Ganõn kĩ bẽlbẽllõn
5
Ĩthõng thĩna, kĩ balna ngĩ elemet Nyekuci ageeta ngĩ keegin eet cĩk abũnna, nyatarka leminit cĩnac, kivitia kayait naaga ganõn kĩ Nyekuc, nyatarka Makayyioit cĩnac Yesu Kiristo, 2 ĩthõng nyatarka leminit cĩnac, ikiyyia anyet Kiristo ageeta bũnnathĩt cĩ Nyekuco cĩ yoko aavĩ ĩcĩnac wo. Ĩthõng kebelbelit naaga muwẽẽnta cĩ abũnna ngatĩ katĩ kõthõlĩ bulẽnĩt cĩ Nyekuco. 3 Athii cĩ õgõõn noko dõ, kẽbẽlbẽl naaga buu, nyatarka pĩrnanẽt cĩnac cobbi, nyatarka kagga naaga ellet pĩrnanẽtĩ ageeta komogit thoothonniok, 4 ĩthõng ma ngĩ kõmõgĩ thoothonniok, anyet kokomit kabaait avuthita cĩ abũnna, ĩthõng anyet muwẽẽnĩt cĩ abũnna. 5 Ĩthõng athii cĩ adĩmannet muwẽẽnĩtĩ cĩ abũnna wo ageeta buth, nyatarka arĩk balna Nyekuci mĩnan cĩnnĩ thinnetinẽy cĩgaac Ririwaca cĩ Dĩhĩmĩ,a wũ balna anyet nẽ ageeta.6 Acĩnnu niigia, baa ngaanĩ athii naaga cĩ keegin tiirti, ikiyyia adaak Kiristo, nyatarka eet cĩk gerthek. 7 Õkõmĩ õrrõt ngatĩ woccia adaaknĩ eeti ĩmma, nyatarka et cĩ abũnna, ĩthõng thĩ, nẽnnẽ dĩdĩ, adaaĩ woccia eeti ĩmma dĩdĩ, nyatarka et cĩ abũnna. 8 Ĩthõng thĩ, eyelehet Nyekuci ageeta mĩnan cĩnnĩ gõõla ĩcĩ, balna ngaanĩ keeginnie naaga gẽrẽthanniok, ikiyyia adaak Kiristo, nyatarka ageeta.
9 Ĩthõng thĩ yoko, kĩ balna ngĩ elemet Nyekuci ageeta kĩĩtõ eet cĩk kũbũnta, nyatarka biyyie cĩk Kiristo, ĩthõng ẽẽlaneet katĩ Nyekuci varaaca cĩnnĩ, nyatarka Kiristo ẽẽn woccia katĩ elianĩtĩ kuu ngĩ maka! 10 Kõdẽ woyyia balna ngĩ kĩĩtõ naaga mĩrõk cĩk Nyekucak, ikiyyia aganĩthẽt Nyekuci ageeta daaĩtha ĩcĩ Ngẽrĩnĩ. Ĩthõng thĩ yoko, kĩcĩ kagayyiõy naaga kĩ Nyekuc wo, keelliay katĩ naaga buu rũgẽta cĩ Ngẽrĩnĩ ĩcĩ ẽẽn kuu. 11 Ĩthõng thĩ, athii cĩ ẽẽn ketee dõ, kẽbẽlbẽl naaga buu kĩ Nyekuc, nyatarka Makayyioit cĩnac Yesu Kiristo, cĩ yoko aganĩthẽt ageeta kĩ Nyekuc wo.
Daaĩth ĩcĩ Adamĩ, ĩthõng rũgẽt ĩcĩ Kiristo
12 Ĩthõng thĩna, ma balna ngĩ ẽgẽrẽthanõy Adamĩ, ikiyyia athanothĩk gerthetini eet vẽlẽk, ĩthõng ikiyyia daaĩthĩ, nyatarka gerthetin, ĩthõng gõõla ĩcoo, ikiyyia athanothĩk daaĩthĩ eet vẽlẽk, nyatarka balna ivitia ẽgẽrẽthantõy eeta vẽlẽk. 13 Ngaanĩ balna kaanyĩwothĩk eet Ngiranĩ, aavu balna gerthetini loota ngato vẽlẽk. Ĩthõng thĩ, athii woccia cĩ agayyi gerthetini, katĩ ngĩ athii Ngiranĩ tõ. 14 Ĩthõng thĩ, kẽnnẽ, ikiyyia athanothĩk daaĩthĩ looc ẽtẽrẽhanĩ ĩcĩ Adamĩb kuumuc kõdõlan Mutha,c kõdẽ woyyia balna ngaanĩ kẽgẽrẽthantõy eeta gõõla ĩcĩ ẽgẽrẽthanĩ tĩrĩthẽnĩt kĩ balna ngĩ adĩman Adamĩ, cĩ õgõõn nẽ kĩ Eeti cĩ katĩ õkkõ aku.
15 Ĩthõng thĩ, maka anyinti ijiar gerthetin. Ma balna ngĩ adaaĩ eeta cĩk meelĩk, nyatarka gerthetin cĩ et codoi doo, ẽẽn woccia katĩ bũnnathĩtĩ cĩ Nyekuco kĩ anyinit cĩ aku bũnnathĩta cĩ Et codoi doo cĩ athĩ Yesu Kiristo wo kuu, kũlũnganothĩk bũnnathĩtĩ kĩ anyinit eet cĩk meelĩk! 16 Athii anyinti cĩ Nyekuco cĩ õgõõn kĩ thoothonniowa cĩk gerthek, cĩk avvu gerthetina ĩcĩ et codoi. Õwõba balna teedinetĩ thõõth cĩ gerthe codoi, ĩthõng ayaha ukwẽẽnĩt, ĩthõng thĩ, ikiyyia anyinti cĩ Nyekuco vurtia cĩ ẽgẽrẽthantõy eeta cĩk meelĩk ngõnana cĩk meelĩk. Ĩthõng ayaha tũngẽnĩt cĩ thoothonniok cĩk gerthek. 17 Agam daaĩthĩ looc kĩ alaanĩ, nyatarka gerthetin cĩ Adamĩ. Ĩthõng thĩ, anyĩk Nyekuci bũnnathĩt kĩ thimatĩth cĩnnĩ cobbi eet cĩk meelĩk cĩk katĩ abaak rũgẽta ĩcĩ Et codoi cĩ athĩ Yesu Kiristo.
18 Ĩthõng thĩna, õvvõ katĩ etedothi eet vẽlẽk thoothiowa, nyatarka gerthetin cĩ Adamĩ. Ĩthõng thĩ, nyatarka gii cĩ abũnna cĩ balna atican Kiristo, ẽlẽm Nyekuci eet vẽlẽk kĩĩtõ eet cĩk ũbũnta, ĩthõng anyĩk ĩnõõgõ anyinit cĩ rũgẽtõ. 19 Nyatarka balna athii Adamĩ cĩ athĩrar thõõth cĩ Nyekuco, ĩthõng amaarak eet cĩk meelĩk kĩĩtõ gẽrẽthanniok. Ĩthõng thĩ, balna athĩrar Yesu Nyekuc, ĩthõng aanyĩk eet cĩk meelĩk kũbũnta nguuma cĩ Nyekuco.
20 Aku balna Ngiranĩ, kĩĩ katĩ kedenyiay tiirthẽtĩ cĩ gẽrẽthaninto ngĩ maka. Ĩthõng thĩ, ngatĩ tiir gerthetini, ikiyyia ĩĩ tiir thimatĩthĩ cĩ Nyekuco kijiar, 21 ma ngĩ agam gerthetini eet, ĩthõng ayaha daaĩth, kĩ yoko wo buu, agam bũnnathĩtĩ cĩ Nyekuco eet, ĩthõng ẽlẽm Nyekuci eet kĩĩtõ eet cĩk ũbũnta, nyatarka Yesu Kiristo Makayyioit cĩnac, cĩ ayahai eet rũgẽt cĩ alna kũdũt.