Balinit cĩ aavĩ ijjionyay
4
Ĩthõng thĩna, nyatarka tamati cĩ Nyekuco, kivitiaha kĩdĩmanta naaga tiic cĩnnĩ, ĩnõõnõ thĩ cĩ athii cĩ kaanyĩcca naaga thinneti cĩgaak kabarritit. 2 Ĩthõng thĩ, kẽnnẽ kaharneca naaga thoothonniok cĩk atican eeta labak cĩk ẽẽn ngawani. Ĩthõng athii cĩ kĩgõõlla et ĩmma, kõdẽ athii cĩ kũwũyya thõõth cĩ Nyekuco. Ẽẽn Nyekuci keberec cĩnang cĩ aga ngatĩ kõthõõththa naaga thõõth cĩ ẽẽn dĩdĩ, ĩthõng aga eeta vẽlẽk thinnetinẽy cĩgĩk ngĩ ẽẽn thõõth coo dĩdĩ. 3 Ĩthõng mĩ alugunyi Nyemut cĩnang cĩ Abũnna wo, alugunyi ĩcĩ eet cĩk katĩ adaaĩ dõ. 4 Ĩdĩĩt nyekuci cĩ looc coo kẽbẽrẽ cĩk eet cĩk athii cĩ ẽẽn lemnyiok, kĩĩ katĩ athii cĩ acĩn nẽẽgẽ lanyĩt cĩ Nyemut cĩ Abũnna, cĩ ẽyẽla bulẽnĩt cĩ Kiristo cĩ õgõõn kĩ Nyekuci kir. 5 Athii cĩ kirionna naaga thõõth cĩ eleeti cĩgaak, ĩthõng thĩ, kirionna thõõth cĩ ẽnnẽ Yesu Kiristo Makayyioit. Itionanet Yesu ageeta kivitiaha kiittia ticcianniok cuguk, nyatarka thõõth cĩnnĩ. 6 Aduwa balna Nyekuci athĩ ne, “Anycĩk lanyĩt katalany muwuratõ.”a Ĩthõng yoko, ũtũkũl nẽ lanyĩt cĩnnĩ thinnetinẽy cĩgaac, lanyĩt coo cĩ anyet kagaac bulẽnĩt cĩnnĩ cĩ edenyiay nguuma ĩcĩ Yesu Kiristo.7 Kayak naaga balinit coo eletinẽy ĩcĩgac cĩk õgõõn kĩ ijjionya wo, cĩk ẽyẽla tiirthẽtĩ cobbi coo cĩ ẽẽn dĩdĩ ĩcĩ Nyekuco, athii cĩ aku ĩcĩnac. 8 Kijioktaha naaga canan goolliowẽy vẽlẽk, ĩthõng thĩ, nga kijiaryieha, kõdẽ woyyia ngĩ athii cĩ kagayya naaga gii cĩ kadĩmanna, ĩthõng thĩ, nga kũtũngtẽẽa naaga tiic, 9 mĩ adĩmannet eeta ageeta buth, aavĩ kẽnnẽ Nyekuci ĩcĩnang, ĩthõng mĩ kiinniana, alna kĩnganna jiena noko. 10 Kayak naaga dõõkĩthĩ daaĩth cĩ Yesu eletinẽy cĩgaac, kĩĩ katĩ kedenyiay woccia rũgẽtĩ cĩnnẽ eletinẽy cĩgaac. 11 Nyatarka ageeta cĩk nga karũgĩ wo, kaanyĩwothi naaga dõõkĩthĩ daaĩth, nyatarka Yesu, kĩĩ katĩ kedenyiay rũgẽtĩ cĩnnẽ eletinẽy ĩcĩgac ĩcĩk katĩ adaaĩ wo. 12 Athĩ thõõth coo ne, aticanni daaĩthĩ eletinẽy cĩgaak, ĩthõng iticanõy rũgẽtĩ ĩcunung.
13 Ĩthõng thĩ, nyatarka kayak naaga leminit cĩ aduwõy kĩcĩ eheeddi Nyaraga cĩ Nyekuco cĩ athĩ ne, “Kelemi balna na Nyekuc, ĩthõng thĩna, kõthõõtha na.”b Ĩthõng kayak naaga leminit coo, kĩĩ katĩ kelemit naaga buu Kiristo, ĩthõng kothoothitõ thõõth cĩnnĩ, 14 nyatarka kagga naaga ngĩ athĩ ne, arũgũtha balna Nyekuci Makayyioit Yesu daaĩtha. Arũgũthanet katĩ nẽ ageeta buu kĩ agiitia daaĩtha, kĩ balna ngĩ arũgũtha nẽ Yesu. Ĩthõng ayahahet katĩ nẽ ageeta ngĩtĩ aavẽ nẽnẽ, kũrũmtẽ kõdõwẽ kĩ ĩnõõnõ. 15 Ẽẽn coo vẽlẽk anyinit cunung, kĩĩ katĩ kagaacõ eeta cĩk meelĩk õrrõt bũnnathĩt cĩ Nyekuco, ĩthõng anyĩk thõõth coo eet cĩk meelĩk kentek Nyekuc ne, ibalallẽ, ĩthõng ĩdĩhĩthĩt ĩnõõnõ.
16 Ĩthõng thĩna, athii cĩ kaanyĩcca naaga thinneti cĩgaak kabarritit, kõdẽ woyyia ngĩ idiimitõ adaaitõ eleeti cĩgaak dõõkĩthĩ, alna nẽnnẽ ĩtooryi tiirthẽtĩ cĩ thinneti cĩgaak wathinniowẽy vẽlẽk. 17 Ĩthõng pĩrnanẽtĩ coo cĩ kayak naaga wo dĩca, ĩthõng athii cĩ alna kũdũt. Ĩthõng thĩ, pĩrnanẽtĩ coo anyet katĩ ageeta bulẽnĩt cobbi õrrõt cĩ alna kũdũt. 18 Kaala cĩk kacĩn naaga thõng wo, ẽẽn nẽẽgẽ kaal cĩk athii cĩ alna kũdũt, ĩthõng kaala cĩk athii cĩ kacĩn naaga wo, ẽẽn nẽẽgẽ kaal cĩk alna kũdũt. Ĩthõng yoko, kĩcĩntẽ naaga bak jurrung, kĩĩ katĩ kĩcĩnĩt naaga kaal cĩk athii nẽẽgẽ cĩ edenyiay wo, nyatarka alna katĩ nẽẽgẽ kũdũt.