Elemit tionniaha Paulo
2
Ma balna vurtia cĩ erkinya õmmõtõ kĩ wec, kikiyyia kimiirie kũwa Yeruthalẽma.a Ma baa kõr nĩcẽ, kivitiaha kiiriokta kĩ Barnabath,b ĩthõng thĩ, balna kiiriokta kĩ Tiito buu. 2 Kõkkõ balna na natẽ, nyatarka balna upuanaha Nyekuci, ĩthõng ennea ne, bĩtõ. Ma balna ngĩ kõdõlana Yeruthalẽm, koottia kutukwuanta kabanyca thõõth kĩ eet wũk athĩ ne, ẽẽn nẽẽgẽ makayyiok cĩk obbitik natẽ. Kuduwaha na ĩnõõgõ thõõth cĩ Nyemut cĩ Abũnna cĩ Yesu cĩ balna kakunie na kirionĩcẽ eet cĩk athii cĩ ẽẽn Yudei wo. Kõkkõ balna kaduwai ĩnõõgõ, kĩĩ katĩ kelemtowua thõõth cĩ balna kirioni na wo, nyatarka athii balna cĩ kadiimi na liman coo kithii kaganoko. 3 Ĩthõng kõdẽ woyyia Tiito wũ balna kiiriokca kĩ ageeta buu, ngaanĩ kĩtĩnganothĩk ngatĩ abũũranĩ ẽlẽ cĩnnĩ,c kõdẽ woyyia balna ngĩ ẽẽn nẽ Girihenit. 4 Õthõõth balna eeta thõõth cĩ abũũranini Tiito wo, nyatarka õvõlõng eeta gwuak athĩ ne, ẽẽn nẽẽgẽ lemnyiok, ĩthõng ĩnĩktaet avvu orottet adiim ngĩ agamanet thõõth cĩ Yesu Kiristo cĩ katiyyia jurrung, ĩthõng adiim nẽẽgẽ ngĩ aryet kiittia nyakapanak cĩgĩk. 5 Athii balna cĩ kẽlẽmnya naaga thõõth cĩnĩng ẽẽ, kõdẽ itina ĩcĩ dĩcĩ, kĩĩ katĩ Nyemut cĩ Abũnna cĩ ẽẽn dĩdĩ wo, kaavu kõrgẽna cunung.6 Ĩthõng eeta cĩk balna aatĩ kĩ makayyiowa, athii balna cĩ kalnai na ĩnõõgõ, nyatarka etedĩk Nyekuci eet thõõth goolliowẽy cĩk ayak nẽẽgẽ thinnetinẽy ĩcĩtõ. Ĩthõng athii cĩ ĩtoori nẽẽgẽ thõõth ĩmma limana cannĩ. 7 Ivitia kẽnnẽ nẽẽgẽ itinycia balna ngĩ anya Nyekuci aneeta tiic cĩ kalimanẽcẽ eet cĩk athii cĩ ẽẽn Yudei Nyemut cĩ Abũnna cĩ Yesu, kaavu kĩ balna ngĩ anyi Nyekuci Pẽtũrũ kilimanek Nyemut cĩ Abũnna eet cĩk ẽẽn Yudei. 8 Ĩthõng Nyekuc dõ noko cĩ balna anyi Pẽtũrũ kĩĩ tionniait cĩ eet cĩk ẽẽn Yudei, cĩ aticaninia aneeta buu kĩthĩ tionniait cĩ eet cĩk athii cĩ ẽẽn Yudei. 9 Ĩthõng dĩdĩ, agayyie balna Jemithi kĩ Pẽtũrũd kĩ Yoanẽ, ngatĩ ẽnnẽ kitiirua cĩk meelitin cĩ lemnyiowu. Aga balna nẽẽgẽ anyinit cĩ balna anya Nyekuci aneeta, ĩthõng ẽlẽmta nẽẽgẽ aneeta kĩ Barnabath kiticantowa kõdõwẽ kĩ ĩnõõgõ. Ma natẽ, ivitia etheryiet nẽẽgẽ ageeta koottia kilimanta eet cĩk athii cĩ ẽẽn Yudei, ĩthõng nga kẽggẽ nẽẽgẽ aticanni kĩ Yudei. 10 Ĩthõng uduktaet thõõth codoi doo cĩ athĩ ne, kuthutti eet cĩk ẽẽn piryiak kõrgẽna ĩcĩnac, thõõth cĩ balna kadiimi ngĩ karĩcana na kir wo neccie.
Ĩtĩrĩth Paulo Pẽtũrũ
11 Ma balna ngĩ ũũk Pẽtũrũ õlõõ ĩcĩ gaalawu ĩcĩ Antioi, kuduwaha balna na ĩnõõnõ thõõth cĩ abacĩ nẽ kẽbẽrẽnĩy ĩcĩgĩnĩk. 12 Ma balna ngĩ arawak Pẽtũrũ ikiyyia uduktõy nẽ kĩ lemnyiok cĩk athii cĩ ẽẽn Yudei. Ma vurtia ĩcĩ balna ivitiaĩ lemnyiowa gwuak cĩk ẽẽn Yudei cĩk avvu ĩcĩ Jemithi,e ĩthĩnga Pẽtũrũ aduwue kĩ lemnyiok cĩk athii cĩ ẽẽn Yudei naboo,f nyatarka ongollie balna nẽ eet wũk balna avvu ĩcĩ Jemithi, wũk balna ẽpẽkanõnĩ thoothonniok cĩk athĩ ne, eeta cĩk athii cĩ ẽẽn Yudei adiim thẽk ma ngĩ abũũranni eleeti cĩgĩk, ĩthõng uthuutti Ngiran cĩ Mutha. 13 Ma balna natẽ, ĩdĩmanit lemnyiowa gwuak cĩk ẽẽn Yudei gii cĩ balna adĩman Pẽtũrũ ẽẽ buu, cĩ woyyia athii wobjiaha cĩk Yesu cĩ adĩmanĩ, ĩthõng agamothĩk Barnabathĩ buu thoothonniok cĩgĩk ẽẽ.
14 Ma balna ngĩ kĩcĩna na ngĩ athii cĩ õwõbĩ nẽẽgẽ thõõth cĩ ẽẽn dĩdĩ cĩ Nyemut cĩ Abũnna ẽẽ, kennea na Pẽtũrũ meelitina cĩ lemnyiowu vẽlẽk ne, “Kĩ yoko ngĩ eeni niia Yudenit tiriathẽtĩna wo, utuburu niia vowothnya cĩk Yudei, ĩthõng abaawu kĩ eeti cĩ athii cĩ eeni Yudenit, nyia yoko cĩ atĩmani niia ngĩ adiimi anyi lemnyiok cĩkkõ cĩk athii cĩ ẽẽn Yudei wo, kowobit vowothnya cĩk Yudei wo?
15 “Keegin naaga Yudei tiriathẽtĩna, ĩthõng athii cĩ keeginna eet cĩk athii cĩ kagayya Nyekuc kĩ eeta cĩk athii cĩ ẽẽn Yudei. 16 Kagayya naaga ngatĩ athii cĩ ẽlẽmĩ Nyekuci et, nyatarka athũnnĩ nẽ Ngiran,g ĩthõng thĩ, ẽlẽmĩ Nyekuci et, nyatarka ẽlẽmĩ nẽ Yesu Kiristo dõ. Kẽlẽmĩ naaga buu Yesu Kiristo, kĩĩ katĩ kelemet Nyekuci ageeta, nyatarka leminit cĩnac ĩcĩ Kiristo, athii cĩ ẽẽn, nyatarka thõõth cĩ kathũnnĩ naaga Ngiran, nyatarka athii Nyekuci cĩ ẽlẽmĩ et ĩmma cĩ athũnnĩ Ngiran dõ.h
17 “Ma ngĩ kadiim naaga ngĩ kaatĩ jurrung kĩĩ kelemet Kiristo ageeta, kamũda kẽnnẽ naaga keegin gẽrẽthanniok, athĩ thõõth coo ne, adiim Kiristo ageeta kẽgẽrẽthantõy? Athii tõ kũdũt. 18 Mĩ woccia kẽtẽngẽnya na gii wũ balna kathaani na naboo, keyeliay katĩna ma ngĩ keeni et cĩ kẽgẽrẽthani Ngiran. 19 Ma ngĩ kabaai balna na buu Ngirana ĩcĩ Mutha, ĩthõng ma balna ngĩ utugu kĩcĩ kadaaha na Ngirana nĩcẽ, kĩĩ katĩ kabaak na gõõla ĩcĩ Nyekuco. 20 Kadaakta balna na kĩ Kiristo kurucea, ĩthõng yoko, ĩĩ ĩnõõnõ dõ cĩ arũgĩ ẽla cannĩ. Ĩthõng rũgẽtĩ cĩ karũknẽ na ẽla cannĩ wo, karugi na, nyatarka leminit cannĩ ĩcĩ Ngẽrtĩ Nyekuco, wũ balna amĩnanna aneeta, ĩthõng adaak, nyatarka aneeta. 21 Ngaanĩ kũtũbũr na bũnnathĩt cĩ Nyekuco. Mĩ elemet Nyekuci ageeta, nyatarka kõwõb Ngiran, monogo adaak Kiristo kaganoko!”