4
Kathĩ na thõõtha coo ne, ma balna da ngĩ adaak baatĩ dooleco, mĩ ngaanĩ doolec dĩc, aduwõy nẽ kĩ nyakapanait thõng, kõdẽ woyyia ma ngĩ aragĩth katĩ nẽ kaal vẽlẽk cĩk ciith cĩ baatĩnnĩ. 2 Athũnnĩ tilingnyioiti doolec, gii ngĩ ikiyyia kõr cĩ katĩ aduwanĩ baatĩnnẽ athĩ ne, ũwũpan doolec ngatĩ agamĩ kõrõõk. 3 Balna ngĩ keeginna naaga dõõlĩ cĩk kĩdĩk keeginna balna naaga buu nyakapanak ngiriantiowẽy ĩcĩk looc coo.4 Ĩthõng thĩ, ma balna ngĩ arawak kõr neccie kir, ikiyyia itiona Nyekuci Ngẽrĩnĩ cĩnnĩ cĩ balna ũũkca ngaa, cĩ athũnnĩ nẽ Ngiran cĩ Mutha, 5 kĩĩ kikiyyia kõõgaẽt ageeta Ngirana cĩ Mutha, kĩĩ kĩĩtõ naaga dõõlĩ dĩdĩ cĩk kabarĩc kaal vẽlẽk õlõõ cĩ Nyekuco. 6 Ĩthõng thĩ, nyatarka iittu niigia dõõlĩ cĩgĩnĩk, ikiyyia itiona Nyekuci Ririwac cĩ Ngẽrĩnĩ, kikiyyia kaavu thinnetinẽy cĩgaac. Ĩthõng aduwacet Ririwacĩ cĩnnẽ enneccet ne, kũtũvvẽc Nyekuc kĩĩtõ ne, “Papa, Baangiet cĩnac.” 7 Ĩthõng thĩ, yoko ĩthĩnga niia eeni nyakapanait naboo, nyatarka ĩthĩ niia doolec cĩ Nyekuco, ĩthõng nyatarka ĩthĩ niia doolec cĩnnĩ, ikiyyia aragithu niia kaal vẽlẽk cĩgĩnĩk.
Ĩrĩcana Paulo lemnyiok cĩk Galathia
8 Balna kũnũũk, baa ngaanĩ niigia agaac Nyekuc, baa ngaanĩ eeginnu niigia nyakapanak cĩk kaal cĩk aar eeta kĩĩtõ nyekucnya cĩk athii cĩ ẽẽn dĩdĩ. 9 Ĩthõng thĩ, kĩcĩ yoko agayyu niigia Nyekuc wo, kõdẽ woyyia kathĩ na ne, yoko ma ngĩ agawung Nyekuci agiitia, nyia idiimit imiiryi ĩĩtõ nyakapanak naboo cĩk ngirantiok cĩk looc coo, cĩk athii cĩ ayahĩ tiirthẽt wo? 10 Athunnu niigia wathinniok cĩk obbitik, kĩ nyĩĩlõwẽ kĩ erkinya peyianĩnẽy cĩk Yudei.a 11 Kongolinung na agiitia, nyatarka kathĩ ne, õgõõn kĩcĩ kẽdẽcahẽ itin cĩ tiic cannĩ wũ balna tiiri ĩcunung kaganoko nyia?
12 Gõtõõnõga kĩ ngõõnõga, kalayyung na agiit aavut kĩ nana, nyatarka kikiyyia kaavu na buu kĩ niigia. Ĩthõng ngaanĩ balna ĩdĩmanteangũ niigia aneeta thõõth cĩ gerthe. 13 Agayyu niigia baa ngĩ kĩmori na, baa ĩcĩ owu, ĩthõng kakuni kalimanecung agiitia Nyemut cĩ Abũnna. 14 Kõdẽ woyyia balna ngĩ kĩmori õrrõt, anyung balna agiitia mõõrĩthĩ cannie hecinit, ĩthõng naboo athii cĩ abayahannangũ. Ĩthõng thĩ kẽnnẽ, atalnecangũ niigia aneeta kaavu kĩcĩ keeni na anjĩlõ cĩ Nyekuco, kõdẽ kaavu kĩcĩ keeni Yesu Kiristo kir. 15 Ũũk talinti wũ baa gõõ ebelbellu niigia nga? Kagga na õtõkõcacangũ woyyia baalia niigia aneeta kẽbẽrẽ cuguk, ĩthõng anycangũ aneeta. 16 Ĩthõng thĩ, kikiyyia yoko kĩthĩ na miroit cunung ngatĩ kaduwacung thõõth cĩ ẽẽn dĩdĩ wo?
17 Ĩthõng limanniowa wũk ẽẽn volongnyiak cĩk adiim balna ngĩ anũmnũmmanung agiitia ẽẽ, athii cĩ adiim bũnnathĩt cunung. Adiim nẽẽgẽ ngĩ anyung agiitia kengeryiõy kĩ aneeta, kĩĩ katĩ ivitia niigia idiimit thẽk elemit thõõth cĩnĩng. 18 Abũnna thẽk ngĩ adiimnyu niigia adĩmannu gimma cĩ abũnna, ĩthõng thĩ, abũnna ma ngĩ adiimnyu gii cĩ abũnna dõõkĩthĩ, kõdẽ woyyia kĩthĩ na rẽẽn ĩcunung. 19 Doolia cĩganniek cĩk kamĩnani wo, awuceca thõõth cunung aneeta kĩ ngaa cĩ ũũkca doolec, gii ngĩ itiryiawu niigia ĩĩtõ dõõlĩ cĩk Kiristo. 20 Anya kũrũmtẽ woyyia yoko na kĩ agiitia, ĩthõng kũtũwũwa gõõl cĩ kõthõõthõnẽ kĩ agiitia, nyatarka athii na cĩ kagawẽ gõõl cĩ kamuwung agiitia.
Hagar kĩ Thaara
21 Ĩthĩktangũ da yoko niigia aneeta eeta cĩk adiimnyu ngĩ owobju Ngiran cĩ Mutha wo. Agayyu yoko thẽk niigia thõõth cĩ aduwa Ngiranĩ wo? 22 Eheeddi Nyaragawa ĩcĩ Ngirano athĩ ne, ayak balna Abrahamĩ lõgõõ cĩk ẽẽn ramma. Arittiay ngẽrĩnẽ cĩ owu ngaawa ĩcĩ ẽẽn nyakapanait cĩ athĩ thar Hagar,b ĩthõng itirriay ĩmma ngaawa ĩcĩ athii cĩ ẽẽn nyakapanait cĩ athĩ thar Thaara.c 23 Arittia balna ngaa cĩ ẽẽn nyakapanait wo, ngẽrĩnĩ cĩnnĩ kĩ gõõ ngĩ uukciay ngaay dõõkĩthĩ, ĩthõng balna itirria ngaa cĩ athii cĩ ẽẽn nyakapanait ẽẽ, ngẽrĩnĩ cĩnnĩ kĩ balna ngĩ abũtaneei Nyekuci Abraham.
24 Eyelecet thõõth cĩ ngaay cĩk ẽẽn ramma wo, õgõõn nẽẽgẽ kĩ ngẽrẽmngẽrẽmĩ cĩk ẽẽn ramma cĩk Nyekucak. Adĩmanni balna ngẽrẽmngẽrẽmĩ codoi Thiira cĩ Thĩnaĩ,d cĩ aritta dõõlĩ cĩk ẽẽn nyakapanak. Õgõõn Hagarĩ kĩ ngẽrẽmngẽrẽmĩ coo. 25 Ĩthõng thĩ, yoko eyehethothi Hagarĩ Thiir cĩ Thĩnaĩ cĩ aavĩ looca cĩ Arabia, ĩthõng eyehethothĩk nẽ eet cĩk Yeruthalẽmĩ cĩk itin coo wo, nyatarka ẽẽn nẽẽgẽ kĩ dõõlĩ cĩgĩnĩk vẽlẽk nyakapanak cĩk Ngiranak. 26 Ĩthõng thĩ, eyehethothi Thaara ngaa cĩ athii cĩ ẽẽn nyakapanait wo Yeruthalẽm cĩ tammutiddin, ĩthõng ẽẽn nẽ yaangiet cĩnac. 27 Kĩ balna ma ngĩ eheeddi Nyaragawa ĩcĩ Nyekuco, athĩ ne,
“Bẽlbẽl niia ngaa
cĩ athii doolia tõ wo!
Bẽl tẽgẽl cĩ talio moloowa cobbi,
niia cĩ ngaanĩ yak wuciith cĩ ũũkcanẽ doolec wo,
nyatarka ayawu niia dõõlĩ cĩk meelĩk,
ijiaru niia ngaa wũ ayak maaca.”e
28 Ĩthõng niigia gõtõõnõga kĩ ngõõnõga, iittu niigia dõõlĩ cĩk aduwonu kĩ Aĩthakf thõng, wũ balna abũtaneei Nyekuci Abraham. 29 Ĩthõng logoo cĩ arittiay kĩ gõõ ngĩ aritia ngaa doolec dõõkĩthĩ, adĩmaneei nẽ thõõth cĩ gerthe logoo wũ balna arittiay, nyatarka Ririwac cĩ Dĩhĩmĩ. Õgõõn thĩ yoko thõõth coo buu noko. 30 Ĩthõng athĩ Nyaraga cĩ Nyekuco ne? “Tingka nyakapanait nĩcẽ kĩ ngẽrĩnĩ vẽlẽk kõõt, nyatarka athii katĩ doolec cĩ ngaa nĩcẽ cĩ õthõl balinit, cĩ katĩ aragĩth ngẽrtĩ ngaa cĩ athii cĩ ẽẽn nyakapanait.”g 31 Ĩthõng thĩna, gõtõõnõga kĩ ngõõnõga, ĩthĩnga keegin naaga dõõlĩ cĩk ngaa cĩ ẽẽn nyakapanait wo, kĩĩtõ naaga dõõlĩ cĩk ngaa cĩ athii cĩ ẽẽn nyakapanait ẽẽ.