Rũma 9

Ẽbẽra Nyekuci eet cĩk Ĩthraĩlĩ

Kothoothi na thõõth dĩdĩ cĩ Kiristo, athii cĩ kovolongi thõng, aduwa muwẽẽnĩtĩ cĩ thĩnĩn cannĩ thõõth coo Ririwaca cĩ Dĩhĩmĩ, 2 kayai na mothinit cobbi õrrõt cĩ awucni thĩnĩn cannie athii cĩ edecciay. 3 Nyatarka kadiimi woccia na ngĩ acĩĩnna Nyekuci aneeta, ĩthõng kengeryiowa kĩ Kiristo, katĩ mĩ ẽẽl eet cĩganĩk 4 cĩk Ĩthraĩlĩ. Nyatarka ẽẽn nẽẽgẽ balna eet cĩk ẽbẽra Nyekuci, ĩthõng eyeleei ĩnõõgõ bulẽnĩt cĩnnĩ. Adait balna nẽ kĩ ĩnõõgõ ngẽrẽmngẽrẽm, thõõtha cĩ anyĩcẽ nẽ ĩnõõgõ Ngiran cĩnnĩ. Aanyĩk nẽ ĩnõõgõ avuthit cĩ alawĩ ĩnõõnõ Ciitha ĩcĩ Nyekuco, ĩthõng umuddia nẽẽgẽ bũtan cĩnnĩ vẽlẽk. 5 Ẽẽn Abrahamĩ kĩ Aĩthak kĩ Yokob baajigi cĩgĩk, ĩthõng aku balna Yesu Kiristo buu ĩcĩnĩng. Ĩthõng ẽẽn Kiristo Nyekuc, cĩ agam looc vẽlẽk, kĩĩ katĩ kĩdĩhĩthĩt eeta ĩnõõnõ kũdũt! Amẽn.

6 Ngaanĩ kutdukuay thõõth wũ balna aduwa Nyekuci. Nyatarka athii cĩ ẽẽn eeta cĩk Ĩthraĩlĩ vẽlẽk eet cĩk Ĩthraĩlĩ. 7 Kõdẽ woyyia ngĩ ẽẽn eeta dõõlĩ cĩk Abrahamĩ. Athii cĩ anyi thõõth coo ĩnõõgõ vẽlẽk kĩĩtõ dõõlĩ cĩgĩnĩk dĩdĩ, nyatarka eheeddi Nyaragawa ĩcĩ Nyekuco athĩ Nyekuci ne, “Nyatarka aku katĩ Aĩthaĩ ẽẽn baatĩ dõõlĩ cĩk dõõlĩ cugunik wũk balna kaduwaci na.” 8 Athĩ thõõth coo ne, athii doolia cĩk Abrahamĩ vẽlẽk cĩ ẽẽn dõõlĩ cĩk Nyekucak, ĩthõng thĩ, doolia wũk balna abũtana Nyekuci ẽẽn kir dõõlĩ cĩk Abrahamĩ. 9 Nyatarka gõõl cĩ balna aduwanĩ Nyekuci thõõth coo, athĩ ne, “Kõbõda katĩ na erkit cĩ gõlla kõr cĩ aavĩ kĩ coo, kũmũdaha katĩ Thaara ũtũwa logoo cĩ maacĩ.”

10 Ĩthõng athii cĩ ẽẽn thõõth nĩcẽ, coo dõ, ĩthõng thĩ, ma balna ngĩ itik baangietĩ cĩnac Aĩthaĩ Rẽbẽka, ikiyyia ũtũwa Rẽbẽka dõõlĩ cĩk ẽẽn kĩballĩ. 11 Ĩthõng thĩ, balna ngaanĩ kittiryiay doolia cĩk ẽẽn kĩballĩ wo, kõdẽ kĩdĩmanit gimma cĩ abũnna, kõdẽ cĩ gerthe, ikiyyia ijiowa Rẽbẽka nyemut ĩmma cĩ Nyekuco, cĩ athĩ ne, ẽbẽra Nyekuci et, nyatarka diimẽnẽt cĩnnĩ, 12 ĩthõng avva nẽ eet, ĩthõng thĩ, athii cĩ ẽnnẽ, nyatarka tiiciok cĩgĩk cĩk abũnna, kõdẽ cĩk gerthek. Aduwaai balna Makayyioiti Rẽbẽka ethei ne, “Aticanothi katĩ logoo cobbi gõtõnĩ cĩ dĩcĩ.” 13 Athĩ Nyekuci Nyaragawa cĩnnĩ ne, “Kamĩnani balna na Yokob, ĩthõng thĩ, kaburea balna Ethau.”

14 Kõthõõth woccia yoko naaga kathĩ ne, nyia? Gẽrtha woccia Nyekuci? Athii tõ kũdũt! 15 Nyatarka balna ethei Nyekuci Mutha ne,

“Kamanni katĩ na et cĩ kadiimi ngĩ kamanni nana,

ĩthõng kathimaati katĩ na et

cĩ kadiimi ngĩ kathimaati nana.”

16 Ĩthõng thĩna, aticanni kaala vẽlẽk tamatia ĩcĩ Nyekuco, ĩthõng athii cĩ ẽẽn giiwa ĩcĩ adiim eeta, kõdẽ ĩcĩ adĩman nẽẽgẽ. 17 Nyatarka aduwa balna Nyekuci Nyaragawa cĩnnĩ ethei alaan cĩ Ijibi ne, “Kodongnyi balna na aniitia, nyatarka thõõth coo, kĩĩ katĩ keyeleei na aniitia tiirthẽt cannĩ, kĩĩ katĩ woccia kagayyie thara cĩganniek eetĩnẽy ĩcĩk loociok vẽlẽk.” 18 Ĩthõng thĩna, amanni Nyekuci eet cĩk adiim nẽ ngĩ amanni, ĩthõng anyĩk eet kũtũbũrĩt ĩnõõnõ wũk adiim nẽ ĩnõõgõ kũtũbũrĩt ĩnõõnõ.

19 Etheca katĩ eeti ĩmma kõrgẽna cunung ne, “Ngaanĩ etedĩcet Nyekuci ageeta thõõth noko nyia? Nyatarka ngẽnẽ cĩ abũrĩ diimẽnẽt cĩnnĩ wo?” 20 Ĩthõng thĩ, nyia woccia niia eeti cĩ olli kaganoko ẽpẽkantõy kĩ Nyekuc wo? Ajin woccia gõõ gii cĩ engenyciay, et cĩ ẽngẽnyca ĩnõõnõ wo ethei ne, “Ẽngẽnycana balna niia ketee nyia?” 21 Athii woccia cĩ ẽbẽra tengenyioiti cĩ ijjionyawu ngatĩ ẽngẽnycanĩ ijjionya õõgĩ cĩk tiicanẽ cĩk addi, ĩthõng ĩĩtõ gwuak cĩk tiicanẽ wũk gõõ dõõkĩthĩ kaganoko?

22 Ma woccia ngĩ adiim Nyekuci ngĩ ẽyẽla varac cĩnnĩ, ĩthõng ẽyẽla tiirthẽt cĩnnĩ kĩ eet vẽlẽk. Ĩthõng thĩ, kẽnnẽ balna alna nẽ adangan eet cĩk inniai varacĩ cĩnnẽ ĩnõõgõ, ĩthõng katĩ athaan nẽ ĩnõõgõ? 23 Ma woccia ngĩ adiim ẽyẽla Nyekuci bulẽnĩt cĩnnĩ cobbi, katĩ ngĩ amanni nẽ eet cĩk ẽbẽra nẽ kotholit bulẽnĩt cĩnnĩ, 24 kõdẽ kĩ ageeta buu eet cĩk ẽbẽra nẽ, eetĩnẽy cĩk Yudei kĩ ĩcĩk athii cĩ ẽẽn Yudei? 25 Kĩcĩ õthõõth Nyekuci Nyaragawa cĩ Hothea, et cĩ õthõõth molook cĩ Nyekuco athĩ ne,

“Eeta wũk balna athii cĩ ẽẽn eet cĩganĩk,

kũtũvũwa katĩ yoko na ĩnõõgõ kennea ne,

iittu niigia eet cĩganĩk.

Ĩthõng kennea et cĩ athii cĩ kamĩnani ne,

kamĩnanni na aniitia.”

26 Ĩthõng,

“Adĩmanni katĩ thõõth coo natẽ nginiwa,

wũ balna aduwaai Nyekuci ĩnõõgõ ethei ne,

‘Athii cĩ eeginnu niigia eet cĩganĩk,’

avwũẽ katĩ nẽẽgẽ athĩ ne,

‘Ẽẽn nẽẽgẽ dõõlĩ cĩk Nyekuc cĩ arũgĩ.’ ”

27 Ẽgẽrẽny balna Ĩthaia eeti cĩ õthõõth molook cĩ Nyekuco, nyatarka eet cĩk Ĩthraĩlĩ athĩ ne,

“Kõdẽ woyyia ma kĩĩtõ doolia cĩk Ĩthraĩlĩ mẽẽlĩ,

kaavutõ kĩ kathaaca cĩk aatĩ titimma cĩ bũlũco,

eliay katĩ eeta cĩk kĩdĩk cĩk ũtũngtothĩha.

28 Nyatarka eteedi katĩ Makayyioiti eet cĩgĩnĩk

thõõth loota ngato, kẽdẽcak tamanoko.”

29 Aduwa balna Ĩthaia ĩcĩ owu athĩ ne,

“Mĩ balna kithii Makayyioiti cĩ Tiiri cĩ Ijiar vẽlẽk

ngatĩ anyigianĩ nẽ dõõlĩ cĩk vurtẽẽn cĩgaac õõgĩ tõ,

kigiiryiay woyyia baalia kaavutõ

kĩ korookjiowa cĩk gaalawu cĩk Thõdõmĩ kĩ Gõmõra.”

Ĩthraĩl kĩ Nyemut cĩ Abũnna

30 Kõthõõth woccia yoko kathĩ ne, nyia? Athii balna cĩ atĩman eeta cĩk athii cĩ ẽẽn Yudei ngatĩ arũbanĩ gõõl cĩ bũnnathĩto, ĩthõng thĩ, yoko ivitia umuddia nẽẽgẽ bũnnathĩt lemintia cĩnĩng ĩcĩ Nyekuco. 31 Ĩthõng thĩ, eeta cĩk Ĩthraĩlĩ wũk balna õwõb Ngiran, kĩĩ katĩ kũrũbta nẽẽgẽ gõõl cĩ ẽlẽmĩ Nyekuci ĩnõõgõ kũbũnta, ĩthõng ngaanĩ kũrũbta nẽẽgẽ gõõl nĩcẽ. 32 Nyia da? Nyatarka athii balna nẽẽgẽ cĩ aticanini leminit, ĩthõng thĩ, aticanini nẽẽgẽ tiiciok cĩk adĩman nẽẽgẽ. Ĩdda balna ĩnõõgõ bĩĩ cĩ gõõ ĩdda eet kitiathõ. 33 Kĩcĩ aduwa Nyekuci Nyaragawa cĩnnĩ athĩ ne,

“Ĩcĩnĩt, kaarĩha na Thiira ĩcĩ Thionĩ,

bĩĩ cĩ ĩdda eet kitiathõ,

anyi bĩĩ ĩnõõgõ kitiathõ.

Ĩthõng thĩ, eeti cĩ ayak leminit ĩcĩnnĩ,

athii katĩ cĩ agam ĩnõõnõ ngawani kũdũt.”