Anyet Ririwacĩ cĩ Nyekuco rũgẽt
8
Ĩthõng thĩna, ithii thõõth cĩ etedothi eet cĩk ũrũmtẽ kĩ Kiristo Yesu tõ, 2 nyatarka anya aneeta Ririwacĩ cĩ Dĩhĩmĩ rũgẽt cĩ aku ĩcĩ Kiristo Yesu, ĩthõng õgaha nẽ aneeta gerthetina kĩ daaĩtha. 3 Nyatarka athii woyyia cĩ atican Ngiranĩ cĩ Mutha thõõth coo, nyatarka anyĩk thõõth cĩ kabarritẽcĩ naaga Ngiran kithii cĩ tiir. Ĩthõng thĩ, balna õgaẽt ageeta Nyekuci, ngatĩ itionanẽ Ngẽrĩnĩ kikiyyia kaavu kĩ naaga gẽrẽthanniowa,a ĩthõng ĩthĩ nẽ gii cĩ cavĩto cĩ gerthetin cĩnac. Adĩmanini Nyekuci ẽlẽ cĩ Yesu kẽtẽdĩ gerthetin, 4 kĩĩ katĩ kĩdĩmanit thoothonniok cĩk abũnna cĩk adiimiet Ngiranĩ kĩthĩhĩt, avuthẽt cĩ kabaaĩ gõõla cĩ Ririwac cĩ Dĩhĩmĩ, ĩthõng athii cĩ kabaaĩ gõõla ĩcĩ eleeti cĩgaac cĩk anyet kĩdĩmanit gerthetin.5 Eeta cĩk agam muwẽẽnĩtĩ cĩ gẽrẽthaninto, ahad thõõth cĩ eleeti cĩgĩk dõ. Ĩthõng eeta cĩk agam Ririwacĩ cĩ Dĩhĩmĩ, ahad thoothonniok cĩk Ririwac cĩ Dĩhĩmĩ. 6 Ayaha muwẽẽnĩtĩ cĩ et cĩ ẽẽn gẽrẽthannioit daaĩth, ĩthõng thĩ, muwẽẽnĩtĩ cĩ et cĩ agam Ririwacĩ, ayaha rũgẽt kĩ ganõn. 7 Aaburneei muwẽẽnĩtĩ cĩ gẽrẽthaninto Nyekuc dõõkĩthĩ. Athii cĩ ẽlẽmĩ Ngiran cĩnnĩ, ĩthõng athii cĩ ongollie Ngiran kũdũt. 8 Eeta cĩk õwõb thoothonniok cĩk gerthek cĩk adiim thinneti cĩgĩk, athii cĩ anyi Nyekuc kẽbẽlbẽl.
9 Ĩthõng thĩ, gõõla ĩmmanĩ, ĩthĩnga agamnyung agiitia thoothonniowa cĩk gerthek cĩk adiim thinneti cuguk, ĩthõng thĩ, kẽnnẽ agamnyung agiit Ririwacĩ, katĩ ngĩ aavĩ Ririwacĩ cĩ Nyekuco ĩcunung. Ĩthõng mĩ athii cĩ ayak eeti ĩmma Ririwac cĩ Kiristo, athii nẽ cĩ ẽẽn et cĩ Kiristo. 10 Ĩthõng thĩ, ma ngĩ aavĩ Kiristo ĩcunung, kõdẽ woyyia ngĩ aavutõ eleeti cuguk kĩcĩ adaaitõ, nyatarka gerthetin, ĩthõng thĩ, anyung Ririwacĩ cĩ Dĩhĩmĩ agiitia rũgẽt, nyatarka elemung Nyekuci agiitia ĩĩtõ eet cĩk ũbũntawu. 11 Ĩthõng ma ngĩ aavĩ Ririwacĩ cĩ Nyekuco ĩcunung, anyi katĩ Nyekuci eleeti cuguk cĩk woccia adaaĩ wo, rũgẽt Ririwaca cĩnnĩ ĩcĩ aavĩ ĩcunung, nyatarka balna arũgũtha nẽ Yesu Kiristo daaĩtha.
12 Ĩthõng thĩna, gõtõõnõga kĩ ngõõnõga, athii woccia cĩ karũgĩ naaga, kĩĩ katĩ kĩdĩmanit thoothonniok cĩk gerthek cĩk abarriteei eleeti cĩgaac. 13 Nyatarka ma ngĩ aruknu niigia, nyatarka thoothonniok cĩk gerthek cĩk abarriteei eleeti cuguk, adaaknu katĩna, ĩthõng thĩ, mĩ ũtũngtewu niigia thoothonniok cĩk gerthek cĩk abarriteei eleeti cuguk tiirthẽta cĩ Ririwac cĩ Dĩhĩmĩ, aruknu katĩna, 14 nyatarka eeta cĩk ũũwa Ririwacĩ cĩ Nyekuco ĩnõõgõ, ẽẽn nẽẽgẽ dõõlĩ cĩk Nyekucak.
15 Athii cĩ anyĩwothicung agiitia ririwacĩ cĩ anyung agiitia ĩĩtõ nyakapanak cĩk aviiriecu Nyekuc. Ĩthõng thĩ, kẽnnẽ anyung Ririwacĩ cĩ Nyekuco ĩĩtõ dõõlĩ cĩk Nyekucak, ĩthõng kũtũvvẽcõ Nyekuc Ririwaca kĩĩtõ ne, “Papa, Baangiet cĩnac.” 16 Anyet Ririwacĩ cĩ Nyekuco kĩ ririwanĩn cĩgaac kagaac, dĩdĩ ngĩ keegin naaga dõõlĩ cĩk Nyekucak. 17 Ĩthõng yoko mĩ kĩĩtõ naaga dõõlĩ cĩk Nyekucak kõdõwẽ kĩ Kiristo, kavvu karagĩth naaga gatan cĩ anyet Nyekuci, kĩ balna ma ngĩ aragĩth Kiristo buu gatan, ĩthõng mĩ kõthõl naaga kĩ Yesu pĩrnanẽt cĩnnĩ dĩdĩ, kõthõl katĩ naaga kĩ ĩnõõnõ bulẽnĩt cĩnnĩ buu.
Bulẽnĩt cĩ katĩ aku vurtia ĩcĩ pĩrnanto
18 Kagga na maka bulẽnĩtĩ cĩ katĩ eyelecet Nyekuci ageeta ijiar pĩrnanẽt cĩ yoko kayak naaga wo. 19 Ereyyi kaala vẽlẽk wũk balna ẽngẽnyca Nyekuci kõr cĩ katĩ ẽyẽlanĩ nẽ kir dõõlĩ cĩgĩnĩk. 20 Ĩthõng kẽnnẽ atalmanyantẽ kaala vẽlẽk wũk balna ẽngẽnyca Nyekuci, nyatarka ĩcĩĩn Nyekuci ĩnõõgõ. Ĩthõng thĩ, yoko ayak nẽẽgẽ vẽlẽk muwẽẽnĩt cĩ abũnna, 21 cĩ katĩ oogianẽ nẽẽgẽ vẽlẽk pĩrnanta kĩ daaĩtha, ĩthõng ivitia otholit bulẽnĩt cĩ dõõlĩ cĩk Nyekucak.
22 Kagga naaga ngĩ kathĩ ne, alu balna kaala vẽlẽk wũk balna ẽngẽnyca Nyekuci wuciitha, kaavutõ kĩ ngaa cĩ adiim ngĩ uukciay, karawak itin coo. 23 Ĩthõng thĩ yoko, kabalac naaga buu thinnetinẽy ĩcĩgac tiv, kõdẽ woyyia yoko ma ngĩ anyet Ririwacĩ cĩ Dĩhĩmĩ ageeta kaal cĩk abũnna, ngaanĩ kẽrẽ eleeti cĩgaac kooktiay pĩrnanta kĩ daaĩtha. 24 Nyatarka muwẽẽnĩt cĩ abũnna coo, kivitia keelliay naaga. Ĩthõng thĩ, mĩ edenyiay muwẽẽnĩtĩ cĩ abũnna wo, athii cĩ ẽẽn naboo muwẽẽnĩt cĩ abũnna. Ngẽnẽ cĩ ayak muwẽẽnĩt cĩ abũnna kaalĩy ĩcĩk ayak nẽ vẽlẽk? 25 Ĩthõng thĩ, mĩ kaari naaga muwẽẽnĩt cĩ abũnna giiwa cĩ ngaanĩ kayait, kẽrẽc ĩnõõnõ mogintia.
26 Ĩthõng gõõla ĩcoo dõ noko, ellet Ririwacĩ cĩ Dĩhĩmĩ ageeta katĩ ngĩ athii naaga cĩ keegin tiirti. Athii cĩ kagga naaga gii cĩ kala wo, ĩthõng thĩ, kẽnnẽ, alawinet Ririwacĩ kir, balacõna cĩ woccia athii cĩ aduwanĩ eeti ĩmma. 27 Ĩthõng Nyekuci cĩ aga thinneti cĩgaac, aga muwẽẽnĩt cĩ Ririwac cĩnnĩ buu. Nyatarka alawini Ririwacĩ eet cĩk callĩk gõõla cĩ adiim Nyekuci.
28 Ĩthõng kagga naaga buu ngĩ kathĩ ne, adĩman Nyekuci kaal vẽlẽk kivitia kũbũnta, nyatarka eet cĩk amĩnan ĩnõõnõ, wũk balna avvuay dimẽnta cĩnnĩ. 29 Nyatarka eeta wũk balna aga Nyekuci balna thẽk baa lõõla, ikiyyia ẽbẽra nẽ ĩnõõgõ kivitia kaavutõ kĩ Ngẽrĩnẽ, kĩĩ katĩ kikiyyia kaavu Ngẽrĩnẽ ĩcĩ owu gotoonikniy kĩ ngoonoginĩy ĩcĩk meelĩk. 30 Ngaatĩ ẽlẽmĩ Nyekuci eet wũk balna ẽbẽra nẽ, ĩthõng ũtũvvũ ĩnõõgõ, ĩthõng aanyĩk ĩnõõgõ kũtũngtothĩk thoothonniowa cĩgĩk cĩk gerthek, ĩthõng otholit Nyekuci bulẽnĩt cĩnnĩ kĩ ĩnõõgõ.
Kothii gii cĩ woccia engeryet ageeta mĩnana cĩ Nyekuco
31 Kẽdẽcĩ woccia yoko naaga thõõth coo kathĩ ne, nyia? Ma ngĩ ẽẽn Nyekuci Nyekuc cĩnac, ngẽnẽ cĩ woccia adĩmannet ageeta buth? 32 Athii balna cĩ ajuraciet Nyekuci ngatĩ anyet Ngẽrĩnĩ cĩnnĩ. Athii woccia da cĩ anyet Nyekuci ageeta kaal vẽlẽk kaganoko? 33 Ngẽnẽ katĩ cĩ õthõõth eet wũk balna ẽbẽra Nyekuci vẽlẽk buth? Athii tõ kũdũt, nyatarka ẽlẽm Nyekuci ĩnõõgõ kĩĩtõ eet cĩk ũbũnta. 34 Ngẽnẽ woccia cĩ etedĩcet ageeta thõõth? Nyatarka balna adaak Yesu Kiristo, ĩthõng ũrũga daaĩtha, nyatarka ageeta, ĩthõng aavĩ loota bulẽnta, attia cĩ athiob ĩcĩ Nyekuco, ĩthõng alawinet ageeta. 35 Ngẽnẽ cĩ woccia engeryet ageeta mĩnana cĩ Kiristo? Engeryet woccia pĩrnanẽtĩ, kõdẽ ukwẽẽntĩ, kõdẽ butunya, kõdẽ tdilanyitini, kõdẽ gerthetini, kõdẽ jore? 36 Kĩcĩ eheeddi Nyaragawa ĩcĩ Nyekuco athĩ ne,
“Nyatarka aniitia Nyekuc, karumona kẽnnẽ naaga kĩ daaĩth dõõkĩthĩ,
kaavuttia naaga kĩ athaa cĩk õõt õtõdõngtẽ thõng.”c
37 Athii tõ kũdũt, kijiaritõ naaga kaalĩy cĩkkõ vẽlẽk, nyatarka Kiristo cĩ amĩnannet ageeta. 38 Athii gii cĩ woccia engeryet ageeta mĩnana cĩ Nyekuco tõ, nyatarka kagga na dĩdĩ ngĩ kathĩ ne, athii daaĩthĩ, kõdẽ rũgẽtĩ, kõdẽ anjĩlẽta,d kõdẽ ririwanĩna cĩk gerthek,e kõdẽ itin coo, kõdẽ itin cĩ katĩ aku, kõdẽ tiirthẽt ĩmma, 39 kõdẽ kaal cĩk avvu tammuatiddina, kõdẽ kaal cĩk avvu loota, kõdẽ gimma cĩ engenyciay. Athii kaala cĩkkõ vẽlẽk cĩ engeryet ageeta mĩnana cĩ Nyekuco, cĩ ayaha Yesu Kiristo Makayyioiti cĩnac.