Nyaraga cĩ ẽẽn Ramma cĩ eheedi Paulo
Lemnyiok cĩk Kelethia cĩ Korinto
1
Aneeta Paulo cĩ keeni tionniaita cĩ Yesu Kiristo,b cĩ kẽhẽdacung nyaraga coo, nyatarka ẽbẽraha balna aneeta Nyekuci thõõtha coo. Karũmẽna kĩ Timotic cĩ ẽẽn lemnyioit kĩ na wo.Kitionacung na agiit Nyaraga coo, kelethiad cĩ lemnyiok cĩk kõrõõk cĩ gaalawu cĩ Korinto kĩ meelitin cĩ lemnyiok vẽlẽk cĩk aatĩ looca cĩ Akeyyia.
2 Anycĩk niigia bũnnathĩt kĩ ganõn cĩ aku ĩcĩ Nyekuc Baangiet cĩnac, kĩ Makayyioit cĩnac Yesu Kiristo kaanycung agiitia aavut jurrung.
Anyi Nyekuci lemnyiok manymanyaniniet vẽlẽk
3 Kĩdĩhĩthĩt Nyekuc cĩ ẽẽn Baatĩ Makayyioit cĩnac Yesu Kiristo, cĩ ẽẽn Baatĩ tamatintio, ĩthõng ẽẽn Nyekuc cĩ amanymanyaneta. 4 Amanymanyanet nẽ ageeta pĩrnanta ĩcĩnac vẽlẽk, kĩĩ katĩ kamanymanyanit naaga buu eet cĩk ayak pĩrnanẽt, manymanyanintia wũ balna karũba naaga ĩcĩ Nyekuco. 5 Kĩcĩ kõthõl naaga pĩrnanẽt cobbi kĩ Kiristo, karũba woccia manymanyaniniet cĩ obbi õrrõt ĩcĩnnĩ buu. 6 Ma ngĩ kapĩrna naaga, kapĩrna, nyatarka manymanyaniniet kĩ elianĩt cunung. Ma woyyia kamanymanyanet Nyekuci ageeta jurrung ẽẽn, nyatarka manymanyaniniet cunung cĩ anyung agiitia omogit pĩrnanẽt nĩcĩ kapĩrnanẽ naaga buu wo. 7 Ĩthõng õkõmĩ muwẽẽnĩtĩ cĩnang cĩ abũnna ĩcunung, nyatarka kagayya naaga kathĩnna ne, kõthõl naaga kĩ agiitia pĩrnanẽt cĩnang wo kõdõwẽ, ĩthõng kõthõl naaga buu manymanyaniniet cĩ aku ĩcĩ Nyekuco kõdõwẽ kĩ agiitia.
8 Gõtõõnõga kĩ ngõõnõga, kadiimnyung naaga agiitia agaac pĩrnanẽt wũ balna kapĩrnanẽ naaga looca cĩ Athia. Kayakca balna naaga pĩrnanẽt cĩ makĩ õrrõt cĩ ijiar tiirthẽt cĩnang, ĩthõng kivitiaha kahaddia kiittia ne, kadaakna woccia katĩna. 9 Ĩthõng dĩdĩ thinnetinẽy cĩgaak, kahaddia kiittia ne, koottia balna keteddiothĩha daaĩth thõng. Ĩthõng thĩ, edenyiay balna thõõth coo, kĩĩ katĩ kithii naaga cĩ kayakca woccia leminit eletinẽy ĩcĩgak mĩn, ĩthõng thĩ, katĩ kayakta woccia naaga leminit ĩcĩ Nyekuc cĩ arũgũtha eet daaĩtha. 10 Ĩthõng balna ẽẽlawet Nyekuci ageeta daaĩtha, ĩthõng kagga naaga nga katĩ alna ellet nẽ ageeta noko. Kayak naaga muwẽẽnĩt cĩ abũnna ĩcĩnnĩ kathĩ ne, alna katĩ nẽ ellet ageeta noko, 11 kĩcĩ elliettu niigia ageeta lawintia cunung wo. Mẽẽlĩ katĩ eeta buu cĩk ennei Nyekuc ne, ibalallẽ, nyatarka ẽdẽcĩ Nyekuci lawinit cunung, nyatarka ageeta.
Ũtũwũ Paulo muwẽẽnĩt cĩnnĩ
12 Ĩthõng yoko, ẽẽn coo rianii cĩnang, ĩthõng aduwa muwẽẽnĩtĩ cĩ thinneti cĩgaak gõõl wũ balna karũmẽnĩ kĩ eet cĩk looc coo, ĩthõng dĩdĩ karũmẽ balna gõõ naaga kĩ agiitia jurrung gõõla ĩcĩ dĩhĩmĩ ĩcĩ ẽẽn dĩdĩ. Athii cĩ ẽẽn gẽẽnyĩth cĩ looc coo cĩ kadĩmania noko wo, ĩthõng thĩ, bũnnathĩt balna cĩ Nyekuco cĩ anyet kutuguthia noko. 13 Athii cĩ kẽhẽdaccung naaga agiitia nyaraga cĩ woccia athii niigia cĩ ebellu, kõdẽ athĩknu. Kayai na muwẽẽnĩt cĩ abũnna, 14 kõdẽ woyyia yoko ngĩ athĩknu niigia thoothonniok cĩk kĩdĩk cĩk kaduwaccung naaga wo, avvunnu katĩ agayyu thoothonniok vẽlẽk wũk kaduwaccung balna naaga. Ma katĩ kõr cĩ õbõdaĩ Makayyioiti Yesu,e avvu katĩ irianietu niigia ageeta, kĩ yoko katĩ ngĩ kirianung naaga agiitia.
15 Nyatarka õkõmĩ balna aneeta thĩnĩn cannie thõõtha coo, kidiima balna ngatĩ kẽhẽrõnacung agiitia ĩcĩ owu, kĩĩ woccia katĩ ivitia niigia ũrũbta gatan cĩ kẽhẽrõnacung na ngõnana ramma. 16 Kadiimi balna na ngatĩ kẽhẽrõnacung agiitia gõõla cĩ kõkõyyẽ na looca cĩ Makedonia, ĩthõng ma kõbõda Makedonia kikiyyia ĩcunung. Ĩthõng woccia katĩ anycangũ niigia aneeta elinit cĩ kadiimi, kĩĩ katĩ woccia kũũk looca cĩ Yudea. 17 Ma balna ngĩ kadĩmanei na thõõth coo wo, kũũwũ da na muwẽẽnĩt cannĩ? Kõdẽ kadĩmani thoothonniok cĩganĩk kĩ eeta cĩk looc coo, kõdẽ kaavẽ kĩ eeti wũ gõõ athĩ itina codoi ne, “Ii,” ĩthõng athĩ ne, “Athiitõ”?
18 Ĩthõng thĩ, dĩdĩ kĩcĩ athũnnĩ Nyekuci thõõth cĩnnĩ, athii cĩ ẽẽn nyemut cĩnang kĩ agiitia cĩ athĩ ne, “Ii,” ĩthõng “Athiitõ.” 19 Nyatarka Yesu Kiristo Ngẽrtĩ Nyekuco wũ balna kalimaneccung naaga agiitia, aneeta kĩ Thĩlathf kĩ Timoti, athii Yesu cĩ athĩ ne, “Ii,” ĩthõng “Athiitõ,” ĩthõng thĩ, ĩcĩnnĩ athĩ nẽ dõõkĩthĩ ne, “Ii.” 20 Ĩthõng thoothiowa vẽlẽk wũk balna abũtana Nyekuci, eyeliay ĩcĩ Kiristo thõõtha cĩ athĩ ne, “Ii” Ĩthõng thõõtha ĩcĩ Kiristo kõthõõth naaga kathĩ ne, “Amẽn,” nyatarka bulẽnĩt cĩ Nyekuco. 21 Ĩthõng yoko, Nyekuc cĩ anyet ageeta kĩ agiit kĩbĩlĩt tiirthẽta ĩcĩ Kiristo. Ẽbẽraet nẽ ageeta, 22 ĩthõng arihiet ageet nyẽkẽr cĩnnĩ cĩ keeginnie naaga eet cĩgĩnĩk, ĩthõng arihiet Ririwac cĩ Dĩhĩmĩ thinnetinẽy cĩgaac, kẽyẽla ngatĩ keeginnie naaga eet cĩgĩnĩk.
23 Kaari balna na Nyekuc kĩĩ keberec cannĩ, nyatarka kothoothi thõõth cĩ ẽẽn dĩdĩ. Ĩnõõnõ thĩ cĩ balna athii cĩ kõbõdaccung na agiitia Korintowa naboo, kĩĩ katĩ kithii cĩ kakuni keheccung agiitia. 24 Ĩthõng athii cĩ keeginna makayyiok cĩk katĩnganeccung agiit gii cĩ woccia elemnyu, ĩthõng thĩ, katicanni naaga kĩ agiit kõdõwẽ, nyatarka tali cunung, kĩĩ katĩ ivitia okomit niigia lemintia cunung.