Ibilli makayyiowa cĩk Yudei Paulo lokika cĩ Velihi
24
Ma baa vurtia cĩ wathinniok tur, ĩtĩnga paadĩrĩ cobbi cĩ athĩ Anania kĩ eet õõgĩ cĩk obbitik kĩ et cĩ athĩ Tertullath cĩ aga ngiran, õõt ĩcĩ kõrõõk cĩ gaalawu cĩ Cithariya. Avvu balna abĩlnĩ nẽẽgẽ Paulo nguuma cĩ gaalinit Velik. 2 Ma balna ngĩ utuvvuyyia Paulo kikiyyia lokika, ĩtĩnga Tertullathĩ ẽbẽl thõõth cĩ abĩlnĩ Paulo nguuma cĩ Velihi wo, athĩ ne, “Gaalinit, kẽbẽlbẽlla naaga õrrõt ganõna, nyatarka aniitia. Ĩthõng thĩ, ĩdĩmanothĩk lõõcĩ cĩnang aavu jurrung, nyatarka amui niia ngatĩ athũnnẽ niia eet cĩgaak bũnnathĩta cunni. 3 Gaalinit cĩ tiiri Velik, katalla naaga, nyatarka bũnnathĩt cĩ ayaha niia wo. 4 Ĩthõng thĩ, yoko athii woccia na cĩ kacananni aniitia kaganoko, kĩlalecina lẽmanẽ kĩdĩĩc, ĩthõng ĩthĩhet ageeta kĩdĩĩc.5 “Kijioktaha naaga ngĩ ẽẽn eeti coo et cĩ gerthe õrrõt kũdũt, alab nẽ Yudei looc tũrũr kuuktõy. Ẽẽn nẽ makayyioit cĩ meelitin cĩ eet cĩk õwõb Yesu cĩ Natharẽtĩ. 6 Adiim balna nẽ ngĩ ĩngõr Ciith cĩ Nyekuco, ĩnõõnõ thĩ yoko cĩ balna kagamia naaga ĩnõõnõ wo, ĩthõng kidiimtia keteddiha ĩnõõnõ thõõth ngirana cĩnang. 7 Ĩthõng thĩ, ikiyyia gaalinti cobbi cĩ nyĩcẽkẽru cĩ athĩ Lithiath nyĩcẽkẽrĩy noko, kikiyyia kũũwĩ ĩnõõnõ athĩnẽy cĩgaak, 8 ĩthõng uduwak eet cĩk abĩlnĩ ĩnõõnõ kivitia ĩcunni. Yoko thẽk jin ĩnõõnõ buu, amũda woccia ngatĩ ẽẽn thoothiowa cĩgaak koo dĩdĩ.”
9 Ngaatĩ õthõõthĩ Yudei thõõth cĩ volongo, ĩthõng elemit thõõth cĩ ẽẽn dĩdĩ buu.
Ẽẽl Paulo ẽlẽ cĩnnĩ
10 Ma balna ngĩ uduwak gaalinti Paulo kõthõõth, ẽdẽc Paulo ĩĩ ne, “Kagga erkinya cĩk meelĩk ngatĩ ẽnnẽ niia et cĩ eteedi thõõth cĩ looc coo, ĩthõng yoko, katalli õrrõt ngatĩ kõthõõthẽ kẽẽlanẽ na ẽlẽ cannĩ lokika. 11 Amũda woccia niia tamanoko ngĩ, athii balna ngatĩ kayahẽ na wathinniok cĩk alacanni cĩk ẽẽn õmmõtõ kĩ ramma, wũk balna kõkkõ kalawinie na Yeruthalẽma. 12 Nga kummuddiaha eeta cĩk abilnia wo ngatĩ balna kegerenyonia kĩ et ĩmma Ciitha cĩ Nyekuco, kõdẽ kĩkõtha thõõth meelitina Ciithẽnẽy ĩcĩk Lawintiak, kõdẽ nẽnnẽ ngamanĩ õlõõ cĩ gaalawu cobbi. 13 Ĩthõng yoko thẽk athii naboo nẽẽgẽ cĩ edeemicia thoothonniok cĩk abilnia aneeta wo buu. 14 Ĩthõng thĩ, yoko kelemi dĩdĩ kala na Nyekuc cĩ õõ baajigi baajigiet cĩgaac kĩ wobjiaiti cĩ gõõl cĩ Makayyioit Yesu cĩ akaneei nẽẽgẽ ĩnõõnõ athĩ ne, athii nẽ cĩ ẽẽn dĩdĩ wo. Kelemi thoothonniok vẽlẽk cĩk aduwõy kĩ Ngiran kĩ Nyaragẽt cĩk ẽhẽẽd eeta cĩk õthõõth molook cĩ Nyekuco, 15 ĩthõng kayai na buu muwẽẽnĩt cĩ abũnna codoi ĩcĩ Nyekuco kĩcĩ thẽk ayak eeta cĩkkõ. Aavĩ thẽk katĩ rũgũthanĩtĩ cĩ eet cĩk edeemi thoothonniok kĩ cĩk ẽẽn gẽrẽthanniok. 16 Ĩthõng nyatarka kagga na, karĩcana dõõkĩthĩ ngatĩ kayahẽ muwẽẽnĩt cĩ thĩnĩn cĩ abũnna nguuma ĩcĩ Nyekuco kĩ eetĩnẽy.
17 “Ma vurtia cĩ erkinya cĩk kĩdĩk cĩk balna kathinnie na tõ, kikiyyia Yeruthalẽma kayahaha eet cĩganĩk cĩk apĩrna anyinit, ĩthõng kikiyyia kaanyĩha Nyekuc buu anyinit. 18 Kuunyi balna na ẽlẽ cannĩ baa ngĩ avvu amũdaca eeta reerunga cĩ Ciith cĩ Nyekuco, ngatĩ kadĩmanẽ thõõth coo. Athii balna eeta cĩk karũmẽna tõ, kõdẽ nẽnnẽ athii cĩ kegerenyona kĩ eeta. 19 Ĩthõng thĩ, aatĩ Yudei gwuak cĩk looc cĩ Athia, cĩk woccia aatĩ ngato nguuma cunni, ĩthõng ayakta thoothonniok cĩgĩk cĩk abilnia aneeta. 20 Kõdẽ jin da eet cĩk aatĩ ngato wo, kuduktia woccia thõõth cĩ gerthe cĩ amũda ĩcannĩ balna ngĩ kabili nguumtẽnẽy ĩcĩk gaala cĩk lokiko cĩ eet cĩgaak, 21 ĩthõng thĩ, nẽnnẽ thõõth codoi doo cĩ woccia abilnia nẽẽgẽ aneeta balna ngĩ kegerenyi na lokika kõrra wũ balna kathĩ ne, ‘Kabili na lokika kõr coo, nyatarka kelemi kathĩ ne, arũkna daakciaha daaĩtha.’ ”
22 Aga balna Velihi jurrung gõõl cĩ Makayyioit Yesu. Ma natẽ, ẽdẽca lokiko, ĩthõng ĩĩ ne, “Kacini katĩ na thõõth cunni katĩ ngĩ ikiyyia Lithiathĩ gaalinti cobbi cĩ nyĩcẽkẽru.” 23 Ngaatĩ aduwacĩ Velihi gaalinit cĩ nyĩcẽkẽru kẽbẽk Paulo jurrung, ĩthõng thĩ, athii woccia cĩ ẽcẽb ĩnõõnõ, ĩthõng anyĩk gõõnõgĩ kivitia keelitõ Paulo.
24 Ma vurtia cĩ wathinniok õõgĩ, iriokta Velihi kĩ ngaa cĩnnĩ Duruthilla cĩ balna ẽẽn Yudenit. Ma natẽ, ũtũvvũwa nẽ Paulo, ĩthõng ĩthĩrar ĩnõõnõ ngatĩ õthõõthĩ thõõth cĩ leminit cĩ Kiristo Yesu. 25 Ma balna ngĩ õthõõth Paulo thõõth cĩ edeemothi, kĩ cĩ kagamĩ eleeti jurrung, kĩ thõõth cĩ eteedi Nyekuci thoothonniok vẽlẽk, ikiyyia õtõngõlẽ Velihi õrrõt, ĩthõng ĩĩ ne, “Ũwũpanĩt thoothiowa neekuo kõr coo! Bĩt da nõõnõ. Ma katĩ ngĩ kamũda itin kõr ĩmma, kavvuyyi katĩna.” 26 Kõr nĩcẽ, monogo nẽnnẽ balna ahad Velihi adiim kaanyĩk Paulo ĩnõõnõ gimma thõng. Ngaatĩ avvũyyĩ ĩnõõnõ kũdũt kivitia kothoothiõy.
27 Ma balna vurtia cĩ erkinya ramma, ikiyyia eeti cĩ athĩ Porthioth Vethtuth ĩthĩ gaalinit, abarĩc Velik. Ĩthõng thĩ, nyatarka balna adiim Velihi katalliek Yudei, ikiyyia ũtũngek nẽ Paulo kaavu kĩjana.