Korookjiok cĩgaac tammuatiddina
5
Aatĩ eleeti cĩgaac kĩ tuggueta cĩk kaatẽ naaga loota ngato wo. Ĩthõng mĩ õõyõktẽ tuggueta cĩkkõ, anyet katĩ ageeta Nyekuci codoi codoi korookjiok cĩk kaatẽ naaga kũdũt tammuatiddina. Ẽẽn katĩ korookjiowa cĩkkõ cĩk athii cĩ ẽngẽnyca eeti cĩ olli. 2 Ma ngaanĩ kaatĩ naaga loota ngato, ngaanĩ alna kabalac, nyatarka kadiim kõvvõ naaga kaatĩ korookjiowẽy ĩcĩgac tammuatiddina kĩ Nyekuc, 3 nyatarka, mĩ kayak naaga korookjiok, kamũda katĩ kẽnnẽ ngĩtĩ kaatẽ naaga dõõkĩthĩ. 4 Ma ngĩ kaatĩ naaga tugguẽtẽy cĩk aatĩ loota wo, kabalac naaga, ĩthõng kapĩrna, nyatarka athii naaga cĩ kadiim ngĩ kuungni eleeti cĩgaac cĩk katĩ adaaĩ kaganoko wo. Ĩthõng thĩ, kadiim naaga kũũwũ eleeti cĩkkõ kĩĩtõ korookjiok cĩgaac tammuatiddina, kĩĩ katĩ eleeti cĩgaac cĩk adaaĩ wo, kutuwuyyie woccia kithii cĩ adaaĩ. 5 Adiim balna Nyekuci ngĩ anyet ageeta eleeti cĩk woccia katĩ ũũkcĩ wo, ĩnõõnõ cĩ anyet ageeta Ririwac cĩ Dĩhĩmĩ cĩ anyet kagaac ngĩ adĩman katĩ Nyekuci thõõth coo.6 Ĩthõng thĩna, kaanycĩk thinneti cĩgaac kokomit. Ma ngaanĩ karũgĩ naaga kayak eleeti loota ngato, ngaanĩ thẽk keegin rẽẽntĩ ĩcĩ Makayyiokto. 7 Karũgĩ naaga, nyatarka kẽlẽmĩ Makayyioit, athii cĩ ẽẽn, nyatarka kaal cĩk kacĩn naaga thõng. 8 Kaanycĩk thinneti cĩgaac kokomit, nyatarka mayya ngatĩ kadaaknĩ loota ngato, ĩthõng kõõt õlõõ tammuatiddina kũrũmtẽ kĩ Makayyioit. 9 Kõdẽ woyyia kaavut õlõõ tammuatiddina kĩ Makayyioit, kõdẽ ngaanĩ karũgĩ naaga loota ngato, ngaanĩ thẽk kadiim naaga Makayyioit kebelbelehet ageeta. 10 Nyatarka aku katĩ Kiristo aavĩ loota taabawa, ĩthõng ẽtẽd katĩ nẽ thoothonniok cĩgaac mĩn mĩn cĩk abũnna, kõdẽ cĩk gerthek.
Anycĩk eet vẽlẽk kagayyiõy kĩ Nyekuc
11 Kagga naaga ngatĩ kongolini naaga Makayyioit, ĩthõng kuduktiak eet vẽlẽk kivitia ĩcĩnnĩ. Agayyet Nyekuci ageeta ngatĩ keeginnie eet cĩk kaatĩ kuu, ĩthõng kamui agayyu niigia buu thõõth coo thinnetinẽy cuguk. 12 Athii naaga cĩ katĩmania ngatĩ kiriania eleeti cĩgaak ĩcunung naboo, ĩthõng thĩ, kadiimnyung naaga agiitia iriantietu ageeta, kĩĩ katĩ koccia atajanit niigia eet cĩk irianĩ kaal cĩk acĩn nẽẽgẽ kĩ ngatĩ woyyia irianĩ kaal cĩk aatĩ thinnetinẽy ĩcĩk eetu.
13 Ma ngĩ adakcet ageet ngaamõnĩ kĩ cĩ aduwa eeta gwuak, ẽẽn coo thõõth cĩnang kĩ Nyekuc. Ĩthõng mĩ mũrra muwẽẽnĩtĩ cĩnang mũrra, kĩĩ katĩ keelung agiitia. 14 Nyatarka agamnyet ageeta mĩnanĩ cĩ Kiristo, nyatarka kagga naaga ngatĩ adaaĩ balna Kiristo, nyatarka eet vẽlẽk, ẽyẽla thõõth coo, ngatĩ õthõl eeta vẽlẽk daaĩth cĩnnĩ. 15 Ĩthõng balna adaaĩ Kiristo, nyatarka eet vẽlẽk, kĩĩ katĩ athii eeta cĩ arũgĩ, nyatarka eleeti cĩgĩk dõ, ĩthõng thĩ, arũgĩ nẽẽgẽ, nyatarka Kiristo wũ balna adaaĩ, ĩthõng ũrũga naboo, nyatarka ĩnõõgõ.
16 Ĩthõng yoko, kadiim naaga ngĩ athii cĩ ketedĩca eet thoothonniok kĩ eeta cĩk looc coo, kõdẽ woyyia balna ngĩ kẽtẽd naaga thõõth cĩ Kiristo gõõla nĩĩcẽ, ĩthĩnga thĩ yoko kadĩman noko. 17 Ĩthõng thĩna, mĩ ikiyyia ẽlẽm eeti ĩmma Kiristo, ikiyyia ithii rũgẽtĩ cĩnnẽ wũ balna rẽẽnĩ, ĩthõng ikiyyia ũtũwẽ rũgẽtĩ cĩnnẽ ĩthĩ jõr. 18 Adĩman balna Nyekuci thoothonniok cĩkkõ vẽlẽk, ngatĩ itionanẽ nẽ Kiristo kikiyyia kaganĩthet ageeta kĩ ĩnõõnõ, ĩthõng anyet ageeta kĩĩtõ eet cĩk kaganĩth eet õõgĩ kĩ Nyekuc.
19 Athĩ thõõth coo ne, aganĩth Nyekuci eet cĩk loocu ẽla cĩnnĩ, nyatarka Kiristo, ngatĩ anyet ageeta kagayyiõy kĩ ĩnõõnõ, ĩnõõnõ thĩ cĩ athii cĩ ekebiciet Nyekuci ageeta gerthetin cĩnac. Ĩthõng anyet tiic cĩ kõthõlĩ nyemut cĩ ganono. 20 Ĩthõng thĩna, kĩĩtõ naaga tionniak cĩk Kiristo, ĩthõng ĩlalewung Nyekuci agiitia ĩthĩhĩt thõõth cĩnang. Kõthõõththa naaga nyemut cĩ Kiristo, ĩthõng dĩdĩ kadiimnyung naaga agiitia agayyiõy kĩ Nyekuc. 21 Kõdẽ woyyia balna ngĩ athii Kiristo cĩ ẽẽn gẽrẽthannioit, aanyĩk balna Nyekuci ĩnõõnõ kĩĩ gii cĩ cavĩto, nyatarka gerthetin cĩnac, kĩĩ katĩ kelemet woccia Nyekuci ageeta kũbũnta.