Paulo kĩ tionniak cĩk ẽẽn volongnyiak
11
Kamui omokju woccia giithakthẽt cannĩ, ĩthõng thĩ, nẽnnẽ ĩdĩmantu kĩyokowẽ vẽlẽk. 2 Kalĩlĩwecung na agiitia, ĩthõng aku lĩlĩwõnĩ coo ĩcĩ Nyekuco. Kabũtanecung na agiitia Kiristo, kĩĩ katĩ aavut niigia ĩĩtõ callẽ ĩcĩnnĩ, kĩ bũwẽẽcĩ cĩ itihie cĩ arũmẽ kĩ maac cĩnnĩ cĩ ngaanĩ kataguthõ kĩ et ĩmma. 3 Ĩthõng thĩ, komothie na ngatĩ ĩgoollung woccia katĩ Thĩttanĩ wũ balna ẽẽn kũwaat wũ baa ĩgõõl Ẽva,a ĩthõng agamnyung katĩ nẽ agiitia gẽẽnyĩtha cĩ võlõng cĩnnĩ, kĩĩ katĩ kithii cĩ owobju thõõth cĩ callĩ cĩ ẽẽn dĩdĩ cĩ Kiristo. 4 Kilimantewung balna naaga agiitia Nyemut cĩ Abũnna cĩ Yesu, ĩthõng ivitiawu elemtu nyemut cĩnang, ĩthõng agamtu Ririwac cĩ Dĩhĩmĩ. Ĩthõng thĩ yoko, ivitiawu anyciwu eet õõgĩ kilimantewung nyemut cĩ rẽẽng cĩ athii cĩ ẽnnẽ dĩdĩ cĩ Yesu. Ĩthõng agamtu ririwac cĩ rẽẽng, ĩthõng elemtu thoothonniok cĩk aduwa nẽẽgẽ. 5 Ĩthõng thĩ, kamui woccia kaduwona na buu kĩ eet nĩĩkĩ ĩgõõl eet athĩ ne, keeginna tionniak cĩk tiirtik wo thõng. 6 Kõdẽ woyyia ngĩ athii cĩ kothoothi na jurrung kĩ nẽẽgẽ, kayai gẽẽnyĩth cĩ kagawẽ thõõth, wũ balna kalimaneccung naaga agiitia thõõth coo vẽlẽk jurrung goolliowẽy vẽlẽk.7 Kẽgẽrẽthana da balna na ngatĩ kaanyĩcẽ ẽlẽ cannĩ kĩĩ dĩca, ĩthõng kõdõngawung agiitia, ngatĩ kalimanecung Nyemut cĩ Abũnna cĩ Nyekuco kaganoko? 8 Kamũda balna na elinit ĩcĩ meelitin cĩ lemnyiok cĩk kelethianya õõgĩ, kĩĩ katĩ keelung na agiitia, õgõõn balna kĩcĩ kõmõmõtha na ĩnõõgõ thõng. 9 Kõdẽ woyyia balna ngĩ kapĩrna na athii gii cĩ kayai balna ngĩ karũmẽ kĩ agiitia, athii balna cĩ keheccung na agiitia. Lemnyiok wũk balna avvu looca cĩ Makedonia dõ, wũk balna avvu ayahaca anyinit, ĩthõng ngaanĩ kẽhẽc et ĩmma kõrgẽna cunung gõõla ĩmmanĩ, ĩthõng kalna katĩ kadĩmanĩ noko kũdũt. 10 Kĩ ngĩ aavĩ thõõth cĩ Kiristo dĩdĩ ĩcannĩ wo, athii katĩ eeti ĩmma cĩ abĩlnĩ rianii cannĩ wo looca cĩ Akeyyia,b ngatĩ kalimanẽ thõõth cĩ Nyekuco kaganoko tõ. 11 Nyia? Nyatarka athii cĩ kamĩnanung na agiitia? Aga Nyekuci ngatĩ kamĩnanung na agiitia!
12 Ĩthõng kalna katĩ na kadĩmani thoothonniok wũk gõõ kadĩmani dõõkĩthĩ, kĩĩ katĩ kĩbĩlĩ eet cĩk adiim ngĩ arũba gõõl cĩ ẽyẽhẽthẽcĩ tiic cĩnĩng cĩ irianĩ wo, kĩ tiic cĩnang. 13 Athii eeta cĩkkõ cĩ ẽẽn tionniak cĩk ẽẽn dĩdĩ, ĩgoollung nẽẽgẽ agiitia anyi eleeti cĩgĩk kaavutõ kĩ tionniaha cĩk Kiristo. 14 Athii woccia cĩ kakuleei naaga jien, nyatarka ĩtĩman Thĩttanĩ kir ma ngĩ anyi ẽlẽ cĩnnĩ kavvu kĩ anjĩlõ cĩ aku ĩcĩ Nyekuco. 15 Ĩthõng thĩna, athii naaga cĩ kakuleei jien, ngatĩ õvõlõngĩ ticcianniowa cĩgĩnnẽk anyi eleeti cĩgĩk kaavutõ kĩ ticcianniowa cĩk abũnna õrrõt. Eteedi katĩ Nyekuci ĩnõõgõ thoothonniok cĩk adĩman nẽẽgẽ.
Ẽhẽcẽ Paulo, nyatarka Kiristo
16 Kõbõdẽcẽ naboo, athii cĩ kadiimnyung na agiit ummuit ngatĩ, keeni na giitheeit. Ĩthõng thĩ, mĩ amukcu kĩyokowẽ, ẽlẽmtangũ thĩ da kaavu kĩ giitheeiti, kĩĩ katĩ kirian na buu kĩdĩĩc. 17 Ĩthõng mĩ kayai na rianii coo, athii cĩ kothoothi kĩ Makayyioiti, ĩthõng thĩ, kothoothi kĩ giitheeiti kaganoko. 18 Ĩthõng kĩcĩ irianit eeta cĩk meelĩk gõõla cĩ eet cĩk looc coo wo, kiriani katĩ na buu. 19 Atalnu niigia ngatĩ elemu eet cĩk ẽẽn giithiak, nyatarka athinnu ne, egeenyu õrrõt! 20 Ĩthõng dĩdĩ, ngaanĩ alna ẽdẽmẽthanu niigia eet cĩk aryung agiit ĩĩtõ nyakapanak noko, ĩtdanynyung, ĩthõng ogorothit ijjio cuguk, ĩthõng naboo õdõng eleeti cĩgĩk kijiaryung agiitia, ĩthõng apantung agiit ngarĩĩna mũrũũr nĩĩco noko. 21 Agamnya aneeta ngawani ngatĩ woccia kathĩ ne, keeginna naaga eet cĩk athii cĩ keeginna tiirti ngatĩ woccia kadĩmania thoothonniok cĩkkõ.
Ĩthõng mĩ iyiacanei eeti irian, kiyacaneei woccia na buu kiriani, kothoothi na kĩ giitheeiti. 22 Irian nẽẽgẽ athĩ ne, keeginna Heburu? Keeni na buu. Irian nẽẽgẽ athĩ ne, keeginna eet cĩk Ĩthraĩlĩ? Keeni na buu Heburenit. Irian nẽẽgẽ athĩ ne, keeginna dõõlĩ cĩk Abrahamĩ? Keeni na buu doolec cĩ Abrahamĩ.c 23 Irian nẽẽgẽ athĩ ne, keeginna ticcianniok cĩk Kiristo? Keeni kẽnnẽ na giitheeit katĩ ngĩ kothoothi ketee, nyatarka kijiari na ĩnõõgõ, nyatarka kiticanothĩha na Kiristo õrrõt, karĩwothĩha balna kĩjan ngõnana cĩk meelĩk, ĩthõng kabicie kalliẽnĩy ngõnana cĩk meelĩk, ĩthõng kĩthĩ õjõõn daaĩtha ngõnana cĩk meelĩk.
24 Ĩthõng naboo, balna ibiccia makayyiowa cĩk Yudei buu ngõnana tur nyegutanya etĩmma kõmmõtõ kĩ tõrkõwẽc itina ĩcĩ odoi gõõ. 25 Kuukie balna na tẽlẽẽa ngõnana iyyio, ĩthõng kõvõcẽ bĩĩyẽnĩy kõr codoi. Apaktẽ kõvõwõlẽta cĩk balna kõwõyyẽ buu ngõnana iyyio, ĩthõng kaavu bũlũcatõ cobbi, baalin codoi kĩ waathĩn codoi. 26 Ĩthõng wueeta cannĩ cĩ kõwõyyẽ na balna ẽẽ, vẽlẽk, kamũda na pĩrnanẽt ngatĩ kabainie lilliok, karumona kĩ goryiak, ĩthõng kũmũda pĩrnanẽt ĩcĩ eet cĩk looc cannĩ kir, ĩthõng naboo, kũmũda pĩrnanẽt ĩcĩ eet cĩk athii cĩ ẽẽn Yudei. Karũba balna na pĩrnanẽt korookjiowẽy ĩcĩk gaalawu, ĩthõng karũba pĩrnanẽt looca, kĩ bulucuanĩy ĩcĩk obbitik, kĩ eetĩnẽy cĩk õvõlõng athĩ ne, eegin nẽẽgẽ wobjiak cĩk Makayyioktak. 27 Katicannie balna na õrrõt, baalinniok cĩk meelĩk kothii kĩnyak, ĩthõng kaavu booba, arukca kõr, athii gii cĩ kadai tõ. Awũdda lajjo, nyatarka kothii ceremua cĩk kabungẽnẽ jurrung.
28 Ĩthõng thoothiowẽy ĩcĩk meelĩk ĩcĩk kothoothi na wo vẽlẽk õõgĩ cĩkkõ, ẽhẽcca baa gõõ aneeta thõõth cĩ adĩman meelitin cĩ lemnyiok cĩk kelethianyawu korookjiowẽy ĩcĩk gaalawu vẽlẽk dõõkĩthĩ. 29 Et jang cĩ athii cĩ ayak tiirthẽt, ĩthõng athii na cĩ keeli ĩnõõnõ? Et jang cĩ igoolli kẽgẽrẽthanõy, ĩthõng athii na cĩ kavaracii wo?
30 Ĩthõng mĩ thẽk kiriana nana, abũnna ngĩ kirianẽ kaal cĩk ẽyẽla athĩ ne, athii tiirthẽtĩ ĩcannĩ tõ. 31 Nyekuc cĩ ẽẽn Baatĩ Makayyioit cĩnac Yesu Kiristo, cĩ aga ngatĩ athii cĩ kovolongi nana. Kĩdĩhĩthĩt naaga ĩnõõnõ kũdũt! 32 Gaalinit cĩ Damathkathĩ cĩ balna aanyĩk nyĩcẽkẽr cĩgĩnĩk kebeit katũgẽt cĩk obbitik cĩk kõrõõk cĩ gaalawu, kĩĩ katĩ kagamta aneeta, wathinniowẽy wũk balna ẽnnẽ Areetathĩ alaan. 33 Ĩthõng thĩ, aryiha gõtõõnõga gwuak aneeta dongowa, ĩthõng anyca kulucciay bẽlẽtha cĩ dilat cobbi cĩ Damathkathĩ, ngaatĩ kanĩhẽ natẽ kĩlĩta ĩnõõnõ.