Tionniak cĩk Kiristo
4
Ĩthõng thĩ, ĩcĩntetu niigia ageeta kĩ ticcianniowa cĩk Kiristo, wũk balna anyĩwothĩcet tiici cĩ kẽkẽbacia eet thoothonniok cĩk Nyekucak cĩk balna alugunyi kũnũũk. 2 Ĩthõng thĩ, yoko adiim woccia eeta wũk balna anyĩwothi tiici ĩnõõgõ keyellia ngĩ adĩman nẽẽgẽ tiic cĩnĩng jurrung. 3 Athii cĩ kodongnothi na katĩ ma ngĩ etedĩcangũ niigia aneeta thõõth, kõdẽ etedĩca eeta cĩk lokikak aneeta thõõth, ĩthõng dĩdĩ, athii cĩ ketedi na ẽlẽ cannĩ thõõth mĩn. 4 Abũnna muwẽẽnĩtĩ cĩ aku thĩnĩna cannĩ, ĩthõng thĩ, kẽnnẽ athii cĩ kathĩ na ne, kamiri thõng. Makayyioit cĩ ẽngẽr thõõth cannĩ. 5 Ĩthõng thĩna, nyĩ etedicu thõõth ĩmma et, katĩ ngaanĩ kũtũbanothĩk kõrra, ereyyiõy kuumuc kikiyyia Makayyioiti. Aku katĩ aduwa nẽ thoothonniok cĩk alugunyi muwuratõ ngatĩvõrĩ, ĩthõng ẽyẽla muwẽẽnĩt cĩ thinneti cĩk eetu. Ĩthõng kõr nĩcẽ, arũba katĩ eeta codoi codoi dĩhĩthẽnĩt ĩcĩ Nyekuco.6 Ĩthõng yoko, gõtõõnõga kĩ ngõõnõga, kiticanõõẽ na thõõth coo ẽla cannĩ kĩ Apoloth, nyatarka bũnnathĩt cunung, kĩĩ katĩ ivitia ilimanta niigia ĩcĩnang thõõth cĩ athĩ ne, “Nyĩ ovvoyyu alacantẽ thõõtha cĩ eheeddi,” kĩĩ katĩ athii cĩ owobju niigia et ĩmma ĩcĩnang, athinnu ne, mayya ijiar et ĩmma ĩcĩnang. 7 Nyia cĩ anyi aniitia ĩthĩ nyẽgẽlẽ ĩcĩ et ĩmma wo? Nyia cĩ ayai niia cĩ balna ngaanĩ kaanyĩwothihi wo? Ĩthõng mĩ balna ngĩ anyĩwothihi aniitia gii neccie, ĩthõng engereni niia nyia?
8 Ayaktu niigia kaal vẽlẽk cĩk adiimnyu niigia! Iittu niigia balliok vẽlẽk! Iittu niigia alaanẽta, ĩthõng athii naaga cĩ keeginna alaanẽta! Kadiimnyung woccia na agiit ĩĩtõ alaanẽt dĩdĩ, kĩĩ katĩ kiittia naaga buu alaanẽt kõdõwẽ kĩ agiitia! 9 Ĩcannĩ, õgõõn kĩcĩ arihiet Nyekuci ageeta tionniak vurtia cĩ eet cĩk ariha õvvõ aruwue, Ĩthõng katĩ acĩnnet eeta kĩ anjĩlẽta cĩk tammutiddinak ageeta. 10 Keeginna naaga giithiak, nyatarka Kiristo, ĩthõng thĩ, kẽnnẽ egeenyu niigia ĩcĩ Kiristo! Athii cĩ keeginna naaga tiirti, ĩthõng thĩ, kẽnnẽ eeginnu niigia tiirti! Ongolinung eeta agiitia, ĩthõng athii cĩ ongoliniet ageeta! 11 Kĩĩ noko, ngaanĩ alna adakcet boobo, ĩthõng arukcet kõr, kahimitia ceremua cĩk thõrthõrĩk, adĩmannet eeta buth, ĩthõng athinniet kõrõõgĩ tõ. 12 Katicanina õrrõt athĩnẽy cĩgaak mĩn. Mĩ acĩĩnnet eeta, kagatanna naaga ĩnõõgõ thõng, mĩ adĩmannet eeta buth, kõmõkja, 13 mĩ aduwa eeta athĩ ne, kadĩmanna naaga kaal cĩk gerthek, kẽdẽcca naaga ĩnõõgõ thimatĩtha. Acĩnnet eeta cĩk looc coo kĩ taaha kaganoko, kĩĩ kõr coo.
14 Athii cĩ keheedi na thoothonniok cĩkkõ, kĩĩ katĩ kaanycung agiit ngawani, ĩthõng thĩ, kathĩ ne, kitirithung na kĩ doolia cĩganniek cĩk kamĩnani thĩnĩna cannĩ. 15 Kõdẽ woyyia ayait eet vucciaknya õmmõtõ cĩk alimanecung agiitia thõõth cĩ Kiristo, athii cĩ ayakcu baajigu cĩk meelĩk, ĩthõng nyatarka Yesu Kiristo, kikiyyia kĩĩthĩ na baaba cunung Nyemuta cĩ Abũnna. 16 Ĩthõng thĩna, kalayyung na agiit, kĩĩ katĩ eyehethiangũ aneeta. 17 Nyatarka thõõth coo, kitionacung katĩ na agiit Timoti,b cĩ aavĩ kĩ ngẽrnannie wũ kamĩnani, ĩthõng athũnnĩ nẽ thõõth cĩ Makayyiokto. Ahadaccung katĩ nẽ agiit avuthit cannĩ cĩ kõwõbẽ Yesu Kiristo cĩ aduwõy kĩ thõõth cĩ kalimanẽ na meelitin cĩ lemnyiowu korookjiowẽy ĩcĩk gaalawu vẽlẽk ĩcĩk kõkõyyẽ nana.
18 Aatĩ eeta gwuak kõrgẽna cunung cĩk ẽngẽrẽn, kaavutõ kĩcĩ katĩ athii cĩ kakunie na ĩcunung. 19 Ĩthõng thĩ, kakuni katĩ na ĩcunung tamanoko, katĩ ngĩ ẽlẽmahia Makayyioiti, ĩthõng katĩ ngĩ kikiyyia kũmũda, ngĩ athii cĩ ẽẽn gõõl cĩ õthõõthĩ eeta cĩk ẽngẽrẽn wo dõ, ĩthõng thĩ, kakuni, kĩĩ katĩ kikiyyia kũmũda tiirthẽt cĩ ayak nẽẽgẽ. 20 Nyatarka athii cĩ ẽẽn kabicocĩ cĩ Nyekuco thõõth cĩ kõthõõth kũtũga kaganoko, ĩthõng thĩ, ẽẽn thõõth cĩ tiirthẽto. 21 Nyia cĩ adiimnyu niigia kikiyyia kĩdĩmanewung na katĩ ngĩ kõdõlanunga? Adiimnyangũ niigia aneeta kikiyyia ĩcunung kĩ eeti cĩ kuukcung thõng, kõdẽ kĩ eeti cĩ ayak mĩnan kĩ thimatĩth?