Ũũk Paulo Yeruthalẽma
21
Ma balna ngĩ kĩthayyiha ĩnõõgõ gõõl, kivitiaha koottia ĩcĩ bũlũco, ĩthõng kotoddia kovowol cobbi kedeccieha koottia looca cĩ athĩ Koth cĩ alĩha maama. Ma ngerethietĩn cĩnnĩ, koottia looca cĩ Rõdẽthĩ cĩ alĩha maama, ma natẽ, koottia kõdõlanta kõrõõk cĩ gaalawu cĩ Patara. 2 Ngaatĩ kovvoyyia kamũdania kovowol ĩmma cobbi cĩ õkkõ looca cĩ Vonithia, ĩthõng kotoddia koottia. 3 Ma vurtia cĩ kẽdẽnycahia Thiporoth looc cĩ aavĩ bũlũca kõrgẽna, ĩthõng kanyangtẽha koottia ĩcĩ diinu, kedeccieha kõdõlanta looc cĩ Thiiria. Ma natẽ, koottia kibillia õlõõ ĩcĩ gaalawu cĩ Tire ngatĩ balna õvvõ aaranẽ eeta ijjio kovowola cobbi cĩnang wo. 4 Ma balna ngĩ kovvoyyia kamũdana wobjiak natẽ wo, kũrũmtea nõ kĩ ĩnõõgõ iinyia tũrgẽrẽm. Eyeleei balna Ririwacĩ cĩ Dĩhĩmĩ ĩnõõgõ kĩtĩrĩthĩt Paulo kithii cĩ õkkõ Yeruthalẽma. 5 Ma balna ngĩ ũtũbantothĩk wathinniowa cĩgaak, koottia kedeccieha gõõla cĩnang naboo. Itionicet balna wobjiaha vẽlẽk gõõl ngaanẽy ĩcĩgĩk, dõõlẽnĩy ĩcĩgĩk vẽlẽk koottia õlõõ cĩ gaalawu ngatĩvõrĩ. Ma balna ngĩ kõdõlanta titim cĩ bũlũco, kivitiaha kakattia kuthungti, ĩthõng kalayyiowa. 6 Ma balna ngĩ kĩthayyiõwa vẽlẽk, kotoddia naaga kovowol cobbi, ĩthõng imiiryie nẽẽgẽ buu õõt korookjiowẽy ĩcĩgĩk.7 Ngaatĩ thĩ nẽnnẽ kĩngannia naaga õlõõ ĩcĩ gaalawu cĩ Tire kovowola cobbi, ĩthõng koottia kulucciaha õlõõ ĩcĩ gaalawu cĩ Tolemaithi, ngatĩ balna kĩthawua lemnyiok, ĩthõng kũrũmtea nõõnõ kĩ ĩnõõgõ waathĩn codoi. 8 Ma balna ngerethietĩn cĩnnĩ, kĩtĩngaththia koottia õlõõ ĩcĩ gaalawu cĩ Cithariya, ĩthõng koottia kuyuwuththia õlõõ cĩ Pilipo et cĩ irion thõõth cĩ Nyekuco, ĩthõng ĩnõõnõ balna cĩ eberiay eetĩnẽy wũk balna ẽẽn tũrgẽrẽma wũk balna ẽẽl tionniak. 9 Ayak balna nẽ buweeci wec cĩk nga kitiktie cĩk õthõõth molook cĩ Nyekuco.
10 Kattĩyya balna naaga Cithariya wathinniok cĩk meelĩk. Ma natẽ, ilibaet eeti ĩmma cĩ õthõõth molook cĩ Nyekuco cĩ athĩ thar Agabuth cĩ aku looca cĩ Yudea. 11 Ma natẽ, ĩdĩma nyẽkẽdẽngõ cĩ Paulo, ĩthõng ẽcẽbĩ athĩn kĩ thoo cĩgĩnĩk. Ngaatĩ balna enneciet ageeta ne, “Aduwa Ririwacĩ cĩ Dĩhĩmĩ athĩ ne, ‘Aatĩ katĩ makayyiowa gwuak cĩk Yudei Yeruthalẽma, ĩthõng ẽcẽb katĩ nẽẽgẽ baatĩ nyẽkẽdẽngõ coo. Ĩthõng naboo katĩ anycĩk ĩnõõnõ eet cĩk athii cĩ ẽẽn Yudei.’ ”
12 Ma balna ngĩ uduwa Agabuthi thõõth coo vẽlẽk, kĩlallieha naaga kĩ eet cĩk olu natẽ, Paulo kithii cĩ õkkõ Yeruthalẽma. 13 Enneccet kẽnnẽ Paulo ne, “Nyia utuluth kuumuc uduulliangũ thĩnĩn cannĩ wo? Kelemi na ngatĩ kecebinie kĩjana, ĩthõng kadaaha, nyatarka thar cĩk Makayyioit Yesu Yeruthalẽma!” 14 Ma balna ngĩ atamaacaet Paulo, kaharyia, ĩthõng kalayyiowa kiittia ne, “Adĩman katĩ Makayyioiti gii cĩ adiim nẽ kĩdĩmanẽ.”
15 Ngaatĩ kadĩmanothicia, ĩthõng koottia Yeruthalẽma. 16 Ma natẽ, itiontet wobjiaha gwuak cĩk Cithariya, ĩthõng ayaktahet nẽẽgẽ kõrõõk cĩ et ĩmma cĩ athĩ thar Mĩnathon cĩ balna kovvoyyia katiyyia. Ẽẽn balna nẽ et cĩ Thiporothi, ĩthõng balna ẽẽn nẽ cĩ owu wobjiaĩ ĩcĩk uwuantẽcĩ.
Agamẽ Paulo Yeruthalẽma
17 Ma balna ngĩ kõdõlanta Yeruthalẽm, ivitia lemnyiowa atalliehet õrrõt ngatĩ acinieta. 18 Ma balna ngerethietĩn cĩnnĩ, kiiriokta naaga kĩ Paulo koottia kĩcĩnta Jemith, ĩthõng aatĩ balna eeta cĩk obbitik vẽlẽk tõ. 19 Ĩthaa Paulo ĩnõõgõ, ĩthõng uduwak gõõl cĩ balna adĩmanĩ Nyekuci ĩnõõnõ kẽẽl eet cĩk athii cĩ ẽẽn Yudei.
20 Ma balna ngĩ athĩrar nẽẽgẽ vẽlẽk thõõth coo wo, ivitia ĩdĩhĩthĩt Nyekuc õrrõt. Ma natẽ, entek Paulo ne, “Gõtõna, cĩn nõõnõ gõõl cĩ avvu ẽnnẽ Yudei lemnyiok cĩk ẽẽn vucciaknya cĩk meelĩk wo! Ĩthõng alna athũnnĩ Ngiran cĩ Mutha õrrõt. 21 Ĩthĩhĩt balna nẽẽgẽ kĩ baa ngĩ aduwuay athĩ ne, alimani niia Yudei vẽlẽk cĩk arũmẽ kĩ eet cĩk athii cĩ ẽẽn Yudei kũtũngtek Ngiran cĩ Mutha. Aduwaai ĩnõõgõ kithii cĩ abũũranĩ nẽẽgẽ eleeti cĩk lõgõõ cĩgĩk cĩk maacĩk, kõdẽ kithii cĩ õwõb ngirantiok cĩk Yudei. 22 Kõgõõn yoko woccia kuu? Athĩrar katĩ nẽẽgẽ ngatĩ ikiyyiaẽ niia, 23 ĩthõng thĩ, dĩman niia gii cĩ kaduwacci naaga. Nyatarka eeta cĩk ẽẽn wec cĩk karũmẽna kĩ ageeta wo, ũbũtantẽk nẽẽgẽ Nyekuc kõngan cĩ tiiri.b 24 Bĩtĩ niia eet cĩkkõ, õõt niigia ũtũũnyĩt eleeti cuguk kĩ ĩnõõgõ, ĩthõng ũdũmanu nyarobinya, kĩĩ katĩ kodottie ĩnõõgõ ooti cĩgĩk. Ĩthõng kĩĩ thĩ, katĩ kagaacõ eeta vẽlẽk thõõth cĩ othoothi eeta aniitia ngĩ ẽẽn võlõng, ĩthõng thẽk katĩ ivitia agaacõ nẽẽgẽ ngatĩ õwõbẽ niia Ngiran cĩ Mutha. 25 Keteheddiha balna naaga nyaraga lemnyiok cĩk eet cĩk athii cĩ ẽẽn Yudei,c kĩĩ katĩ kũtũngtek ngatĩ adaĩ nẽẽgẽ dainit cĩ anyĩwothi kaal cĩk aar eeta kĩĩtõ nyekucnya, kõdẽ ngatĩ athii cĩ awũdĩ biyyie, kõdẽ ngatĩ athii cĩ adaĩ kẽlẽgẽ cĩk acude thõng, kõdẽ ngatĩ athii cĩ oginnie eeta kĩ ngaay taktak.”
26 Ma balna ngerethietĩn cĩnnĩ, ũũwĩ Paulo eet cĩk ẽẽn wec wo kõõt kũtũũnyĩtõ kĩ ĩnõõgõ eleeti cĩgĩk. Ngaatĩ õkõyyĩ Paulo Ciitha cĩ Nyekuco kũũk kuduwa kõr cĩ katĩ edecianĩ wathinniowa cĩk tũnyẽntak, kĩĩ katĩ kĩdĩmanit nẽẽgẽ vẽlẽk codoi codoi gii cĩ cavĩto.
Agamẽ Paulo
27 Ma balna ngĩ õbõktẽ edecciay wathinniowa tũrgẽrẽm, ivitia ĩcĩnĩt Yudei gwuak cĩk looc cĩ Athia Paulo Ciitha cĩ Nyekuco. Ma natẽ, alabtẽk meelitin vẽlẽk kagamit ĩnõõnõ, 28 ĩthõng egerenyit ĩĩtõ ne, “Eeta cĩk Ĩthraĩlĩ, elliettu! Et wũ gõõ aliman eet vẽlẽk vatĩk dũũwũk thõõth cĩ gerthe kĩ eet cĩgaac kĩ ngiran cĩnac kĩ Ciith cĩ Nyekuco wo coo. Ayaha nẽ ngawani ngatĩ ẽẽktanẽ eet cĩk Girihi ngatĩ angiranni reerunga cĩ Ciith cĩ Nyekuco, ĩthõng ẽgẽrẽthan ngĩtĩ angiranni coo.” 29 Ĩcĩnĩt balna nẽẽgẽ Paulo kĩ Torovimath ĩcĩ owu Yeruthalẽma. Ẽẽn balna Torovimathĩ et cĩ kõrõõk cĩ gaalawu cĩ Ẽvẽthathĩ, ĩthõng athii cĩ ẽẽn nẽ Yudenit. Ĩthõng ahaddiek ngatĩ athĩ ne, ayaha Paulo ĩnõõnõ reerunga cĩ Ciith cĩ Nyekucod thõng.
30 Ma natẽ, athanothĩk thõõth kõrõõk cĩ gaalawu tũrũr, ngaatĩ alibanĩ eeta tonniok vẽlẽk. Agamit Paulo, ĩthõng utuguryia ĩnõõnõ Ciitha cĩ Nyekuco ngĩtĩvõrĩ, ĩthõng ũnyũktẽ katũgẽta cĩk obbitik nĩĩco noko. 31 Ma balna ma ngĩ uuk nẽẽgẽ Paulo adiim ngĩ aruk ĩnõõnõ, õdõlan nẽnnẽ nyemut gaalinit cobbi cĩ nyĩcẽkẽr cĩk Rũmae athĩ ne, ĩĩ maka yõkyõwõnĩ Yeruthalẽma ĩcĩtõ vẽlẽk. 32 Ngaatĩ ĩngannĩ gaalinti cobbi tamanoko kĩ gaalaf kĩ nyĩcẽkẽr, kiviryiothĩk meelitin. Ma balna ngĩ acĩn meelitini gaalinit cobbi kĩ nyĩcẽkẽr cĩgĩnĩk, ĩbĩlĩt nẽẽgẽ ĩnĩnga uuk Paulo.
33 Ma natẽ, ikiyyia gaalinti cobbi wo, ĩthõng agam Paulo, ĩthõng uduwak nyĩcẽkẽr kecebit ĩnõõnõ ngarikonyay ĩcĩk obbitik ramma. Ngaatĩ ajini ĩnõõnõ ngĩ ẽẽn nẽ ngẽnẽ, ĩthõng gii jang cĩ kette ẽgẽrẽthan nẽ wo. 34 Acalcallõnĩ balna meelitini cĩ eetu tõõna ĩmmanĩ gii ĩmma mĩn, ĩthõng acalcallõnĩ naboo gwuak tõõna ĩmmanĩ gimma cĩ ẽẽn nyẽgẽlẽ. Athii balna cĩ amũda gaalinti cobbi thõõth cĩ ẽẽn dĩdĩ, nyatarka calcalli. Ngaatĩ aduwacĩ nẽ nyĩcẽkẽr cĩgĩnĩk kootti Paulo õlõõ cĩ nyĩcẽkẽru. 35 Ma balna ngĩĩ õjõõntĩ nẽẽgẽ kĩ vatĩk cĩk õtõd nẽẽgẽ, ikiyyia angarngar meelitini õrrõt ngaatĩ õdõnganĩ nyĩcẽkẽrĩ Paulo thõng. 36 Ẽgẽrẽny balna meelitini cĩ õwõb Paulo athĩ ne, “Uruit ĩnõõnõ thõng! Uruit ĩnõõnõ thõng!”
Õthõõthĩ Paulo ẽlẽ cĩnnĩ
37 Ma balna nga adiim nyĩcẽkẽrĩ õvõyyĩ Paulo õlõõtõtõ ĩcĩnĩng, ikiyyia ijin Paulo gaalinit cobbi ethek ne, “Athii woccia nõõnõ cĩ anya kothoothiõy kĩ aniitia?”
Ẽdẽcĩ gaalinti cobbi ethei ne, “Othoothi niia Girihiyyiey? 38 Athii wõnõ niia cĩ eeni Ijibenit wũ balna ĩkõtha niia jore, ĩthõng ũũwẽ eet cĩk jorak vucciaknya wec baatha cĩ õdõõĩ kak?”
39 Ẽdẽcĩ Paulo ethei ne, “Keeni na Yudenit, ĩthõng karittiay õlõõ ĩcĩ gaalawu cĩ tiiri ĩcĩ Tarthuthi looca cĩ Cilithia. Laang, anya baai thẽk kothoothiowa kĩ eet.”
40 Ma balna natẽ ẽlẽmaaĩ gaalinti cobbi ĩnõõnõ kõthõõth. Ngaatĩ abĩlnĩ Paulo vatĩkẽy ĩcĩk otoddie, ĩthõng õtõmõõĩ nẽ athiit cĩnnĩ kaanyĩk eet kitivantẽ. Ma balna ngĩ ĩjakci eeta wo, othoothĩk ĩnõõgõ Aramayyiey.