Galathia 3

Leminit dõ cĩ ẽẽlaneet ageeta

Niigia giithiaha cĩk Galathia wo! Abuuyyung woccia thẽk agiitia ngẽnẽ? Balna ngĩ kaduwaccung naaga thõõth cĩ ododinie Yesu Kiristo kurucea, ĩthõng kĩ balna ngĩ acĩnnu niigia kẽbẽrẽnĩy cuguk ngatĩ ẽẽn dĩdĩ. 2 Kadiimi na kagga gii codoi doo dõ ĩcunung. Amũdanu balna niigia Ririwac cĩ Dĩhĩmĩ, nyatarka athunnu niigia Ngiran cĩ Mutha, kõdẽ nyatarka elemtu thõõth wũ balna kalimaneccung naaga? 3 Agiithenu niigia noko nyia? Amukcu niigia athinnu ne, ẽdẽcacu katĩ nyaguana dõ thõõth cĩ balna ẽtẽrẽhaĩ Ririwacĩ cĩ Dĩhĩmĩ? 4 Acanantewu niigia õrrõt, nyatarka Nyemut cĩ Abũnna, õkkõ koccia yoko hecinti neccie kaganoko? Ehecinu da thẽk kaganoko? 5 Anyung agiit Nyekuci Ririwac cĩ Dĩhĩmĩ, ĩthõng ĩdĩman thoothonniok cĩk anaat eeta ĩcunung. Adĩman nẽ thoothonniok cĩkkõ, nyatarka owobju niigia Ngiran, kõdẽ nyatarka ithiktu niigia, ĩthõng elemtu Kiristo?

6 Ummuit da thõõth cĩ Abrahamĩ, kĩ ngĩ athĩ Nyaraga cĩ Nyekuco ne, “Ẽlẽmĩ balna Abrahamĩ thõõth cĩ Nyekuco, ĩthõng nyatarka thõõth nĩcẽ, ikiyyia ẽlẽm Nyekuci ĩnõõnõ kĩĩ et cĩ abũnna.” 7 Ĩthõng agaac ĩĩtõ ne, eeta cĩk ẽlẽmĩ Nyekuc, ẽẽn nẽẽgẽ dõõlĩ cĩk Abrahamĩ.

8 Eheeddi balna baa lõõla Nyaragawa ĩcĩ Nyekuco athĩ ne, ẽlẽmĩ Nyekuci eet cĩk athii cĩ ẽẽn Yudei, kĩĩ eet cĩk abũnna katĩ ngĩ ẽlẽmĩ nẽẽgẽ ĩnõõnõ. Ngaatĩ aduwacĩ Nyekuci Abraham Nyemut cĩ Abũnna ẽthẽcĩ ne, “Agatanni katĩ eeta loociowẽy vẽlẽk, nyatarka aniitia.” 9 Ĩthõng thĩ, agatan katĩ Nyekuci eet cĩk ẽlẽmĩ ĩnõõnõ, kĩ balna ngĩ agatan nẽ Abraham, et wũ balna ẽlẽmĩ ĩnõõnõ.

10 Ĩthõng acĩĩn katĩ Nyekuci eet cĩk õwõb Ngiran cĩ Mutha, nyatarka eheeddi Ngirana ĩcĩ Nyekuco athĩ ne, “Acĩĩn katĩ Nyekuci eet vẽlẽk cĩk athii cĩ alna õwõb thõõth vẽlẽk cĩ eheeddi Nyaragawa cĩ Ngirano.” 11 Ĩthõng edenyiay thẽk jurrung athĩ ne, athii Nyekuci cĩ ẽlẽmĩ et ĩmma, katĩ ngĩ õwõb eeti neccie Ngiran, nyatarka eheeddi Nyaragawa ĩcĩ Nyekuco athĩ ne, “Arũgĩ katĩ eeti cĩ abũnna, nyatarka ẽlẽmĩ Nyekuci leminit cĩnnĩ.” 12 Athii Ngiranĩ cĩ aduwõy kĩ ma ngĩ kẽlẽmĩ Nyekuc, nyatarka athĩ Ngiranĩ ne, “Eeti cĩ adĩman kaal cĩkkõ, abaak katĩ nẽ ĩcĩnĩng.” 13 Ikiyyia balna ẽẽlawet Yesu Kiristo ageeta cĩĩnẽnta cĩ ayaha Ngiranĩ, ngatĩ aku õkõyyĩ nẽ cĩĩnẽnẽt cĩnac kĩ balna ngĩ aduwa Ngiranĩ cĩ Nyekuco athĩ ne, “Agam cĩĩnẽnẽtĩ et cĩ irime kẽẽta.” 14 Nyatarka thõõth wũ balna ĩdĩman Yesu Kiristo, ikiyyia ẽẽlawet nẽ ageeta, kĩĩ katĩ kaanyĩk nẽ eet cĩk athii cĩ ẽẽn Yudei gatan, wũ balna aanyĩk Nyekuci Abraham, kĩĩ katĩ kũrũbta naaga Ririwac cĩ Dĩhĩmĩ lemintia, kĩ balna ngĩ aduwa Nyekuci.

Ngiran kĩ Bũtan

15 Gõtõõnõga kĩ ngõõnõga, nyẽ da kuduwawung thõõth cĩ agayyu niigia vẽlẽk. Ma ngĩ adak eeta ngẽrẽmngẽrẽm, athii thõõth cĩ woccia ũũkcĩ vurtia cĩnnĩ tõ. Aduwõy ngẽrẽmngẽrẽmĩ coo kĩ cĩ aku Nyekuca. 16 Abũtaneei balna Nyekuci Abraham kĩ doolec cĩnnĩ, thõõth cĩ katĩ agatanĩ nẽ eet loociowẽy vẽlẽk, nyatarka Abraham. Ĩthõng athii Nyaraga cĩ Nyekuco cĩ athĩ ne, “Gatanĩ coo cĩ õkkõ ĩcĩ dõõlĩ cĩgĩnĩk,” cĩk meelĩk, monogo athĩ ne, õkkõ, “Ĩcĩ doolec cĩnnĩ,” ĩthõng ẽẽn doolec neccie Kiristo. 17 Thõõth cĩ kathĩ na coo, adak balna Nyekuci ngẽrẽmngẽrẽm kĩ Abraham, ĩthõng ma baa vurtia ĩcĩ erkinya cĩk ẽẽn eet etĩmma kĩ etĩmma kõmmõtõ (430), aanyĩk Nyekuci Ngiran cĩnnĩ Mutha. Athii Ngiranĩ cĩ ũũwũ ngẽrẽmngẽrẽm wũ balna adak Nyekuci kĩ Abraham, ĩthõng athii Ngiranĩ cĩ ũũwũ bũtan wũ baa adĩman Nyekuci kĩ Abraham. 18 Ma ngĩ kathũnnĩ naaga Ngiran kĩĩ katĩ kumuddia gatan Nyekuca, ĩthõng thĩ, athii gatanĩ neccie cĩ aku ĩcĩnac nyatarka bũtan cĩ Nyekuco. Ĩthõng thĩ, athimati balna Nyekuci Abraham, ĩthõng aanyĩk nẽ ĩnõõnõ gatan bũtana cĩnnĩ.

19 Ĩthõng thĩ yoko, tiic da balna thẽk cĩ Ngirano kir niin? Ariwothi balna Ngiranĩ, kĩĩ katĩ kagaac kĩĩtõ ne, kẽgẽrẽthan naaga. Ĩthõng woccia balna alna Ngiranĩ coo kuumuc kikiyyia doolec, cĩ ẽẽn Yesu, wũ balna aduwaai Nyekuci Abraham. Aanyĩk balna Nyekuci Ngiran cĩnnĩ anjĩlẽta, kĩĩ kaanycĩk Mutha, cĩ balna ẽẽn et cĩ ẽẽn thooc cĩ Nyekuco kĩ eet cĩgĩnĩk. 20 Ĩthõng yoko, athii eeti cĩ ẽẽn thooc ẽẽ, cĩ õthõõthĩ et codoi doo dõ, ĩthõng thĩ, ẽẽn Nyekuci codoi dõ.

21 Ĩthõng thĩna, abũrĩ woccia Ngiranĩ thõõth wũ balna aduwa Nyekuci? Athii tõ kũdũt! Ma da balna kaanyet Ngiranĩ rũgẽt cĩ jõr, anyet woyyia baalia Nyekuci ageeta kũbũnta ngatĩ kathĩknĩ Ngiran. 22 Ĩthõng thĩ, aduwa Nyaraga cĩ Nyekuco athĩ ne, agam gerthetini eet vẽlẽk looca, kĩĩ kikiyyia thõõth wũ balna abũtan Nyekuci kaanyĩwothĩk woccia eet cĩk katĩ ayak leminit cĩ ẽlẽmĩ Yesu Kiristo.

Keegin naaga dõõlĩ cĩk Nyekucak lemintia

23 Ngaanĩ balna kedenyiay leminiti coo, balna ngĩ keegin naaga Yudei eet cĩk ecebjie Ngirana, õgõõn kĩ ngĩ kaatĩ naaga kĩjanatõ, kuumuc kikiyyia kõõgaẽt leminiti coo, ageeta cĩk kẽlẽmĩ Yesu Kiristo. 24 Ẽẽn balna Ngiranĩ tilingnyioit cĩ anyet ageeta kagaac Kiristo, kĩĩ katĩ kikiyyia kelemet Nyekuci ageeta, nyatarka kẽlẽmĩ naaga Yesu. 25 Ĩthõng yoko, kivitia kayait naaga leminit coo, ĩthĩnga agamnyet Ngiranĩ ageeta naboo, kũdũt.

Iittu niigia dõõlĩ cĩk Nyekucak

26 Iittu niigia vẽlẽk dõõlĩ cĩk Nyekucak, nyatarka elemtu Yesu Kiristo, 27 nyatarka agamtu balna niigia vẽlẽk batithimo thaarĩy cĩk Kiristo, ivitiawu ũrũmtewu niigia buu kĩ Kiristo. 28 Ĩthĩnga niigia eeginnu Yudei, kõdẽ Girik, kõdẽ nyakapanak, kõdẽ eet cĩk athii cĩ ẽẽn nyakapanak, kõdẽ eet cĩk maacĩk, kõdẽ ngaay cĩk ngayyik. Anyung agiitia leminiti aavut gõõla codoi doo ĩcĩ Yesu Kiristo, 29 Ĩthõng ma ngĩ iittu niigia eet cĩk Kiristo, ivitiawu niigia iittu eet cĩk kõrõõk cĩ Abrahamĩ. Ĩthõng ivitiawu katĩ ũrũbtawu niigia gatan cĩ thõõth wũ balna aduwaai Nyekuci Abraham.