Kaal cĩk woccia amũda tionniaiti tiica cĩnnĩ
9
Ngaanĩ wõnõ koogiay nana? Athii wõnõ na cĩ keeni tionniait? Ngaanĩ wõnõ balna kĩcĩn na Yesu Makayyioit cĩnac? Athii wõnõ cĩ eeginnu niigia eet cĩk ayaha tiici cannie cĩ Makayyiokto wo? 2 Kõdẽ woyyia ngĩ athii cĩ keeni na tionniait cĩ eet õõgĩ, keeni tionniait cunung dĩdĩ! Nyatarka eeginnu niigia eet kir cĩk ẽẽn yelinit cĩ agayyu ngatĩ kẽnnẽ na tionniait cĩ Makayyiokto.3 Thõõth coo cĩ kalĩtẽ na ẽlẽ cannĩ katĩ ngĩ ajinna eeta cĩk etedĩca aneeta thõõth. 4 Athii woccia cĩ kamũda naaga ahat kĩ wũdẽnĩt, tiica cĩnac? 5 Athii woccia cĩ kayak naaga ngaay cĩgaac cĩk ẽẽn lemnyiok kiiriok kõdõwẽ kĩ ageeta, kĩcĩ iriok tionniaha gwuak kĩ gõtõõnõgĩ Makayyioit, kĩcĩ adĩman Pẽtũrũa buu ẽẽ? 6 Kõdẽ aneeta kĩ Barnabathb dõ cĩk woccia katicanina athĩnẽy cĩgaak, kĩĩ katĩ kũrũkta?
7 Adũman woccia gõõ nyĩcẽkẽrowocĩ nyarobinya cĩk tiic cĩnnĩ mĩn? Akatĩ woccia gõõ eeti kẽẽn cĩk vĩnõwak, ĩthõng athii cĩ aduk nyegerua cĩgĩk? Athii woccia cĩ aam tũwayyioiti ir cĩk ẽẽtha cĩgĩnĩk? 8 Kaduwa yoko thẽk na thoothonniok cĩkkõ, cĩk aga eeta vẽlẽk ngĩ ẽẽn dĩdĩ. Athii wõnõ cĩ aduwa Ngiranĩc cĩ Mutha thõõth coo dõ noko? 9 Nyatarka eheeddi Ngirana cĩ Muthad athĩ ne, “Nyĩ ecebi kũtũk cĩ tomoto katĩ ngĩ atura labĩ, anyĩk tõmõt kadawõy.”ef Alnai Nyekuci tõmõnya dõ? 10 Dĩdĩ, aduwacet nẽ ageeta thõõth coo, athii yoko cĩ aduwaceta? Ii, eheeddi balna thõõth coo nyatarka ageeta, ĩthõng nyatarka mĩ evyi evyioiti tõmõnyay, ĩthõng utura eeti labĩ atican nẽẽgẽ noko muwẽẽnta ĩcĩ abũnna cĩ katĩ avvu õthõlĩ nẽẽgẽ labĩ teedintia. 11 Ma da balna kathaccia naaga kinyomo cĩk thõõth cĩ Nyekuco kõrgẽna cunung, õkõmĩ woccia õrrõt ngatĩ kamũdania anyinit cĩ ijionu ĩcunung? 12 Mĩ woccia thẽk ngĩ ellu niigia eet õõgĩ, athii niigia woccia thẽk cĩ elliettu ageeta õrrõt kijiar?
Athii naaga balna cĩ katicaninia elinit cunung. Ĩthõng thĩ, kẽnnẽ gõõla ĩmmanĩ ĩcĩ ẽẽn nyẽgẽlẽ, kõmõgĩ naaga kaal vẽlẽk, kĩĩ katĩ kithii cĩ kalaam Nyemut cĩ Abũnna cĩ Kiristo. 13 Athii cĩ agayyu niigia ngĩ athĩ ne, arũba eeta cĩk aticanni Ciitha cĩ Nyekuco dainit cĩnĩng Ciitha cĩ Nyekuco,g ĩthõng eeta cĩk aticanni ngatĩ todongintio,h õthõl nẽẽgẽ dainit cĩ anyĩwothi Nyekuc ngatĩ todongintio? 14 Gõõla cĩ aduwõy thõng, aduwa balna Makayyioiti athĩ ne, arũba woccia thẽk eeta cĩk irion Nyemut cĩ Abũnna, dainit cĩnĩng eetĩnẽy ĩcĩk ẽlẽmĩ Nyemut cĩ Abũnna.
15 Ĩthõng thĩ, ngaanĩ kiticanõõĩ na thõõth cannĩ cĩ ẽẽn dĩdĩ wo. Ĩthõng athii cĩ keheedi na thõõth coo, muwẽẽnta cannĩ cĩ abũnna cĩ katĩ adĩmanu niigia thõõth coo, nyatarka aneeta. Mayya ngatĩ woccia kadaaknẽ kijiar ngatĩ agamania eeti ĩmma rianii coo. 16 Katĩ ma ngĩ kirioni na Nyemut cĩ Abũnna, athii woccia cĩ kengereni, nyatarka kirioni na thẽk Nyemut coo. Pĩrnanẽt kĩ aneeta katĩ ngĩ athii cĩ kirioni Nyemut cĩ Abũnna! 17 Mĩ kirioni na Nyemut coo kĩcĩ kadiimi na kaganoko, kadũmannie woccia katĩna. Ĩthõng thĩ, mĩ athii cĩ kirioni kaganoko, alna ngaanĩ kirioni na thõõth wũ balna anya aneeta Nyekuci kĩdĩmanũ. 18 Dũman cannĩ wo jaang? Ĩnõõnõ coo. Mĩ kalimani na Nyemut cĩ Abũnna, abũnna ngĩ kaanyi eet kaganoko, athii cĩ kũũtẽnẽ thõng, kĩĩ katĩ athii cĩ katicaninie thõõth cannĩ cĩ ẽẽn dĩdĩ wo, katĩ ngĩ kirioni eeta.
Tiic cĩ Paulo cĩ ẽnnẽ Tionniait
19 Athii cĩ keeni na nyakapanait cĩ et ĩmma. Ĩthõng thĩ, kẽnnẽ kikiyyia kĩthĩ nyakapanait cĩ eet vẽlẽk, kĩĩ katĩ kalaba eet cĩk meelĩk õrrõt kelemit Kiristo. 20 Ma balna ngĩ karũmẽna na kĩ Yudei, kikiyyia kaavu na kĩ eeti cĩ ẽẽn Yudenit, kĩĩ katĩ kũnũmnũmmana ĩnõõgõ kĩĩtõ lemnyiok. Ma balna ngĩ karũmẽna na kĩ eet cĩk agam Ngiranĩ ĩnõõgõ, kabaai balna kĩ eeti cĩ agam Ngiranĩ neccie, kõdẽ woyyia ngĩ athii cĩ agamnya Ngiranĩ aneeta, kũnũmnũmmana ĩnõõgõ kĩĩtõ lemnyiok. 21 Ĩthõng mĩ karũmẽna na kĩ eet cĩk athii cĩ agam Ngiranĩ, kaavu kĩ eeti cĩ athii cĩ agam Ngiranĩ, kĩĩ katĩ kũnũmnũmana ĩnõõgõ kĩĩtõ lemnyiok. Ĩthõng thĩ, nẽnnẽ athii balna na cĩ ereheca thõõth cĩ Ngiran cĩ Nyekuco, ĩthõng thĩ, dĩdĩ agama aneeta Ngiranĩ cĩ Kiristo. 22 Kĩ eet cĩk athii cĩ õkõmĩ lemintia, kikiyyia kaavu na buu kĩ eeti cĩ athii cĩ õkõmĩ lemintia, kĩĩ katĩ kũnũmnũmmana ĩnõõgõ kivitia kĩĩtõ lemnyiok. Kikiyyia kĩthĩ na gii vẽlẽk cĩ eet vẽlẽk, kĩĩ katĩ woccia kẽẽl õõgĩ. 23 Kadĩmanĩ na thoothonniok cĩkkõ vẽlẽk, nyatarka Nyemut cĩ Abũnna, kĩĩ katĩ woccia kũmũda na buu gatan cĩ aku Nyemuta ĩcĩ Abũnna.
Virẽt kĩ anyinit
24 Athii cĩ agayyu niigia ngĩ athĩ ne, virẽta cĩ aviri eeta cĩk avir, ijiowa eeti codoi doo anyinit? Ivirit niigia buu noko, kĩĩ katĩ umuddia anyinit. 25 Alimanni eeta cĩk avir õrrõt, kĩĩ katĩ kijiaritõ eet õõgĩ, ĩthõng alimanni nẽẽgẽ, kĩĩ kumuddia anyinit cĩ athii cĩ alna kũdũt, ĩthõng thĩ, kalimanni naaga, kĩĩ katĩ kũrũbta anyinit cĩ alna kũdũt. 26 Ĩthõng thĩna, athii cĩ kaviri na kĩ eeti cĩ avir taktak, ĩthõng athii na cĩ katicani jore kĩ eeti cĩ atur ngõõt athĩnẽy kaganoko. 27 Kathũnnẽ na ẽlẽ cannĩ, ĩthõng kaanyĩha ĩnõõnõ kĩĩ nyakapanait cannĩ, kĩĩ katĩ kithii cĩ katdukuay ngatĩ kamũdanẽ anyinit vurtia cĩ kirionĩhẽ eet õõgĩ Nyemut cĩ Abũnna.