Ayaha gerthetini daaĩth, ĩthõng thĩ, ayaha Kiristo rũgẽt
6
Kõthõõth woccia yoko kathĩ ne? Kõbõdẽcĩ yoko naaga kẽgẽrẽthantõy noko, kĩĩ katĩ kĩtõõrẽ bũnnathĩtĩ? 2 Athii tõ kũdũt! Kaavutõ naaga kĩ eeta cĩk balna adaaitõ vẽlẽk, athii gerthetini cĩ agam ĩnõõgõ, ĩthõng woccia ngaanĩ kalna karũgĩ naaga gerthetina kuu? 3 Kõdẽ athii cĩ agayyu niigia ngĩ athĩ ne, naaga vẽlẽk cĩk kõthõl batithimo cĩ Yesu Kiristo, kõthõl daaĩth cĩnnĩ buu? 4 Balna ma ngĩ kagam naaga batithimo kaavutõ naaga kĩ eeta cĩk adaaitõ, ĩthõng kadayyie naaga kĩ Kiristo. Ĩthõng kĩ balna ngĩ arũkna Kiristo daaĩtha bulẽnta cĩ Nyekuc Baatĩnnĩ, kavvu katĩ kayak naaga buu rũgẽt cĩ jõr.5 Mĩ balna kũrũmtẽ naaga kĩ Yesu daaĩtha cĩnnĩ, karũmẽ katĩ naaga kĩ ĩnõõnõ buu rũgũthanta ĩcĩnnĩ. 6 Nyatarka kagga naaga kathĩ ne, otoddoyyothĩk eleeti wũgac wũk baa rẽẽntĩk kurucea kĩ Yesu. Adĩmanni balna thõõth coo, kĩĩ katĩ kithiicõ eleeti cĩgaac, kĩĩ katĩ athii naaga cĩ keegin nyakapanak cĩk gerthetinak naboo, 7 nyatarka eeti ĩmma cĩ adaak, ooguay nẽ tiirthẽta cĩ gẽrẽthaninto.
8 Mĩ balna kadaaĩ naaga kõdõwẽ kĩ Kiristo, kẽlẽmĩ naaga kathĩ ne, karũgĩ katĩ naaga buu kĩ ĩnõõnõ. 9 Nyatarka kagaacõ naaga balna thẽk thõõth cĩ arũknanĩ Kiristo daaĩtha, ĩthĩnga nẽ woccia adaaĩ naboo, ĩthĩnga woccia daaĩthĩ ũũlĩ ngatĩ aruk ĩnõõnõ. 10 Daaĩthĩ cĩ adaaknĩ nẽ, adaaĩ nẽ itin codoi doo, nyatarka gerthetin cĩ eet vẽlẽk. Ĩthõng thĩ, rũgẽtĩ cĩ arũknĩ nẽ wo, arũgĩ, nyatarka Nyekuc.
11 Gõõla cĩ aduwõy noko, nyĩ ngaanĩ anyiccu gerthetin kagam eleeti cuguk. Ĩthõng thĩ, kẽnnẽ, anyung Yesu Kiristo agiit rũgẽt, ĩthõng aavuttu gõõla cĩ atarnanĩ Nyekuci. 12 Ĩthõng thĩna, nyĩ anyiccu gerthetin kagam eleeti cuguk cĩk adaaĩ wo, kĩĩ katĩ athii cĩ adĩmannu thoothonniok cĩgĩnĩk cĩk gerthek. 13 Nyĩ anyiccu vatĩk cĩk eleeti cuguk gerthetin, anycĩk eleeti cuguk Nyekuc, kĩ eeta cĩk ũrũkta daaĩtha, ĩthõng anyciwu eleeti cuguk ĩnõõnõ, kĩĩ katĩ ĩdĩmanit thoothonniok cĩk abũnna. 14 Athii gerthetini cĩ agamnyung agiitia naboo, nyatarka athii cĩ agamnyung agiit Ngiranĩ, ĩthõng thĩ, agamnyung agiitia bũnnathĩtĩ cĩ Nyekuco.
Nyakapanak cĩk adĩman thõõth cĩ atarnanĩ Nyekuci
15 Athĩ woccia thẽk thoothiowa cĩkkõ vẽlẽk ne, nyia? Alna koccia thẽk naaga kadĩman gerthetin, nyatarka athii cĩ agamnyet Ngiranĩ, ĩthõng thĩ, kẽnnẽ agamnyet bũnnathĩtĩ cĩ Nyekuco? Athii tõ kũdũt! 16 Athii cĩ agayyu niigia ngatĩ anyiccu niigia eleeti cuguk kĩĩtõ nyakapanak cĩk et ĩmma, adiim thẽk ma ngĩ athĩknu niigia ĩnõõnõ? Ma ngĩ eeginnu katĩ niigia nyakapanak cĩk gerthetinak, adaaktu katĩna, kõdẽ ma katĩ ngĩ eeginnu nyakapanak cĩk athĩknu Nyekuc, cĩ katĩ anyung agiit ũbũnta rũgẽta cunung. 17 Ĩthõng thĩ, yoko kennei Nyekuc ne, ibalallẽ, kõdẽ woyyia balna gõõ ngĩ eeginnu niigia nyakapanak cĩk gẽrẽthaninto, ivitiawu ithiktu niigia liman wũ balna alimanothicung agiitia. 18 Ooktiawu balna niigia gerthetina, ĩthõng yoko ivitiawu iittu nyakapanak cĩk adĩmannu thoothonniok cĩk abũnna.
19 Kothoothi na ketee kĩ eeti cĩ olli, nyatarka athii cĩ eeginnu tiirti niigia. Kĩ balna gõõ ngĩ alna anyiccu eleeti cuguk kĩĩtõ nyakapanak cĩk thoothonniok cĩk ẽẽn riiriny kĩ cĩk gerthek, ĩthõng thĩ, yoko anycĩk ĩnõõgõ kĩĩtõ nyakapanak cĩk thõõth cĩ abũnna cĩ okoyyung thõõtha cĩ dĩhĩmĩ. 20 Balna ngaanĩ eeginnu niigia nyakapanak cĩk gerthetinak, athii balna cĩ amukcu niigia gõõl cĩ adĩmannu thõõth cĩ adiim Nyekuci agiitia ĩdĩmanit. 21 Yoko balna bũnnathĩt jang cĩ balna thẽk amũdanu niigia wathinniowẽy nĩĩkẽ, kaalĩy cĩk yoko anyung agiit ngawani wo? Amaaracung agiit kaala neekie daaĩth. 22 Ĩthõng thĩ, yoko kĩcĩ ooktiawu niigia gerthetina wo, ĩthõng iittu nyakapanak cĩk Nyekucak wo, ikiyyia anyinti cĩ amũdanu niigia cĩ anyung agiitia ĩĩtõ callẽ, ĩthõng uuwung agiitia rũgẽta cĩ alna kũdũt. 23 Nyatarka dũmaninietĩ cĩ gerthetino ẽẽn daaĩth, ĩthõng thĩ, anyet anyinti cĩ Nyekuco rũgẽt cĩ alna kũdũt, cĩ aku ĩcĩ Yesu Kiristo Makayyioit cĩnac.