Adiim Paulo kĩtĩmanẽ nẽ lokika ĩcĩ alaan cobbi cĩ Rũma
25
Ma vurtia cĩ wathinniok iyyio cĩ balna ikiyyia ĩthĩ Vethtuthi gaalinit cĩ agam looc, ũũk nẽ ĩcĩ Cithariya, ĩthõng ũũk Yeruthalẽma. 2 Ma natẽ, ivitia makayyiowa cĩk paadĩrnyawu kĩ makayyiok cĩk Yudei uduktiak ĩnõõnõ thoothonniok cĩk avvu abĩlnĩ nẽẽgẽ Paulo. 3 Ma tamanoko, alaacõ nẽẽgẽ Vethtuth õrrõt kaanyĩk ĩnõõgõ katalit katĩ ngĩ ition nẽ Paulo kũũk Yeruthalẽma, nyatarka balna adiim nẽẽgẽ ngĩ oginneei ĩnõõnõ, adiim ngĩ aruk gõõla. 4 Ẽdẽcĩ Vethtuthi ethei ne, “Ecebjie Paulo kĩjana Cithariya, ĩthõng kõkkõ katĩ na kir natẽ tamanoko. 5 Anycĩk makayyiok õõgĩ cuguk kivitia kiiriokta kĩ aneeta kõdõwẽ, kõõt kuduktia nẽẽgẽ thoothonniok cĩk abĩlnĩ Paulo wo nĩĩcẽ, katĩ da thẽk ngĩ ẽgẽrẽthanõy nẽ.”6 Ngaatĩ aavẽ Vethtuthi Yeruthalẽma wathinniok turgi, kõdẽ wathinniok õmmõtõ nga kũũk Cithariya. Ma baa ngerethietĩn cĩnnĩ, ũtũvvũ nẽ lokiko, ĩthõng ayahiay Paulo ĩcĩnnĩ. 7 Ma balna ngĩ ikiyyia Paulo, ĩtĩngathõ Yudei wũk balna avvu Yeruthalẽma koyokonit ĩnõõnõ, ĩthõng itigiryia thoothonniok cĩk gerthek cĩk meelĩk cĩk abĩlnĩ nẽẽgẽ Paulo, ĩthõng athii cĩ ẽyẽlanĩ thoothonniok cĩkkõ ngatĩ ẽnnẽ dĩdĩ.
8 Ma natẽ, ẽẽl Paulo ẽlẽ cĩnnĩ ĩĩ ne, “Nga kẽgẽrẽthan na Ngiran cĩ Yudei, kõdẽ cĩ Ciith cĩ Nyekuco, kõdẽ ngiran cĩ alaan cobbi cĩ Rũma.”
9 Ĩthõng thĩ, balna adiim Vethtuthi Yudei kĩmĩnanit ĩnõõnõ, ngaatĩ ajini Paulo ẽthẽcĩ ne, “Õkkõ woccia niia Yeruthalẽma bĩt bĩl lokika ngatĩ kaavẽ na, nyatarka thoothonniok cĩkkõ?”
10 Ẽdẽcĩ Paulo athĩ ne, “Kabili na yoko lokika cĩ alaan cobbi cĩ Rũma cĩ katĩ thẽk katĩmaninie na. Nga kẽgẽrẽthan na gimma cĩ Yudei kĩcĩ thẽk aga niia buu ẽla cunni mĩn wo. 11 Ma baalia kẽgẽrẽthan na thõõth cĩ woccia ketedothice daaĩth, athii cĩ kaburi na daaĩth. Ĩthõng thĩ, mĩ ẽẽn thoothiowa cĩk abilnia aneeta Yudei cĩkkõ wo volongnyiok, athii woccia eeti cĩ ũũlũ ngatĩ anya aneeta kũũk ĩcĩnĩng tõ. Kadiimi yoko na kũũk kijina alaanĩ cobbi cĩ Rũmaa nẽ mĩn.”
12 Ma balna ngĩ othoothitõ Vethtuthi kĩ gõõnõgĩ cĩk lokikak thõõth coo, ethek nẽ Paulo ne, “Adiimi viyyio niia ngĩ õkkõ, kĩĩ katĩ kẽtẽd alaanĩ cobbi cĩ Rũma thõõth cunni. Ĩthõng thĩ, õkkõ katĩ niia ĩcĩnnĩ!”
Othoothiõy Paulo kĩ Agripa kĩ Bernith
13 Ma vurtia cĩ wathinniok cĩk kĩdĩk, ikiyyia alaanĩ Agripa iriokta kĩ Bernith ngõõnĩ cĩnnĩ, ẽhẽrõntõthĩk Vethtuth õlõõ ĩcĩ gaalawu ĩcĩ Cithariya. 14 Avvu balna aatĩ nẽẽgẽ natẽ wathinniok cĩk meelĩk, ngaatĩ aduwacĩ Vethtuthi alaan thõõth cĩ Paulo. Ethei balna nẽ alaan ne, “Aavĩ eeti ĩmma ngato cĩ balna uungni Velihi kĩjana. 15 Ma balna ngĩ kõkkõ na Yeruthalẽma, ivitia makayyiowa cĩk paadĩrnyawu kĩ eet cĩk obbitik cĩk Yudei ibilli ĩnõõnõ, ĩthõng ijinta nẽẽgẽ aneeta ketedĩk ĩnõõnõ thõõth kĩthĩ ne, ẽẽn nẽ gẽrẽthannioit.
16 “Ngaatĩ kẽnnẽccẽ ĩnõõgõ ne, athii cĩ ẽẽn ngiran cĩ Rũma, cĩ kẽtẽdĩcẽ et ĩmma thõõth kathĩ ne, ẽgẽrẽthanõy, nga kiriontõy kĩ eet cĩk abĩlnĩ ĩnõõnõ wo, nga kẽẽla ẽlẽ cĩnnĩ kõthõõthĩ thoothiowẽy ĩcĩk abĩlnĩ eeta ĩnõõnõ wo. 17 Ma kõr cĩ kõdõlantia kĩ ĩnõõgõ ngittio, athii balna cĩ kẽdẽcai itin kaganoko. Ma balna ngerethietĩna cĩnnĩ, kũtũvũwa na lokiko, ĩthõng kuduwaha eet kayakta et lokika. 18 Ma balna ngĩ ĩngathĩ eeta cĩk abĩlnĩ ĩnõõnõ wo kothoothitõ, athii kẽnnẽ cĩ aduwa thoothonniok cĩk ẽgẽrẽthan nẽ wo gõõla cĩ balna kahadẽẽcẽ nana. 19 Ayak balna kẽnnẽ thoothonniok cĩk ẽpẽkanõnĩ kĩ ĩnõõnõ, nyatarka thõõth cĩ Nyekuc cĩnĩng kĩ thõõth cĩ et ĩmma cĩ balna adaak cĩ athĩ thar Yesu, cĩ athĩ Paulo ne, ũrũga nẽ daaĩtha. 20 Ma baa natẽ, ẽrẽkca ngatĩ woccia kõwõbẽ thoothonniok cĩk aatĩ ketee. Ma balna natẽ kijina na ngĩ woccia adiim nẽ kũũk Yeruthalẽma, kũũk kĩbĩl lokika thoothiowẽy ĩcĩk abĩlnĩ eeta ĩnõõnõ wo. 21 Ma balna ngĩ uduwa Paulo thõõth cĩ adiimi kaanyĩwothĩk nẽ athĩnẽy cĩk alaan cobbi cĩ Rũma wo, kuduwaha eet kuthutti ĩnõõnõ kuumuc kĩĩ kitionĩk na ĩnõõnõ alaan cobbi.”
22 Ma natẽ, uduwak Agripa Vethtuth ethek ne, “Kadiimi da na kir kathĩrari thõõth cĩ et coo.” Ẽdẽcĩ Vethtuthi ethei ne, “Athihi katĩ ĩnõõnõ lootha ngerenniet.”
Othoothĩk Paulo Agripa
23 Ma baa ngerethietĩn cĩnnĩ, iriokta Agripa kĩ Bernith iriana ceremuanĩy ĩcĩk dĩhĩmĩk õrrõt, ĩthõng itiothõ ciith cĩ lokiko, iriowa kĩ gaala cĩk obbitik cĩk nyĩcẽkẽru kĩ makayyiok cĩk kõrõõk cĩ gaalawu. Ĩthõng thĩ, thõõtha cĩ aduwa Vethtuthi, ayahiay Paulo lokika. 24 Ma natẽ, irion Vethtuthi ĩĩ ne, “Alaan Agripa kĩ eet vẽlẽk cĩk attiyyu ngato wo, acĩnnu et coo! Acalcallecca balna eeta cĩk Yudei vẽlẽk cĩk aatĩ Yeruthalẽma kĩ Cithariya ngato wo, etheca ne, adiim thẽk ngĩ aruwue nẽ thõng.” 25 Ĩthõng kũmũda balna na, athii gii cĩ gerthe cĩ ẽgẽrẽthan eeti coo tõ, cĩ woccia anyi thẽk ĩnõõnõ kadaak. Adiim balna nẽ thõõth cĩnnĩ kũũk kĩthĩrar alaanĩ cobbi cĩ Rũma, kuduwa na ngĩ kitiona ĩnõõnõ kũũk alaana cobbi Rũmatẽy. 26 Ĩthõng athii gii kir cĩ kamũda balna na cĩ ẽgẽrẽthan nẽ tõ, cĩ katĩ kẽhẽẽdẽ nyaraga kitionĩk alaan cobbi cĩ Rũma. Ĩnõõnõ thĩ yoko cĩ kayahanẽ na ĩnõõnõ ngato ĩcunung vẽlẽk koo, aniitia thẽk kir alaan Agripa, ma kothoothitõ naaga thõõth coo wo, kĩĩ thĩ katĩ kẽtẽhẽẽd woccia na gimma. 27 Nyatarka kamui na athii woccia cĩ kitionii et cĩ aavĩ kĩjana kaganoko alaan cobbi cĩ Rũma katĩ ngĩ athii gimma cĩ edenyiay cĩ ẽgẽrẽthan nẽ tõ.