Mĩnan
13
Mĩ kothoothi na thoothonniowẽy ĩcĩk eetu mĩn mĩn, kõdẽ ĩcĩ anjĩletu, ĩthõng athii cĩ kamĩnani eet õõgĩ, kaavẽ na kĩ burui cĩ abũ ngõõtĩ kaganoko. 2 Mĩ kayai na anyinit cĩ kaduwanẽ thoothonniok cĩk avvu Nyekuca, ĩthõng kagawa thoothonniok vẽlẽk cĩk alugunyi, ĩthõng mĩ kayai leminit cĩ woccia anyi thiiryiok kõtõõthõ, ĩthõng athiina mĩnanĩ tõ, keeni gimma kaganoko. 3 Mĩ kaanyi na kaal cĩganĩk vẽlẽk eet cĩk ẽẽn ngĩjũrra, ĩthõng kaanyĩha ẽlẽ cannĩ kũtũthẽ, ĩthõng athiina mĩnanĩ tõ, athii thẽk gii cĩ karũba na tõ.4 Anyi mĩnanĩ eet komogit thõõth, ĩthõng anyĩk ĩnõõgõ kĩĩtõ thimattiak. Athii mĩnanĩ cĩ anyi eet kabarrittiek kaal cĩk eet õõgĩ, kõdẽ athii cĩ ẽngẽrẽnĩ, kõdẽ irianĩ. 5 Athii cĩ anyi mĩnanĩ et kummu thĩnĩn, athii cĩ anyi mĩnanĩ et kũthũtĩ ẽlẽ cĩnnĩ dõ, anyi mĩnanĩ et kithii cĩ ahada kaal cĩk adĩmaneei eeti ĩnõõnõ buth. 6 Athii mĩnanĩ cĩ anyi et kataraaĩ thõõth cĩ gerthe, ĩthõng thĩ, ebelbelei mĩnanĩ thõõth cĩ ẽẽn dĩdĩ. 7 Ẽẽla mĩnanĩ et dõõkĩthĩ, ĩthõng ayak leminit kĩ eet dõõkĩthĩ, ĩthõng ayak muwẽẽnĩt cĩ abũnna, ĩthõng alna mĩnanĩ dõõkĩthĩ.
8 Athii mĩnanĩ cĩ aturnẽcẽ, ĩthõng avvu katĩ abĩlĩ thoothiowa cĩk avvu Nyekuca, ĩthõng avvu katĩ abĩlĩ eeta cĩk õthõõth thoothonniok mĩn mĩn, ĩthõng aku katĩ gẽẽnyĩthĩ athii. 9 Nyatarka kagga kaal cĩk kĩdĩk dõ, ĩthõng ma ngĩ kathĩhĩ naaga thoothonniok cĩk avvu Nyekuca, kagga naaga cĩk kĩdĩk, 10 ĩthõng thĩ, mĩ ikiyyia thõõth cĩ edeemothi cĩ abũnna kũdũt wo, enyekci katĩ thõõth cĩ athii cĩ edeemothi cĩ abũnna kũdũt. 11 Balna ngaanĩ keeni na doolec cĩ dĩcĩ, kothoothi balna kĩ doolec cĩ dĩcĩ, ĩthõng kayai muwẽẽnĩt kĩ doolec cĩ dĩcĩ. Ma balna mĩ kĩthĩ maka, kikiyyia kũtũngea muwẽẽnĩt cĩ kĩdĩcthẽtĩno. 12 Ĩthõng yoko, kaala vẽlẽk cĩk kacĩn naaga wo, gerthe õgõõn kĩcĩ kacĩn naaga eleeti cĩgaac madarawa cĩ alibie. Ĩthõng katĩ vurtia, kacĩn katĩ naaga kaal vẽlẽk mũrũũr. Ĩthõng yoko kagawa na gii cĩ dĩcĩ, ĩthõng thĩ, kagawa katĩna kaal vẽlẽk, kĩ yoko ngĩ agawa aneeta Nyekuci wo.
13 Ĩthõng yoko, aatĩ thoothiowa iyyio, leminit kĩ muwẽẽnĩt cĩ abũnna kĩ mĩnan. Ĩthõng thĩ, thoothiowẽy ĩcĩkkõ vẽlẽk, mĩnan cĩ ijiarĩ.