Anyinit cĩ alũta nẽẽgẽ cĩ lemnyiowu Yeruthalẽma
8
Gõtõõnõga kĩ ngõõnõga, kadiimnyung naaga agiitia agaac bũnnathĩt cĩ balna anyi Nyekuci meelitin cĩ lemnyiok cĩk kelethianya cĩk looc cĩ Makedonia. 2 Kõdẽ woyyia balna ngĩ ayait nẽẽgẽ avuthit cĩ õkõmĩ õrrõt, ĩthõng naboo ĩĩtõ piryiak õrrõt, ẽbẽlbẽl balna nẽẽgẽ õrrõt gimmanoko, ĩthõng ĩdĩmta anyintiok talintia. 3 Ĩthõng kaduwa na dĩdĩ kathĩ ne, adĩma balna nẽẽgẽ anyintiok cĩk meelĩk kijiar cĩk woyyia balna adĩma nẽẽgẽ mĩn. Nyatarka adiim balna nẽẽgẽ ngĩ adĩman noko, 4 ivitia alayyiet lemnyiowa ageeta, kĩĩ katĩ kẽlẽmta naaga ĩnõõgõ kayait talinit, ngatĩ adĩmaanĩ anyintiok cĩgĩk cĩk anyi lemnyiok cĩk Makayyiokto Yesu Yeruthalẽma. 5 Ivitia ĩdĩmta nẽẽgẽ anyintiok kijiar wũk balna kahad naaga, ĩthõng thĩ, ngatĩ anyĩcẽ nẽẽgẽ eleeti cĩgĩk Makayyioit Yesu ĩcĩ owu, ĩthõng thĩ kĩ ageeta dimẽnta ĩcĩ Nyekuco.6 Kajinna balna thẽk naaga Tiito wũ baa ithiananĩ tiic coo, kĩĩ katĩ keelung agiitia edeciak tiic wũ abũnna, wũ balna ẽtẽrẽhanu niigia. 7 Ĩthõng thĩ, kĩcĩ aticaninu niigia õrrõt ijiarit eet vẽlẽk. Ayakcu niigia leminit cĩ õkõmĩ, othooththu niigia jurrung, ĩthõng agayyu thõõth cĩ obbi, ĩthõng abarritecu ngatĩ aticanothicu Nyekuc, ĩthõng amĩnannetu ageeta. Ĩthõng yoko, kadiimnya ngĩ anyiccu anyinit talintia cĩ thinneti cuguk kijiar eet vẽlẽk.
8 Athii na cĩ katĩnganeccung agiitia iticanit ketee, ĩthõng thĩ, kadiimi katĩmannung na agiitia thõng, katĩ thẽk ngĩ ẽẽn mĩnanĩ cunung dĩdĩ, ngatĩ eyehethecu mĩnan cunung kĩ thoothonniok cĩk adiim ngĩ ẽyẽla eeta gwuak. 9 Agayyu niigia bũnnathĩt cĩ Makayyioit cĩnac Yesu Kiristo, ngatĩ abalini balna nẽ, ĩthõng nyatarka agiitia ikiyyia ĩthĩ nẽ ngĩjũrrait, ĩthõng ngĩjurrathẽtĩna ĩcĩnnĩ wo, ivitiawu aballiowu niigia.
10 Ĩthõng tĩrĩthẽnĩt cannĩ coo cĩ aduwa thõõth cĩ ĩdĩmantu niigia jurrung. Erkit wũ balna gõlla agiitia balna ĩcĩ owu cĩk adiimnyu ngĩ anyiccu anyinit. 11 Ĩthõng yoko, edeciak tiic cunung wũ balna ẽtẽrẽhanu. Ĩthõng anycĩk diimẽnẽt cunung kiirioit kĩ decianet cunung, gõõla ĩcĩ kaal cĩk ayakcu niigia. 12 Mĩ adiimi niia anyi anyinit cunni thĩnĩna cunni dĩdĩ, elemnyie katĩ anyinti kaalĩy cĩk ayai niia kõdẽ maka kõdẽ dĩca.
13 Athii cĩ kathĩnna naaga ne, kadiim ngĩ anyiccu rũgẽt kũmũc eetĩnẽy gwantĩk, ĩthõng kaanycĩha kõkõm ĩcunung, ĩthõng thĩ, aduwõy woccia thẽk thõõth ĩcunung vẽlẽk thõng. 14 Ĩthõng yoko, ayakcu niigia kaal cĩk meelĩk, otholit kĩ ĩnõõgõ katĩ ngĩ ayak nẽẽgẽ kaal cĩk kĩdĩk kaganoko, ĩthõng katĩ vurtia, mĩ ayait nẽẽgẽ buu kaal cĩk meelĩk, avvu katĩ othollu kĩ agiitia, kĩĩ katĩ kuduwõy woccia thẽk thõõth ĩcunung vẽlẽk thõng, 15 kĩcĩ eheeddi Nyaragawa ĩcĩ Nyekuco athĩ ne, “Eeti wũ balna alũta cĩ makĩ athii cĩ ayak cĩ makĩ õrrõt, ĩthõng eeti wũ alũta cĩ dĩcĩ athii cĩ ayak cĩ dĩcĩ.”a
Tiito kĩ gõõnõgĩ
16 Kennei na Nyekuc ne, ibalallẽ cĩ anyi balna thĩnĩn cĩ Tiito kuthutung agiitia kaavu kĩcĩ kathunnung na agiitia wo. 17 Kalayya balna naaga Tiito, ĩthõng ẽlẽm nẽ gõõla, kĩĩ katĩ kẽhẽrõnawung agiitia, ĩĩdĩ balna nẽ ngatĩ akuni, nyatarka adiim nẽ ngĩ aku acĩnnung agiitia. 18 Kitionana naaga Tiito kiiriokta kĩ wobjiait ĩmma cĩ Makayyiokto, cĩ agayyie meelitina cĩ lemnyiok cĩk kelethianyawu, ngatĩ aticanni, nyatarka thõõth cĩ Nyemut cĩ Abũnna cĩ Kiristo. 19 Athii cĩ ẽẽn kĩyokowẽ dõ, ẽbẽra balna meelitinnya cĩk lemnyiok cĩk kelethianyawu ĩnõõnõ, kĩĩ katĩ kiiriokta kĩ ageeta, kĩcĩ kayakca naaga anyinit coo cĩ katĩ anyi Makayyioit dĩhĩthẽnĩt, ĩthõng ẽyẽla ĩĩ ne, kabarritecca naaga ngatĩ keelia lemnyiok. 20 Athii cĩ kadiimnya et ĩmma kothoothet ageeta buth gõõla cĩ kagamia anyintiok cĩkkõ, wũk balna meelĩk wũk adĩma lemnyiowa. 21 Ĩthõng karĩcanana naaga anyintiok cĩkkõ jurrung, athii ngatĩ ẽẽn kẽbẽrẽnĩy ĩcĩk Makayyioktak dõ, ĩthõng thĩ, karĩcanana kẽbẽrẽnĩy ĩcĩk eetu buu.
22 Kitionana naaga Tiito kĩ wobjiait coo, kĩ gotooniet ĩmma cĩ Makayyiokto. Kĩtĩmanta naaga gotooniet coo ngõnana cĩk meelĩk, ĩthõng kijioktaha ngĩ ẽẽn nẽ et cĩ ayak avuthit cĩ woccia ellung agiitia, ĩthõng yoko, adiim nẽ ngĩ ellung agiitia kijiar, nyatarka ariwung nẽ agiitia thĩnĩna cĩnnĩ dĩdĩ. 23 Katicaninia naaga kĩ Tiito kõdõwẽ, nyatarka agiitia, ĩthõng gõtõõnõga cĩk ẽẽn ramma ẽẽ, ẽẽn nẽẽgẽ eet cĩk itiona meelitini cĩ lemnyiok cĩk kelethianya cĩgĩk mĩn mĩn, kayaktak nẽẽgẽ bulẽnĩt Kiristo. 24 Ĩthõng thĩna, ĩdĩmanit ĩnõõgõ jurrung, gõõla cĩ woccia acĩnĩ meelitini cĩ lemnyiok cĩk kelethianyawu mĩnan cunung, kĩĩ katĩ kivitia kagaacõ nẽẽgẽ, nyia kiriantung naaga agiit wo.