22
“Gõtõõnõga kĩ õõ baangĩ, ĩthĩrarit da thõõth cannĩ cĩ kẽẽlẽ na ẽlẽ cannĩ.” 2 Ma balna ngĩ athĩrar meelitini ngatĩ õthõõthĩ Paulo Aramayyiey wo, ivitia itivantẽ kĩĩ lõõcĩ ĩĩr.3 Ngaatĩ thĩ athĩ Paulo ne, “Keeni na Yudenit cĩ karittiay õlõõ ĩcĩ gaalawu cĩ Tarthuthi, looca cĩ Cilithia, ĩthõng thĩ, balna kalĩnna ngato Yeruthalẽma. Keeni balna na doolec cĩ thukul cĩ Gamalieli cĩ kalimaniay Ngirana cĩ õõ baatĩ baajigi baajigiet cĩgaak õrrõt jurrung. Ĩthõng dĩdĩ, kamĩnani na buu Nyekuc kaavu kĩ cĩ yoko niigia kõr coo wo. 4 Kadĩmani balna na lemnyiok cĩk meelĩk õrrõt cĩk õwõb gõõl cĩ Makayyioit Yesu buth. Ĩthõng kaanyĩha õõgĩ buu kuruktie, kagami kõdõõt kĩ ngaay kaari kĩjan, 5 ĩthõng woccia thẽk aduwaccung paadĩrĩ cobbi kĩ eet vẽlẽk cĩk lokikak ngatĩ ẽẽn thõõth coo dĩdĩ. Anya balna thẽk nẽẽgẽ aneeta nyaragẽt kayawothĩk eet cĩganĩk cĩk ẽẽn Yudei Damathkatha, kĩĩ kũũk na kayaha eet cĩkkõ kivitia kẽcẽbtẽ Yeruthalẽma, ĩthõng uuktie.”
6 “Ma balna ngĩ aavu kõr tiddina, kikiyyia balna kĩĩthĩ õjõõn kĩ Damathkath, ĩthõng tamanoko utdukaha lanyĩtĩ ĩmma cĩ võõrĩ pẽr tammuatiddina. 7 Ma natẽ, kuuka looc, ĩthõng kĩthĩrara molook cĩ etheca aneeta ne, ‘Thaulo! Thaulo! Adĩmanna niia aneeta buth nyia?’
8 “Ngaatĩ kajinie kẽthẽcẽ ne, ‘Aniitia ngẽnẽ Makayyioit?’
“Ẽdẽcca etheca ne, ‘Aneeta Yesu cĩ Natharẽtĩ cĩ adĩmani niia buth wo.’ 9 Acĩn balna eeta cĩk kiiriokca kĩ aneeta buu lanyĩt, ĩthõng thĩ, kẽnnẽ athii cĩ athĩrar molook cĩ et cĩ othoothĩca aneeta wo.
10 “Ma natẽ, kijina kennea ne, ‘Kĩdĩman yoko nyia Makayyioit?’
“Ẽdẽcĩ Makayyioiti etheca ne, ‘Tĩnga, ĩthõng uuwu Damathkatha. Kaduwacci katĩ gii cĩ õkkõ adĩmani natẽ.’ 11 Ma natẽ, agamta balna aneeta eeta cĩganniek athiit itiyyia kõdõlanta Damathkath, nyatarka ĩdĩta lanyĩtĩ cĩ atũkũlĩ õrrõt kẽbẽrẽ cĩganĩk kĩĩtõ rubẽnẽ.
12 “Ma natẽ, iliba eeti ĩmma cĩ athĩ Anania kikiyyia kĩcĩnanĩ. Ẽẽn balna eeti coo et cĩ athũnnĩ Ngiran jurrung õrrõt, ĩthõng ongollie Yudei vẽlẽk cĩk aatĩ natẽ ĩnõõnõ. 13 Ngaatĩ aku abĩlnĩ nẽ ngatĩ kaavẽ wo, ĩthõng ĩĩ ne, ‘Gõtõna Thaulo, cĩnẽ da naboo!’ Ma natẽ noko, ĩcĩntẽ kẽbẽrẽ cĩganniek, kĩcĩna ĩnõõnõ buu.
14 “Ngaatĩ ethecia nẽ ne, ‘Ẽbẽraai balna Nyekuci cĩ õõ baajigi baajigiet cĩgaac aniitia gaa gii cĩ adiim nẽ, kĩĩ katĩ cĩn Et cĩ Edeemi Thoothonniok, kĩĩ katĩ thĩk thoothonniok cĩk kũtũk cĩnnĩ. 15 Abũnna ma ngĩ aduwaai niia eet vẽlẽk gii cĩ icinu niia, ĩthõng ithiwu wo. 16 Ĩthõng nyia yoko cĩ nga ẽrẽ niia wo? Tĩnga gam batithimo, ĩthõng ũtũũnya niia gerthetin cunni gõõla cĩ alawẽ niia thar cĩk Makayyioktak.’
17 “Ma balna ngĩ kõbõda Yeruthalẽma, ĩthõng kalawõy Ciitha cĩ Nyekuco wo, kakuni kẽnnẽ kacĩnĩ Makayyioit ngonothintia, 18 ĩthõng kĩcĩna na Makayyioit, ennecca nẽ ne, ‘Tĩnga tamanoko tũngek Yeruthalẽm, nyatarka abũrĩ eeta thõõth cĩ aduwa niia, nyatarka aneeta wo.’
19 “Kedeci kẽnnẽ kennei ne, ‘Makayyioit, aga eeta cĩkkõ ngĩ balna gõõ koyokoni na Ciithi cĩk Lawintiak cĩk meelĩk kẽcẽb ĩnõõgõ, ĩthõng kuuka eet cĩk elemnyi aniitia. 20 Balna ngĩ aruwue Ithtivenĩ wũ balna ẽẽn keberec cĩ thõõth cunni, kabili balna na natẽ kabanyca, ĩthõng kẽlẽmahẽ ĩnõõnõ kadaak, ĩthõng kẽbẽha ceremua cĩk eet cĩk aruk ĩnõõnõ ẽẽ.’
21 “Ngaatĩ ethecia Makayyioiti ne, ‘Bĩtõ, kitionni na aniitia bĩt rẽẽna ĩcĩ eet cĩk athii cĩ ẽẽn Yudei.’ ”
Ẽẽn Paulo et cĩ Rũma
22 Athĩknẽ balna meelitini cĩ eetu kuumuc kẽdẽcak Paulo thõõth coo. Ma natẽ, ẽtẽrẽktaĩ acalcallit ĩĩtõ ne, “Thiiwi et coo! Athii thẽk woccia cĩ arũgĩ nẽ!”
23 Ma balna ngĩ ẽgẽrẽny nẽẽgẽ utdukit ceremua cĩk ahimit eletinẽy cĩgĩk, ĩthõng utudungtek tuduwac ngõõt, 24 ikiyyia uduwak gaalinti cobbi nyĩcẽkẽr cĩgĩnĩk kootti Paulo õlõõ cĩ nyĩcẽkẽru, kĩĩ katĩ kũũk nẽ kuukie thõng. Aduwa balna nẽ thõõth coo, kĩĩ katĩ kũmũda nyia da kegerenycek eeta Paulo ketee wo. 25 Ma balna nga ẽcẽb nyĩcẽkẽrĩ Paulo, kĩĩ katĩ kibicie, ijin nõõnõ Paulo gaalinit cĩ nyĩcẽkẽru ethek ne, “Ẽlẽmĩ woccia ngiranĩ ngatĩ uukwe niia et cĩ Rũma ma nga kumudiay thõõth cĩ ẽgẽrẽthan nẽ lokika wo buu?”
26 Ma balna ngĩ athĩrar gaalinti cĩ nyĩcẽkẽru thõõth coo wo, ũũk ĩcĩ gaalinit cobbi cĩnnĩ, ĩthõng ijin ĩnõõnõ ethek ne, “Nyia cĩ adĩmani niia ketee wo? Ma kĩĩ ẽẽn eeti coo et cĩ Rũma wo!”
27 Ma natẽ, ũũk gaalinti cobbi wo ĩcĩ Paulo, ĩthõng ijin ethek ne, “Duwaha da, eeni niia et cĩ Rũma?” Ẽdẽcĩ Paulo ethei ne, “Ii.”
28 Ngaatĩ athĩnnĩ gaalinti cobbi ne, “Kadũmani balna na nyarobinya cĩk meelĩk, kĩĩ kikiyyia kĩthĩ et cĩ Rũma.” Ẽdẽcĩ balna Paulo ĩnõõnõ ethei ne, “Karittiay balna na keeni et cĩ Rũma.”
29 Ĩthõng nyĩcẽkẽrĩ cĩk balna adiim ajin Paulo wo, ĩvĩjait ĩcĩ vurtio. Ngaatĩ abarriti gaalinti cobbi mĩn balna ngĩ ikiyyia aga ngatĩ ẽcẽbĩ nẽ et cĩ Rũma.
Ootti eeta Paulo lokika
30 Ma balna ngerethietĩn cĩnnĩ, idiim gaalinti cobbi ngĩ ijiowa nyia thẽk kibilli Yudei Paulo wo. Ma natẽ, õõga ĩnõõnõ, ĩthõng ũlũta makayyiok cĩk paadĩrnyawu kĩ eet vẽlẽk cĩk lokikak ngatĩ odoi. Ngaatĩ ayahanĩ Paulo kikiyyia kĩbĩl kẽbẽrẽnĩy ĩcĩgĩk.