Et cĩ õthõõth thõõtha ĩcĩ rẽẽng, kõdẽ õthõõth molook cĩ Nyekuco
14
Owobit niigia gõõl cĩ mĩnano, ĩthõng abarrittewu anyintiok cĩk Ririwac cĩ Dĩhĩmĩ, arru thẽk kir anyinit cĩ othooththu niigia thõõth cĩ Nyekuco. 2 Nyatarka eeti ĩmma cĩ õthõõth thõõtha ĩcĩ rẽẽng, athii cĩ õthõõthõy kĩ eeta, õthõõthõy nẽ kĩ Nyekuc. Ĩthõng dĩdĩ, athii eeti cĩ aga ĩnõõnõ tõ, aduwa nẽ thoothonniok cĩk addi cĩk alugunyi Ririwaca cĩ Dĩhĩmĩ. 3 Ĩthõng thĩ, eeti cĩ õthõõth molook cĩ Nyekuco, aduwaai nẽ eet, kĩĩ katĩ kokomit thinneti cĩgĩk, ĩthõng amanymanyan eet cĩk ayak ulua. 4 Eeti cĩ õthõõth thõõtha ĩcĩ rẽẽng, ẽẽl nẽ ẽlẽ cĩnnĩ, ĩthõng thĩ, eeti cĩ atukwuan thoothonniok cĩk avvu Nyekuca, ẽẽl nẽ meelitin cĩ lemnyiowu kelethiawa. 5 Kadiimnyung na agiit vẽlẽk othoothit thoothonniowẽy ĩcĩk rẽẽng, ĩthõng thĩ, nẽnnẽ kadiimnyung woccia na agiitia utukwuanit thoothonniok cĩk avvu Nyekuca. Ijiar eeti cĩ atukwuan thoothonniok cĩk avvu Nyekuca et cĩ õthõõth thõõtha ĩcĩ rẽẽng, gii dũũwũk katĩ ngĩ õkõbaneei eeti ĩnõõnõ, kĩĩ katĩ kiliman thõõth cĩnnẽ meelitin cĩ lemnyiowu kelethiawa.6 Ĩthõng yoko, gõtõõnõga kĩ ngõõnõga, mĩ kakuni na ĩcunung, ĩthõng kõthõõtha thõõtha ĩcĩ rẽẽng, kabũnna woccia katĩ na ĩcunung kuu, gii dũũwũk ngĩ kayahacung agiitia yelinit, kõdẽ gẽẽnyĩth, kõdẽ thoothonniok cĩk avvu Nyekuca, kõdẽ thõõth cĩ limano? 7 Ma ngĩ õrõĩ moloowuana cĩk kidoretu kĩcĩ nyalomorunyawu vẽlẽk, aga woccia katĩ eeta jang cĩ õrõĩ ẽẽ, gii dũũwũk ngĩ õrõĩ jurrung? 8 Ma ngĩ athii cĩ abũ eeti nyeepu cĩ abiciẽnĩ kũtũgĩ jurrung, ngẽnẽ woccia katĩ cĩ adĩmanothi kũũk jora? 9 Ĩthõng õgõõn ĩcunung buu noko, katĩ ngĩ othooththu kutugetinẽy ĩcĩk rẽẽng, aga woccia katĩ eeti cĩ athĩrar thõõth cĩ othooththu niigia kuu? Aavĩ kẽnnẽ katĩ kĩcĩ othooththicu ngõõt kaganoko. 10 Mẽẽlĩ kutugeti cĩk rẽẽng looca coo, ĩthõng abũnna nẽẽgẽ vẽlẽk. 11 Ĩthõng thĩ, mĩ athii cĩ kathĩrari na thõõth cĩ õthõõth eeti ĩmma, keeni kẽnnẽ na et cĩ looc cĩ rẽẽng eta nĩcẽ, ĩthõng ẽẽn nẽ buu et cĩ looc cĩ rẽẽng ĩcĩnanĩ. 12 Õgõõn kĩyokowo buu ĩcunung. Mĩ adiimnyu niigia anyintiok cĩk Ririwac cĩ Dĩhĩmĩ dĩdĩ, eberyia niigia anyintiok cĩk katĩ ẽẽl meelitin cĩ lemnyiowu kelethiawa jurrung.
13 Nyatarka thõõth coo, anycĩk niigia et cĩ õthõõth thõõtha cĩ rẽẽng kalawõy koccianĩ, kĩĩ katĩ kẽẽl Nyekuci ĩnõõnõ kõkõbanek eet thõõth cĩ õthõõth nẽ ẽẽ. 14 Nyatarka mĩ kalayyie na thõõtha ĩcĩ rẽẽng, alayyie ririwacĩ cannie wo, ĩthõng thĩ, kẽnnẽ athii cĩ kagga na lawinit cannĩ. 15 Ĩthõng kogooni yoko katĩ na kuu? Kalayyie katĩ na ririwaca cannĩ, ĩthõng katĩ kalawõy muwẽẽnta cannĩ buu. Kebellie katĩ na ririwaca cannĩ, ĩthõng katĩ kebellie muwẽẽnta cannĩ buu. 16 Ma yoko thẽk ngĩ adihithi niia Nyekuc ririwaca cunni dõ, ĩthõng athĩrar woccia katĩ eeti cĩ arumenu kĩ aniitia wo lawinit cunni kuu, kĩĩ katĩ kĩthĩ nẽ ne, “Amẽn”? Nyatarka ethei niia Nyekuc ne, ibalallẽ, ĩthõng thĩ, athii cĩ aga nẽ lawinit cunni wo. 17 Ala woccia niia Nyekuc gõõla cĩ abũnna, ĩthõng thĩ, kẽnnẽ athii cĩ ẽẽl lawinti cunnie wo ĩnõõnõ buu.
18 Kennei na Nyekuc ne, ibalallẽ, nyatarka kothoothi na kutugetinẽy ĩcĩk rẽẽng kijiaryung agiitia vẽlẽk. 19 Ĩthõng thĩ, mĩ kaavẽ meelitina cĩ lemnyiowu kelethiawa, mayya woccia ngatĩ kothoothi thoothonniok tur cĩk aga eeta, katĩ ngĩ kalimani na ĩnõõgõ, kijiar ngatĩ woccia kothoothi thoothonniok vucciaknya õmmõtõ (10,000) thõõtha ĩcĩ rẽẽng.
20 Gõtõõnõga kĩ ngõõnõga, ibilli niigia thẽk muwẽẽnĩt cĩ ayakcu kĩ doolia cĩk kĩdĩk wo. Ĩthõng thõõtha cĩ gerthe, ĩmĩrĩt aavut kĩ doolia cĩk kĩdĩk, ĩthõng thĩ, muwẽẽnta cunung, ayait muwẽẽnĩt kĩ eeta cĩk obbitik. 21 Eheeddi Ngirana athĩ ne,
“Aduwa Makayyioiti athĩ ne,
kirioni katĩ na eet cĩganĩk,
eetĩnẽy cĩk õthõõth kutugetinẽy ĩcĩk rẽẽng,
ĩthõng thĩ, alna eeta cĩganniek wo,
athii cĩ athĩkna aneeta noko.”a
22 Ma ngĩ õthõõth eeti ĩmma thõõtha ĩcĩ rẽẽng, athii cĩ ẽẽn yelinit ĩcĩ lemnyiowu, ĩthõng thĩ, ẽẽn yelinit cĩ eet cĩk athii cĩ ẽẽn lemnyiok. Ĩthõng thĩ, mĩ õthõõth eeti ĩmma cĩ õthõõth molook cĩ Nyekuco, ẽẽn thoothonniowa cĩkkõ cĩk lemnyiowu, ĩthõng athii cĩ ẽnnẽ cĩk eet cĩk athii cĩ ẽẽn lemnyiok. 23 Ma yoko thẽk kothoothitõ eeta vẽlẽk lawintia kelethiawa thoothonniowẽy ĩcĩk rẽẽng, ĩthõng ivitia eeta gwuak cĩk athii cĩ agawĩ thoothonniok cĩkkõ, kõdẽ eeta cĩk athii cĩ ẽẽn lemnyiok, athii kẽnnẽ katĩ cĩ ahad nẽẽgẽ athĩ ne, adakcung agiitia ngaamõnĩ? 24 Ĩthõng thĩ yoko, mĩ atukwuannu niigia vẽlẽk thoothonniok cĩk avvu Nyekuca, ĩthõng ivitia eeta gwuak cĩk athii cĩ ẽẽn lemnyiok, kõdẽ eeta cĩk ngaanĩ ithiananĩ aga Yesu, avvu katĩ nẽẽgẽ kagaacõ ngatĩ ẽgẽrẽthantõy, ĩthõng idiimitõ nẽẽgẽ ngatĩ ũũkcĩ goolliok cĩgĩk, nyatarka thoothonniok cĩk aduwuanu niigia wo, 25 edenyiay katĩ thoothonniowa cĩk alugunyi thinnetinẽy cĩgĩk. Ĩthõng thĩ, katĩ akatit kuthungti, ĩthõng entek ne, “Kagayyia dĩdĩ ngatĩ aavẽ Nyekuci ĩcunung.”
Lawinit cĩ abũnna
26 Gõtõõnõga kĩ ngõõnõga, kõthõõth yoko woccia kathĩ ne? Mĩ alutenu niigia kõdõwẽ, ayakcu niigia codoi codoi tẽgẽl, kõdẽ thõõth cĩ limano, kõdẽ thõõth cĩ yelintio, kõdẽ kũtũk cĩ rẽẽng, kõdẽ thõõth cĩ woccia õkõbanni. Adiim woccia ngĩ aticanni thoothiowa cĩkkõ vẽlẽk, kĩĩ katĩ kaanycĩk meelitin cĩ lemnyiowu kĩĩ tiirti kelethiawa. 27 Mĩ õthõõth eeti ĩmma thõõtha ĩcĩ rẽẽng, anycĩk kothoothitõ eeta rammak, kõdẽ iyyiok, codoi codoi, ĩthõng õkõbanek woccia thẽk eeti ĩmma thõng. 28 Mĩ athii eeti cĩ õkõban thõõth tõ, anycĩk et cĩ õthõõth wo kĩjawõy kelethiawa, ĩthõng õthõõthĩ ẽlẽ cĩnnĩ dõ ĩcĩ Nyekuco.
29 Anycĩk eet cĩk õthõõth molook cĩ Nyekuco ramma, kõdẽ iyyio kutukwuanit, ĩthõng ahadit woccia eeta gwuak thõõth cĩ aduwuay wo jurrung. 30 Ĩthõng mĩ aavĩ eeti ĩmma loota cĩ akunei thõõth cĩ aku Nyekuca, anycĩk woccia et wũ õthõõth ĩcowu kĩjawõy. 31 Ĩthõng gõõla ĩcoo, anycĩk eet codoi codoi kutukwuanit thoothonniok cĩk avvu Nyekuca, kĩĩ katĩ ilimanta niigia vẽlẽk thõõth cĩ aduwa nẽẽgẽ, kĩĩ katĩ ketherung agiitia. 32 Eeta cĩk õthõõth molook cĩ Nyekuco, õthõõth nẽẽgẽ thoothonniok cĩk aduwa nẽẽgẽ codoi codoi. 33 Nyatarka athii Nyekuci cĩ adiim eet cĩgĩnĩk cĩk callĩk katalmanyantõy, adiim nẽ ĩnõõgõ kaavutõ ganõna. Adiim woccia thoothonniowa cĩkkõ vẽlẽk kĩdĩmantẽ kelethianyay vẽlẽk ĩcĩk Makayyioktak.
34 Athii woccia cĩ kẽlẽmacĩ ngaay kothoothitõ meelitina cĩ lemnyiowu. Ĩjakci woccia nẽẽgẽ thõng, ĩthõng ĩthĩktõy kaganoko, kĩcĩ aduwa Ngiranĩ cĩ Mutha. 35 Mĩ aavĩ gii ĩmma cĩ adiim nẽẽgẽ ngĩ aga, ajinna woccia katĩ nẽẽgẽ maacuanĩy cĩgĩk katĩ ngĩ õdõlanit kõrõõk. Athii katĩ cĩ abũnna ngaa ngĩ õthõõth kelethiawa ĩcĩ arumone meelitini cĩ lemnyiowu.
36 Ithiananĩ balna thõõth cĩ Nyekuco ĩcunung? Kõdẽ agiitia balna dõ cĩk õdõlanung thõõth cĩ Nyekuco? 37 Mĩ ahad eeti ĩmma ngĩ athĩ ne, ẽẽn nẽ et cĩ õthõõth molook cĩ Nyekuco, kõdẽ ayak anyintiok cĩk Ririwac cĩ Dĩhĩmĩ, anycĩk ĩnõõnõ kagga kĩĩ ne, thõõth cĩ kẽhẽdacung na agiit wo, ẽẽn tĩrĩthẽnĩt cĩ Makayyioit Yesu. 38 Ma ngĩ abayahan eeti ĩmma thõõth coo, abayahanni katĩ nẽ buu.