Ũrũga Kiristo
15
Ĩthõng yoko, gõtõõnõga kĩ ngõõnõga, kadiimi ngĩ kaduwacung naboo Nyemut cĩ Abũnna wũ balna kirionicung na agiitia, ĩthõng ngaanĩ elemnyu kĩĩ noko. 2 Nyemuta cĩ Abũnna wo, elliawu niigia ngĩ athunnu thõõth wũ balna kirionicung na agiitia jurrung. Ĩthõng thĩ, mĩ athii tõ, ẽẽn thĩ leminiti cunung wo gimma kaganoko.3 Nyatarka thõõth cĩ tiiri õrrõt wũ balna aduwacca aneeta Kiristo, kuduwawung balna na agiitia ngatĩ balna adaaknĩ Kiristo gerthetina ĩcĩnac, kĩ balna ngĩ aduwa Nyaraga cĩ Nyekucoa athĩ ne, 4 adawẽ balna nẽ, ĩthõng ma vurtia cĩ wathinniok iyyio, ikiyyia ũrũga daaĩtha kĩcĩ aduwa Nyaraga cĩ Nyekuco. 5 Ilibak balna nõõnõ Kiristo Pẽtũrũ,b ma natẽ ikiyyia ilibak tionniak cĩk ẽẽn õmmõtõ kĩ ramma wo buu. 6 Ma vurtia, ikiyyia ilibak nẽ lemnyiok cĩk meelĩk cĩk ijiar eet etĩmma kĩ eet tur (500). Ngaanĩ yoko arũgĩ lemnyiowa cĩkkõ cĩk meelĩk noko, ĩthõng thĩ, balna adaaitõ gwuak. 7 Ma natẽ, ilibak nẽ Jemith, ma vurtia, ikiyyia ilibak tionniak vẽlẽk, 8 ma balna vurtia cĩnnĩ vẽlẽk, ikiyyia ilibaha aneetac buu, kõdẽ woyyia ngĩ kaavu kĩ balna ngĩ karittiay na itina ĩcĩ gerthe.
9 Keeni na tionniait cĩ athii cĩ keeni tiir tionniaĩ vẽlẽk,d nyatarka dĩdĩ, kamaarai balna na meelitin cĩ lemnyiok cĩk Nyekucak kelethiawa pĩrnanẽt cobbi õrrõt, cĩ woccia athii cĩ avvũyya eeta aneeta athĩnna ne, tionniait. 10 Ĩthõng thĩ, avuthita cĩ yoko kaavẽ na wo kĩĩ kõr coo wo, nyatarka anya aneeta Nyekuci bũnnatin cĩnnĩ, ĩthõng balna athii cĩ kamĩnyẽ na bũnnathĩt cĩ Nyekuco kaganoko. Athii tõ kũdũt, balna ngĩ katicannie na kijiar tionniak vẽlẽk, ĩthõng thĩ, athii balna na cĩ katicannie mĩn, katicannie balna, nyatarka aavĩ bũnnathĩtĩ cĩ Nyekuco ĩcannĩ. 11 Ma ngĩ kirioni balna na, kõdẽ irion balna nẽẽgẽ, kirionna thĩ balna naaga vẽlẽk thõõth codoi wo noko, cĩ elemtu niigia balna vẽlẽk koo.
Arũkna katĩ eeta cĩk Nyekucak daaĩtha
12 Ĩthõng thĩ, ma ngĩ irionni thõõth cĩ athĩ ne, ũrũga balna Kiristo daaĩtha, nyia thĩna kothoothitõ eeta gwuak kõrgẽna cunung kĩĩtõ ne, athii woccia eeta cĩk adaaitõ cĩ arũkna wo? 13 Mĩ athii eeta cĩk adaaitõ cĩ arũkna, monogo nẽnnẽ thẽk balna ngaanĩ kũrũga Kiristo buu. 14 Ĩthõng ngĩ da balna ngaanĩ kũrũga Kiristo, ẽẽn woyyia limanĩ cĩnang kĩ leminit cunung wo, gii cĩ kaganoko. 15 Ĩthõng kijioktiaha naaga buu ngatĩ keeginnia volongnyiak cĩ thõõth cĩ Nyekuco, nyatarka balna kothollia naaga thõõth cĩ Nyekuco kiittia ne, ũrũgũtha balna Nyekuci Kiristo daaĩtha. Ĩthõng thĩ, ngaanĩ kũrũgũtha nẽ ĩnõõnõ daaĩtha, katĩ balna ngĩ ngaanĩ kũrũkta daakciaha daaĩtha. 16 Nyatarka, mĩ ngaanĩ kũrũkta eeta cĩk adaaitõ, ngaanĩ thĩ thẽk balna kũrũga Kiristo buu. 17 Ĩthõng mĩ balna ngaanĩ kũrũga Kiristo, ẽẽn thĩ thẽk leminiti cunung wo buu gimma kaganoko, ĩthõng ngaanĩ kẽnyẽhẽ gerthetini cunung noko. 18 Ĩthõng eeta wũk balna adaaitõ lemintia cĩ Kiristo buu, ithiicõ. 19 Ma ngĩ kayak naaga muwẽẽnĩt cĩ abũnna ĩcĩ Kiristo cĩ rũgẽt cĩnac dõ looca coo, amannĩcet thĩ katĩ eeta ageeta kijiaritõ eet vẽlẽk.
20 Ĩthõng thĩ, dĩdĩ ũrũga balna Kiristo daaĩtha! Ẽẽn balna nẽ et cĩ uwantanĩ ĩcowu cĩ ũrũga daaĩtha, cĩ eet vẽlẽk cĩk katĩ arũkna daaĩtha. 21 Ĩthõng kĩcĩ acĩnnu niigia wo, aavĩ kĩ balna ngĩ aku daaĩthĩ loota ngato, nyatarka et codoi doo, ithianaĩ yoko rũgũthanĩtĩ cĩ daakciawu buu eta codoi doo. 22 Amaaracet balna Adamĩe ageeta vẽlẽk daaĩth, ĩthõng ayahacet katĩ Kiristo ageeta vẽlẽk rũgẽt. 23 Arũgũtha balna nõõnõ Nyekuci Kiristo ĩcĩ owu daaĩtha, ĩthõng arũgũtha katĩ Kiristo eet cĩgĩnĩk buu daaĩtha, katĩ ngĩ õbõda nẽnẽ. 24 Ĩthõng vurtia cĩ ijiari Kiristo mĩrõk cĩgĩnĩk vẽlẽk, alaanẽt kĩ makayyiok kĩ gaalĩthẽt cĩnĩng vẽlẽk, ĩthõng thĩ, katĩ ikiyyia decianeti cĩ loocu, ĩthõng anyĩk nẽ alaanthẽt Nyekuc Baatĩnnĩ. 25 Nyatarka agam katĩ nẽ looc kuumuc, gii katĩ ngĩ atamaac nẽ mĩrõk cĩgĩnĩk vẽlẽk. 26 Miroiti cĩ aturna cĩ katĩ aruwue wo, ẽẽn daaĩth. 27 Nyatarka aduwa Nyaraga cĩ Nyekuco athĩ ne, “Anyi Nyekuci ĩnõõnõ makathĩt cĩ agamĩ nẽ kaal vẽlẽk.”f Ĩthõng yoko, mĩ athĩ thõõth coo ne, “Anyi Nyekuci ĩnõõnõ makathĩt cĩ agamĩ nẽ kaal vẽlẽk,” Athii cĩ athĩ ne, agam nẽ Nyekuc, ĩthõng thĩ, anyi balna Nyekuci Kiristo makathĩt cĩ agamĩ nẽ kaal vẽlẽk. 28 Ma vurtia cĩ arĩhĩ Ngẽrĩnẽ kaal vẽlẽk thoonĩy ĩcĩgĩnĩk, ĩthõng katĩ arĩk nẽ ẽlẽ cĩnnĩ tiirthẽta cĩ Nyekuco cĩ aari balna kaal vẽlẽk kagam Ngẽrĩnẽ cĩnnẽ. Ĩthõng thĩ, agam katĩ Nyekuci kaal vẽlẽk tammuatiddina kĩ loota.
29 Ĩthõng yoko, mĩ athii cĩ arũkna eeta daaĩtha, atican katĩ eeta cĩk agam batithimo nyia, nyatarka eet cĩk adaaitõ wo? Ĩthõng thẽk mĩ athii cĩ arũkna eeta cĩk adaaitõ wo kũdũt, nyia nẽnnẽ kagamit eeta batithimo, nyatarka ĩnõõgõ wo? 30 Nyia kamaaryiak naaga eleeti cĩgaac thoothonniok cĩk woccia ayaha daaĩth, kõdẽ pĩrnanẽt wathinniok vẽlẽk wo? 31 Ĩthõng nyia kurumtowa na kĩ daaĩth dõõkĩthĩ wo? Rianii cĩ kayai na ĩcunung, nyatarka Yesu Kiristo Makayyioit cĩnac, cĩ anya aneeta kuduwa thõõth coo wo. 32 Mĩ da balna kuukona na kĩ kẽlẽgẽ cĩk bõõnak õlõõ ĩcĩ gaalawu cĩ Ẽvẽthathĩ,g nyatarka muwẽẽnĩt cannĩ cĩ kamuwe rũgẽt cannĩ looca coo dõ, nyia yoko cĩ karũba na muwẽẽnta ĩcoo wo? Mĩ athii cĩ arũkna eeta cĩk adaaitõ,
“Kuduktõy thẽk thĩ nẽnnẽ naaga,
ĩthõng kũwũdĩt mẽrtẽ,
nyatarka kadaaĩ katĩ lootha.”h
33 Ma ngĩ agiiththu eleeti cuguk kaganoko noko. Ẽgẽrẽthannung katĩ agiitia goonogu cĩk gerthek. 34 Ĩcĩnĩt, ĩthõng ibillu gerthetin, nyatarka aatĩ eeta gwuak kõrgẽna cunung, cĩk ngaanĩ kagaacõ thõõth cĩ Nyekuco. Kaduwa na thõõth coo, kĩĩ katĩ kagamung agiit ngawani.
Ẽlẽ cĩ arũkna
35 Ĩthõng thĩ, woccia ngĩ ajin eeti ĩmma thõõth cĩ athĩ ne, “Arũkna katĩ eeta cĩk adaaitõ kuu? Avvu katĩ ayak nẽẽgẽ eleeti cĩk õgõõn kuu?” 36 Nyĩ agiithenu thõng! Kinyomocĩ cĩ athaccu niigia, athii woccia cĩ arũkna nĩĩco noko, adaaĩ nõõnõ thõng. 37 Mĩ athaci niia kinyomoc, athii niia cĩ akati ẽlẽ cĩnnĩ vẽlẽk, ĩthõng thĩ, athaccie kinyomocĩ kaganoko, kõdẽ woccia ngĩ ẽẽn labitot, kõdẽ gimma buu. 38 Ĩthõng thĩ, anyĩk Nyekuci kinyomoc ẽlẽ kĩ balna ngĩ adiim nẽnẽ, ĩthõng anyĩk kinyomo eleeti cĩgĩk mĩn mĩn. 39 Engenyciay eeta, kĩ kẽlẽgẽ, kĩ kĩballĩ, kĩ kulugua ayak eleeti, ĩthõng thĩ, athii cĩ aduwõy kĩ gõõnõgĩ. 40 Ayak kaala cĩk tammutiddinak eleeti, ĩthõng ayak kaala cĩk loocu buu eleeti. Ĩthõng thĩ, bulẽnĩtĩ cĩ kaal cĩk tammutiddin, aatĩ gõõla cĩnĩng mĩn, ĩthõng bulẽnĩtĩ cĩ kaal cĩk looc coo, aatĩ gõõla cĩnĩng mĩn mĩn. 41 Ayak kõr bulẽnĩt cĩnnĩ mĩn, ĩthõng ayak nyĩĩloĩ cĩnnĩ mĩn, ĩthõng ayait mũnyũnya buu cĩnĩng mĩn, ĩthõng athii cĩ aduwõy bulẽnĩtĩ cĩ mũnyũnyõc ĩmma kĩ cĩ ĩmma.
42 Õgõõn katĩ noko katĩ ngĩ ũrũkta eleeti cĩgaac daaĩtha. Eleeti wũk balna adaaitõ, arũkna katĩ naboo, ĩthõng thĩ, ĩthĩnga katĩ naboo adaaĩ kũdũt. 43 Adayyie eleeti cĩgaac, nyatarka athii nẽẽgẽ cĩ ayak bulẽnĩt, ĩthõng thĩ, arũkna katĩ nẽẽgẽ bulẽnta, adayyie nẽẽgẽ, nyatarka athii cĩ tiirti, ĩthõng arũkna katĩ nẽẽgẽ tiirthẽta. 44 Adayyie eleeti cĩk eetu, nyatarka adaaitõ, ĩthõng arũkna katĩ nẽẽgẽ, ĩthõng ũrũgĩt kũdũt.
Mĩ aatĩ eleeti cĩk looc coo, aatĩ thẽk katĩ eleeti cĩk jõr Nyekuca buu. 45 Aduwa balna Nyaraga cĩ Nyekuco athĩ ne, “Ẽẽn balna Adamĩ et cĩ owu, ĩthõng ikiyyia ũrũk nẽ. Ĩthõng thĩ, Yesu cĩ ẽẽn Adam cĩ aturna wo, ẽẽn Ririwac cĩ anyet rũgẽt.”i 46 Aku eeti cĩ owu cĩ ayak ẽlẽ looca coo, ĩthõng thĩ, aku Eeti cĩ vurtio cĩ ayak ẽlẽ Nyekuca. 47 Engenyciay balna eeti cĩ owu tõdõwaca, ĩthõng thĩ, aku Eeti cĩ vurtio ẽẽ, tammuatiddina. 48 Ayak eeta vẽlẽk cĩk loocu eleeti cĩk aduwõy kĩ ẽlẽ cĩ et wũ balna engenyciay tõdõwaca. Ĩthõng ayait eeta cĩk aatĩ tammuatiddina vẽlẽk eleeti cĩk aduwõy kĩ ẽlẽ cĩ Et wũ balna aku tammuatiddina Nyekuca. 49 Kĩ cĩ kaduwõy naaga kĩ et wũ balna engenyciay tõdõwaca wo, kaatĩ katĩ naaga kĩ Eeti wũ balna aku tammuatiddina.
50 Gõtõõnõga kĩ ngõõnõga, kadiimnyung na agiit agaac ngatĩ, adaaĩ katĩ eleeti cĩgaac, athii katĩ nẽẽgẽ cĩ õthõl alaanthẽt cĩ Nyekuco cĩ alna kũdũt wo. 51 Ĩthĩktõy, kaduwacung katĩ na agiitia thõõth cĩ alugunyi cĩ ijiar gẽẽnyĩth cĩ eetu. Athii katĩ naaga vẽlẽk cĩ kadaaĩ, ĩthõng thĩ, kũkcĩ katĩ naaga vẽlẽk kaganoko. 52 Edenyiay katĩ thõõth coo tamanoko, kijiar badi cĩ tammuo wũ gõõ acĩn keberecĩ tamanoko. Nyatarka abũẽ katĩ nyeepu cĩ aturna, ĩthõng ũrũkta eeta vẽlẽk cĩk adaaitõ. Ĩthõng nẽnnẽ katĩ kutuwuyyie naaga vẽlẽk kithii cĩ kadaaĩ naboo kũdũt. 53 Ũũkcĩ katĩ eleeti cĩgaac cĩk adaaĩ, ĩthõng ammu wo, kĩĩtõ eleeti cĩk athii cĩ adaaĩ, kõdẽ ammu. 54 Eleeti cĩk yoko kayak naaga wo, ẽẽn eleeti cĩk athii cĩ tiirti, ĩthõng adaaĩ. Ĩthõng thĩ, ũũkcĩ katĩ nẽẽgẽ kĩĩtõ eleeti cĩk alna kũdũt. Ĩthõng katĩ ikiyyia thõõth cĩ Nyaraga cĩ Nyekuco kĩĩ dĩdĩ, kĩ balna ngĩ athĩ ne,
“Atamaacẽ balna daaĩthĩ!”j
55 “Ũũk tiirthẽtĩ cĩ daaĩtho wo ĩjang?
Ũũk wuciithi cĩ daaĩtho wo nga?”k
56 Ayaha gerthetini daaĩth, ĩthõng anyĩk Ngiranĩ gerthetin tiirthẽt. 57 Ĩthõng thĩ, kentek naaga Nyekuc ne, ibalallẽ ngatĩ anyĩcẽ nẽ Makayyioit cĩnac Yesu Kiristo kaanyet ageeta tiirthẽt cĩ kijiarĩ daaĩth!
58 Ĩthõng thĩna, gõtõõnõga kĩ ngõõnõga, aavut okomit. Nyĩ anyiccu gimma kotomowunga. Aryik eleeti cuguk dõõkĩthĩ tiica cĩ Makayyiokto, nyatarka agayyu niigia ngĩ athĩ ne, athii cĩ ẽẽn tiici cunung cĩ Makayyiokto wo cĩ kaganoko.