Nyaraga cĩ eheedi Paulo
Lemnyiok cĩk Kelethianyawu Galathiawa
Thawinet cĩ aku ĩcĩ Paulo
1
Aneeta Paulo tionniaita cĩ itionana Yesu Kiristob kĩ Nyekuc Baangiet, wũ balna arũgũtha Yesu daaĩtha. Athii balna cĩ ẽbẽrana aneeta eeta, kõdẽ eeti ĩmma kaganoko. 2 Kẽhẽdaccung naaga kĩ lemnyiok cĩk kattĩyya kĩ aneeta Nyaraga coo, agiitia lemnyiok cĩk kelethianyac cĩk looc cĩ Galathia.3 Kala na Nyekuc Baangiet kĩ Makayyioit Yesu Kiristo, kĩĩ katĩ kagatantung nẽẽgẽ agiitia bũnnathĩta kĩ ganõna. 4 Nyatarka athĩrar Yesu Kiristo Nyekuc Baangiet cĩnac, ĩnõõnõ thĩ cĩ balna aku anyĩcẽ nẽ ẽlẽ cĩnnĩ kĩĩ gii cĩ cavĩto cĩ thoothonniok cĩgaac cĩk gerthek, kĩĩ katĩ keelet ageeta looca cĩ gẽrẽthanniowu wo, 5 ĩthõng kaanyi naaga bulẽnĩt Nyekuc cĩ alna kũdũt. Amẽn.
Nyemut cĩ Abũnna cĩ ẽẽn dĩdĩ
6 Kũtũbuanẽ na thõõth cĩ utuburyu niigia Nyekuc tamanoko, nyatarka balna ẽbẽrawung nẽ agiitia bũnnathĩta cĩ Kiristo, ĩthõng yoko elemtu niigia nyemut cĩ rẽẽng 7 cĩ athii cĩ ẽẽn dĩdĩ. Ĩthõng thĩ, aatĩ eeta gwuak cĩk anyung agiitia atalmanyantẽ, ĩthõng adĩmannung agiitia ũtũwec Nyemut cĩ Abũnnad cĩ Kiristo kẽgẽrẽthanẽ. 8 Kala na Nyekuc kĩcĩĩnet ageeta, kõdẽ anjĩlõ cĩ aku tammuatiddina, katĩ ngĩ kirionna naaga kõdẽ anjĩlõ nyemut cĩ rẽẽng cĩ athii cĩ aavĩ kĩ Nyemut cĩ Abũnna wũ balna kirioniccung naaga agiitia. 9 Kuduktiaha balna naaga vẽlẽk, ĩthõng ngaanĩ kõbõdẽcẽ naboo kathĩ ne, acĩĩn katĩ Nyekuci et cĩ irion nyemut cĩ athii cĩ ẽẽn Nyemut cĩ Abũnna, wũ balna elemtu niigia vẽlẽk.
10 Kadiimi yoko na eet kebelbelit thõõth cannĩ, kõdẽ kẽbẽlbẽl Nyekuci? Kõdẽ kadiimi na eet katalit thõõth cannĩ dõ? Mĩ balna kĩdĩman na noko, athii woyyia yoko na cĩ keeni nyakapanait cĩ Kiristo.
Ũtũvvũ Nyekuci Paulo
11 Gõtõõnõga kĩ ngõõnõga, kadiimnyung na agiitia agaac ĩĩtõ ne, Nyemut cĩ Abũnna cĩ kirioni na wo, athii cĩ ẽẽn Nyemut cĩ aku ĩcĩ et cĩ olli kaganoko. 12 Athii balna cĩ karũba na Nyemut coo ĩcĩ et ĩmma kaganoko, kõdẽ alimanecca eeti ĩmma, eyeleca balna Yesu Kiristo aneeta Nyemut cĩ Abũnna coo ngonothintia.
13 Ithiktu balna niigia kaal cĩk kadĩmani na, balna ngĩ keeni Yudenite cĩ balna kowobi gõõl cĩ rũgẽt cĩ õõ baajigietĩ cĩganniek õrrõt. Kuuki balna na lemnyiok cĩk kelethia cĩ Nyekuco, ĩthõng kĩtĩmana ngatĩ kathaanẽ ĩnõõgõ. 14 Keeni balna na Yudenit cĩ kabũnna õrrõt, ngatĩ kathũnnẽ vowoth wũ balna aari õõ baatĩ baajigietĩ cĩgaac, kijiar eet cĩk kalĩnnana kĩ aneeta kõdõwẽ vẽlẽk.
15 Ĩthõng thĩ, balna ngaanĩ kittiriay nana, ẽbẽraha balna Nyekuci aneeta, ĩthõng ũtũvvũwa bũnnatina cĩnnĩ. Ngaatĩ ẽbẽlbẽlĩ nẽnẽ 16 ngatĩ eyelecia aneeta Ngẽrĩnĩ cĩnnĩ, kĩĩ katĩ kuduwak eet vẽlẽk cĩk athii cĩ ẽẽn Yudei Nyemut cĩnnĩ cĩ Abũnna, ĩthõng ngaanĩ kijin na et ĩmma nyemut coo kũdũt. 17 Ĩthõng ngaanĩ kũũk Yeruthalẽma kijin thõõth ĩmma tionniak cĩk Yesu, wũk balna uwuantiay ĩcannĩ. Kõkkõ kẽnnẽ kedeceei mũrũũr kõkkõ looca cĩ Arabia, ma balna vurtia, kikiyyia kimiirie kũwa ĩcĩ kõrõõk cĩ gaalawu cĩ Damathkathĩ.
18 Ma balna vurtia cĩ erkinya iyyio, kikiyyia kurumtowa kĩ Pẽtũrũf Yeruthalẽma, ngaatĩ kavvunna karũmẽna wathinniok õmmõtõ kĩ tur. 19 Athii balna cĩ karumona na kĩ tionniak õõgĩ, karumona balna kĩ Jemithg dõ wũ balna ẽẽn gõtõnĩ Makayyioit cĩnac Yesu. 20 Kabũtanecung na agiitia dĩdĩ nguuma ĩcĩ Nyekuco, kathĩ ne, thõõth cĩ keheedi na wo, athii cĩ ẽnnẽ võlõng.
21 Ma balna vurtia, kũwa ĩcĩ looc cĩ Thiiria, kĩ looc cĩ Cilithia. 22 Ĩthõng wathinniowẽy nĩĩkẽ buu, ngaanĩ balna kagayyia meelitini cĩk lemnyiok cĩk kelethianya cĩk Kiristo looca ĩcĩ Yudea wo aneeta. 23 Athĩrar balna nẽẽgẽ athĩ ne, eeti wũ balna gõõ adĩmannet ageeta buth ngato, ikiyyia yoko irion nẽ Nyemut cĩ Abũnna wũ balna adiim ngĩ athaan nẽ. 24 Ngaatĩ thĩ balna avvu adĩhĩthĩ nẽẽgẽ Nyekuc, nyatarka aneeta.