Lũtẽnĩt cĩ nyarobinya cĩk eet cĩk Nyekucak
16
Ĩthõng yoko, thõõtha cĩ lũtẽnĩt cĩ nyarobinya cĩk eet cĩk Nyekucak, ĩdĩmanit niigia thõõth wũ balna kaduwai na meelitin cĩ lemnyiok cĩk kelethianya cĩk Galathia. 2 Lomidikanyay vẽlẽk,a anycĩk eet codoi codoi kõrgẽna cunung kiitiangit nyarobinya õõgĩ kabanyca, nyarobinyay cĩk agam nẽẽgẽ tiica cĩnĩng mĩn mĩn cĩ athii cĩ aduwõy, kĩĩ katĩ mĩ kikiyyia na, ithii katĩ lũtẽntĩ ĩmma tõ. 3 Ĩthõng mĩ kõdõlana, kaanyi katĩ na eet wũk balna ẽbẽranu niigia nyaragẽt cĩk yelintiak, ĩthõng itiontu ĩnõõgõ kootti anyinit cunung Yeruthalẽma. 4 Mĩ kacini ngĩ abũnna ngatĩ woccia kõkõyyẽ na buu, kiiriokca katĩ kĩ ĩnõõgõ kõdõwẽ.Thoothonniok cĩk adiim Paulo
5 Kakuni katĩ kacinnung agiitia vurtia cĩ kõbõdaẽ looca cĩ Makedonia, nyatarka kadiimi katĩ na ngĩ kõkkõ nõõnõ ĩcĩ Makedonia. 6 Kerebo woccia katĩ kakuni na karũmẽ nõ kĩ agiitia kĩdĩĩc, kõdẽ kakuni kẽdẽcai attienb natẽ, kĩĩ katĩ ivitia elliahangũ aneeta hẽẽrõna cannĩ ĩcĩ kõkõyyẽ. 7 Athii cĩ kadiimi na kacinnung agiitia yoko, ĩthõng kikiyyia koyowotewung wathinniowẽy ĩcĩk kĩdĩk kaganoko, kamui woccia katĩ kakuni na karũmẽ kĩ agiitia kuumuc, katĩ ngĩ ẽlẽmĩ Makayyioiti. 8 Ĩthõng thĩ, kaavẽ katĩ õlõõ ĩcĩ gaalawu cĩ Ẽvẽthathĩ kuumuc kõdõlan Peyianĩ cĩ Wathinniok eet ramma kõmmõtõ,c 9 nyatarka õwẽ aneeta katũk cobbi cĩ tiic cĩ abũnna, ĩthõng aatĩ eeta cĩk meelĩk cĩk abũrna aneeta.
10 Ma ngĩ õdõlanung Timotid agiitia, ivitia ũrũmtẽ kĩ ĩnõõnõ jurrung. Adĩman nẽ tiic cĩ Makayyiokto kĩ nana. 11 Nyĩ anyiccu thẽk niigia et ĩmma kũtũbũr ĩnõõnõ. Itiontak ĩnõõnõ gõõl jurrung, kĩĩ katĩ kõbõda ĩcannĩ. Kẽrẽ katĩ na ĩnõõnõ kĩ lemnyiok õõgĩ.
12 Ĩthõng yoko, nyatarka thõõth cĩ Apolothĩ,e kadiimi na kitionacung ĩnõõnõ kiiriokta kĩ lemnyiok õõgĩ. Aharĩ balna nẽ ngatĩ akuni yoko, ĩthõng thĩ, aku katĩ nẽ kõr cĩ adiim nẽnẽ.
13 Aavut vĩrĩngĩng, okomit lemintia cunung, anycĩk thinneti cuguk kokomit. 14 Iticanit thoothonniok vẽlẽk mĩnanintia.
15 Agayyu niigia balna ngĩ arak eeta cĩk kõrõõk cĩ Ithtivanathĩ ĩcowu, ngatĩ avvu ẽẽn lemnyiok looca ĩcunung cĩ Akeyyia, ĩthõng ĩrĩcanta ngatĩ aticanothĩcẽ lemnyiok cĩk Makayyioktak. Kaduwacung na agiitia gõtõõnõga kĩ ngõõnõga, 16 elemit eet cĩk aatĩ ketee, kĩ eet vẽlẽk cĩk aticanothi Makayyioit cĩk õgõõn kĩ nẽẽgẽ. 17 Katali balna na õrrõt, ngatĩ õdõlania aneeta Ithtivanathĩ kĩ Vortunatoth kĩ Accaikath, nyatarka anyca nẽẽgẽ aneeta elinit wũ balna anyangũ niigia woyyia aneeta, ma baalia aavut niigia ngato. 18 Ĩthõng naboo, anyca aneeta kẽbẽlbẽl õrrõt, kĩ balna ngĩ anyung agiitia buu ebelbelit. Entek niigia eet cĩk õgõõn noko ne, ibalallẽ.
Thawinet cĩ Paulo cĩ aturna
19 Ĩthayyung meelitini cĩ lemnyiok cĩk avvu korookjiowẽy ĩcĩk gaalawu mĩn mĩn ĩcĩ looc cĩ Athia. Ĩthayyung Akwila kĩ ngaa cĩnnĩ Pirithilaf õrrõt thaarĩy cĩk Makayyioktak, kõdõwẽ kĩ lemnyiok cĩk aruumõy ciitha cĩnĩng. 20 Ĩthayyung gotoonogu kĩ ngoonogu cĩk aatĩ ngato vẽlẽk agiitia. Ĩthaac lemnyiok codoi codoi talintia.
21 Keheedi na Paulo kir thawinet coo attia cannĩ.
22 Mĩ athii cĩ amĩnan eeti ĩmma Makayyioit, ĩcĩĩnẽ nẽ vẽlẽk. Makayyioit, ijjia niia!
23 Anycĩk bũnnathĩt cĩ Makayyioit Yesu kaavu ĩcunung.
24 Anycĩk mĩnan cannĩ kaavu ĩcunung vẽlẽk thaarĩy cĩk Kiristo Yesu. Amẽn.