Karũgĩ naaga, nyatarka Kiristo
2
Ĩthõng thĩ, balna aavuttu niigia kĩcĩ adaaktu, nyatarka gerthetin cunung kĩ thoothonniok cĩk gerthek cĩk adĩmannu niigia, 2 gõõla wũ balna gõõ attiyyu, ĩthõng owobtu thoothonniok cĩk looc coo, ĩthõng ithiktu alaan cĩ ririwanĩn cĩk gerthek cĩ ẽẽn makayyioit cĩ looc coo. Ẽẽn nẽ ririwac cĩ aticanni thinnetinẽy cĩk eet cĩk athii cĩ athĩrar Nyekuc. 3 Kaatĩ baa gõõ naaga vẽlẽk noko, ngatĩ kõwõbĩ kaal cĩk abarriteei eleeti kĩ thinneti cĩgaac. Ĩthõng nyatarka thoothonniok wũk balna kadĩman naaga, ikiyyia avaracĩhet Nyekuci ageeta kĩ eeta gwuak.4 Ĩthõng thĩ, ayak Nyekuci tamati cobbi, ĩthõng amĩnannet nẽ ageeta õrrõt, 5 kõdẽ woyyia balna ngĩ kadaaitõ naaga, nyatarka thoothonniok cĩgaac cĩk gerthek, anyet Nyekuci ageeta kũrũgĩt kõdõwẽ kĩ Kiristo, bũnnathĩt cĩ Nyekuco dõ cĩ balna ẽẽlanung agiitia. 6 Ngaatĩ balna arũgũthanet Nyekuci ageeta daaĩtha, kõdõwẽ kĩ Kiristo, ĩthõng anyet kũrũmtẽ kĩ Yesu Kiristo tammuatiddina, 7 kĩĩ katĩ keyelek Nyekuci eet erkinyiay ĩcĩk katĩ avvu gõõl cĩ ẽẽn bũnnathĩt cĩnnĩ, kĩ thimatĩth cĩnnĩ, nyatarka thõõth cĩ ĩdĩman Yesu Kiristo. 8 Ẽẽlanung balna Nyekuci agiitia bũnnathĩta cĩnnĩ katĩ ngĩ elemnyu niigia ĩnõõnõ, athii cĩ ẽẽn gimma cĩ balna adĩmannu niigia, ĩthõng thĩ, ẽẽn anyinit cĩ Nyekuco ĩcunung. 9 Athii cĩ ẽẽn ellianĩtĩ dũmaniniet cĩ tiiciok cĩk balna kadĩman naaga, kĩĩ katĩ kithii eeti ĩmma cĩ irian, nyatarka elinit cĩnnĩ. 10 Keegin naaga eet cĩk ẽngẽnycanet Nyekuci gõõla ĩcĩ katiyyie wo, kaavut kõdõwẽ kĩ Yesu Kiristo, kĩĩ katĩ kĩdĩmanit tiicanẽ cĩk abũnna wũk balna adiim Nyekuci ageeta kĩdĩmanit ĩcĩ owu.
Arũm Nyekuci loociok vẽlẽk ĩcĩ Kiristo
11 Ĩthõng thĩna, nyĩ anyiccu kerehewung ngatĩ eeginnu niigia eet cĩk athii cĩ ẽẽn Yudei. Avvuyyung baa gõõ Yudei ennecung ne, “Eeginnu niigia eet cĩk ngaanĩ kũbũũrantẽ eleeti cuguk,”a irian thĩ baa gõõ nẽẽgẽ, nyatarka abũũran eleeti cĩgĩk. 12 Athii balna niigia cĩ agayyu Kiristo baa erkinyiay nĩĩkẽ. Balna ngĩ eeginnu niigia eet cĩk kĩrẽẽng eetĩnẽy ĩcĩk Ĩthraĩlĩ, ĩthõng athii cĩ othollu ngẽrẽmngẽrẽm wũ balna adak Nyekuci kĩ ĩnõõgõ. Attiyyu balna niigia rẽẽna ĩcĩ Nyekuco, ĩthõng ithii muwẽẽnĩtĩ cĩ abũnna ĩcunung tõ. 13 Ĩthõng thĩ, yoko urumtu niigia eleeti cuguk kõdõwẽ kĩ Yesu Kiristo. Eeginnu balna gõõ niigia rẽẽntĩ ĩcĩ Nyekuco, ĩthõng thĩ yoko, ivitiawu oboktowu kĩ ĩnõõnõ, nyatarka biyyie cĩk Kiristo.
14 Nyatarka ayahahet Kiristo ageeta ganõn, ikiyyia ũrũm nẽ eet cĩk Yudei kĩ eet cĩk athii cĩ ẽẽn Yudei, kĩĩtõ codoi doo ẽla cĩnnĩ. Athaan balna nẽ lũwat cĩ ẽngẽr ĩnõõgõ kaaburyiõy 15 daaĩtha cĩnnĩ, balna ngĩ ĩbĩlĩ nẽ gõõl cĩ adĩmanini Ngiranĩb cĩ Mutha, kĩ tĩrĩthẽnĩt cĩnnĩ vẽlẽk. Ikiyyia ĩdĩman nẽ ganõn kõrgẽna cĩ eet cĩk Yudei kĩ eet cĩk athii cĩ ẽẽn Yudei, ngaatĩ arũmĩ ĩnõõgõ kĩĩtõ eet cĩk odoi doo. 16 Ĩthõng ẽla ĩcĩnnĩ dõ, ikiyyia aganĩth Kiristo ĩnõõgõ kĩ Nyekuc, ngatĩ adaaknĩ kurucea,c ĩthõng ĩbĩlĩ gõõl cĩ aaburnõnĩ nyaguana. 17 Ayahacung balna nẽ agiitia eet cĩk athii cĩ eeginnu Yudei wo, Nyemut cĩ Abũnna cĩ ganono, eeginnu balna niigia rẽẽntĩ ĩcĩnnĩ, ĩthõng ayahak ganõn eet cĩk Yudei cĩk õjõõntĩ ĩcĩnnĩ. 18 Ĩthõng nyatarka Kiristo, kivitia naaga kõdõwẽ ĩcĩ Baangietĩ Ririwaca ĩcĩ odoi, nyatarka thõõth cĩ adĩman Kiristo.
19 Nyatarka thõõth coo, ĩthĩnga niigia eeginnu eet cĩk kĩrẽẽng, ũrũmtothiwu niigia eet cĩk kõrõõk cĩ Nyekuco, 20 ogoonnu niigia kĩ ciith cĩnnẽ cĩ ẽngẽnycẽ, ĩthõng aavutõ tionniaha kĩ eet cĩk õthõõth molook cĩ Nyekucod kĩ telecuana, ĩthõng aavu Yesu Kiristo kĩ kitiiri cĩ tiiri õrrõt. 21 Agam nẽ ciith nĩcẽ kĩĩ codoi doo, ĩthõng anyĩk ciith nĩcẽ kĩtĩlĩth kĩĩ Ciith cĩ dĩhĩmĩ cĩ Makayyiokto. 22 Ĩthõng eeginnu niigia tõõn cĩ Ciith nĩco, cĩ balna ẽngẽnyẽt Kiristo kĩĩ ngini cĩ aavẽ Nyekuci Ririwaca cĩnnĩ.