩ Nyekuco.