Ayaha Kiristo rũgẽt cĩ jõr
12
Ĩthõng thĩna, niigia gõtõõnõga kĩ ngõõnõga, kalayyung na agiit tamatia cĩ Nyekuco, anycĩk eleeti cuguk kaavutõ kĩ kaala cĩk cavawu cĩk arũgĩ, kĩdĩhĩmtẽ kaanycĩk Nyekuc katal, ẽẽn coo gõõl cĩ woccia alawinu niigia. 2 Nyĩ ngaanĩ owobju niigia thoothonniok cĩk looc coo naboo, ĩthõng thĩ, ũtũwec muwẽẽnĩt cĩ thinneti cuguk kĩĩtõ jõr. Ĩnõõnõ thĩ cĩ katĩ ullu ngatĩ atĩmannu, ĩthõng ũrũbtawu diimẽnẽt cĩ Nyekuco ngatĩ abũnnanĩ kijiar õrrõt.3 Nyatarka bũnnathĩt wũ balna anyĩwothĩca aneeta, kaduwacung na agiitia vẽlẽk kethecung ne, nyĩ amukcu thõõth cĩ eleeti cuguk õrrõt, kĩcĩ woyyia ngĩ adiimnyu niigia, ĩthõng thĩ, ummuit eleeti cuguk gõõla cĩ leminit wũ balna anyung Nyekuci agiitia codoi codoi. 4 Kayak naaga vẽlẽk eleeti codoi codoi cĩk ayak vatĩk cĩk aatĩ mĩn mĩn, ĩthõng vatĩka cĩkkõ vẽlẽk, athii cĩ aduwõy tiici cĩnĩng thõng, 5 ĩthõng thĩ, kaatĩ naaga buu noko. Keegin naaga mẽẽlĩ, ĩthõng keegin ẽlẽ codoi doo kĩ Kiristo, ĩthõng vatĩka cĩkkõ vẽlẽk, aticanothi nẽẽgẽ vẽlẽk gõõnõgĩ. 6 Bũnnathĩta cĩ Nyekuco, anyet nẽ ageeta codoi codoi anyinit kiticantõĩ jurrung. Mĩ woccia anyi aniitia Nyekuci duwa thõõth cĩ katĩ aku kõr ĩmma, adĩmani woccia katĩ kĩcĩ aduwa leminiti cĩ eyei niia. 7 Mĩ woccia aticanothi niia eet õõgĩ, ticanothĩk. Ma woccia ngĩ eeni niia limannioit, limanõy. 8 Ma ngĩ aga niia ngatĩ anũmnũmmanẽcẽ eet thõõth cĩ abũnna, nũmnũmmanek ĩnõõgõ thõõth nĩcẽ. Ma ngĩ aga niia ngatĩ õwacẽ eet kaal õõgĩ, õwak thĩnĩna ĩcĩ võõrĩ. Ma ngĩ eeni niia makayyioit, tũwwa eet gõõla cĩ abũnna. Ma ngĩ amanni niia eet, tamatĩk talintia.
Mĩnan eet vẽlẽk
9 Anycĩk mĩnan cĩ amĩnanu niigia eet kĩĩ dĩdĩ. Ũtũbũrĩt thoothonniok vẽlẽk cĩk gerthek, ĩthõng uthuuttu gii vẽlẽk cĩ abũnna. 10 Ĩmĩnanit goonogu kaavutõ kĩ gotoonogu kĩ ngoonogu, ĩthõng idihiththu ĩnõõgõ kijiaritõ eleeti cuguk. 11 Iticantõy õrrõt, ĩthõng nyĩ eeginnu nyamuttiok, iticantothĩk Makayyioit õrrõt talintia. 12 Anycĩk muwẽẽnĩt cunung cĩ abũnna kaanyung agiit ebelbelit. Omogit pĩrnanẽt wathinniowẽy cĩk gerthek, ĩthõng nyĩ abilnuu lawinit. 13 Uthuutti eet cĩk ẽẽn piryiak cĩk Makayyioktak, ĩthõng anyciwu kerenniok kivitia korookjiok cuguk.
14 Alaac Nyekuc kagatan eet cĩk adĩmannung agiit buth. Alaac ĩnõõnõ kagatan ĩnõõgõ thõng, nyĩ aciinnu ĩnõõgõ thõng. 15 Ebelbelit kĩ eet cĩk ẽbẽlbẽlĩ, ĩthõng utuluthu kĩ eet cĩk alu. 16 Aavut jurrung kĩ eet vẽlẽk. Nyĩ engerennu, ĩthõng thĩ, irioit kĩ eet cĩk athimatĩth vẽlẽk jurrung. Nyĩ athinnu ne, eeginnu niigia tiirti ijiaryu eet õõgĩ.
17 Nyĩ ĩcaacanu thoothonniok cĩk adĩmanecung eeta agiitia buth. Ĩthõng ĩdĩmanit thoothonniok cĩk ahad eeta vẽlẽk athĩ ne, abũnna. 18 Ĩtĩmanit õrrõt ngatĩ attiyyu jurrung kĩ eet vẽlẽk. 19 Gõõnõga cĩganĩk, nyĩ ĩcaacanu thoothonniok cĩk adĩmanecung eeta agiitia buth. Ĩthõng thĩ, anycĩk Nyekuc kĩcaaca nẽnẽ. Athĩ Makayyioiti ne, “Aneeta woccia cĩ kĩcaaca. Kadũmani katĩ na ĩnõõgõ thõõth cĩnĩng cĩ gerthe ẽẽ.”a 20 Õthõõth naboo Nyaraga cĩ Nyekuco athĩ ne,
“Ma ngĩ adak miroit cunni boobo,
anyĩk gii cĩ adaĩ.
Ĩthõng mĩ aruk ĩnõõnõ kõr,
anyĩk ĩnõõnõ maam kũwũdẽ.
Aduwõy katĩ thõõth coo
kĩ ngatĩ anyĩcẽ ĩnõõnõ kangawan thõng.”b
21 Nyĩ anyi gerthetin kijiari aniitia, jiar niia gerthetin gõõla cĩ adĩmanẽ thõõth cĩ abũnna.