Yelinit cĩ tiẽnto
7
Gõtõõnõga kĩ ngõõnõga, niigia eeta cĩk agayyu Ngiran wo, athii cĩ agayyu niigia ngatĩ agamĩ Ngiranĩ eet cĩk ngaanĩ arũgĩ dõ? 2 Yelinit ĩmma coo cĩ Ngirano cĩ athĩ ne, ngaa cĩ eeto, anycĩk kũrũmtẽ nẽ kĩ maac cĩnnĩ dõ, katĩ ngaanĩ arũgĩ maac. Ĩthõng thĩ, mĩ adaak maac, ooguay nẽ Ngirana, ĩthõng athii Ngiranĩ cĩ agam ĩnõõnõ. 3 Ĩthõng thĩ, mĩ itik eeti ĩmma ĩnõõnõ, katĩ ngaanĩ arũgĩ maac cĩnnẽ, avvũ katĩ eeta ĩnõõnõ athĩ ne, agamothi kĩ et cĩ rẽẽng. Ĩthõng thĩ, mĩ ikiyyia adaak maac cĩnnẽ wo, ĩthĩnga Ngiranĩ cĩ tiẽnto agam ĩnõõnõ, katĩ ngĩ ikiyyia itihie nẽ naboo.4 Ĩthõng thĩna, gõtõõnõga kĩ ngõõnõga, adaaktu balna niigia buu Ngirana, nyatarka ẽlẽ cĩ Kiristo, kĩĩ katĩ ĩĩtõ niigia eet cĩk Kiristo wũ balna arũkna nẽ daaĩtha, ĩthõng kĩĩtõ naaga eet cĩk kadĩmanei Nyekuc thoothonniok cĩk abũnna. 5 Nyatarka balna ngaanĩ agamnyet ageeta thõõth cĩ kabarritẽcĩ gerthetin, wũ balna anyet Ngiranĩ kidiimit kĩdĩmanit gerthetin eletinẽy cĩgaac ĩcĩk amaaracet daaĩth wo. 6 Ĩthõng thĩ, yoko ĩthĩnga Ngiranĩ agamnyet ageeta naboo, nyatarka balna kadaaitõ naaga Ngirana, kĩĩ katĩ athii cĩ keegin naaga nyakapanak cĩgĩnĩk. Ĩthõng thĩ, yoko kiticantothĩk naaga Nyekuc, athii cĩ ẽẽn gõõla wũ rẽẽnĩ wũ balna eheeddi Ngirana, ĩthõng thĩ, katicanothi naaga gõõla cĩ jõr ĩcĩ Ririwaco.
Jore cĩ kuukõnẽ kĩ gerthetin
7 Kõthõõth woccia yoko katĩ naaga Ngiran kathĩ ne, nyia? Kathĩ ne, ẽẽn Ngiranĩ gerthetin? Athii tõ kũdũt! Ĩthõng dĩdĩ athii woyyia baalia cĩ kagga na gerthetin niin, ma ngaanĩ kuduwa Ngiranĩ. Nyatarka ngaanĩ woccia balna kagga thõõth cĩ kathĩ ne, gẽrtha barritõnĩ wo, ma kithii Ngiranĩ ngatĩ athĩ ne, “Nyĩ abarriteei niia gii cĩ et ĩmma.”a 8 Ĩthõng thĩ, adĩmanini gerthetini tĩrĩthẽnĩt coo kaanya aneeta kabarritek thoothonniok cĩk meelĩk. Ma ngĩ athii Ngiranĩ tõ, athii cĩ ayak gerthetini tiirthẽt. 9 Karugi balna na baa ngaanĩ kagga Ngiran. Ma balna ngĩ kikiyyia kagawa Ngiran, ikiyyia ĩĩ tiir gerthetini, ĩthõng kadaaha na. 10 Ĩthõng kikiyyia balna kũmũda tĩrĩthẽnĩt wũ balna woccia anya aneeta rũgẽt, ikiyyia ũtũwẽ ayahaha aneeta daaĩth. 11 Adĩmanini gerthetini tĩrĩthẽnĩt cĩ Nyekuco kĩgõõla aneeta, ĩthõng nyatarka tĩrĩthẽnĩt, anya aneeta gerthetini kadaawũ.b 12 Ngaanĩ alna Ngiranĩ dĩhĩma, ĩthõng dĩhĩm tĩrĩthẽntĩ buu, ĩthõng edeemothi abũnna.
13 Ikiyyia da thõõth wũ balna abũnna ũtũwẽ ĩĩ daaĩth ĩcannĩ? Athii tõ kũdũt! Ĩthõng thĩ, kĩĩ katĩ kagawẽ gerthetini kĩĩ gerthetin dĩdĩ, ikiyyia ayahaha aneeta daaĩth, nyatarka tĩrĩthẽnĩt cĩ abũnna, kĩĩ katĩ kikiyyia kĩĩ gẽrtha gerthetini kũdũt tĩrĩthẽnta.
14 Kagga naaga ngĩ aku Ngiranĩ ĩcĩ Nyekuco, ĩthõng thĩ, keeni na et cĩ olli kaganoko, ĩthõng balna kũtũwẽ kĩĩthĩ nyakapanait cĩ gẽrẽthaninto. 15 Athii na cĩ kagga gii cĩ kadĩmani. Nyatarka gii cĩ kadiimi ngĩ kadĩmani, athii kẽnnẽ cĩ kadĩmani buu, ĩthõng thĩ, gii cĩ kaaburneei nana kadĩmani kẽnnẽ. 16 Ĩthõng mĩ kadĩmani gii cĩ athii cĩ kadiimi na kadĩmani, kelemi nẽnnẽ ngatĩ abũnnanĩ Ngiranĩ. 17 Kaavu kĩ yoko wo, ĩthĩnga ẽẽn aneeta cĩ kadĩmani gerthetin wo, ĩthõng thĩ, kẽnnẽ gerthetin cĩ aavĩ ĩcannĩ cĩ atican gerthetin wo. 18 Kagga na ngĩ athii gii cĩ abũnna kĩ aneeta tõ, nyatarka gerthetin cĩ aavĩ ẽla cannĩ. Kõdẽ woyyia ngĩ kabarriteei na ngatĩ kadĩmanẽ gii cĩ abũnna, alna amacca aneeta athii cĩ kadĩmanẽ noko. 19 Nyatarka athii na cĩ kadĩmanẽ thõõth cĩ abũnna kĩcĩ kadiimi ngĩ kadĩmani, ĩthõng thĩ, kẽnnẽ alna nga kadĩmani thõõth cĩ gerthe cĩ athii na cĩ kadiimi ngĩ kadĩmani. 20 Ĩthõng thĩ, yoko mĩ kadĩmani na gii cĩ athii cĩ kadiimi ngĩ kadĩmani, athii cĩ ẽẽn aneeta kir cĩ kadĩmani thõõth cĩ gerthe wo, ĩthõng thĩ, kẽnnẽ gerthetin cĩ aavĩ ẽla cannĩ cĩ adĩman thõõth nĩcẽ wo.
21 Eyeleea ngiranĩ coo aneeta athĩ ne, aavĩ gimma cĩ gerthe thĩnĩna cannĩ cĩ alaamana aneeta ngatĩ kadĩmanẽ thõõth cĩ edeemothi cĩ kadiimi ngĩ kadĩmani. 22 Nyatarka thĩnĩna cannĩ vẽlẽk, kebelbeli na Ngirana cĩ Nyekuco. 23 Ĩthõng thĩ, kẽnnẽ kĩcĩna ngiran ĩmma ẽla cannĩ cĩ aaburnõy kĩ ngiran cĩ aavĩ õõwa cannĩ, cĩ anya aneeta kĩthĩ nyakapanait cĩ ngiran cĩ gerthetin cĩ aavĩ ẽla cannĩ wo. 24 Ĩcĩnĩt nõõnõ pĩrnanẽt cannĩ! Ngẽnẽ woccia thẽk cĩ ẽẽlana aneeta ẽla cannĩ ĩcĩ daaĩtho wo? 25 Ibalallẽ kĩ Nyekuc, nyatarka ẽẽlawa nẽ aneeta, nyatarka Yesu Kiristo Makayyioit cĩnac!
Ĩthõng thĩna, kĩĩthĩ na õõwa cannĩ nyakapanait cĩ Ngiran cĩ Nyekuco, ĩthõng thĩ, thõõtha ĩcĩ gerthe cĩ abarriteei ẽlẽ cannie, keeni nyakapanait cĩ ngiran cĩ gẽrẽthaninto.