Ũũk Paulo gõõla ĩcĩ ẽdẽẽm Makedonia kĩ Girith
20
Ma balna ngĩ edeciay calcallõnĩ, ũtũvvũwa Paulo wobjiak, ĩthõng ĩdĩhĩth ĩnõõgõ kuthutti leminit. Ngaatĩ ĩthaawĩ ĩnõõgõ vẽlẽk, ĩthõng ũũk looca cĩ Makedonia. 2 Ma balna ngĩ õkkõ nẽ looca nĩcẽ, ĩdĩhĩthek nẽ eet thoothonniok cĩk meelĩk. Ĩthõng thĩ, balna vurtia ũũk looca ĩcĩ Girihi,a 3 ngaatĩ balna aku Paulo aavẽ nyĩĩlõwẽ iyyio natẽ. Adiim balna nẽ ngĩ õtõd kovowol kũũk ĩcĩ looc cĩ Thiiria. Ĩthõng thĩ, kẽnnẽ balna atukwuan makayyiowa gwuak cĩk Yudei, gõõl cĩ adiim arui Paulo. Nyatarka thõõth coo, ikiyyia imiirie nẽ gõõla cĩ Makedonia. 4 Iriok balna nẽ kĩ Thopatar ngẽrtĩ Pĩrathĩ cĩ aku õlõõ ĩcĩ gaalawu cĩ Berea, kĩ Arithtarkath kĩ et cĩ athĩ Thikonduth cĩk avvu nẽẽgẽ õlõõ ĩcĩ gaalawu cĩ Thẽthalonika, ĩthõng iriowa naboo kĩ et ĩmma, cĩ athĩ Gauth cĩ aku õlõõ ĩcĩ gaalawu cĩ Derbe, ĩthõng iriowa kĩ Timoti buu, ĩthõng iriowa kĩ Taicikath kĩ Torovimath cĩk balna avvu looca cĩ Athia. 5 Uwuantẽcĩ balna eeta cĩkkõ ĩcĩ owu kõõt kereyyiet ageeta õlõõ cĩ gaalawu cĩ Torawothi. 6 Ĩthõng thĩ, ma baa vurtia cĩ Peyian cĩ Ahat cĩ Avaadiay cĩ Kothii Nyĩgĩt, kotoddia kovowol koottia õlõõ ĩcĩ gaalawu cĩ Vilipi. Ma vurtia cĩ wathinniok tur, kurumtowa naaga kĩ ĩnõõgõ Torawotha, ĩthõng kaavuttia natẽ iinyia tũrgẽrẽm.Heeroni cĩ aturna cĩ õkõyyĩ Paulo Torawotha
7 Ma Lomidikawa,b kivitiaha kurumtowa naaga kĩ lemnyiok vẽlẽk ngatĩ odoi, ĩthõng kivitiaha kengeryia ahat cĩ avaadiay cĩ Makayyiokto cĩ aturna. Irionĩk balna Paulo eet kuumuc kĩĩ baalin kõrgẽn, nyatarka ĩngathĩ katĩ nẽ ngerethietĩn cĩnnĩ. 8 Ciitha tiddina cĩ balna karumonia wo, atũkũlĩ balna kaala cĩk katũkũlẽnĩ cĩk meelĩk õrrõt. 9 Aavĩ balna logoo ĩmma loota cĩ athĩ thar cĩgĩnĩk Yutikath bẽlẽtha. Ma balna nga irion Paulo, adũngĩ kẽnnẽ ngĩthorowocĩ coo õrrõt, ngaatĩ ongiyyie. Ma natẽ, utdukwuay nẽ ciitha tiddina ngatĩ ẽẽn iyyio tõõna ĩcĩ beletho ẽẽ. Ma balna ngĩ avvu õdõng eeta ĩnõõnõ wo, amũdaai ĩnõõnõ adaaha. 10 Ngaatĩ alũũcẽnẽ Paulo kũũk kĩcĩn Yutikath loota, ĩthõng arabũũt ĩnõõnõ ĩbaatinei ĩcĩgĩnĩk, ĩthõng ĩĩ ne, “Lõgõth, nyĩ ongolinu! Arũgĩ nẽ.” 11 Ma vurtia cĩ imiirõĩ Paulo ũũwĩ ciitha tiddina, ikiyyia ẽngẽr ahat cĩ avaadiay, ĩthõng kuduktowa kĩ ageeta. Ngaatĩ irioni kuumuc kõngõtha kõr tiddina, ĩthõng ũũwa. 12 Ma natẽ, ootti nẽẽgẽ ngĩthorowoc õlõõ rũgẽtẽt, ĩthõng balna ebelbelit nẽẽgẽ õrrõt.
Ĩthaa Paulo makayyiok cĩk Ẽvẽthathĩ
13 Kutuwuanteea balna nẽnnẽ naaga kovowola cobbi, ĩthõng õwõ balna Paulo thoonĩy karawothĩk kõrõõk cĩ gaalawu cĩ Athothĩ, ĩthõng koottia woccia kayakta ĩnõõnõ kovowola natẽ. 14 Ma balna ngĩ koottia kurumtowa kĩ ĩnõõnõ Athotha, ikiyyia õtõda nẽ kovowol, ĩthõng kedeccieha koottia õlõõ ĩcĩ gaalawu ĩcĩ Mitilene. 15 Ma ngerethietĩn cĩnnĩ, kivitiaha kõdõlanta ngĩtĩ õjõõn kĩ kõrõõk cĩ gaalawu cĩ Kiothĩ. Ma ngerethietĩn cĩnnĩ naboo, kivitiaha kõdõlanta kõrõõk cĩ gaalawu cĩ Thamothĩ. Ma vurtia cĩ kõr nĩcẽ, koottia kõdõlanta kõrõõk cĩ gaalawu cĩ Miletothi. 16 Ma natẽ, ikiyyia aavu Paulo natẽ, nyatarka athii balna nẽ cĩ ayahĩ itin cĩ õkõyyĩ õlõõ cĩ gaalawu cĩ Ẽvẽthathĩ, kõdẽ looca cĩ Athia kuumuc. Adiim balna nẽ ngĩ õkkõ taman, nyatarka adiim kõdõlan nẽ Yeruthalẽm nga kikiyyia Peyianĩ cĩ Wathinniok Eet ramma kõmmõtõ.
Ĩthayyik eeta cĩk obbitik cĩk lemnyiowu Paulo gõõla
17 Ma Miletotha, itionĩk Paulo nyemut eet cĩk obbitik cĩk kelethiawak cĩk Ẽvẽthathĩ kivitia kurumtõy kĩ ĩnõõnõ. 18 Ma balna ngĩ avvu õdõlan nẽẽgẽ natẽ, ethek Paulo ĩnõõgõ ne, “Agayyu niigia gõõl cĩ kaavẽ na balna ngĩ karũmẽ ĩcĩ owu, ẽtẽrẽhanĩ kõr wũ balna kakunie na looca ĩcĩ Athia. 19 Katicanothi na Makayyioit thimatĩtha cobbi kĩ tulalõy, kõdẽ woyyia ngĩ komogi tĩman cĩ adiim ngĩ aruwua Yudei. 20 Agayyu balna niigia buu athii na cĩ kaburi ngatĩ kalimanung agiitia thoothonniok cĩk ellung agiitia. Ĩthõng thĩ, balna kalimani na thuwi kĩĩ kũũk ciithẽnẽy ĩcĩk meelĩk. 21 Kaduwai balna na Yudei kĩ Girik kivitia ĩcĩ Nyekuco, ĩthõng ũtũngtek gerthetin cĩnĩng, kĩĩ kelemit Makayyioit cĩnac Yesu.
22 “Athii na cĩ kagga gii cĩ katĩ õkkõ adakca aneeta Yeruthalẽma, ĩthõng thĩ, katĩ koccia kathĩrari na Ririwac cĩ Dĩhĩmĩ, ĩthõng kũwa Yeruthalẽma. 23 Kagga na korookjiok cĩk gaalawu vẽlẽk, atĩrĩtha aneeta Ririwacĩ cĩ Dĩhĩmĩ athĩ ne, ẽrẽyya aneeta kĩjanĩ kĩ canan. 24 Ĩthõng thĩ, athii na cĩ karĩcananẽ rũgẽt cannĩ katĩ nẽnnẽ ngĩ kẽdẽcaha woccia na tiic wũ balna anya Makayyioiti Yesu wo. Ĩthõng tiici neccie, ẽẽn tiic cĩ kaduwanẽ na Nyemut cĩ Abũnna cĩ tiiri cĩ bũnnathĩt cĩ Nyekuco.
25 “Ĩthõng yoko, kagga na kõrgẽna cunung eeta wũk balna kirioni na kabicoca cĩ Nyekuco, ĩthĩnga katĩ acĩnnangũ niigia aneeta naboo. 26 Ĩthõng thĩna, kaduwacung na agiitia kõr coo ngatĩ kamĩrnẽ na biyyietĩy ĩcĩk eet vẽlẽk. 27 Nyatarka nga kũtũbũr na ngatĩ kalimanecung thõõth vẽlẽk cĩ Nyekuco. 28 Uthuutti eleeti cuguk, ĩthõng ũtũwayyu eet wũk balna anyung Ririwacĩ cĩ Dĩhĩmĩ agiitia ebeit. Ĩĩtõ niigia tũwayyiok cĩk eet cĩk kelethiawak cĩk Nyekucak, wũk balna ũũta nẽ biyyietĩy ĩcĩgĩnĩk mĩn. 29 Kagga na vurtia cĩnanĩ, avvu katĩ eeta gwuak ĩcunung cĩk ẽẽn volongnyiak cĩk aatĩ kĩ kudumuana cĩk gerthek cĩk avvu agĩĩra nyalõmar, kivitia nẽẽgẽ katĩ kẽgẽrẽthantung agiitia. 30 Avvu katĩ eeta gwuak cuguk mĩn, atalmanyan wobjiak cĩk Yesu, aduwaai wobjiak võlõng, kĩĩ katĩ kowobit ĩnõõgõ. 31 Lõgõth, ebeit eleeti jurrung! Ahaddia nõõnõ ngatĩ kirionicung na agiitia codoi codoi erkinya iyyio baalin kĩ waathĩn tulualõy.
32 “Ĩthõng yoko, karicung na agiitia Nyekuca kĩrĩcanawung, ĩthõng ellung woccia agiitia nyemut cĩnnẽ cĩ bũnnathĩto ĩtĩlĩthĩt lemintia cĩ Nyekuco, ĩthõng anyung agiitia kaal vẽlẽk cĩk ayak eeta cĩk Nyekucak. 33 Nga kabarritek na nyarobinya, kõdẽ ceremua cĩk et ĩmma kũdũt. 34 Agayyu niigia buu katicaninie balna na athĩn cĩganĩk mĩn, kĩĩ katĩ kũrũbaaĩ kaal cĩk kadiimi na kĩ cĩk adiim gõõnõga cĩganniek. 35 Kaalĩy vẽlẽk ĩcĩk kĩdĩmana balna na, keyelecung na agiitia tiicanẽ cĩk õkõmĩ cĩk õgõõn ketee, ĩrĩcanta thẽk ngatĩ eelu eet cĩk apĩrna, ahaddia thoothonniok wũk balna aduwa Makayyioiti Yesu athĩ ne, ‘Aku gatanĩ cobbi katĩ kaanyi naaga et ĩmma elinit kijiar ngatĩ anyĩwothĩcet ageeta.’ ”
36 Ma balna ngĩ ẽdẽcak Paulo thõõth coo wo, akat nẽ kuthungti, ĩthõng alayyiõy kĩ ĩnõõgõ vẽlẽk. 37 Alu balna nẽẽgẽ vẽlẽk baa ngĩ ĩthaawõy arabũũtõy kĩ Paulo kĩĩ kucuccuyyiõy kĩ ĩnõõnõ mĩnanintia. 38 Gii cĩ balna anyi ĩnõõgõ kutuluthõ õrrõt wo, thõõth cĩ aduwaai Paulo ĩnõõgõ ethei ne, athii katĩ cĩ acĩnĩ nẽẽgẽ ĩnõõnõ naboo. Ma natẽ, itionitõ ĩnõõnõ ĩĩthõng kũũk kõtõd kovowol cobbi.