7
Ĩthõng thĩna, niigia gõõnõga cĩk kamĩnanung wo, kĩcĩ kayait naaga thoothonniok cĩk tiirtik cĩk abũtana Nyekuci wo, kaavut rẽẽna kaalĩy vẽlẽk ĩcĩk woccia anyi eleeti kĩ ririwanĩn cĩgaac kĩĩtõ riiriny. Kadiim naaga keegin eet cĩk abũnna cĩk callĩk, ĩthõng kayait avuthit cĩ kongolini Nyekuc.Bẽlbẽllõn cĩ Paulo
2 Oyihetu ageeta thinneti cuguk. Nyatarka athii cĩ kadĩmanna et ĩmma buth, athii cĩ kẽgẽrẽthanna naaga et ĩmma, ĩthõng athii cĩ kĩtdanya et ĩmma. 3 Athii na cĩ kaduwa ketee, kĩĩ katĩ ketediwung na agiitia thõõth, ĩthõng thĩ, kuduwawung balna na agiitia ĩcĩ owu kennewung ne, kamĩnannung naaga agiitia thinnetinẽy cĩgaak dĩdĩ, kõdẽ woyyia ngĩ karũmẽ kõdõwẽ, kõdẽ ngĩ kadaaĩ kõdõwẽ kĩ agiitia. 4 Õkõmĩ thĩnĩn cannie õrrõt ĩcunung, ĩthõng kirianung na agiitia õrrõt, ĩthõng anya tiici cunung wo, aneeta dĩhĩthẽnĩt, ĩthõng canana ĩcĩnac alna katali na õrrõt noko.
5 Ma balna ngĩ kivitiaha kõdõlanta looc cĩ Makedonia, ivitia ipiryia eleeti cĩgaak õrrõt, ĩthõng kamũdana balna canan goolliowẽy vẽlẽk taktak ĩcĩ mĩrõk cĩgaak, kĩ kulliathĩt cĩ aavĩ thinnetinẽy cĩgaak. 6 Ĩthõng thĩ, Nyekuc cĩ amanymanyan eet cĩk abarritit thinneti cĩgĩk, ĩthõng amanymanyanet nẽ ageeta ngatĩ itionacet balna nẽ Tiito, 7 kĩĩ katĩ kebelbellia naaga ngatĩ kacinia Tiito, ĩthõng gõõl wũ balna anyiccu niigia ĩnõõnõ kẽbẽlbẽl coo. Ikiyyia balna uduwaet nẽ ageeta gõõl wũ balna adiimangũ niigia aneeta, ĩthõng omothiewu õrrõt, ĩthõng ĩrĩcantahangũ aneeta. Ikiyyia anya thõõth coo aneeta kẽbẽlbẽl õrrõt.
8 Kõdẽ woyyia balna mĩ anyung nyaraga cannie wo agiitia mothinit,a athii cĩ gẽrtha kĩ aneeta. Kõdẽ woyyia balna nẽnnẽ ngĩ gẽrtha kĩ aneeta, ngĩ kacini ngĩ anyi nyaraga cannie wo thinneti cuguk kuwucit kĩdĩĩc. 9 Ĩthõng thĩ, yoko kẽbẽlbẽla nana, ĩthõng athii cĩ ẽẽn, nyatarka mothinit cunung, ĩthõng thĩ, nyatarka ĩdĩma balna Nyekuci mothinit cunung wo, kĩĩ gõõl cĩ amiirenu niigia ovvoyyu ĩcĩnnĩ kĩ cĩ adiim nẽnẽ, kĩĩ katĩ athii eeti ĩmma kõrgẽna cunung cĩ kadĩmanna naaga buth tõ. 10 Anyi mothinti cĩ aku Nyekuca eet kimiiryie kõõt ĩcĩnnĩ, kĩĩ katĩ keelliay nẽẽgẽ, ĩthõng yoko ĩthĩnga nẽẽgẽ omoththie naboo. Ĩthõng thĩ, anyi mothinti cĩ looc coo ĩnõõgõ daaĩth.
11 Ĩcĩnĩt da, adĩmanecung agiitia mothinti cĩ aku Nyekuca nyia? Anyung agiitia idiimit othoothit thõõth cĩ ẽẽn dĩdĩ, idiimit ngatĩ amirnu, avaracit, akulecu jien. Ĩthõng anyung idiimit õrrõt ngatĩ acinniangũ ĩthõng ĩrĩcantahangũ aneeta, idiimit ngatĩ acĩnnu teedinet cĩ ẽẽn dĩdĩ. Ĩthõng eyeliawu ngatĩ abũnnanu niigia thõõtha coo vẽlẽk dĩdĩ. 12 Kõdẽ woyyia balna ngĩ kẽhẽdacung na agiitia nyaraga, athii balna cĩ kẽhẽẽda, nyatarka et cĩ balna ẽgẽrẽthan thõõth, kõdẽ kẽẽl et wũ balna ẽgẽrẽthan goonia ĩnõõnõ buth canana. Kẽhẽẽda balna, kĩĩ katĩ keyelewung agiitia Nyekuci gõõl cĩ amĩnanietu niigia ageeta. 13 Ĩthõng ikiyyia etheret balna ageeta thõõth cunung õrrõt.
Ĩthõng Tiito cĩ balna alna aku ĩtooricet ageeta talinit õrrõt, nyatarka kĩcĩnta naaga ĩnõõnõ, ngatĩ ẽbẽlbẽlĩ nẽ õrrõt, nyatarka ivitiawu balna anyciwu niigia vẽlẽk muwẽẽnĩt cĩnnĩ kuyuwuth. 14 Kirianẽ balna na ĩnõõnõ, nyatarka agiitia, ĩthõng athii balna cĩ anyangũ niigia aneeta ngawani. Ĩthõng thĩ, thoothiowa wũk balna kaduwaccung naaga agiitia vẽlẽk, ivitia edenyciay ĩĩtõ dĩdĩ, ĩthõng ikiyyia edenyiay riania cĩnang cĩ kirianecia Tiito, nyatarka agiitia kĩĩ dĩdĩ. 15 Amĩnannung agiitia Tiito õrrõt katĩ ngĩ ahada nẽ gõõl, wũ balna ongolinu niigia ĩnõõnõ, ĩthõng abarrittu tongolintia, ngatĩ ẽlẽmacu niigia ĩnõõnõ kikiyyia ĩcunung. 16 Katali na õrrõt, nyatarka õkõm thĩnĩn cannie kaalĩy cĩk adĩmannu niigia.