Arawak Paulo Malta
28
Ma balna ngĩ kõdõlanta titim jurrung, kivitiaha kijioktaha monogo athĩ looc cĩ alĩha maama nĩcẽ Malta. 2 Adĩmannet balna baajigi looc ageeta jurrung õrrõt, ngaatĩ avadaciet guo cĩ katiyyia naaga vẽlẽk, nyatarka balna atĩĩlĩ tammu, ĩthõng alal lõõcĩ õrrõt. 3 Ma balna ngĩ ũlũta Paulo rĩmma õõgĩ, ĩthõng arĩk guyyiatõ, umur aburthẽtĩ cĩ guyyio kũwaat, ngaatĩ õvõvõtĩ akuni ngĩtĩvõrĩ kikiyyia kĩtĩrtĩrranõthĩk athiit cĩ Paulo. 4 Ma balna ngĩ acĩn baajigi loocu ngatĩ atĩrtĩranothĩcẽ kũwaat athiit cĩ Paulo wo, utumumit ĩĩtõ ne, “Ẽẽn thẽk gõõ eeti coo et cĩ aruk eeta, nga kukku bũlũc ĩnõõnõ, ĩthõng thĩ, athii katĩ nyekuci cĩnac cĩ anyi ĩnõõnõ kũrũk.” 5 Ma natẽ, utururek Paulo kũwaat guyyia, ĩthõng nga kadak gimma ĩnõõnõ. 6 Ahad balna eeta athĩ ne, iivi woccia thẽk katĩ ẽlẽ cĩnnẽ, kõdẽ uuk katĩna nẽ looc tamanoko, ĩthõng adaaha. Ma balna ngĩ ereyyiõy kuumuc, ĩthõng athii cĩ acĩn gimma cĩ adak Paulo buu wo, ivitia ũtũwẽcõ nẽẽgẽ ooti cĩgĩk ĩĩtõ ne, ẽẽn eeti coo nyekuc!7 Athĩ balna gaalinit cĩ looc cĩ alĩha maama ẽẽ, Pupiloth, ayak balna nẽ looc cĩnnĩ cobbi natẽ. Ma natẽ, ikiyyia ũtũvvũwẽt nẽ ageeta õlõõtõtõ cĩnnĩ, ĩthõng ĩdĩmanet nẽ ageeta jurrung, ngaatĩ kattĩyya natẽ iinyia iyyio. 8 Monogo nẽnnẽ ĩmmõrĩ baatĩ Pupilothi õrrõt õõngĩ lobela, aaburi ẽlẽ guo, ĩthõng uwuc kẽẽng ẽvẽrẽt biyyie. Ma natẽ, etewothĩk Paulo ĩnõõnõ, ĩthõng alawõy. Ma natẽ, atadĩk athĩn cĩgĩnĩk ẽla cĩ mooryiakto, ĩthõng aanyĩk ĩnõõnõ kũbũna. 9 Ma vurtia cĩ thõõth coo wo, ivitia mooryiaha cĩk looc cĩ alĩha maama tũrũr ĩcĩ Paulo, ngaatĩ anyĩcẽ nẽ ĩnõõgõ kũbũnta. 10 Ongoliniet balna eeta õrrõt goolliowẽy ĩcĩk meelĩk, ma balna ngĩ kĩdĩmantothĩha kotoddia kovowol cobbi, ivitia elliet kaalĩy cĩk kadiimnya.
Arawak Paulo Rũma
11 Ma balna vurtia ĩcĩ nyĩĩlõwẽ iyyio, kĩtĩngaththia kotoddia kovowol cobbi cĩ balna ayuwuth ngatĩ alĩha maama kuumuc kedecciay lõõlõ. Ẽẽn balna kovowolĩ neccie cĩ aku õlõõ ĩcĩ gaalawu ĩcĩ Alẽkthanderia, ĩthõng ecebothi ririwanĩnẽ cĩk nyekucnya cĩk ẽẽn cũũdẽ ĩcĩ owu cĩk athĩ Kathto kĩ Polluth. 12 Ngaatĩ kõdõlania kõrõõk cĩ gaalawu cĩ athĩ Thayrakuth, ĩthõng kaavuttia natẽ wathinniok iyyio. 13 Ma natẽ, kedeccieha kovowola kuumuc kõdõlanta kõrõõk cĩ gaalawu cĩ athĩ Rejium. Ma ngerethietĩn cĩnnĩ, ẽtẽrẽhaĩ uvunganaet ngõõtĩ cĩ aku ĩcĩ diinu, ĩthõng ma balna ngerethietĩn cĩnnĩ, kõdõlanta kõrõõk cĩ gaalawu cĩ athĩ Putewoli. 14 Ma natẽ, koottia kijioktaha balna naaga lemnyiok, cĩk avvuyyiet koottia nõõnõ kũrũmtea kĩ ĩnõõgõ iinyia tũrgẽrẽm. Ma natẽ, kotoththia thoonĩy kuumuc kõdõlanta kõrõõk cĩ gaalawu cobbi cĩ Rũma. 15 Monogo ĩthĩraritõ lemnyiowa gwuak ngatĩ kavvunna, ĩthõng ivitia nẽẽgẽ urumtihiet gõõl ngatĩ tũwẽnto õlõõ ĩcĩ gaalawu cĩ Apiothi, ĩthõng naboo ivitia inyiamantehet Ciithẽnẽy cĩk ẽẽn Iyyio ĩcĩk oginnie eeta. Ma balna ma ngĩ acĩn Paulo eet cĩkkõ wo, ennek nẽ Nyekuc ne, ibalallẽ, ĩthõng õkõm ĩnõõnõ thĩnĩn cĩnnẽ.
16 Ma balna ngĩ kõdõlanta Rũma, õõt ẽlẽmtaĩ gaala cĩk Rũma Paulo kaavu mĩn, ĩthõng thĩ, balna anyĩwothĩk nyĩcẽkẽrowocĩ kẽbẽk ĩnõõnõ.
Irionĩk Paulo Yudei Rũmatẽy
17 Ma balna vurtia cĩ wathinniok iyyio, ikiyyia ũtũvvũwa Paulo makayyiok cĩk Yudei. Ma balna ngĩ uluttiay nẽẽgẽ vẽlẽk, uduwak ĩnõõgõ ethek ne, “Gõtõõnõga kĩ ngõõnõga, nga balna na kĩdĩmanek eet cĩgaac gii cĩ gerthe, kõdẽ nga kẽgẽrẽthan ngiran cĩ õõ baajigi baangiet cĩgaac, kagamnyie balna na Yeruthalẽma, ĩthõng kaanyĩwothĩha eet cĩk Rũma. 18 Ivitia balna ahadit gaala thoothonniok cĩk abilnia eeta lokika wo, ĩthõng idiimitõ õõgtahanĩ, nyatarka nga kẽgẽrẽthan gimma cĩ woccia ketedothice daaĩth. 19 Ĩthõng thĩ, balna utuburyiõy makayyiowa cĩk Yudei, ĩthõng kĩthĩ ne, abũnna thẽk ngĩ kabili na ĩcĩ alaan cobbi cĩ Rũma, kolli thĩ, kẽnnẽ gimma cĩ kaduwa na cĩ woccia adĩman eet cĩganĩk buth. 20 Ĩnõõnõ yoko cĩ kavvuyyung na kivitia kothoothiõy wo. Kecebjie na ngarikonyay ĩcĩkkõ, nyatarka muwẽẽnĩt cĩ abũnna cĩ Ĩthraĩlĩ.”
21 Ẽdẽcĩ balna makayyiowa cĩk Yudei athĩ ne, “Ngaanĩ kijioktaha nyaragẽt õõgĩ cĩk avvu Yudea, nyatarka aniitia. Ĩthõng ngaanĩ kayaktahet eeta cĩgaak cĩk avvu Yudea nyemut, kõdẽ thõõth ĩmma cĩ gerthe kĩ aniitia. 22 Kadiimnya yoko ngĩ kathĩkna athĩ muwẽẽnĩt cunni ne, nyatarka kagayya naaga ngĩ õthõõth eeta vẽlẽk thõõth cĩ gerthe, nyatarka eet cĩk õthõõth thõõth cĩ jõr cĩ Yesu.”
23 Ngaatĩ aarĩcẽ kõr ĩmma cĩ avvu arumone kĩ Paulo. Ma natẽ, ivitia thẽk oyowottia nẽẽgẽ eet cĩk meelĩk ngatĩ balna aavẽ nẽ wo. Ma kõr nĩcẽ ngerenniet kĩĩ jiatĩn, irionĩk Paulo eet, ĩthõng uduwak ĩnõõgõ kabicoc cĩ Nyekuco. Aduwaai balna nẽ õrrõt kũnũmnũmmantek ĩnõõgõ thõõth cĩ Yesu wũ balna ẽhẽẽd Mutha Ngirana, kĩ thoothiowẽy ĩcĩk õthõõth eeta cĩk õthõõth molook cĩ Nyekuco. 24 Ma natẽ, ivitia elemit eeta gwuak thoothonniok cĩk aduwa Paulo wo, ĩthõng thĩ, kẽnnẽ balna abũrĩ gwuak. 25 Ngaatĩ avvu ẽpẽkanõnĩ nẽẽgẽ mĩn kengeryiõy kathaantẽ vurtia cĩ ẽdẽcaaĩ Paulo thõõth cĩ aturna cĩ athĩ ne, “Õthõõth balna Ririwacĩ cĩ Dĩhĩmĩ thõõth cĩ ẽẽn dĩdĩ cĩ balna aduwaai õõ baajigi baajigu cuguk kũtũga cĩ Ĩthaia, et cĩ õthõõth molook cĩ Nyekuco athĩ ne,
26 “ ‘Bĩt mũdõthĩk eet nĩĩko, ĩthõng ennewu ne,
“Arkiccu katĩ athĩknenu, ĩthõng thĩ, kẽnnẽ athii cĩ agayyu kũdũt,
arkiccu katĩ acĩnnu, ĩthõng thĩ, kẽnnẽ athii cĩ acĩnnu.”
27 Nyatarka õkõmĩ ooti cĩk eet cĩkkõ vẽlẽk,
ivitia idittie kĩĩna cĩgĩk pĩd,
ĩthõng ummuttie ĩnõõgõ kẽbẽrẽ cĩgĩk.
Yoko ma ngĩ kithii cĩ aatĩ nẽẽgẽ ketee,
acĩnẽ woyyia yoko kẽbẽrẽnĩy ĩcĩgĩk,
ĩthõng ĩthĩktõy kĩĩnĩy ĩcĩgĩk,
ĩthõng yoko agaacõ thinnetinẽy tõõ ĩcĩgĩk,
ĩthõng oboddia ĩcannĩ,
ĩthõng kaanyĩha woccia na ĩnõõgõ kũbũnta.’a
28 “Ĩthõng thĩna, kadiimi agaac niigia ngĩ ikiyyia balna itiona Nyekuci nyemut cĩ aku ẽẽlanẽ eet cĩk athii cĩ ẽẽn Yudei. Ĩthõng athĩknẽ katĩ nẽẽgẽ.” 29 Uduwa balna Paulo thõõth coo, ivitia ẽpẽkantõy Yudei õrrõt.