Nyaraga cĩ eheedi Paulo
Lemnyiok cĩk Kelethia cĩ Ẽvẽthathĩ
Ĩthaa Paulo lemnyiok cĩk Ẽvẽthathĩ
1
Nyaraga cĩ aku ĩcannĩ Paulo coo, et cĩ ẽbẽrana Nyekuci dimẽnta cĩnnĩ kĩthĩ tionniaita cĩ Yesu Kiristo.b Keheedi na Nyaraga coo eet cĩk callĩk cĩk Nyekucak õlõõ ĩcĩ gaalawu ĩcĩ Ẽvẽthathĩ. Eet cĩk athũnnĩ thõõth cĩ Yesu Kiristo, ĩthõng ĩĩtõ wobjiak cĩgĩnĩk.2 Kalayyie na kĩĩ katĩ kaanyung Nyekuci Baangietĩ kĩ Makayyioit cĩnac Yesu Kiristo bũnnathĩt kĩ ganõn.
Ayaha Kiristo gatan Ririwaca
3 Kĩdĩhĩthĩt Nyekuc cĩ ẽẽn Baatĩ Makayyioit cĩnac Yesu Kiristo cĩ agatannet nẽ ageeta giiwa vẽlẽk ĩcĩ abũnna, ngatĩ ayahacet Kiristo ageeta tammuatiddina! 4 Nyatarka ẽbẽraet balna Nyekuci ageeta ĩcĩ Kiristo kiittia eet cĩgĩnĩk cĩk dĩhĩmĩk cĩk kamĩrĩ nguuma cĩnnĩ, baa ngaanĩ kẽtẽngẽnya nẽ looc. Amĩnannet nẽ ageeta, 5 ikiyyia ẽbẽraet nẽ ageeta balna kuumuc, ĩthõng aret kĩĩtõ dõõlĩ cĩgĩnĩk, nyatarka Yesu Kiristo. Ĩthõng thõõth coo cĩ balna adiim nẽ kĩdĩman, ĩthõng aanyĩk ĩnõõnõ katal. 6 Kĩdĩhĩthĩt naaga Nyekuc õrrõt, nyatarka bũnnathĩt cĩnnĩ cĩ iriowa kĩ bulẽnĩt cĩ anyet nẽ ageeta kaganoko, ngatĩ anyet Ngẽrĩnĩ cĩ amĩnan nẽ õrrõt. 7 Ayak Nyekuci thimatĩth õrrõt, ĩthõng ũtũũwa ogianĩt cĩnac biyyietĩy cĩk Ngẽrĩnĩ cĩnnĩ, ĩthõng ũtũngek gerthetin cĩnac. 8 Anyet Nyekuci ageeta bũnnathĩt cĩnnĩ cobbi õrrõt kõdõwẽ kĩ gẽẽnyĩth kĩ thĩhẽnĩt.
9 Ĩthõng yoko, eyelehet Nyekuci ageeta kagaac muwẽẽnĩt cĩ thoothonniok cĩgĩnĩk cĩk alugunyi baa lõõla, cĩk ijiar gẽẽnyĩth cĩ eetu, cĩ adĩman nẽ ĩcĩ Kiristo cĩ anyi Nyekuc kẽbẽlbẽl. 10 Ĩthõng muwẽẽnĩt nĩcẽ coo, mĩ ũtũbanothĩk kõr, anyi katĩ Nyekuci Kiristo kagam kaal vẽlẽk cĩk tammutiddin kĩ cĩk loocu.
11 Adĩman dõõkĩthĩ Nyekuci kaal gõõla ĩcĩ adiimi nẽ ĩnõõgõ kĩdĩmantẽ, ĩnõõnõ thĩ cĩ ẽbẽranẽt nẽ ageeta kĩĩtõ dõõlĩ cĩgĩnĩk ĩcĩ Kiristo.
12 Atican balna Nyekuci ketee, kĩĩ katĩ kidihiththia naaga Yudei ĩnõõnõ, nyatarka balna keeginna naaga eet cĩk kayakca muwẽẽnĩt cĩ abũnna ĩcĩ Kiristo ĩcĩ owu. 13 Ikiyyia ayahawung nẽ buu agiitia eet cĩk athii cĩ eeginnu Yudei thõõth cĩ ẽẽn dĩdĩ, cĩ ẽẽn Nyemut cĩ Abũnna cĩ Kiristo,c cĩ ẽẽlanung agiitia. Aryiwu balna niigia leminit cunung ĩcĩ Kiristo, ĩthõng anyĩwothiwung agiitia Ririwacĩ cĩ Dĩhĩmĩd wũ balna aduwa Nyekuci. Anyung Ririwacĩ cĩ Dĩhĩmĩ agiitia edenyciay niigia ngatĩ eeginnu eet cĩk Nyekucak. 14 Anyet Ririwacĩ cĩ Dĩhĩmĩ ageeta buu kagaac kĩĩtõ ne, anyet katĩ Nyekuci ageeta thoothonniok vẽlẽk cĩk katĩ aragĩth eeta cĩgĩnnẽk. Ĩthõng thĩ, katĩ keelliay naaga, kĩĩ katĩ kĩdĩhĩthĩt naaga ĩnõõnõ, ĩthõng kubuluthit ĩnõõnõ.
Alawõõĩ Paulo lemnyiok Ẽvẽthatha
15 Kathihi balna thẽk na thõõth cĩ elemu niigia Makayyioit Yesu, kĩ mĩnan cĩ amĩnanu lemnyiok vẽlẽk cĩk callĩk cĩk Nyekucak, 16 nga kĩbĩl na ngatĩ kẽnnẽccẽ Nyekuc ne, ibalallẽ, nyatarka agiitia, kahadanung na katĩ ngĩ kalayyie dõõkĩthĩ. 17 Nga na kajini Nyekuc cĩ abulie cĩ ẽẽn Baatĩ Makayyioit cĩnac Yesu Kiristo noko, kĩĩ kaanyung nẽ gẽẽnyĩth cĩnnĩ, kĩĩ katĩ agaac ĩnõõnõ jurrung. 18 Kalayyie na kathĩ ne, anycĩk lanyĩt cĩ Nyekuco kũtũkũl thinneti cuguk, kĩĩ katĩ agaac thõõth cĩ muwẽẽnĩt cĩ abũnna, wũ balna anyung Nyekuci kõr wũ balna ẽbẽranung nẽ agiitia. Ĩthõng thĩ, katĩ ũrũbtawu gatan cĩ abulie cĩ katĩ ẽẽn cunung, kõdõwẽ kĩ eet cĩk callĩk cĩk Nyekucak vẽlẽk. 19 Kadiimnyung na agiitia agaac tiirthẽt, kĩ makathĩt cĩ ayahacet Nyekuci ageeta cĩk kẽlẽmĩ ĩnõõnõ wo. Ẽẽn coo tiirthẽt wũ balna adĩmanini Nyekuci, 20 kũrũgũtha Kiristo daaĩtha, ĩthõng aanyĩk ĩnõõnõ kaavu attia cĩnnĩ ĩcĩ athioe tammuatiddina. 21 Agam Kiristo kaal vẽlẽk cĩk tiirtik, kĩ cĩk ayak makathĩt, kĩ loociok, kĩ alaanẽt vẽlẽk. Agam nẽ kaal vẽlẽk cĩk looc coo, ĩthõng katĩ agam kaal vẽlẽk cĩk looc cĩ katĩ aku kõr ĩmma buu. 22 Anyi Nyekuci Kiristo tiirthẽt cĩ agamĩ kaal vẽlẽk, ĩthõng ẽbẽra ĩnõõnõ kĩĩ Makayyioit cĩ kaal vẽlẽk cĩk bũnnathĩt cĩ kelethiawo,f 23 cĩ ẽẽn ẽlẽ cĩ Kiristo, ĩthõng abĩththĩ Kiristo ẽlẽ cĩnnĩ, cĩ anyi kaal vẽlẽk kũrũgĩt.