Athũnnĩ Nyekuci thõõth cĩ aduwa
3
Nyia cĩ abũnna katĩ ngĩ ẽẽn eeti ĩmma Yudenit? Kõdẽ nyia cĩ abũnna katĩ ngĩ abũũran eeti ĩmma ẽlẽ cĩnnĩ? 2 Ĩthõng dĩdĩ mẽẽlĩ thoothonniowa cĩk abũnna cĩk ẽnnẽ eeta Yudei! Ĩcĩ owu, anyi balna Nyekuci ĩnõõgõ thoothonniok cĩgĩnĩk kuthutti.3 Ma katĩ ngĩ athii eeta gwuak cĩ ayak leminit? Anyi woccia thõõth cĩ athii nẽẽgẽ cĩ ayaĩ leminit wo, kithii cĩ athũnnĩ Nyekuci thõõth cĩnnĩ? 4 Athii tõ kũdũt! Anycĩk Nyekuc kĩĩ dĩdĩ, ĩthõng ĩĩtõ eeta vẽlẽk volongnyiak. Kĩcĩ eheeddi Nyaragawa ĩcĩ Nyekuco athĩ ne,
“Kĩĩ katĩ thõõth cunnie kĩthĩ mũrra, katĩ ngĩ othoothi niinia,
ĩthõng ĩthĩ thõõth cunnie dĩdĩ katĩ ngĩ eteddie niia.”a
5 Ĩthõng thĩ, ma ngĩ ẽyẽla gerthetini cĩnac bũnnathĩt cĩ Nyekuco ngatĩvõrĩ, kõthõõth koccia yoko kathĩ ne? Gẽrtha yoko woccia katĩ kĩ Nyekuc ngatĩ avaracĩ, ĩthõng uuket ageeta? Kothoothi na kĩ gõõ ngĩ õthõõth eeti cĩ olli kaganoko. 6 Athii cĩ õgõõn kĩyokowẽ! Ma baalia kutugu kĩyokowẽ ẽngẽr woccia katĩ Nyekuci thõõth cĩ loocu kuu? 7 Õthõõth woccia thẽk eeti ĩmma athĩ ne, “Ma ngĩ anyĩk võlõng cannie wo thõõth cĩ Nyekuco kĩĩ dĩdĩ, ĩthõng ĩtõõr bulẽnĩt cĩnnĩ, alna nẽnnẽ ngaanĩ õthõõththa Nyekuci athĩ ne, keeni gẽrẽthannioit noko nyia?” 8 Othooththet eeta gwuak ageeta õvõlõng athĩ ne, kathĩnna naaga ne, “Kĩdĩmanit thõõth cĩ gerthe, kĩĩ katĩ kũrũbtaĩ thõõth cĩ abũnna!” Ĩthõng thĩ, abũnna Nyekuci, ngĩ uuk thẽk ĩnõõgõ thoothiowẽy cĩgĩk ĩcĩk ẽẽn võlõng ẽẽ.
Athii eeti cĩ abũnna tõ
9 Kõthõõth woccia thẽk yoko thõõth coo kathĩ ne? Kathĩ ne, keegin naaga Yudei mayyẽ? Athii tõ kũdũt! Nyatarka kagaacõ naaga vẽlẽk ngatĩ aduwõnĩ eeta cĩk ẽẽn Yudei kĩ cĩk athii cĩ ẽẽn Yudei gerthetina cĩnĩng thõng. 10 Kĩcĩ eheeddi Nyaragawa ĩcĩ Nyekuco athĩ ne,
“Athii eeti cĩ abũnna tõ, kothii,
kõdẽ woyyia codoi doo kaganoko,
11 Athii eeti cĩ aga Nyekuc jurrung tõ,
athii eeti cĩ adiim ĩnõõnõ tõ.
12 Ẽngẽlanit balna eeta vẽlẽk,
ĩthõng ivitia nẽẽgẽ vẽlẽk ẽgẽrẽthantẽ,
athii eeti cĩ atican thoothonniok cĩk abũnna tõõ,
kothii nẽnnẽ codoi doo kaganoko.”b
13 “Õgõõn lõgõrlõngẽta cĩgĩk
kĩ loowuana cĩk aavutõ ngaburur,
õthõõth nẽẽgẽ ahaatuanĩy cĩgĩk,
thõõth cĩ ẽẽn võlõng.”c
“Õgõõn kutugeti cĩgĩk
kĩ madocĩ cĩ kũwaanyawu.”d
14 “Abbĩththĩ cĩĩnẽnẽtĩ kutugetinẽy cĩgĩk
kĩ varac kũdũt kaganoko.”e
15 “Obokci ĩcĩnĩng ngatĩ arui eet tamanoko.
16 Amaarai nẽẽgẽ eet canan,
ĩthõng ẽgẽrẽthanit ijjio cĩk eetu goolliowẽy cĩk õwõyyĩ,
17 ĩthõng ẽrẽk gõõl cĩ aatẽ jurrung ganõna.”f
18 “Athii tongolinti cĩ Nyekuco kẽbẽrẽnĩy cĩgĩk tõõ.”g
19 Ĩthõng yoko, kagaacõ naaga kathĩ ne, gii vẽlẽk cĩ aduwa Ngiranĩ, aduwaai eet cĩk agam Ngiranĩ ĩnõõgõ, kĩĩ katĩ kithii eeti cĩ ẽpẽkanõy kĩ Nyekuc tõ, ĩthõng ẽyẽla Nyekuci ngatĩ ẽẽn eeta cĩk looc coo vẽlẽk gẽrẽthanniok. 20 Ĩthõng thĩna, athii katĩ eeti ĩmma cĩ aduwuay athĩ ne, ũbũna nẽ nguuma cĩ Nyekuco tõ, nyatarka õwõb nẽ Ngiran. Ĩthõng thĩ, nyatarka Ngiran, kivitia kagaacõ naaga gerthetin.
Gõõl cĩ ẽlẽmĩ Nyekuci eeta
21 Ĩthõng thĩ, yoko eyelehet Nyekuci ageeta gõõl cĩ anyet ageeta kũbũnta kĩ ĩnõõnõ. Aduwa Ngiranĩ kĩ eet cĩk õthõõth molook cĩ Nyekuco gõõl cĩ aku elemiet Nyekuci ageeta, ĩthõng athii cĩ ẽẽn, nyatarka kõwõb Ngiran cĩ Mutha. 22 Ĩthõng thĩna, aku bũnnathĩtĩ Nyekuca, nyatarka ẽlẽmĩ eeta Yesu Kiristo. Athii Nyekuci cĩ angalĩt eeta, 23 nyatarka ẽgẽrẽthantõy eeta vẽlẽk, ĩthõng utduktiay nẽẽgẽ vẽlẽk, ithii eeti cĩ arũba bulẽnĩt cĩ Nyekuco tõ, 24 ĩthõng ikiyyia õgaẽt Nyekuci ageeta vẽlẽk bũnnathĩta cĩnnĩ, nyatarka elianĩt wũ balna aku ĩcĩ Yesu Kiristo. 25 Aanyĩk balna Nyekuci Yesu kikiyyia kĩĩ gii cĩ cavĩto cĩ enyeeinie thoothonniowa cĩk gerthek, nyatarka leminit biyyietĩy cĩgĩnĩk. Atican balna Nyekuci ketee, kẽyẽla bũnnathĩt cĩnnĩ, nyatarka moginit cĩnnĩ cĩ athii cĩ uuki eet wũk balna ĩcĩ owu, nyatarka gerthetin cĩnĩng. 26 Ĩthõng aanyĩk Nyekuci Yesu keyelek eet thõõth cĩ adĩman nẽ cĩ edeemothi itin coo. Adĩman balna Nyekuci ketee, kĩĩ katĩ kẽtẽd nẽ thõõth jurrung, ĩthõng ũtũngek eet cĩk ẽlẽmĩ Yesu.
27 Ĩthõng rianii thĩ yoko nĩcẽ jaang? Kothii. Kirian woccia naaga, nyatarka kõwõb Ngiran? Athii tõ, ĩthõng thĩ, nyatarka kẽlẽmĩ naaga Kiristo. 28 Nyatarka kagga naaga ẽlẽmĩ Nyekuci eet, nyatarka leminit cĩ ẽlẽmĩ nẽẽgẽ Yesu, ĩthõng athii cĩ ẽẽn, nyatarka õwõb nẽẽgẽ Ngiran. 29 Ẽẽn Nyekuci, Nyekuc cĩ Yudei dõ? Athii cĩ ẽẽn nẽ Nyekuc cĩ eet cĩk athii cĩ ẽẽn Yudei buu? Ii, ẽẽn nẽ Nyekuc cĩ eet cĩk athii cĩ ẽẽn Yudei buu! 30 Nyatarka aavĩ Nyekuci codoi doo dõ, cĩ katĩ ẽlẽmĩ eet, cĩk abũũranni eleeti cĩgĩk kĩ cĩk athii cĩ abũũranni eleeti cĩgĩk lemintia cĩnĩng. 31 Katdukwua woccia yoko thẽk naaga Ngiran, nyatarka leminit coo? Athii tõ kũdũt! Kuthutti nẽnnẽ naaga Ngiran kõkõm.