23
Atahamĩk balna Paulo gaala cĩk lokikak, ĩthõng ethek ne, “Gõtõõnõga, katicanothi balna na Nyekuc jurrung kĩĩ kõr coo thĩnĩna ĩcĩ abũnna.” 2 Ma natẽ, uduwak Anania wũ ẽẽn paadĩr cobbi eet cĩk abĩlĩ kĩ Paulo natẽ kapanitõ ĩnõõnõ kũtũk. 3 Ngaatĩ ẽthẽcĩ Paulo ĩnõõnõ ne, “Apanni katĩ Nyekuci aniitia buu, cĩ ogooni kĩ dilatĩ cĩ athithijiani kaibowa cĩ võõrĩ wo, ĩthõng ĩcĩtõõnĩ gogo eeni niia gẽrtha! Aavẽ niia loota nato kuumuc, ĩthõng etedĩha aneeta thõõth Ngirana cĩ Mutha, ĩthõng monogo nẽnnẽ ẽgẽrẽthani niia Ngiran ngatĩ aduwacẽ et kapana aneeta!”4 Ma natẽ, ĩĩtõ eeta wũk balna abĩlĩ joonui ĩcĩ Paulo ne, “Athii niia cĩ aga ngatĩ adaacẽ paadĩr cobbi cĩ Nyekuco?”
5 Ẽdẽcĩ Paulo athĩ ne, “Gõtõõnõga, athii viyyio bõng cĩ kagga ngatĩ ẽnnẽ nẽ da paadĩr cobbi, nyatarka eheeddi Nyaragawa ĩcĩ Nyekuco athĩ ne, ‘Nyĩ othoothi makayyioit cĩ eet cugunik buth.’ ”a
6 Ma balna ngĩ aga Paulo ngatĩ ẽnnẽ eeta cĩk lokikak gwuak Thaduthei, ĩthõng ĩĩtõ gwuak Varithei wo, ikiyyia õthõõth ĩĩ ne, “Gõtõõnõga, keeni na Varithenit ngẽrtĩ Varithento. Kabili yoko na lokika, nyatarka muwẽẽnĩt cannĩ cĩ arũknanĩ eeta cĩk adaaitõ.” 7 Ma balna ngĩ uduwa Paulo thõõth coo, ivitia ẽpẽkantõy Varithei kĩ Thaduthei, ngaatĩ engerini eeta lokika. 8 Athĩ balna Thaduthei ne, athii eeta cĩk adaaitõ cĩ arũkna daaĩtha, ĩthõng kothii anjĩlẽt, kõdẽ ririwanĩna. Ĩthõng thĩ, balna ẽlẽmĩ Varithei ngatĩ arũknanĩ eeta cĩk adaaitõ daaĩtha, kĩ anjĩlẽt, kĩ ririwanĩn vẽlẽk.
9 Ĩthõng balna ĩĩ maka calcalli, ngaatĩ ĩngannĩ limanniowa gwuak cĩk Ngiran cĩ Mutha cĩk ẽẽn Varithei, ĩthõng ẽpẽkantõy õrrõt. Athĩ balna nẽẽgẽ ne, “Nga kijioktaha naaga gimma cĩ gerthe cĩ ẽgẽrẽthan eeti coo. Kerebo yoko balna da othoothĩk anjĩlõ, kõdẽ ririwacĩ ĩnõõnõ dĩdĩ.” 10 Ma natẽ, ikiyyia ĩĩ gẽrtha pẽkanĩ õrrõt, ĩthõng õtõngõlẽ gaalinti cobbi cĩ nyĩcẽkẽru athĩ ne, agurrõõnĩ tooko eeta cĩkkõ Paulo õrrõt. Ma natẽ, uduwak nyĩcẽkẽr kõõt kutururyia Paulo kõrgẽna cĩnĩng tiirthẽta koboddiai kõrõõk cĩ nyĩcẽkẽru.
11 Ma baalin nĩcẽ, ilibak Makayyioiti Yesu Paulo kikiyyia kĩbĩl ngatĩ aavẽ nẽ, ĩthõng ĩĩ ne, “Anyĩk thĩnĩn cunni kõkõm! Kĩcĩ eyelewu balna niia eet thõõth cannĩ Yeruthalẽma wo, õkkõ thẽk katĩ eyeleei niia Rũmatẽy buu.”
Tukwuan cĩ adiim aruwẽẽnĩ Paulo
12 Ma ngerethietĩn cĩnnĩ, ivitia uluttie Yudei gwuak, ĩthõng ũbũtanit kõnganĩ cĩ athii cĩ aduwẽẽnĩ, kõdẽ awũdẽẽnĩ kuumuc gii ngĩ uruit Paulo. 13 Ẽẽn balna eeta cĩk atukwuan ẽẽ, eet ramma kĩ gimma. 14 Ngaatĩ õvõyyĩ nẽẽgẽ ĩcĩ makayyiok cĩk paadĩrnyawu kĩ eet cĩk obbitik, ĩthõng õõt ĩĩtõ ne, “Kũbũtanta viyyio naaga kõngan cĩ kathĩnna ne, athii cĩ kadahia gimma gii ngĩ kurukta Paulo. 15 Ĩthõng niigia kĩ eet cĩk lokikak vẽlẽk, õõt nẽnnẽ niigia igoolit gaalinit cobbi cĩ nyĩcẽkẽru gõõla cĩ adiim amũdanu nyemut cĩ ẽẽn dĩdĩ cĩ katĩ etedothi Paulo lokika. Ijinta ĩnõõnõ kaanyĩk Paulo kikiyyia lokika. Ĩthõng thĩ, kerewina katĩ kẽnnẽ naaga, kĩĩ katĩ kurukta ĩnõõnõ katĩ nga kõdõlan nẽ nginicẽ.”
16 Ĩthõng thĩ, ma balna ngĩ ĩthĩrar logoo cĩ ngõõnõnĩ Paulo thõõth coo, ũũk ĩcĩ kõrõõk cĩ nyĩcẽkẽru kũũk kuduwak Paulo thõõth.
17 Ma natẽ, ũtũvvũwa Paulo gaalinit ĩmma cĩ nyĩcẽkẽru, ĩthõng ennek ne, “Bĩtĩ ngĩthorowoc coo ĩcĩ gaalinit cobbi cunni, nyatarka ayak nẽ thõõth ĩmma cĩ adiim aduwaai ĩnõõnõ.”
18 Ngaatĩ õkõyyĩ gaalinti ngĩthorowoc ĩcĩ gaalinit cobbi cĩ nyĩcẽkẽru, ĩthõng ũũk ethek ne, “Aduwacca aneeta Paulo cĩ aavĩ kĩjana, athĩ ne, kayahai na aniitia logoo coo, nyatarka ayak nẽ thõõth cĩ adiim aduwacina.”
19 Ma natẽ, agam gaalinti cobbi ngĩthorowoc athiit, ngaatĩ õkõyyĩ ĩnõõnõ kabanyca, ĩthõng ijin ethek ne, “Nyia cĩ adiimi niia aduwacca aneeta wo?”
20 Ẽdẽcĩ ngĩthorowocĩ athĩ ne, “Ĩdĩmantek Yudei gwuak thõõth cĩ avvu ĩgooli aniitia yaha Paulo kikiyyia lootha lokika, gõõla cĩ adiim amũdanĩ thõõth cĩ mũrrĩ, nyatarka ĩnõõnõ. 21 Nyĩ baai thẽk elemi thõõth cĩnĩng wo, nyatarka avvu oginneei eeta cĩk ẽẽn eet ramma kĩ gimma ĩnõõnõ gõõla. Ũbũtanit viyyio nẽẽgẽ ĩĩtõ ne, athii nẽẽgẽ cĩ aduwẽẽnĩ, kõdẽ awũdẽ gii ngĩ uruit Paulo. Ĩdĩmantothĩk nẽẽgẽ vẽlẽk ẽrẽẽcõ thõõth cĩ katĩ aduwa niia dõ.”
22 Ngaatĩ itionĩcẽ gaalinti cobbi wo ngĩthorowoc nĩcẽ gõõl kũũk, ĩthõng ethek ne, “Nyĩ thĩ õkkõ aduwaai et ĩmma ennei ne, kuduwaha viyyio na gaalinit cobbi thõõth coo.”
Itione Paulo ũũk Cithariya
23 Ma natẽ, ũtũvvũwa gaalinti cobbi gaala cĩk nyĩcẽkẽru ramma, ĩthõng uduwak ethek ne, “Ĩdĩmantek nyĩcẽkẽr eet õmmõtõ, kĩ nyĩcẽkẽr cĩk avir nyangõlẽnyay eet iyyio kõmmõtõ, kĩ nyĩcẽkẽr eet õmmõtõ cĩk dĩlanyawu. Õvvõ katĩ nẽẽgẽ õlõõ ĩcĩ gaalawu ĩcĩ Cithariya katĩ baal, ngĩĩ itini tõrkõwẽc. 24 Ĩdĩmantek niigia nyangõlẽnya õõgĩ Paulo, kĩĩ katĩ thẽk abũnna ma ngĩ õdõlan nẽ jurrung, Velik gaalinit cĩ agam looc.”
25 Ma natẽ, ẽtẽhẽẽd gaalinti cobbi cĩ nyĩcẽkẽru nyaraga cĩ ebellie athĩ ne, 26 “Thawinet cĩ aku ĩcĩ Kilawudoth Lithiath gaalinit cobbi cĩ nyĩcẽkẽru cĩ õkkõ ĩcĩ gaalinit Velik. 27 Agam balna Yudei et coo, ĩthõng adiim ngĩ aruk ĩnõõnõ thõng. Ĩthõng thĩ, balna ma kamũda na ngĩ ẽẽn nẽ et cĩ Rũma wo, kũũwẽ nyĩcẽkẽr õõgĩ kõõt keelia ĩnõõnõ. 28 Kadiimi balna na kagga nyia kibilli nẽẽgẽ ĩnõõnõ wo, ngaatĩ kayahacẽ ĩnõõnõ lokika cĩnĩng. 29 Kamũda kẽnnẽ abĩlnĩ ĩnõõnõ, nyatarka Ngiran cĩnĩng. Ĩthõng thĩ, balna athii thẽk thõõth cĩ amudiay cĩ woccia etedothĩcẽ ĩnõõnõ daaĩthĩ, kõdẽ ecebini thõng tõ. 30 Ma balna ngĩ aku eeti ĩmma aduwacca ngatĩ adĩmanẽcĩ eeta gõõl cĩ oginnẽcĩ ĩnõõnõ kidiimitõ kuruit ĩnõõnõ thõng wo, kitionai na ĩnõõnõ nĩĩco noko. Kuduwaha eet cĩk abĩlnĩ ĩnõõnõ wo buu, kivitia kẽkẽbtai thõõth cĩ abĩlnĩ nẽẽgẽ ĩnõõnõ wo aniitia.”
31 Ngaatĩ thĩ balna athĩknĩ nyĩcẽkẽrĩ thõõth cĩ gaalinit cobbi, ĩthõng ootti Paulo baa baal ĩĩthõng kõdõlantĩ kõrõõk cĩ gaalawu cĩ athĩ Antipatirith. 32 Ma balna ngerethietĩn cĩnnĩ, ivitia oboddia nyĩcẽkẽrĩ cĩk õwõ thoonĩy ẽẽ, õõt õlõõ cĩ nyĩcẽkẽru, ĩthõng irioit Paulo kĩ nyĩcẽkẽr cĩk avir nyangõlẽnyanẽy dõ. 33 Ma balna ngĩ õdõlanit nẽẽgẽ Cithariya, aanycĩk gaalinit nyaraga, ĩthõng aanycĩk nẽẽgẽ Paulo gaalinit buu. 34 Ma natẽ, ẽbẽl gaalinti nyaraga, ĩthõng ijin Paulo, ĩthõng ijiowa ngatĩ akuni nẽ looca cĩ Cilithia. 35 Ngaatĩ athĩnnĩ gaalinti ne, “Kathĩrari katĩ na thõõth cunni katĩ ngĩ ivitia eeta cĩk abilni aniitia wo ngato.” Ma balna ngĩ uduwa nẽ thõõth coo, uduwak nyĩcẽkẽr kuthutti Paulo kĩjana õlõõtõtõ cĩ Ẽrõõdĩ.