Kiding cĩ ẽẽn gii cĩ cavĩto cĩ anyĩwothi nyekucnya
8
Kagayya naaga vẽlẽk thõõth cĩ kiding cĩ ẽẽn gii cĩ cavĩto cĩ anyĩwothi kaal cĩk aar eeta kĩĩtõ nyekucnya. Kagayya naaga vẽlẽk gẽẽnyĩth coo. Anyet gẽẽnyĩthĩ kiriantĩ eleeti cĩgaac, ĩthõng thĩ, anyet mĩnanĩ keelit goonogiet. 2 Ĩthõng dĩdĩ, eeti cĩ ahad athĩ ne, kagga thõõth õrrõt, athii cĩ aga thõõth vẽlẽk cĩ woccia aga nẽ. 3 Ĩthõng thĩ, eeti cĩ amĩnan Nyekuc, aga Nyekuci ngatĩ amĩnanĩ nẽ ĩnõõnõ.4 Ĩthõng thĩ, thõõth cĩ kadaĩ kaal cĩk cavawu cĩk anyĩwothi kaal cĩk aar eeta kĩĩtõ nyekucnya wo, kagga naaga nyekucnya cĩkkõ athii cĩ ẽẽn dĩdĩ, ĩthõng aavĩ Nyekuci codoi doo dõ. 5 Kõdẽ woyyia ma ngĩ aatĩ nyekucnya tammuatiddina kĩ loota ngato kĩ makayyiok cĩk meelĩk, cĩk athii cĩ ẽẽn dĩdĩ, 6 ĩthõng thĩ, kayak naaga Nyekuc codoi doo dõ, ĩthõng ẽẽn nẽ Baangiet cĩnac. Ẽngẽnyca balna nẽ kaal vẽlẽk, ĩthõng karũgĩ naaga, nyatarka ĩnõõnõ. Yesu Kiristo dõ cĩ ẽẽn Makayyioit cĩnac. Engenyciay balna kaala vẽlẽk thaarĩy cĩgĩnĩk, ĩthõng anyet ageeta rũgẽt.
7 Ĩthõng thĩ, athii cĩ aga eeta vẽlẽk thoothonniok cĩkkõ. Ĩthõng dĩdĩ, itilithia balna eeta cĩk meelĩk gõõla cĩ ẽlẽmĩ thõõth cĩ athĩ ne, arũgĩ kaala cĩk aar eeta kĩĩtõ nyekucnya wo. Ĩthõng thĩ, mĩ adak nẽẽgẽ kiding cĩ ẽẽn gii cĩ cavĩto cĩ anyĩwothi nyekucnya cĩkkõ wo, acanan kẽnnẽ ĩnõõgõ muwẽẽnĩtĩ cĩ thinneti cĩgĩk cĩk athii cĩ õkõmĩ, ĩthõng ẽgẽrẽthan ĩnõõgõ. 8 Ĩthõng thĩ, athii kidingi coo, cĩ anyet ageeta kõbõktõy kĩ Nyekuc, ĩthõng naboo, athii naaga cĩ keeginnie rẽẽntĩ ĩcĩ Nyekuco katĩ ngĩ athii naaga cĩ kadak kiding coo.
9 Egeenyit õrrõt, nyĩ amaaracu et cĩ athii muwẽẽnĩtĩ cĩ thĩnĩn cĩnnĩ cĩ tiir, thõõth cĩ gerthe, nyatarka agayyu niigia ngatĩ adawu kiding cĩ gii cĩ cavĩto coo. 10 Mĩ icinung eeti cĩ athii cĩ tiir muwẽẽnĩtĩ cĩ thĩnĩn cĩnnĩ agiit eet cĩk agayyu thõõth coo, ngatĩ adawu kiding cĩ gii cĩ cavĩto ciitha cĩ kaal cĩk aar eeta kĩĩ nyekucnya, anyi kẽnnẽ katĩ thõõth coo ĩnõõnõ buu, kũũk kabarritek ngatĩ õkkõ adaĩ kiding coo, cĩ anyĩwothi nyekucnya cĩkkõ wo. 11 Ĩthõng ẽgẽrẽthanẽ lemnyioiti coo wũ balna athii cĩ tiir leminiti cĩnnẽ, wũ balna adaaknĩ Kiristo, nyatarka ĩnõõnõ, nyatarka maka gẽẽnyĩthĩ cunung. 12 Mĩ ẽgẽrẽthantu niigia ngatĩ adĩmannu lemnyiok buth gõõla ĩcoo, ĩthõng ujjuryu muwẽẽnĩt cĩ thinneti cĩgĩk cĩ athii cĩ õkõmĩ wo, ẽgẽrẽthantu niigia thõõth cĩ Kiristo. 13 Ĩthõng thĩna, ma ngĩ anyĩk gii cĩ kadai na wo, lemnyioit kẽgẽrẽthanõy, athii woccia katĩ na cĩ kadai kiding nĩcẽ kũdũt, kĩĩ katĩ athii nẽ cĩ ẽgẽrẽthanni.