Ngaanĩ kũtũbũr Nyekuci eet cĩgĩnĩk Ĩthraĩl
11
Ĩthõng thĩ, kijina na thõõth cĩ kathĩ ne, abũrĩ da balna Nyekuci eet cĩgĩnĩk? Athii tõ kũdũt! Keeni na et cĩ Ĩthraĩlĩ, cĩ kakuni vurtia cĩ Abrahamĩ, tatũga cĩ Benyamini. 2 Athii balna cĩ abũrĩ Nyekuci eet cĩgĩnĩk wũk balna aga nẽ ĩcĩ owu. Athii wõnõ cĩ agayyu niigia thõõth wũ balna aduwa Nyaraga cĩ Nyekuco athĩ ne, alayyie balna Elijaa eeti cĩ õthõõth molook cĩ Nyekuco, thõõtha wũ balna alawĩ nẽ Nyekuc, nyatarka eet cĩk Ĩthraĩlĩ? 3 Ethei balna nẽ ne, “Makayyioit Nyekuc, uruit balna nẽẽgẽ eet wugunik wũk õthõõth molook cunni, ĩthõng athaanitõ vatĩk cĩk todongintiak cugunik, ĩthĩ aneeta dõ cĩ ngaanĩ kuungnothi, ĩthõng idiimitõ urukta aneeta buu.”b 4 Aduwaai balna kẽnnẽ Nyekuci Elija ethei ne, “Ngaanĩ kayai na wobjiak vucciaknya tũrgẽrẽm (7,000) cĩk athii cĩ ala nyekuc cĩ athĩ thar Bal.”cd 5 Ĩthõng thĩ, õgõõn yoko wathinniowẽy ĩcĩkkõ buu kĩyokowẽ, ẽbẽra Nyekuci eet cĩk Ĩthraĩlĩ cĩk kĩdĩk cĩk uungniay, bũnnathĩta cĩnnĩ. 6 Ĩthõng ma ngĩ ẽẽn bũnnathĩta cĩ Nyekuco, athii thĩ kẽnnẽ cĩ ẽẽn tiicanẽy, ma woyyia kĩĩ tiicanẽy, athii woyyia bũnnathĩtĩ cĩ Nyekuco tõ.7 Athĩ thõõth coo ne, nyia? Ẽrẽpan balna eeta cĩk Ĩthraĩlĩ Nyekuc, ĩthõng nga kumuddia nẽẽgẽ ĩnõõnõ, ĩthõng thĩ, eeta wũk eberyiay umuddia nẽẽgẽ ĩnõõnõ. Ĩthõng thĩ, aanyĩk Nyekuci õõgĩ kidiitie ooti pĩd, 8 aavĩ kĩcĩ aduwa Nyaraga cĩ Nyekuco athĩ ne,
“Aanyĩk balna Nyekuci ĩnõõgõ kũdũngĩt,
kĩĩ katĩ athii cĩ acĩnẽ kẽbẽrẽ cĩgĩk,
ĩthõng ĩdĩĩt nẽ kĩĩn cĩgĩk,
kĩĩ katĩ athii nẽẽgẽ cĩ athĩknẽ kĩĩ kõr coo.”e
9 Ngaatĩ balna õthõõthĩ alaanĩ Davide athĩ ne,
“Anyĩk woccia niia peyian cĩnĩng kĩĩ detinit cĩnĩng,
kĩ bĩĩ cĩ ĩdda ĩnõõgõ, kĩĩ katĩ kuukitõ nẽẽgẽ looc.
10 Anyĩk woccia niia ĩnõõgõ vẽlẽk kĩĩtõ rubẽnẽ!
Anyĩk bowuci cĩgĩk kigiinycie dõõkĩthĩ!”f
Eliay katĩ eeta cĩk athii cĩ ẽẽn Yudei
11 Kathĩ yoko na ne, ũtũbũrĩt eeta cĩk Ĩthraĩlĩ Nyekuc kũdũt? Athii tõ kũdũt! Aanyĩk thõõth cĩ abũrnĩ nẽẽgẽ Nyekuc eet cĩk athii cĩ ẽẽn Yudei keelliay, ĩthõng aanyĩk thõõth coo eet cĩk Ĩthraĩlĩ kililiyyek ĩnõõgõ. 12 Ĩthõng thĩ, ma ngĩ ẽẽl eeta cĩk Ĩthraĩlĩ eet cĩk loociok vẽlẽk gerthetina cĩnĩng kumuddia gatan, ĩthõng kaala cĩk ithiicõ ĩcĩnĩng, ayaktak gataninit eet cĩk athii cĩ ẽẽn Yudei, ẽẽn woccia katĩ gataniniti cobbi cĩ Nyekuco kuu, katĩ ngĩ oboddia eeta cĩk meelĩk cĩk Ĩthraĩlĩ kĩ ĩnõõnõ naboo!
13 Kaduwacung na agiitia eet cĩk athii cĩ eeginnu niigia Yudei wo, kĩcĩ keeni na tionniait cunung wo, kiriani na, nyatarka tiic cannĩ cĩ kadĩmani wo, 14 cĩ anya aneeta muwẽẽnĩt cĩ abũnna, kathĩ ne, kaanyĩk eet cĩganĩk õõgĩ kĩlĩlẽcõ kidiimitõ ngatĩ elianẽ. 15 Ma ngĩ ũtũbũrĩt balna eeta cĩk Ĩthraĩlĩ Nyekuc, ayahai thõõth coo eet cĩk looc vẽlẽk ganõn kĩ Nyekuc. Ĩthõng thĩna, katĩ ivitia elemit eeta cĩk Ĩthraĩlĩ Nyekuc naboo, õgõõn katĩ thõõth coo kĩcĩ ũrũgũtha nẽ ĩnõõgõ daaĩtha. 16 Ma ngĩ dĩhĩm tũkanĩ cĩ owu cĩ ongonyie cĩ kaanyi Nyekuc, dĩhĩm katĩ tũkanĩ cĩ ongonyie ẽẽ, vẽlẽk. Ĩthõng mĩ dĩhĩmẽ kẽgẽrõ cĩk kẽẽtak, dĩhĩmẽ nẽnnẽ katĩ taliibanẽ buu.
17 Ma da ngĩ uduullie taliibanẽ gwuak cĩk kẽẽt cĩ olivi,g ĩthõng niia cĩ balna akuni kẽẽta ĩcĩ bõõnõ cĩ olivi, arĩwothiwu balna niia kẽẽta ĩcĩ olivi kõdõwẽ kĩ taliiban cĩk olivi cĩk evyi thõng. Ijjia niia otholit dainit cĩ abũnna cĩ aku kẽgẽrõy cĩk kẽẽt cĩ olivi, 18 Ĩthõng thĩ, nyĩ iriani niia, amui athĩ ne, ijiari niia taliibanẽ nĩĩkẽ. Ma ngĩ adĩmani niia noko, ngĩ amui niia athĩ ne, athii niia cĩ anyi kegeroc kĩtĩlĩth, kegeroc cĩ anyi aniitia tĩlĩthũ. 19 Ma katĩ ngĩ amui niia athĩ ne, “Engedothii balna taliibanẽ neekie tuu, kĩĩ katĩ kabarĩc na ĩnõõgõ.” 20 Ẽẽn thẽk thõõth neccie thõõth dĩdĩ. Ĩthõng thĩ, engedothii balna nẽẽgẽ tuu, nyatarka athii balna nẽẽgẽ cĩ ẽlẽmĩ Nyekuc, ĩthõng aavẽ niia ngatĩ aavẽ wo, nyatarka ayawu niia leminit ĩcĩnnĩ. Ĩthõng thĩ, nyĩ iriani thõng, tõngõlẽ Nyekuc. 21 Ma da ngĩ etengedek Nyekuci taliibanẽ nĩĩkẽ tuu, athii woyyia cĩ atican noko ĩcunni buu?
22 Ĩthõng thĩna, had niia thimatĩth kĩ teedinet cĩ Nyekuco. Teedinet cĩ eet cĩk ũtũbũrĩt ĩnõõnõ, ĩthõng thĩ, thimatĩth ĩcunni, katĩ ngĩ alna niia thimatĩtha cĩnnĩ. Ma ngĩ athii tõ, engedothii woccia katĩ kẽnnẽ niia buu tuu. 23 Ma da ngĩ ẽtẽrẽktaĩ eeta cĩk Ĩthraĩlĩ ayait leminit naboo, aku katĩ ẽlẽmĩ Nyekuci ĩnõõgõ kĩĩtõ taliibanẽ naboo. Ayak Nyekuci makathĩt cĩ õbõdanĩ ĩnõõgõ naboo kẽẽta cĩnnĩ. 24 Ma baalia niia ma ngĩ eeni taliibanit cĩ engedothii tuu kẽẽta cĩ ẽẽn oliv cĩ boono, ĩthõng arĩwothiwu kẽẽta ĩcĩ evyi ĩcĩ olivi, amũjĩ ngatĩ aarĩcẽ Nyekuci taliibanẽ cĩk ẽẽn dĩdĩ kẽẽta ĩcĩnĩng dõ.
Eliay katĩ eeta cĩk Ĩthraĩlĩ vẽlẽk
25 Gõtõõnõga kĩ ngõõnõga, kadiimnyung na agiit agaac thõõth cĩ alugunyi cĩ ijiar gẽẽnyĩth cĩ eetu, kĩĩ katĩ athii niigia cĩ iriannu. Ĩthõng balna ivitia eeta gwuak cĩk Ĩthraĩlĩ ũtũbũrĩt Nyekuc, ĩĩthõng gii ma ngĩ ivitia eeta cĩk ẽtẽmanõy cĩk athii cĩ ẽẽn Yudei kelemit Nyekuc, 26 gõõla cĩ aduwõy thõng, eliay katĩ eeta cĩk Ĩthraĩlĩ vẽlẽk, kĩcĩ aduwa Nyekuci Nyaragawa cĩnnĩ athĩ ne,
“Aku katĩ Ellioiti Thiira ĩcĩ Thionĩ kikiyyia kẽẽl eeta.
Ũũwũ katĩ nẽ dõõlĩ cĩk Yokobĩ, kĩĩ katĩ kithii nẽẽgẽ
cĩ atican thoothonniok cĩk gerthek.
27 Ngẽrẽmngẽrẽm cannĩ cĩ katĩ kadakca naaga kĩ ĩnõõgõ coo,
kĩĩ katĩ kẽnyẽẽĩ na gerthetin cĩnĩng ngatĩvõrĩ.”h
28 Mẽẽlĩ eeta cĩk Ĩthraĩlĩ cĩk yoko ẽẽn mĩrõk cĩk Nyemut cĩ Abũnna, ĩthõng thĩ, ngaanĩ ẽẽn nẽẽgẽ eet cĩk amĩnan Nyekuci noko, nyatarka ẽbẽra balna nẽ õõ baatĩ baajigi baajikni Abraham kĩ Aĩthak kĩ Yokob, 29 nyatarka athii cĩ amiirẽnẽ Nyekuci anyintiok wũk balna aanyĩk nẽ eet cĩgĩnĩk, ĩthõng ngaanĩ kerehek eet wũk balna ẽbẽra nẽnẽ. 30 Aburnu balna gõõ niigia eeta cĩk athii cĩ eeginnu Yudei Nyekuc, ĩthõng yoko, atamatiwung nẽ agiitia, nyatarka ũtũbũrĩt balna eeta cĩk Ĩthraĩlĩ ĩnõõnõ, 31 ngaatĩ yoko avvu gerthe nẽẽgẽ, kĩĩ katĩ woccia kijiokta nẽẽgẽ buu tamati cĩ Nyekuco, nyatarka atamatiwung Nyekuci agiitia. 32 Ũtũbũrĩt balna eeta vẽlẽk thõõth cĩ Nyekuco, ĩnõõnõ thĩ cĩ adĩmanĩ nẽ ĩnõõgõ kĩ eeta cĩk ecebjie wo, kĩĩ katĩ woccia katamatĩk nẽ ĩnõõgõ vẽlẽk.
Kĩdĩhĩthĩt Nyekuc
33 Ngẽnẽ woccia cĩ atĩman balinit cobbi õrrõt cĩ gẽẽnyĩtho kĩ thõõth cĩ aga Nyekuci. Ngẽnẽ woccia cĩ aga teedinet cĩnnĩ vẽlẽk, kõdẽ ngẽnẽ woccia cĩ ẽkẽba goolliok cĩk õkõyyĩ nẽnẽ
34 “Ngẽnẽ balna cĩ aga muwẽẽnĩt cĩ Makayyiokto?
Kõdẽ ngẽnẽ balna cĩ ẽẽn tirithioit cĩnnĩ?”i
35 “Ngẽnẽ balna cĩ aanyĩk Nyekuc anyinit ĩmma,
kĩĩ katĩ kũdũman Nyekuci ĩnõõnõ?”j
36 Avvu kaala vẽlẽk ĩcĩnnĩ, ĩthõng engenyciay balna kaala vẽlẽk, nyatarka ĩnõõnõ, ĩthõng katĩ imiiryie õõt ĩcĩnnĩ. Kĩdĩhĩthĩt ĩnõõnõ kũdũt! Amẽn.