Itingkac gotonu cĩ ẽẽn gẽrẽthannioit!
5
Kathĩrari balna na ngĩ athĩ ne, aavĩ eeti ĩmma cĩ oogin kĩ ngaay taktak kõrgẽna cunung,a athĩ ne, oogin eeti kĩ ngaa cĩ baatĩnnĩ, ĩthõng dĩdĩ, eeta cĩk athii cĩ aga Nyekuc abũrĩ thõõth cĩ õgõõn kĩ coo. 2 Ĩthõng thĩ, iriannu kẽnnẽ niigia kĩ ngatĩ woccia aluyyu thõng, ĩthõng adiim thẽk ngĩ umuryu et coo, ngatĩ alawinu niigia kũũk ngatĩvõrĩ! 3 Kõdẽ woyyia ngaanĩ kathii na kir tõ natẽ, aavĩ thĩnĩn cannie kĩ agiitia. Ĩthõng balna ketedĩha et cĩ balna atican thõõth coo thõõth vẽlẽk, kaavu kĩcĩ kaavẽ na natẽ kĩ agiitia, 4 mĩ alutenu niigia thaarĩy cĩk Yesu, ĩthõng kaavu na ĩcunung ririwaca, ĩthõng aavu tiirthẽtĩ cĩ Makayyioit cĩnac Yesu ĩcunung, 5 anycĩk et nĩcẽb Thĩttan,c kĩĩ katĩ kẽnyẽhẽ gerthetini ẽla cĩnnĩ, ĩthõng eliay ririwacĩ cĩnnẽ kõrra ĩcĩ katĩ õbõdanĩ Makayyioiti.d6 Athii riania cunung wo cĩ abũnna. Athii wõnõ niigia cĩ agayyu ngatĩ athanothĩcẽ nyĩgĩta cĩk kĩdĩk kaganoko tũkan cĩ ongonyie vẽlẽk? 7 Utduutik niigia nyĩgĩt cĩk ũnũũĩtõ wo tuu, kĩĩ katĩ aavut niigia kĩ tũkanĩ cĩ ongonyie cĩ athii nyĩgĩta tõ, nyatarka daaĩth cĩ Yesu Kiristo cĩ aavĩ kĩ nyion cĩ otodongnyie Kõrra cobbi cĩ Ngothio.f 8 Ĩthõng thĩna, kuthutti thẽk Peyian coo, athii cĩ ẽẽn aheenin cĩk avaadiay cĩk ũnũũĩtõ cĩk ayak nyĩgĩt cĩk gerthek, ĩthõng thĩ, ĩĩtõ niigia callẽ, ĩthõng ĩdĩmantu thõõth cĩ ẽẽn dĩdĩ jurrung, ĩthõng adaktu Peyian coo, gõõla cĩ aduwu aheenin cĩk avaadiay cĩk athii nyĩgĩta tõ.g
9 Kẽtẽhẽẽdawung balna na agiitia nyaragawa cannĩ kennewung ne, nyĩ iriokcu kĩ eet cĩk oogin kĩ ngaay taktak. 10 Ĩthõng thĩ, balna athii na cĩ kothoothi eet cĩk looc coo, cĩk ẽẽn gẽrẽthanniok, kõdẽ lavlavyiak, kõdẽ eet cĩk ĩgõõl gõõnõgĩ, kõdẽ eet cĩk ala kaal cĩk aar eeta kĩĩtõ nyekucnya. Ĩthõng thĩ, mĩ kõthõõtha na kĩyokowẽ, adiim woccia niigia ngĩ uungniccu looc coo. 11 Ĩthõng thĩ, yoko kẽhẽdacung na agiit Nyaraga coo, kĩĩ katĩ kithii cĩ iriokcu kĩ et ĩmma cĩ avvũ ẽlẽ cĩnnĩ, a ne, ẽẽn nẽ lemnyioit, monogo nẽ ẽẽn et cĩ oogin kĩ ngaay taktak, kõdẽ ngaruba, kõdẽ ẽẽn et cĩ ala kaal cĩk aar eeta kĩĩtõ nyekucnya, kõdẽ ẽẽn volongnyiait, kõdẽ ẽẽn bakciait, kõdẽ ẽẽn et cĩ ĩgõõl gõõnõgĩ. Ĩthõng thĩ, nyĩ aduwenu kĩ et cĩ õgõõn noko.
12 Nyia ketedĩk na eet cĩk athii cĩ ẽẽn lemnyiok cĩk aatĩ kelethiawa thõõth wo? Athii wõnõ niigia woccia cĩ etedicu eet cĩk ẽẽn lemnyiok cĩk aatĩ kelethiawa ẽẽ, dõ thõõth? 13 Ẽngẽr katĩ Nyekuci thõõth cĩ eet cĩk athii cĩ ẽẽn lemnyiok, kĩcĩ aduwa Nyaraga cĩ Nyekuco athĩ ne, “Tingkawek thẽk niia et cĩ ẽẽn gẽrẽthannioit kõrgẽna cunung ngĩtĩvõrĩ.”h