Rũma 10

Gõtõõnõga kĩ ngõõnõga, adiim thĩnĩn cannie ngĩ kala Nyekuc, kĩĩ katĩ keelliay eeta cĩk Ĩthraĩlĩ. 2 Nyatarka kaduwa na kathĩ ne, adiim nẽẽgẽ Nyekuc õrrõt, ĩthõng thĩ, kẽnnẽ diimẽnẽtĩ cĩnĩng wo, athii cĩ ẽẽn gẽẽnyĩth cĩ aku ĩcĩ Nyekuco. 3 Nyatarka athii cĩ aga eeta cĩk Ĩthraĩlĩ gõõl cĩ bũnnathĩt cĩ aku ĩcĩ Nyekuco, ĩthõng idiimitõ ngatĩ arũbanĩ gõõl cĩ bũnnathĩt cĩnĩng mĩn, ĩthõng ũtũbũrĩt bũnnathĩt cĩ Nyekuco, 4 ikiyyia ẽdẽcak Kiristo tiic wũ balna anyi Ngiranĩ eet kiticanit, kĩĩ katĩ eeta vẽlẽk cĩk ẽlẽmĩ Kiristo, ikiyyia ẽlẽm Nyekuci ĩnõõgõ lemintia ĩcĩnĩng.

Eliay katĩ eeta vẽlẽk

5 Uduwa balna Mutha, bũnnathĩt cĩ aku Ngirana gõõla cĩ athĩ ne, “Eeti cĩ adĩman kaal cĩkkõ, abaak katĩ nẽ ĩcĩnĩng.” 6 Ĩthõng thĩ, aduwa bũnnathĩtĩ cĩ aku lemintia athĩ ne, “Nyĩ othoothi niia thĩnĩna ĩcunni athĩ ne, ‘Ngẽnẽ cĩ woccia õtõd tammutiddin?’ ” Athĩ thõõth coo ne, kũũk kayaha nẽ Kiristo loota, 7 “kõdẽ ‘Ngẽnẽ cĩ woccia alũũcĩ õkkõ looca cĩ daakciawu?’ ” Athĩ thõõth coo ne, kũũk kũrũgũtha nẽ Kiristo daaĩtha. 8 Ĩthõng thĩ, athĩ thõõth coo ne, nyia? Athĩ ne, “Õbõwẽ nyemut ĩcunni aavu joonui, aavu kũtũga cunni kĩ thĩnĩna cunni.” Ĩthõng ẽẽn coo nyemut cĩ leminit cĩ kirionna naaga wo thõng. 9 Nyatarka mĩ uduwa niia kũtũga cunni ĩthĩ ne, “Ẽẽn Yesu Makayyioit,” ĩthõng elemu thĩnĩna cunni ĩthĩ ne, arũgũtha balna Nyekuci ĩnõõnõ daaĩtha, eliay katĩna niia. 10 Nyatarka ma ngĩ elemi niia thĩnĩna cunni ngĩ athĩ ne, anyi katĩ Nyekuci aniitia bũna, ĩthõng mĩ uduwa niia ĩthĩ ne, elemi niia Kiristo kũtũga cunni, eliay thẽk niia. 11 Kĩcĩ aduwa Nyaraga cĩ Nyekuco athĩ ne, “Eeti cĩ ẽlẽmĩ ĩnõõnõ, athii katĩ cĩ agam ngawani kũdũt.” 12 Nyatarka aduwõy eeta cĩk ẽẽn Yudei kĩ eet cĩk athii cĩ ẽẽn Yudei thõng, Makayyioit codoi doo dõ cĩ ẽẽn Makayyioit cĩ eet vẽlẽk, ĩthõng agatan eet vẽlẽk õrrõt cĩk avvũ ĩnõõnõ, 13 nyatarka, “Eeta vẽlẽk cĩk avvũ Makayyioit, eliay katĩna nẽẽgẽ.”

14 Avvũ woccia nẽẽgẽ et cĩ ngaanĩ kelemit nẽẽgẽ kuu? Ayak woccia nẽẽgẽ leminit ĩcĩ et cĩ ngaanĩ kĩthĩraritõ nẽẽgẽ ĩnõõnõ kuu? Ĩthõng athĩrar woccia nẽẽgẽ ĩnõõnõ ma ngaanĩ kirionĩk eeti ĩmma ĩnõõgõ kuu? 15 Irioni woccia nẽẽgẽ eet kuu katĩ ngaanĩ kitiontẽ nẽẽgẽ? Kĩcĩ eheeddi Nyaragawa ĩcĩ Nyekuco athĩ ne, “Ẽẽn dihimitini cĩ thoo cĩk eet cĩk ayaha Nyemut cĩ Abũnna wo kuu!”

16 Ĩthõng thĩ, balna athii cĩ ẽlẽmĩ eeta cĩk Ĩthraĩlĩ vẽlẽk Nyemut cĩ Abũnna wo. Nyatarka balna ethei Ĩthaia eeti cĩ õthõõth molook cĩ Nyekuco Makayyioit ne, “Makayyioit, ngẽnẽ balna cĩ ẽlẽmĩ nyemut cĩnang?” 17 Ĩthõng thĩna, aku leminiti, nyatarka thĩhẽnĩt cĩ Nyemut cĩ Abũnna, ĩthõng athĩhĩ eeta nyemut coo thõõtha ĩcĩ õthõõthĩ eeta thõõth cĩ Kiristo. 18 Ĩthõng thĩ yoko, kathĩ na ne, nga balna kĩthĩraritõ eeta cĩk Ĩthraĩlĩ? Ii, ĩthĩraritõ! Aduwa Nyaraga cĩ Nyekuco athĩ ne,

“Ĩthõng thĩ, nẽnnẽ, õkkõ moloowĩ cĩnĩng ĩcĩ looc vẽlẽk,

ĩthõng ĩthĩraritõ eeta cĩk looc vẽlẽk molook cĩnĩng.”

19 Ĩthõng thĩ, kijinõy kĩthĩ ne, athĩknẽ balna thẽk eeta cĩk Ĩthraĩlĩ jurrung? Aduwaai balna Nyekuci Mutha ethei ne,

“Kaanyung katĩ na agiitia Ĩthraĩl ililiyiek eet

cĩk athii cĩ ayak looc.

Kaanyung katĩ na agiitia avaraccik eet

cĩk athii cĩ aga gimma.”

20 Õthõõth balna Ĩthaia tiirion, ngatĩ aduwanĩ thõõth cĩ Makayyiokto athĩ ne,

“Umuddiaha balna eeta wũk balna athii cĩ adiimnya aneeta.

Ĩthõng kilibaha eet wũk balna athii cĩ ajinna aneeta.”

21 Ĩthõng thĩ, õthõõth Nyekuci eet cĩk Ĩthraĩlĩ athĩ ne,

“Waathĩn vẽlẽk, kodongeei na athĩn cĩganĩk ĩnõõgõ,

kĩĩ katĩ kagayyiõwa na kĩ eet

cĩk athii cĩ athĩknẽ kĩ cĩk utuburyia aneeta.”