Ayahẽ Paulo ũũk Rũma
27
Ma balna ngĩ ikiyyia itini cĩ kovvoyyia Ĩtali,a ũũk anyĩwothĩk Paulo kĩ eet õõgĩ cĩk ecebjie gaalinit cĩ nyĩcẽkẽru cĩ athĩ Julioth. Agam balna nẽ meelitin cĩ nyĩcẽkẽr õõgĩ cĩk alaan cobbi cĩ Rũma. 2 Ma natẽ, kotoddia kovowol cobbi cĩ balna aku õlõõ ĩcĩ gaalawu cĩ athĩ Adaramittum. Ĩthõng koottia vatĩkẽy ĩcĩk balna abĩlnĩ kõvõwõlẽta cĩk obbitik gõõla cĩ anũ titim cĩ looc cĩ Athia, ngaatĩ kedececia ĩcĩ bũlũco. Kiiriokca balna naaga kĩ et ĩmma cĩ athĩ Arithtarkath cĩ balna aku õlõõ ĩcĩ gaalawu ĩcĩ Thẽthalonika looca cĩ Makedonia.3 Ma ngerethietĩn cĩnnĩ, kivitiaha kõdõlanta kõrõõk cĩ gaalawu cĩ Thidonĩ, ĩthõng balna ayak Julliathĩ Paulo jurrung, ẽlẽmaaĩ ĩnõõnõ kũũk kĩcĩn gõõnõgĩ, kĩĩ katĩ kaanycĩk woccia nẽẽgẽ ĩnõõnõ kaal cĩk adiim nẽ. 4 Ma natẽ, kagamta kovowol cobbi naboo, ĩthõng kabaaktẽa tõõna ĩcĩ tõõn cĩ lootu ĩcĩ Thiporothi, nyatarka balna avungannet ngõõtĩ cĩ tiiri õrrõt ageeta. 5 Ma balna ngĩ kabaaktẽa titim cĩ bũlũc cĩ looc cĩ Cilithia kĩ cĩ Pamvilia, koottia titimma cĩ abĩlnĩ kõvõwõlẽta cĩk obbitik õlõõ ĩcĩ gaalawu cĩ Mĩĩra looca ĩcĩ Lithia. 6 Ma natẽ, ijiowa gaalinti cĩ nyĩcẽkẽru kovowol cobbi cĩ aku Alẽkthanderia cĩ balna õkkõ Ĩtali, ngaatĩ otodeciet kovowol. 7 Kotoththia kĩdĩĩc kĩdĩĩc wathinniok cĩk meelĩk pĩrnanta cobbi õrrõt, kuumuc kiittia õjõõntĩ õlõõ ĩcĩ gaalawu cĩ athĩ Thinidath. Ma balna ngĩ ikiyyia alammet ngõõtĩ kũtũktẽha koottia, kedeccieha mũrũũr, kivitiaha kotoththia kovowola ngatĩ õbõwõy kĩ ngĩtĩ athĩ Thalmõnẽ cĩ aavĩ looca cĩ athĩ Kẽrẽẽtẽ cĩ aavĩ bũlũcatõ kõrgẽna. 8 Kutunuthia titim pĩrnanta kuumuc kõdõlanta ngĩtĩ athĩ thar Ngĩtĩ Abũnna cĩ Kayuwuthi, ngatĩ õjõõn kĩ kõrõõk cĩ gaalawu cĩ Lathea.
9 Ikiyyia ithii itini cobbi, ĩthõng ĩĩ gẽrtha ngatĩ kovvoyyia kovowola cobbi ĩcĩ owu, nyatarka tiir katĩ ngõõtĩ õrrõt vurtia ĩcĩ katĩ Kõr cĩ Ũũngnĩcẽ Nyekuci eet thoothonniok cĩgĩk cĩk gerthek.b Ngaatĩ atĩrĩthĩ Paulo ĩnõõgõ ẽthẽcĩ ne, 10 “Lõgõth! Kacini na wueeta ĩcoo, ẽgẽrẽthanni katĩ ijjio, kĩ kovowol cobbi, kĩ rũgẽt cĩnac buu.” 11 Athii balna kẽnnẽ cĩ ẽlẽmĩ gaalinti cĩ nyĩcẽkẽru thõõth cĩ Paulo, ĩthõng thĩ, kẽnnẽ ẽlẽmĩ thõõth cĩ et cĩ amacuc kovowol cobbi kĩ baatĩ kovowolo. 12 Nyatarka balna gẽrtha titim cĩ abĩlnĩ nẽẽgẽ kovowol cĩnĩng cobbi katĩ ngĩ ikiyyia attienĩ,c ĩthĩ meelitini cĩ eetu ne, adiim ngĩ õwõ thẽk nẽẽgẽ kovowola noko, amuk nẽẽgẽ adiim ma ngĩ õdõlan Võnĩth kaavutõ natẽ attiey. Ngĩtĩ balna ayuwuthi kõvõwõlẽta Kẽrẽẽta, ngatĩ acĩnõy kĩ kõrgẽn cĩ tõõn cĩ diinu cĩ okolothĩcẽ kõr, kĩ kõrgẽn cĩ tõõn cĩ lootu cĩ okolothĩcẽ kõrra.
Ngõõt bũlũcatõ
13 Ma balna ngĩ ẽtẽrẽhaĩ ĩvĩnĩhanek ngõõtĩ vurut cĩ aku ĩcĩ diinu, ahad kẽnnẽ eeta athĩ ne, ĩthĩ itin cĩ õvõyyĩ nẽẽgẽ coo. Ngaatĩ õdõngĩ thiihit cĩ adĩngdĩngĩ cĩ ecebjie loorona cĩ abĩlnĩ kovowol cobbi, ĩthõng õõt ũtũnũthõ titim cĩ Kẽrẽẽtẽ. 14 Ma tamanoko, uvungan ngõõtĩ cĩ tiiri õrrõt, cĩ athĩ thar, “Ngõõt cĩ aku kõrgẽna ĩcĩ tõõn cĩ lootu kĩ cĩ alibanĩ kõrra. Avungannet ageeta tõõna ĩcĩ Kẽrẽẽtẽ looc cĩ alĩha maama.” 15 Ngaatĩ õmõnnĩ ngõõtĩ neccie kovowol õrrõt katamacet ngatĩ kovvoyyia ĩcĩ owu. Ngaatĩ kuungnicia kovowol kũũwĩ ngõõtĩ.
16 Kabaaktẽa koottia kõdõlanta looc cĩ alĩha maama cĩ athĩ Kauda, kabanyca ĩcĩ kothii ngõõt cĩ tiiri cĩ õgõõn noko. Kongonyona balna ngatĩ kecebecia kovowol cĩ dĩcĩ kovowolatõ cobbi, kĩĩ katĩ kithii cĩ atdukie. 17 Ma balna ngĩ õdõngtak eeta kovowol cĩ dĩcĩ ĩcĩtõ, ivitia ecebtek nẽẽgẽ ĩnõõnõ kovowola ĩcĩ obbi, kĩĩ katĩ athii cĩ athaanĩ ngõõtĩ kĩ mugi cĩ towono kovowol cĩ dĩcĩ thõng. Ma natẽ, ĩkoththik lõõrõnẽt kovowola cobbi loota, ĩthõng ecebit, kĩĩ katĩ kithii cĩ alibiẽnĩ. Ongollie balna nẽẽgẽ ngatĩ woccia athaaninie kovowolĩ cobbi titimma cĩ bũlũc cĩ Thartithi. Ngaatĩ õkõlẽcĩ nẽẽgẽ cẽrẽm cĩ ecebjie lõõrõnẽtẽy cĩ anyi kovowol kõtõõ mũrũũr kĩdĩĩc katĩ ngĩ avungan ngõõtĩ kovowol ĩcĩ vurtio.
18 Maka balna tammu cĩ ngooto õrrõt, ma balna ngerethietĩn cĩnnĩ, ẽtẽrẽktaĩ eeta utdukteek ijjio tuu. 19 Ma balna kõrra cĩ ẽẽn iyyio, ivitia utdukteek eeta kaal õõgĩ cĩk adĩmanini kovowolĩ bũlũcatõ. 20 Athii balna cĩ kacĩnna kõr, kõdẽ mũnyũny wathinniok cĩk meelĩk õrrõt. Avungan ngõõtĩ cĩ tiiri õrrõt balna noko kũdũt, ngaatĩ kaharnecia muwẽẽnĩt cĩ woccia ngaanĩ keeliania.
21 Ma balna ngĩ adak eet boobo wathinniok cĩk meelĩk, ĩtĩnga Paulo ĩbĩl ĩcowu, ĩthõng õthõõth ĩĩ ne, “Lõgõth, woyyia thẽk balna ĩthĩktangũ aneeta! Yoko da thẽk balna aavut Kẽrẽẽta, athii woyyia yoko cĩ karumõy kĩ pĩrnanẽt kĩ ngatĩ katdukẽcĩ ijjio tuu. 22 Ĩthõng thĩ, yoko anycĩk thinneti cuguk kokomit, nyatarka athii katĩ niigia cĩ adaaknu. Kovowol katĩ dõ cĩ ẽgẽrẽthanni. 23 Keeni na et cĩ Nyekuco, ĩthõng katicanothi na ĩnõõnõ. Itiona nẽ anjĩlõ waabal, 24 kikiyyia kennea aneeta ne, ‘Paulo, nyĩ ongollie! Õkkõ katĩ abili niia ĩcowu ĩcĩ alaan cobbi cĩ Rũma. Ĩthõng nyatarka aniitia, ẽẽla katĩ Nyekuci eet cĩk iriokcu kovowolatõ wo vẽlẽk.’ 25 Ĩthõng yoko, anycĩk thinneti cuguk kokomit, nyatarka kayai na leminit ĩcĩ Nyekuco! Adĩman katĩ nẽ thõõth kĩ balna ngĩ aduwacca nẽ aneeta. 26 Ĩthõng thĩ, okoyyiet katĩ ngõõtĩ kuumuc kũũk kĩdda kovowolĩ looc ĩmma cĩ alĩha maama.”
Athaanẽ kovowolĩ
27 Uvunganet balna ngõõtĩ wathinniok kĩ baalinniok õmmõtõ kĩ wec, oyokoniet Bũlũc cĩ Adiriatihi. Ma balna ngĩĩ baalin tobbi, ummuit maccucciowa cĩk kovowolak ngatĩ ĩthĩ õjõõn lõõcĩ cĩ õdõõĩ. 28 Ngaatĩ atĩmanĩ nẽẽgẽ bũlũc loorona ĩmmanĩ ĩcĩ wuuni cĩ atĩmanĩ maam. Amũda kẽnnẽ nga wuun ayak wuunthẽt thoo eet tur kĩ etĩmma tĩmanintia cĩ thoonu. Ma vurtia kĩdĩĩc, ĩtĩmanit naboo, ĩthõng ijiokta ngĩ ayak wuunthẽt thoo cĩk ẽẽn eet wec kõmmõtõ tĩmanintia cĩ thoonu. 29 Ongollie balna nẽẽgẽ athĩ ne, õkkõ koccia katĩ ĩdda kovowolĩ laarab thõng. Ngaatĩ aarĩcẽ thĩĩk wec cĩk adĩngdĩngĩ cĩk ecebjie lõõrõnẽtẽy cĩk abĩlnĩ kovowolĩ vurtia cĩ kovowolo, ĩthõng alayyiõy, kĩĩ katĩ kikiyyia waathĩnĩ.
30 Adiim balna ngĩ avir maccucciowa cĩk kovowolak thõng. Ngaatĩ õõganẽ kovowol cĩ dĩcĩ kũũk maamĩytõ kaavu kĩcĩ õgõõn kĩ ngĩ, okoleei thĩĩk cĩk adĩngdĩngĩ cĩk abĩlnĩ kovowolĩ ĩcowu cĩ kovowol cobbi. 31 Ma natẽ, ethek Paulo gaalinit cĩ nyĩcẽkẽru kĩ nyĩcẽkẽr ne, “Mĩ thẽk athii cĩ aatĩ maccucciowa kovowolatõ, athii thẽk katĩ cĩ aruknu kũdũt.” 32 Ngaatĩ ẽtẽẽdĩ nyĩcẽkẽrĩ looron cĩ ecebothĩcẽ kovowolĩ cĩ dĩcĩ kovowol cobbi, ĩthõng anycĩk kũũwĩ ngõõtĩ kovowol cĩ dĩcĩ wo.
33 Ma balna nganĩ aliba kõr, ikiyyia amanymanyan Paulo eet kadait dainit cĩ dĩcĩ. Aduwaai nẽ ĩnõõgõ ethei ne, “Wathinniowẽy ĩcĩk ẽẽn õmmõtõ kĩ wec vẽlẽk wo, omothinu balna õrrõt kithii cĩ adakcu gimma kũdũt. 34 Kalayyung na thẽk atarit dainit cĩ dĩcĩ. Nyatarka aavĩ rũgẽtĩ cunung daintia. Ĩdĩmanit ketee, kĩĩ katĩ kithii eeti cĩ enyekci rũgẽtĩ cĩnnẽ tõ.” 35 Ma balna ngĩ uduwa nẽ thõõth coo wo, ĩdĩma ahat cĩ avaadiay ĩmma, ĩthõng ethek Nyekuc ne, ibalallẽ kẽbẽrẽnĩy ĩcĩgĩk vẽlẽk. Ngaatĩ ẽngẽrĩ ahat cĩ avaadiay, ĩthõng uduk nẽ ĩmma. 36 Ma natẽ, ivitia okomit ĩnõõgõ vẽlẽk thinneti cĩgĩk, ĩthõng uduktõy. 37 Ẽẽn balna eeta vẽlẽk kovowolatõ eet õmmõtõ kĩ eet iyyio kõmmõtõ kĩ tõrkõnõm (276), 38 ma balna ngĩ uduktõy eeta vẽlẽk, ivitia utdukteek dongokua cĩk labinu bũlũcatõ, kĩĩ katĩ kõvõlvõl kovowolĩ.
Athaan mugua cĩ towono kovowol cobbi
39 Ma baa ngĩĩ ngerethietĩn cĩnnĩ, ĩcĩnĩt maccucciowa titim ĩmma cĩ ẽrẽk ĩnõõgõ, ĩthõng thĩ, kẽnnẽ balna acĩn ngĩtĩ võõrĩ cĩ abũnna ngatĩ abĩlnĩ kovowolĩ. Ngaatĩ athĩnnĩ nẽẽgẽ ne, kõõt thẽk kibilli kovowol natẽ. 40 Ma balna ngĩ eteditõ nẽẽgẽ lõõrõnẽt cĩk ẽcẽb thĩĩk cĩk adĩngdĩngĩ korokrokgit, ũtũngtek ĩnõõgõ bũlũcatõ, ĩthõng natẽ noko, õõkta nẽẽgẽ lõõrõnẽt cĩk agam kaal cĩk amacucẽnẽ kovowolĩ. Ma naboo natẽ, odongtek cẽrẽm kovowola tiddina, kĩĩ katĩ kuvungan ngõõtĩ kovowol kẽdẽcẽẽĩ kũũwĩ ĩcĩ titimmo. 41 Ĩthõng thĩ, kẽnnẽ ĩdda kovowolĩ kathaacinit cĩ dũwũmĩ noko kathĩhĩcĩk bũlũcatõ, kithii cĩ õwõ naboo, ĩthõng athaan mugua cĩ maamu kovowol ĩcĩ vurtio.
42 Ma natẽ, idiimitõ uruit nyĩcẽkẽrĩ eet cĩk ecebjie, nyatarka balna ahad nẽẽgẽ athĩ ne, atdukothi koccia katĩ bũlũcatõ, ĩthõng ivirit thõng. 43 Ĩthõng thĩ, balna adiim gaalinti cĩ nyĩcẽkẽru Paulo kũrũk kithii cĩ adaaĩ, ĩthõng ĩbĩlĩ nyĩcẽkẽr ngatĩ woccia adĩmanĩ thõõth cĩ arui ĩnõõgõ. Ngaatĩ aduwacĩ eet cĩk aga ngatĩ othotine maamĩy kutduktothĩk maamĩytõ karaktẽ kabaaktẽ kõõt ngatĩ õdõõĩ. 44 Ĩthõng uduwak balna eet õõgĩ buu, kagamit kẽẽn õõgĩ kovowola. Gõõla ĩcoo, ivitia balna eeta vẽlẽk õdõlanit titim cĩ bũlũco jurrung.