Nyĩ ovvoyyu lemnyiok lokika
6
Mĩ ayak lemnyioiti ĩmma kĩ gõõnĩ cĩ ẽẽn lemnyioit gẽrẽnyõn cĩ woccia abĩlnĩ ĩnõõnõ lokika, õkkõ woccia abĩlnĩ nẽ ĩnõõnõ lokika cĩ eet cĩk athii cĩ ẽẽn lemnyiok? Õkõyyĩ woccia nẽ abĩlnĩ ĩnõõnõ lokika ĩcĩ eet cĩk callĩk ĩcĩk Nyekucak. 2 Athii cĩ agayyu niigia ngĩ ẽngẽr katĩ eeta cĩk callĩk cĩk Makayyioktak thõõth cĩ eet cĩk looc coo? Ĩthõng mĩ õvvõ engeryu thõõth cĩ looc coo, athii woccia cĩ ullu ngatĩ eteddu thoothonniok cĩk kĩdĩk? 3 Athii cĩ agayyu niigia ngĩ, kẽngẽrya katĩ naaga thoothonniok cĩk anjĩletu?a Ma ngĩ õgõõn noko, kẽtẽdda woccia thẽk katĩ naaga thoothonniok cĩk rũgẽtak jurrung! 4 Ĩthõng thĩna, mĩ ayakcu thoothonniok cĩk aatĩ noko, eberyia woccia niigia thẽk eet cĩk ẽtẽd thoothonniok, kõdẽ woyyia ngĩ ẽẽn nẽẽgẽ eet cĩk athii cĩ tiirti meelitina cĩ lemnyiowu! 5 Kaduwa na thõõth coo, kĩĩ katĩ kagamung agiit ngawani. Athii woccia thẽk eeti ĩmma kõrgẽna cunung cĩ ẽgẽẽnyĩ, cĩ woccia ẽngẽr thoothonniok cĩk ẽgẽrẽnyõnĩ lemnyiowa kõrgẽna cunung wo tõ? 6 Nyia koccia kũũwĩ eeti ĩmma kõrgẽna cunung gõõnĩ cĩ ẽẽn lemnyioit lokika cĩ eet cĩk athii cĩ ẽẽn lemnyiok wo?7 Ĩthõng mĩ õkõyyĩ lemnyioiti ĩmma gõõnĩ lokika, utduktiawu niigia vẽlẽk. Mayya woccia ngatĩ ĩgoollung eeta, ĩthõng ẽbẽlantunga. 8 Ĩthõng thĩ, kẽnnẽ ĩgoolonu niigia mĩn, ĩthõng ĩdĩmantu thoothonniok cĩk gerthek, ĩthõng ĩdĩmantewu thoothonniok cĩkkõ lemnyiok.
9 Athii wõnõ cĩ agayyu niigia ngĩ athii katĩ cĩ abarĩc eeta cĩk ẽẽn gẽrẽthanniok alaanthẽt cĩ Nyekuco? Nyĩ ĩgoollu eleeti! Athii katĩ eeta cĩk oogin kĩ ngaay taktak, kõdẽ eeta cĩk ala nyekucnya cĩk athii cĩ ẽẽn dĩdĩ, kõdẽ eeta cĩk õvõyyĩ ngaay cĩk eetu, kõdẽ eet cĩk adiim gõõnõgĩ cĩk maacĩk aar kĩ ngaay cĩgĩk, 10 kõdẽ goryiaha, kõdẽ eeta cĩk ngarubik, kõdẽ bakciaha, kõdẽ eeti cĩ ẽtẽd eet aduwa thõõth cĩ gerthe, kõdẽ eeti cĩ ĩgõõl eet alaba ijjio, athii katĩ nẽẽgẽ cĩ aragĩth alaanthẽt cĩ Nyekuco. 11 Attiyyu da balna gõõ niigia gwuak kĩyokowẽ. Ĩthõng thĩ, yoko utuunycewu niigia kĩĩ katĩ ĩĩtõ dĩhĩmẽ, ĩthõng elemung Nyekuci agiitia, thaarĩy cĩk Makayyioit cĩnac Yesu Kiristo, kĩ Ririwaca cĩ Nyekuco.
Ũtũbũrĩt thoothonniok cĩk oginnu kĩ ngaay taktak
12 Athinnu niigia gwuak ne, “Kadĩmani woccia na gii vẽlẽk cĩ kadiimi.” Ĩthõng thĩ, kaduwacunga, athii cĩ abũnna kaala vẽlẽk ĩcĩnac. Ĩnõõnõ thĩ cĩ kabũrnẽ na ngatĩ woccia ijiaria gimma aneeta wo. 13 Ĩthõng naboo iittu niigia gwuak ne, “Ẽẽn dainti cĩ keengu, ĩthõng ĩthĩ kẽẽng cĩ daintio,” ĩthõng thĩ, athaan katĩ Nyekuci ĩnõõgõ rammatuguan. Athii ẽlẽ cĩ ẽẽn cĩ oginnu kĩ ngaay taktak, ĩthõng thĩ, ẽẽn ẽlẽ cĩ Makayyiokto, ĩthõng ĩthĩ Makayyioiti cĩ elo. 14 Tiirthẽta cĩnnĩ, arũgũtha balna Nyekuci Makayyioit cĩnac daaĩtha, ĩthõng arũgũthanet katĩ nẽ ageeta buu daaĩtha. 15 Athii niigia cĩ agayyu ngatĩ ẽẽn eleeti cuguk tõõn cĩ ẽlẽ cĩ Kiristo? Kadĩma woccia na ẽlẽ cĩ Kiristo, ĩthõng kũrũmeha kĩ tegemnyiait? Athii tõ kũdũt! 16 Athii cĩ agayyu niigia ngatĩ athĩ ne, eeti cĩ arumeei ẽlẽ cĩnnĩ kĩ tegemnyiait, ĩĩtõ nẽẽgẽ ẽlẽ codoi doo? Nyatarka aduwa Nyaraga cĩ Nyekuco athĩ ne, “Ũrũmtẽ eeta cĩk ẽẽn ramma kĩĩtõ codoi doo.”b 17 Ĩthõng thĩ, eeti cĩ arũm ẽlẽ cĩnnĩ kĩ cĩ Makayyiokto, ivitia ĩĩtõ codoi doo ririwaca.
18 Ũtũbũrĩt niigia thoothonniok cĩk oginnu kĩ ngaay taktak. Ĩthõng thoothonniowa cĩk gerthek vẽlẽk cĩk ẽgẽrẽthan eeti, aatĩ ẽla cĩnnĩ ngatĩvõrĩ, ĩthõng thĩ, eeti cĩ atican gerthetin cĩ oginnie kĩ ngaay taktak, atican gerthetin cĩ ẽlẽ cĩnnĩ. 19 Athii niigia cĩ agayyu ngatĩ ẽnnẽ eleeti cuguk Ciith cĩ Ririwac cĩ Dĩhĩmĩc cĩ aavĩ kĩ agiit wũ balna anyung Nyekuci? Athii eleeti cuguk wo, cĩ ẽnnẽ cuguk dõ, 20 nyatarka ũũtanung balna agiitia Nyekuci thõng, ĩthõng thĩna, otongollie Nyekuc eletinẽy cuguk.