2
Ĩnõõnõ thĩ cĩ kũkcẽ na muwẽẽnĩt cannĩ, kĩĩ katĩ kithii cĩ ayahacung heeroni cannie wuciith ĩmma naboo. 2 Ma ngĩ ẽẽn aneeta kir cĩ kaanyung agiitia aavut mothintia, ngẽnẽ katĩ cĩ aku anya aneeta kẽbẽlbẽlũ? Agiit thẽk kir wũk balna kaanyung na agiit omothie. 3 Ĩnõõnõ thĩ balna cĩ kẽhẽdacung na agiitia kĩ balna ngĩ kadĩmani ẽẽ, kĩĩ katĩ ma kikiyyia, athii woccia na cĩ komoththie eetĩnẽy ĩcĩk anya woccia aneeta kẽbẽlbẽlũ. Õkõmĩ balna thĩnĩn cannie, nyatarka agiit vẽlẽk, cĩk katĩ woccia othollu talinit cannĩ. 4 Nyatarka kẽhẽdacung balna na nyaraga nĩcẽ, pĩrnanta kĩ mothintia cobbi kĩ tulalõy, kĩĩ katĩ kithii cĩ kaanyung na agiitia wuciith, ĩthõng thĩ, kĩĩ katĩ agaac ngatĩ maka mĩnanĩ cannie ĩcunung õrrõt.Atamattik et cĩ ẽẽn gẽrẽthannioit
5 Mĩ ayaha eeti mothinit,a nga kaanya nẽ aneeta kõmõthẽ kĩcĩ anyung nẽ agiitia vẽlẽk omoththie õrrõt wo. Athii na cĩ kothoothi thõõth nĩcẽ õrrõt. 6 Ũwũpan ukwẽẽntĩ cĩ balna uuki lemnyiowa cĩk meelĩk ĩnõõnõ. 7 Ĩthõng thĩ, kẽnnẽ yoko atamattik woccia niigia ĩnõõnõ, ĩthõng amanymanyanit ĩnõõnõ, kĩĩ katĩ kithii cĩ ũũlĩ wuciithi cĩ mothintio, et nĩcẽ õrrõt. 8 Kaduwacung na agiit dĩdĩ kathĩ ne, eyelliek ĩnõõnõ mĩnan cunung. 9 Thõõth wũ balna kẽhẽdacung na agiit nyaragawa kathĩ ne, kĩtĩmanung agiitia, ĩthõng kagga dĩdĩ, katĩ mĩ owobju woccia niigia thoothonniok vẽlẽk wũk balna kaduwa nana. 10 Mĩ amannicu niigia et ĩmma, kamanni katĩ na buu ĩnõõnõ, katĩ ngĩ aavĩ gimma cĩ woccia kamanni. Ĩthõng mĩ katamatĩha gerthetin coo, kamanni nguuma cĩ Kiristo, nyatarka agiitia, 11 kĩĩ katĩ kithii cĩ aku ĩgoollet Thĩttanĩb ageeta. Nyatarka kagga naaga muwẽẽnĩt cĩnnĩ cĩ gerthe õrrõt.
12 Ma balna ngĩ kũwa õlõõ ĩcĩ gaalawu cĩ Torawothi, kũwa kilimaneha eet Nyemut cĩ Abũnnac cĩ Kiristo, kũrũbothĩha Makayyioit õwĩha balna gõõl vẽlẽk. 13 Ngaanĩ balna abarrit aneeta thĩnĩn cannie, ngatĩ athii cĩ kamũdothĩcẽ gõtõna Tiito natẽ, ngaatĩ kẽnnẽccẽ ĩnõõgõ ne, abũnna a, ĩthõng kedeceea kũwa ĩcĩ looc cĩ Makedonia.
Ticcianniok cĩk Ngẽrẽmngẽrẽm cĩ Jõr
14 Katalla naaga õrrõt ngatĩ anyiet Nyekuci ageeta Kiristo keelet ageeta kaalĩy vẽlẽk ĩcĩk gerthek. Ĩthõng koottia kathaantĩha Nyemut cĩ Kiristo cĩ ẽmmẽdẽ loociowẽy vẽlẽk, ĩthõng õngõlĩ Nyemut coo ẽmmẽdẽ. 15 Nyatarka kaatĩ naaga Nyekuca kĩ mõõcacĩ cĩ õngõlĩ ẽmmẽdẽ cĩ Kiristo, cĩ athanothĩk eet wũk gõõ eliay kĩ eet cĩk katĩ õbõktẽ adaaitõ. 16 Ĩthõng eeta cĩk õbõktẽ adaaitõ, õngõlĩ Nyemut cĩ Abũnna kĩ ĩnõõgõ, muyuk cĩ daaĩtho, ĩthõng kĩ eet cĩk eliay, õngõlĩ Nyemut coo kĩ ĩnõõgõ, muyuk cĩ rũgẽtõ. Ĩthõng ngẽnẽ cĩ ũũlĩ ngatĩ adĩmanĩ tiic cĩ addi coo wo? 17 Adiim eeta cĩk meelĩk ngĩ arũba balinit, nyatarka aduwaai nẽẽgẽ eet thõõth cĩ Nyekuco, ĩthõng athii cĩ kattĩyya naaga buu kĩ nẽẽgẽ. Keeginna naaga tionniak cĩk Nyekucak dĩdĩ, ĩthõng thĩ, makathĩta cĩ Kiristo, kõthõõththa naaga nyemut thõõtha ĩcĩ ẽẽn dĩdĩ nguuma ĩcĩ Nyekuco, cĩ ẽẽn nẽ keberec cĩnang.