Rũma 4

Tiirthẽt cĩ leminit cĩ Abrahamĩ

Kõthõõth woccia yoko naaga Abraham baangiet wũ balna baa lõõla kathĩ ne, ijiowa nẽ nyia thõõtha cĩ ẽlẽmĩ Nyekuci ĩnõõnõ wo? 2 Ma balna ngĩ ẽlẽmĩ Nyekuci Abraham, nyatarka kaal cĩk balna atican nẽ, ayak woccia nẽnnẽ nẽ gimma cĩ irianĩ. Ĩthõng thĩ, athii balna cĩ ẽẽn gõõl cĩ irianẽcĩ nẽ Nyekuc neccie. 3 Aduwa Nyaraga cĩ Nyekuco athĩ ne nyia? Athĩ ne, “Ẽlẽm balna Abrahamĩ thõõth cĩ Nyekuco, nyatarka leminit cĩnnĩ, ikiyyia ẽlẽm Nyekuci ĩnõõnõ ngatĩ ẽnnẽ et cĩ abũnna.”

4 Ma ngĩ aticanni eeti, athii cĩ anyĩwothi nyarobinya ĩnõõnõ kĩĩ anyinit, ĩthõng thĩ, anyĩwothi kĩĩ dũmaniniet cĩ tiic cĩnnĩ. 5 Ĩthõng thĩ, eeti cĩ athii cĩ aticanni, ĩthõng ayak leminit ĩcĩ Nyekuc cĩ ẽlẽmĩ eet cĩk ẽẽn gẽrẽthanniok, ẽlẽmĩ katĩ Nyekuci ĩnõõnõ kĩĩ et cĩ ũbũna. 6 Aduwa alaanĩ Davide buu thõõth coo dõ noko, ngatĩ õthõõthĩ talinit cĩ et cĩ acĩn Nyekuci ĩnõõnõ ngĩ ũbũna, kõdẽ woyyia ma ngĩ athii Nyekuci cĩ acĩn tiic cĩnnĩ. Aduwa Davide athĩ ne,

7 “Agatantẽ eeta cĩk ũtũngtothĩk

thoothonniowa cĩgĩk cĩk gerthek,

eeta cĩk upucantẽ thoothonniowa cĩk gerthek cĩgĩk.

8 Agatanẽ eeti cĩ ũtũngek

Makayyioiti gerthetin cĩnnĩ.”

9 Ẽẽn gatanĩ coo cĩ eet cĩk abũũranni eleeti cĩgĩk dõ, kõdẽ cĩk eet cĩk athii cĩ abũũranni eleeti cĩgĩk buu? Kõthõõth balna gõõ naaga kathĩ ne, ẽlẽmĩ balna Nyekuci Abraham kĩĩ et cĩ ũbũna, nyatarka ayak nẽ leminit ĩcĩ Nyekuco. 10 Ĩthõng thĩ, da balna edenyiay thõõth cĩ ẽlẽmĩ Nyekuci Abraham wo, vaangan? Edenyiay balna ĩcĩ owu, kõdẽ vurtia cĩ balna ũbũũranõy Abrahamĩ vẽlẽk? Ii, edenyiay balna ĩcĩ owu. 11 Aanyĩk balna Abrahamĩ ẽlẽ cĩnnĩ kũbũũranẽ, kĩĩ nyẽkẽr kĩthĩ ne, ẽlẽmĩ balna Nyekuci ĩnõõnõ, nyatarka leminit cĩnnĩ, kõdẽ woyyia baalia ngaanĩ kũbũũranẽ ẽlẽ cĩnnẽ. Thõõth coo cĩ, balna anyĩk Abraham kĩĩ baatĩ eet vẽlẽk cĩk ẽlẽmĩ Nyekuc, kĩĩtõ eet cĩk ũbũnta, kõdẽ woyyia ngaanĩ kũbũũrantẽ eleeti cĩgĩk. 12 Ĩthõng naboo ĩthĩ Abrahamĩ buu baatĩ eet cĩk abũũranni eleeti cĩgĩk, ĩthõng athii eleeti cĩgĩk cĩ abũũranni dõ, ĩthõng thĩ, õwõb nẽẽgẽ gõõl cĩ leminit wũ balna ayak baangietĩ cĩnac Abrahamĩ balna ngaanĩ kũbũũranẽ ẽlẽ cĩnnẽ.

Thõõth cĩ abũtaneei Nyekuci Abraham

13 Athii balna cĩ arũba Abrahamĩ kĩ dõõlĩ cĩk dõõlĩ cĩgĩnĩk, bũtan cĩ aduwa balna Nyekuci athĩ ne, ẽẽn katĩ nẽẽgẽ eet cĩk aragĩth looc, nyatarka Ngiran, ĩthõng thĩ, katĩ aragĩth nẽẽgẽ looc nĩcẽ, nyatarka bũnnathĩt cĩ aku lemintia. 14 Ma baalia kaanyĩk Nyekuci eet karagĩthĩt looc, nyatarka athũnnĩ nẽẽgẽ Ngiran, ẽẽn woccia kẽnnẽ baalia leminiti cĩnĩng wo gimma kaganoko, ĩthõng ẽẽn woccia bũtanĩ cĩ aduwa Nyekuci wo, buu gimma kaganoko, 15 nyatarka avaracĩth Nyekuci katĩ ngĩ ẽgẽrẽthanni Ngiranĩ cĩnnẽ. Ĩthõng ngatĩ athiinni Ngiranĩ tõ, athii woccia gii cĩ ẽgẽrẽthan eeta tõ.

16 Ĩthõng thĩna, aku bũtanĩ lemintia ĩcĩ balna abũtana Nyekuci, kĩĩ katĩ woccia kikiyyia bũtanĩ bũnnathĩta ĩcĩnnĩ. Ĩthõng athũnnĩ katĩ Nyekuci bũtan cĩ aduwa nẽ wo, athii cĩ ẽẽn cĩk dõõlĩ cĩk Abrahamĩ dõ wũk balna ayak Ngiran, ĩthõng thĩ, ẽẽn cĩk dõõlĩ cĩk Abrahamĩ vẽlẽk wũk ayak leminit kĩ nẽnẽ. Ẽẽn Abrahamĩ baangiet cĩnac vẽlẽk. 17 Kĩcĩ eheeddi Nyaragawa ĩcĩ Nyekuco, athĩ Nyekuci ne, “Kaanyi na aniitia ĩthĩ baatĩ loociok cĩk meelĩk.” Ẽẽn nẽ baangiet cĩnac nguuma cĩ Nyekuco wũ ẽlẽmĩ Abrahamĩ, ĩthõng anyĩk Nyekuci rũgẽt daakciak, ĩthõng ẽtẽngẽnya kaal cĩk jõr kaalĩy ĩcĩk kolli.

18 Kõdẽ woyyia balna ngĩ athii cĩ ayak Abrahamĩ thõõth cĩ ayahĩ muwẽẽnĩt cĩ abũnna, aku katĩ nẽ ẽẽn baatĩ loociok cĩk meelĩk, alna balna ẽlẽmĩ nẽ thõõth cĩ aduwa Nyekuci athĩ ne, “Kaanyi katĩ na aniitia dõõlĩ.” 19 Alna balna õkõmĩ leminiti cĩ Abrahamĩ, kõdẽ woyyia balna ngĩ ĩĩtõ erkinya cĩgĩnnẽk eet tur (100). Aga balna nẽ ngatĩ ĩthĩ õjõõn ĩnõõnõ daaĩthĩ, ĩthõng ngaa cĩnnẽ Thaara wũ atangany ĩthĩnga woccia ayak dõõlĩ. 20 Ĩthõng thĩ, balna athii Abrahamĩ cĩ akidan bũtan wũ balna aduwa Nyekuci. Aanyĩk balna leminiti cĩnnẽ ĩnõõnõ kõkõm thĩnĩn, ĩthõng balna ikiyyia aanyĩk nẽ bulẽnĩt vẽlẽk Nyekuc. 21 Aga balna Abrahamĩ jurrung ngatĩ ayahĩ Nyekuci makathĩt dĩdĩ, cĩ woccia adĩmanĩ thõõth wũ balna aduwa nẽnẽ. 22 Ĩnõõnõ thĩ balna cĩ, “Ikiyyia ẽlẽm Nyekuci ĩnõõnõ ngatĩ ẽnnẽ et cĩ abũnna, nyatarka leminit cĩnnĩ.” 23 Thoothonniowa cĩk athĩ ne, “Ẽẽn nẽ et cĩ ũbũna, nyatarka leminit cĩnnĩ wo,” athii balna cĩ eheeddi, nyatarka ĩnõõnõ dõ, 24 ĩthõng thĩ, eheeddi balna thoothonniowa cĩkkõ kĩĩ cĩgaac, nyatarka leminit cĩnac ĩcĩ Nyekuco, elemnyet katĩ nẽ ageeta ngĩ keegin eet cĩk kũbũnta, nyatarka balna arũgũtha nẽ Makayyioit cĩnac Yesu daaĩtha. 25 Aanyĩk balna Nyekuci Yesu kadaak, nyatarka gerthetin cĩnac, ĩthõng ũrũgũtha ĩnõõnõ daaĩtha, kĩĩ katĩ kelemet Nyekuci ageeta ngĩ keegin eet cĩk kũbũnta.