6
Kĩcĩ katicanni naaga kõdõwẽ kĩ Nyekuc, kalayyung naaga agiitia ketheccung ne, iticantõõĩ bũnnathĩt cĩ Nyekuco gõõla ĩcĩ abũnna. 2 Aduwa Nyekuci Nyaragawa cĩnnĩ athĩ ne,“Mĩ ikiyyia kõr wũ balna kamanici nana,
kikiyyia na kithihi aniitia,
ĩthõng ma kõr wũ balna adiime niia elinit,
kakuni keelina aniitia.”a
Ĩthõng kaduwacung na Paulo dĩdĩ, ikiyyia kõr cĩ ellung Nyekuci agiitia yoko.
Canan cĩ arũba Paulo
3 Athii balna cĩ kalaamnya naaga et ĩmma gõõla, kĩĩ katĩ kithii gerthetini cĩ amudiay tiica cĩnang wo tõ. 4 Ĩthõng thĩ, kaalĩy kĩ goolliowẽy vẽlẽk, kadiim ngĩ kẽyẽla naaga ngatĩ keegin nyakapanak cĩk Nyekucak. Balna gõõ kõmõgĩ naaga pĩrnanẽt kĩ canan, kĩ mothinit. 5 Kuukteha balna naaga, ĩthõng karyiwothĩha kĩjanatõ, ĩthõng uukcet meelitini ageeta ngõnana cĩk meelĩk. Kiticantowa balna naaga õrrõt, ĩthõng kacĩnena kaal, ĩthõng adakcet boobo. 6 Ĩthõng thĩ, keeginna naaga callẽ, ĩthõng kagayyia thõõth cĩ Nyekuco dĩdĩ, kĩ ngatĩ kõmõkja canan, ĩthõng kiittia thimattiak. Aavu Ririwacĩ cĩ Dĩhĩmĩb ĩcĩnang, ĩthõng kamĩnanna naaga eet gõõla cĩ ẽẽn dĩdĩ. 7 Kirionna naaga thõõth cĩ ẽẽn dĩdĩ tiirthẽta cĩ Nyekuco. Katicaninia naaga tũũrẽn cĩk thõõth cĩ edeemothi attia ĩcĩ athio, kĩ attia cĩ angettio. 8 Kõdẽ woyyia balna ngĩ otongolliehet eeta gwuak ageeta, kõdẽ athii gwuak cĩ ongolinet, kõdẽ abuluthet, kõdẽ acĩĩnnet, kõdẽ athĩ ne, keeginna naaga volongnyiak, ĩthõng thĩ, alna nga kõthõõththa naaga dõõkĩthĩ thõõth cĩ eleeti cĩgaak cĩk ẽẽn dĩdĩ wo noko. 9 Athii cĩ agayyet eeta gwuak ageeta, ĩthõng agayyietu niigia ageeta jurrung. Kaavuttia naaga kĩcĩ kadaakta vẽlẽk, ĩthõng thĩ, alna ngaanĩ karũkna noko. Kuukteha balna naaga, ĩthõng athii cĩ karuwuenia, 10 ĩthõng kẽbẽlbẽlla kũdũt, kõdẽ woyyia wathinniowẽy cĩk mothintiak. Ĩthõng, kõdẽ woyyia keeginna naaga ngĩjũrra, kaanycĩha naaga eet cĩk meelĩk õrrõt balinit, kõdẽ woyyia kothii gii cĩ kayakca naaga, ẽẽn kaala vẽlẽk cĩgaak.
11 Niigia gõtõõnõga kĩ ngõõnõga cĩk Korinto, kothoothicung naaga agiitia mũrũũr, ĩthõng koyiwung naaga agiitia thinneti cĩgaak dĩdĩ. 12 Athii cĩ kĩcaccung naaga agiitia mĩnan cĩnang, ĩthõng thĩ, agiit dõ, cĩk ĩcaacettu ageeta mĩnan cunung. 13 Kaduwacung na agiit kĩcĩ kaduwai dõõlĩ cĩganĩk, ĩthõng kathĩ ne, oyihetu ageeta thinneti cuguk buu.
Ciith cĩ Nyekuc cĩ arũgĩ
14 Nyĩ arumenu kĩ eet cĩk athii cĩ ẽẽn lemnyiok cĩk Kiristo. Aduwõy woccia gõõ eeta cĩk abũnna kĩ eet cĩk gerthek? Kõdẽ aduwõy gõõ lanyĩtĩ kĩ muwur? 15 Ganõn jang cĩ woccia ayak Kiristo kĩ Thĩttan?c Kõdẽ nyia gõõ cĩ õthõl lemnyiowa cĩk Kiristo kĩ eet cĩk athii cĩ ẽẽn lemnyiok? 16 Ganõn jang cĩ ayak Ciith cĩ Nyekuco kĩ kaal cĩk aar eeta kĩĩtõ nyekucnya wo? Nyatarka keegin naaga Ciith cĩ Nyekuc cĩ arũgĩ. Kĩcĩ aduwa Nyekuci Nyaragawa ĩcĩnnĩ athĩ ne, “Kaavẽ katĩ na ĩcĩnĩng, ĩthõng kiiriokta kĩ ĩnõõgõ. Keeni katĩ na Nyekuc cĩnĩng, ĩthõng ĩĩtõ katĩ nẽẽgẽ eet cĩganĩk.”d
17 “Ĩthõng thĩna, athĩ Makayyioiti ne,
‘Ũtũngtek niigia eet cĩk athii cĩ ẽẽn lemnyiok
engeryiõy kĩ ĩnõõgõ,
nyĩ awumnyu kaal cĩk ẽẽn riiriny
ĩthõng kelemnyung katĩ na agiitia.’ ”e
18 “Kuduwa na Makayyioiti
cĩ Tiiri cĩ Ijiar vẽlẽk kathĩ ne,
‘Kĩthĩ katĩ na Baaba cunung, ĩthõng iittu katĩ niigia
dõõlĩ cĩganĩk cĩk maacĩk kĩ cĩk ngayyik.’ ”f