Thoothonniok cĩk tihẽntak
7
Ĩthõng thĩ, yoko katajanecung na thoothonniok wũk balna ajinnangu niigia aneeta nyaragawa wunung. Wũ balna athinnu niigia ne, “Abũnna woccia ngatĩ athii cĩ atihi eeti ngaa.” 2 Ĩthõng thĩ, nyatarka mẽẽlĩ eeta cĩk oogin kĩ ngaay taktak, abũnna ngĩ atik eeti ngaa cĩnnĩ, ĩthõng oogin ngaa kĩ maac cĩnnĩ. 3 Adiim maac thẽk kẽlẽm thõõth cĩ ngaa cĩnnĩ, katĩ ngĩ adiim ngaa ngĩ oogin kĩ ĩnõõnõ, ĩthõng ngaa buu adiim thẽk kẽlẽm maac cĩnnĩ katĩ ngĩ adiim maac ngĩ oogin kĩ ĩnõõnõ. 4 Athii ngaa cĩ ayak makathĩt cĩ ẽlẽ cĩnnĩ dõ, ĩthõng thĩ, adiim ngaa kaanyĩk ẽlẽ cĩnnĩ maac cĩnnĩ. Ĩthõng gõõla cĩ aduwõy thõng noko, athii maac cĩ ayak makathĩt cĩ ẽlẽ cĩnnĩ dõ, ĩthõng thĩ, adiim maac kaanyĩk ẽlẽ cĩnnĩ ngaa cĩnnĩ, athii cĩ ẽẽn ẽlẽ, ẽlẽ cĩnnĩ dõ. 5 Nyĩ aburnu niigia ngatĩ oginnu kõdõwẽ, gii dũũwũk ngĩ elemtowu vẽlẽk ngatĩ abilnuu kĩnyak kĩdĩĩc, kĩĩ katĩ alayyiõy thõng. Ĩthõng thĩ, ataguththu naboo, kĩĩ katĩ athii Thĩttanĩ cĩ atĩmannunga, nyatarka athii cĩ ullu niigia ngatĩ agamu eleeti cuguk jurrung. 6 Kaduwa na thõõth coo, kĩĩ katĩ eberyia thõõth cĩ adĩmannu niigia, athii cĩ katĩnganeccung thõng. 7 Kamui na abũnna woyyia thẽk baalia niigia vẽlẽk ngĩ athii cĩ atihenu kĩyoko na wo. Ĩthõng thĩ, kẽnnẽ ayakcu niigia codoi codoi anyinit cĩ aku ĩcĩ Nyekuco, ayak ĩmma anyinit cĩ atihẽnĩ, ĩthõng ayak ĩmma anyinit cĩ athii cĩ atihẽnĩ.8 Ĩthõng yoko, kennei na maacua kĩ ngaay cĩk ngaanĩ kitiktõy kĩ ngaay cĩk bõyyĩk ne, mayya ĩcĩnĩng ngatĩ athii cĩ atihẽnĩ kĩ nana. 9 Ĩthõng thĩ, mĩ athii cĩ ũũlĩ ngatĩ athũnnĩ eleeti cĩgĩk, anycĩk ĩnõõgõ kitiktõy, mayya ngatĩ atihẽnĩ kijiar ngatĩ abarritẽcĩ nẽẽgẽ kĩnyak cĩk oginnie kĩ ngaay õrrõt.
10 Tĩrĩthẽnĩt cĩ kaduwai na maacua kĩ ngaay cĩk itiktõya coo, athii cĩ ẽẽn aneeta cĩ kaduwa wo, ĩthõng thĩ, aduwa Makayyioiti athĩ ne, athii woccia cĩ uungni ngaa maac cĩnnĩ. 11 Ĩthõng thĩ, mĩ ũtũbũr ngaa maac cĩnnĩ, adiim thẽk woccia kithii cĩ atik eeti ĩmma naboo, kõdẽ adiim thẽk woccia nẽ kimiirothĩk maac cĩnnĩ. Ĩthõng athii woccia cĩ õõg maac ngaa cĩnnĩ.
12 Athii na cĩ kagawẽ tĩrĩthẽnĩt ĩmma cĩ õthõõth Makayyioiti, nyatarka tihẽnĩt. Gii vẽlẽk cĩ woccia kothoothi na, kaanyung woccia na agiit muwẽẽnĩt cannĩ. Mĩ athii cĩ ẽẽn ngaa cunnie wobjiait cĩ Makayyiokto, ĩthõng ẽlẽm ngatĩ arumenu kĩ aniitia, nyĩ oogi ĩnõõnõ. 13 Ĩthõng mĩ ayak ngaa ĩmma maac cĩnnĩ cĩ athii cĩ ẽẽn lemnyioit, ĩthõng ẽlẽmĩ maac ngatĩ arũmẽẽnĩ kĩ ĩnõõnõ, athii woccia cĩ abũrĩ ngaa ĩnõõnõ. 14 Nyatarka anyi ngaa maac cĩnnĩ cĩ athii cĩ ẽẽn lemnyioit kĩĩ calla, ĩthõng anyi maac ngaa cĩnnĩ cĩ athii cĩ ẽẽn lemnyioit kĩĩ calla. Ma athii cĩ õgõõn noko, athii woyyia doolia cuguk cĩ callẽ, ĩthõng thĩ, thõõth coo cĩ anyi dõõlĩ cuguk buu kĩĩtõ callẽ.
15 Ĩthõng thĩ, mĩ ũtũngek maac cĩ athii cĩ ẽẽn lemnyioit ngaa cĩnnĩ, kõdẽ mĩ ũtũngek ngaa maac cĩnnĩ cĩ athii cĩ ẽẽn lemnyioit, anycĩk ĩnõõnõ kũtũngek. Eeti, kõdẽ ngaa cĩ ẽẽn lemnyioit, athii woccia cĩ ẽcẽb thoothiowa cĩk aatĩ ketee, nyatarka avvanet Nyekuci ageeta kaavut ganõna. 16 Aga woccia niia ngaa kuu ngatĩ ẽẽla maac cunni,b kõdẽ woccia aga niia maac kuu, ngatĩ woccia ẽẽlanẽ ngaa cunni?
17 Adiim ngĩ athunnu niigia codoi codoi gõõl wũ balna aaricung agiit Makayyioiti, ĩthõng aavuttu kĩ balna ngĩ avvuyyung agiit Nyekuci ĩcĩ owu. Tĩrĩthẽnĩt cannĩ cĩ kaduwai meelitin cĩ lemnyiok cĩk kelethianyawu vẽlẽk kowobit coo. 18 Baa da ngĩ ũtũvvũ Nyekuci et cĩ ũbũũranẽ da ẽlẽ cĩnnẽ,c nyĩ anyiccu ĩnõõnõ kũtũwũ bũũraniniet. Ma da ngĩ ũbũũranẽ anycĩk thĩ kaavu kĩyokowẽ. Ma da ngaanĩ kũbũũranẽ eeti balna ngĩ ũtũvvũ Nyekuci ĩnõõnõ. Athii thĩ woyyia cĩ abũũranni nẽ. 19 Ẽẽn bũũraninietĩ cĩ elo gii cĩ kaganoko, ĩthõng thõõth cĩ athii cĩ abũũranini ẽlẽ, ẽẽn gii cĩ kaganoko buu. Thõõth cĩ tiiri dõ, thõõth cĩ kathĩknĩ tĩrĩthẽnĩt cĩ Nyekuco dõ.
20 Adiim thẽk eeti codoi codoi, kaavu nẽ gõõla wũ balna avvẽ Nyekuci ĩnõõnõ. 21 Eeni balna niia nyakapanait balna ngĩ avaani Nyekuci? Nyĩ anyi thĩnĩn cunni kabarrit, ĩthõng thĩ, nẽnnẽ mĩ aga ngatĩ arũbanẽ gõõl cĩ woccia õõganẽ ẽlẽ cunni nyakapanthẽtĩna, õõga. 22 Nyatarka ma da ngĩ ẽbẽra Makayyioiti nyakapanak, ivitia nẽẽgẽ ĩĩtõ eet cĩgĩnĩk cĩk ooktiay. Ĩthõng mĩ ẽbẽra nẽ eet cĩk ooktiay vẽlẽk, ivitia ĩĩtõ nẽẽgẽ nyakapanak cĩk Kiristo. 23 Ũtũwawung balna Nyekuci agiitia vẽlẽk, nyĩ ngaanĩ thẽk avvunnu eeginnu nyakapanak cĩk eetu naboo. 24 Gõtõõnõga kĩ ngõõnõga, anycĩk eet codoi codoi kiticantothĩk Nyekuc, kaavutõ gõõla cĩ balna avaanĩ Nyekuci ĩnõõgõ.
Eet kĩ ngaay cĩk ngaanĩ kitiktõy
25 Ẽrẽkca thõõth ĩmma cĩ õthõõth Makayyioiti, nyatarka buweeci cĩk ngaanĩ kataguthõ kĩ eeta. Ĩthõng thĩ, kaduwacung woccia na agiit thõõth cĩ kamui na. Ĩthõng woccia elemnyu thõõth cĩ kaduwa na wo, nyatarka anya aneeta Makayyioiti tamatia ĩcĩnnĩ gẽẽnyĩth. 26 Nyatarka thõõth cĩ gerthe cĩ aavĩ yoko wo, kamui woccia abũnna õrrõt ngatĩ aavẽ bũwẽẽcĩ cĩ ngaanĩ kataguthõ kĩ et kaganoko athii cĩ atihẽnĩ. 27 Ma ngĩ itiwõõy niia, nyĩ oogi ngaa. Ĩthõng mĩ ngaanĩ tiwõy, nyĩ adiimi tihẽnĩt. 28 Ĩthõng thĩ, ma ngĩ itiwõõy niia athii cĩ gẽrtha ngatĩ atihẽnẽ, ĩthõng ma ngĩ itihie bũwẽẽcĩ cĩ ngaanĩ kataguthõ kĩ et, nga kẽgẽrẽthanõy nẽ. Ĩthõng thĩ, eeta cĩk atihi, arũba katĩ canan cĩ obbi, ĩthõng kadiimi ngĩ kẽẽlanung na agiitia thõõtha coo.
29 Ĩthõng thõõth cĩ kathĩ na wo gõtõõnõga kĩ ngõõnõga, turẽ wathinniowa cĩk ngaanĩ kaatẽ naaga loota ngato wo õrrõt. Ĩthõng thĩ, ithiananĩ yoko, anycĩk eet cĩk ayak ngaay kaavutõ kĩcĩ athii cĩ ayahĩ, 30 anycĩk niigia eet cĩk alu, kaavutõ kĩcĩ athii cĩ alu, anycĩk eet cĩk ẽbẽlbẽl, kaavutõ kĩcĩ athii cĩ ẽbẽlbẽl buu, anycĩk eet cĩk ũũt ijjio, kaavutõ kĩcĩ athii cĩ ũũta nẽẽgẽ ijjio, 31 anycĩk eet cĩk adĩmanini kaal cĩk looc coo, kaavutõ kĩcĩ athii cĩ amuk nẽẽgẽ kaal cĩkkõ õrrõt. Nyatarka athii katĩ lõõcĩ coo kĩcĩ yoko kacĩn naaga wo.
32 Kadiimnyung na agiit aavut jurrung ĩthĩnga abarrittu. Ẽrẽppan eeti cĩ ngaanĩ kitiwõy thõõth cĩ Makayyiokto, ĩthõng ẽrẽppan gõõl cĩ woccia anyĩcẽ nẽ Makayyioit kẽbẽlbẽl. 33 Ĩthõng thĩ, kẽnnẽ ẽrẽppan eeti cĩ itiwõõy, thoothonniok cĩk looc coo, kĩ gõõl cĩ woccia anyĩcẽ nẽ ngaa cĩnnĩ kẽbẽlbẽl, 34 ĩthõng engeryie thoothiowa cĩk adiim nẽnẽ. Arĩcana ngaa cĩ nga kitihe kõdẽ bũwẽẽcĩ cĩ ngaanĩ kataguthõ kĩ et ĩmma, thoothonniok cĩk Makayyioktak. Aavĩ muwẽẽnĩtĩ cĩnnẽ cĩ elo kĩ ririwac cĩnnĩ vẽlẽk Makayyiokta. Ĩthõng thĩ, kẽnnẽ arĩcana ngaa cĩ itihie thoothonniok cĩk looc coo, kĩ gõõl cĩ woccia anyĩcẽ nẽ maac cĩnnĩ kẽbẽlbẽl. 35 Kaduwa na thõõth coo, kĩĩ cĩ bũnnathĩt cunung, kithii cĩ ecebjung thõng, kĩĩ katĩ aavut gõõla cĩ abũnna cĩ athii cĩ engerinu, gõõla cĩ aticanothicu Makayyioit.
36 Ĩthõng thĩ, mĩ abarriteei eeti ĩmma bũweec cĩ ngaanĩ kataguthõ kĩ et, ĩthõng ũrũc nẽ ĩnõõnõ, ngĩ ũtũbantẽ erkinya cĩk bũweec nĩcẽ awũpan woccia ngatĩ atihi nẽ ĩnõõnõ, anycĩk kitik ĩnõõnõ kĩcĩ adiim nẽnẽ. Athii cĩ ẽẽn gerthetin. 37 Ĩthõng thĩ, abũnna ngatĩ athũnnĩ eeti ẽlẽ cĩnnĩ, ĩthõng umuk jurrung ngatĩ woccia athii cĩ atihẽnĩ nẽnẽ, ĩdĩman nẽ buu thõõth cĩ edeemothi noko. 38 Abũnna ngatĩ atihi eeti bũweec cĩ ngaanĩ kataguthõ kĩ et ĩmma, ĩthõng thĩ, mayya ngatĩ woccia athii cĩ atihi nẽ ĩnõõnõ kũdũt.
39 Alna woccia ngaa arũmẽ kĩ maac cĩnnĩ kuumuc gii ngĩ adaak maac. Ĩthõng thĩ, katĩ ooguay ngaa coo, ĩthõng itik ĩnõõnõ eeti cĩ ẽẽn wobjiait cĩ Makayyiokto dõ. 40 Ĩthõng thĩna, muwẽẽnta cannĩ, kamui woccia kathĩrari na thõõth cĩ Ririwac cĩ Nyekuco ngatĩ kathĩnnẽ ne, ẽbẽlbẽl woccia ngaa cĩ bõyyĩ katĩ ngĩ aavĩ mĩn.