Irion Paulo Ẽvẽthatha
19
Ma balna nga aavĩ Apolothĩ õlõõ ĩcĩ gaalawu ĩcĩ Korinto, ĩtĩnga Paulo õtõ nyetulubaha iithio looc cĩ ẽdẽẽm thiiryiok kõdõlan kõrõõk cĩ gaalawu cĩ Ẽvẽthathĩ. Ma natẽ, ũũk ijiowa nẽ wobjiak õõgĩ, 2 ĩthõng ijin ĩnõõgõ ethek ne, “Anyĩwothiwung balna Ririwacĩ cĩ Dĩhĩmĩ, kõrra wũ balna elemu niigia Yesu?”Ẽdẽcĩ nẽẽgẽ athĩ ne, “Athii tõ, nga balna kĩthĩraryia ngatĩ aavẽ Ririwacĩ cĩ Dĩhĩmĩ.”
3 Ngaatĩ ajini Paulo ĩnõõgõ ẽthẽcĩ ne, “Batithimo cĩ balna õgõõn kuu cĩ agamnyu niigia wo?”
Ẽdẽcĩ nẽẽgẽ athĩ ne, “Batithimo cĩ Yoanẽ.”
4 Ngaatĩ ẽthẽcĩ Paulo wobjiak nĩĩkẽ ne, “Ẽẽn balna batithimo cĩ Yoanẽ, batithimo cĩ aduwacĩ eeta thoothonniok cĩgĩk cĩk gerthek Nyekuc. Aduwaai balna Yoanẽ eet kelemit et cĩ nga aku vurtia cĩnnĩ, ĩnõõnõ thĩ Yesu.” 5 Ma balna ngĩ athĩrar nẽẽgẽ thõõth coo wo, agamit batithimo thaarĩy ĩcĩk Makayyioit Yesu. 6 Ma natẽ, atadĩk Paulo athĩn cĩgĩnĩk ootinẽy ĩcĩgĩk. Ngaatĩ akunĩcẽ Ririwacĩ cĩ Dĩhĩmĩ ĩnõõgõ, ĩthõng othoothitõ nẽẽgẽ thoothiowẽy ĩcĩk ẽẽn nyẽgẽlẽ kĩ ngatĩ aduwanĩ nẽẽgẽ thoothonniok cĩk Nyekucak. 7 Ẽẽn balna eeta cĩkkõ vẽlẽk õmmõtõ kĩ ramma.
8 Ĩthõng balna ẽhẽẽt Paulo Ciith cĩ Lawintio, ĩthõng õthõõth tiirion natẽ õrrõt nyĩĩlõwẽ iyyio, ĩlaleei eet kelemit kabicoc cĩ Nyekuco. 9 Ĩthõng thĩ, balna kẽnnẽ õkõmĩ ooti cĩk eet õõgĩ kõrgẽna cĩnĩng, ĩthõng ũtũbũrĩt ngatĩ ẽlẽmĩ gõõl cĩ Yesu. Uduktia nẽẽgẽ thoothonniok cĩk gerthek kẽbẽrẽnĩy ĩcĩk eetu, nyatarka Yesu. Ma natẽ, ũtũngek Paulo ĩnõõgõ. Ĩtĩngathõ nẽ kĩ wobjiak õõt ciitha cobbi õrrõt ĩcĩ limano, cĩ et cĩ athĩ Tiranath, ĩthõng ũũk gõõ õthõõth nẽ natẽ. 10 Alimanni balna Paulo natẽ erkinya ramma, kĩĩ katĩ kĩthĩraritõ Yudei kĩ Girik cĩk aatĩ looca cĩ Athia vẽlẽka thõõth cĩ Makayyioit Yesu.
Lõgõõ cĩk Thikeva
11 Aanyĩk balna Nyekuci Paulo tiirthẽt cĩ adĩmanĩ thoothonniok cĩk makatĩk cĩk anaat eeta, 12 kĩĩ katĩ kayaktothĩk eeta puutanya kĩ ceremua cĩk ticciak cĩk balna uwumit Paulo eet cĩk ĩmmõrĩ, kĩĩ katĩ kivitia kũbũnta, ĩthõng ũtũngtek ririwanĩna cĩk gerthek ĩnõõgõ.
13 Ma natẽ, õtõõthõ Yudei gwuak oyokonit looc ẽtẽrẽktaĩ ĩtĩmanit itingkacõ ririwanĩn cĩk gerthek Thaarĩy ĩcĩk Makayyioit Yesu. Ethei balna nẽẽgẽ ririwanĩn cĩk gerthek ne, “Thaarĩy ĩcĩk Makayyioit Yesu cĩ irioni Paulo eet thõõth cĩnnĩ wo, kethecung ne, ẽtẽẽkta niigia thẽk ngatĩvõrĩ.” 14 Atican balna lõgõõ cĩk ẽẽn tũrgẽrẽm cĩk et cĩ athĩ Thikeva cĩ ẽẽn paadĩr cobbi cĩ Yudei thõõth coo. 15 Ethek ririwacĩ cĩ gerthe ĩnõõgõ ne, “Kagga na Yesu, ĩthõng kagga Paulo buu, ĩthõng thĩ, eeginnu niigia õõ ngẽnẽ?” 16 Ngaatĩ õngõthõthĩcẽ eeti cĩ ayak ririwac cĩ gerthe wo ĩnõõgõ, ĩthõng atamaac ĩnõõgõ tiirthẽta cĩnnĩ. Ma natẽ, ibic nẽ ĩnõõgõ kivirit kilibtia ciitha kõõt ngatĩvõrĩ tdilanyany keterrit jiena.
17 Ma balna ngĩ athĩrar Yudei kĩ Girik vẽlẽk cĩk balna aatĩ Ẽvẽthatha thõõth coo wo, ivitia otongollie õrrõt kivitia kubuluthit thar cĩk Makayyioit Yesu. 18 Ngaatĩ thĩ balna avvunni eeta cĩk meelĩk cĩk ẽẽn lemnyiok ẽẽ, aduwanĩ gerthetin cĩnĩng cĩ balna atican nẽẽgẽ. 19 Angaryẽ balna gõõ lemnyiowa gwuak thõng, ivitia ayakta nyaragẽt cĩgĩk cĩk angaryini kutuththie, kĩĩ katĩ kivitia kĩcĩnĩt eeta vẽlẽk. Uutiay balna nyaragẽta cĩkkõ nyarobinyab cĩk ẽẽn vucciaknya eet ramma kõmmõtõ. 20 Ngaatĩ athanothĩcẽ nyemut cĩ Makayyioit Yesu eet cĩk meelĩk õrrõt, kikiyyia kĩĩ tiir õrrõt.
Jore Ẽvẽthatha
21 Ma vurtia cĩ thoothonniok cĩkkõ vẽlẽk, ahad Paulo ngatĩ woccia õkõyyĩ Yeruthalẽma, abaakci gõõla cĩ õkkõ looca cĩ Makedonia kĩ looca cĩ Akeyyia. Ngaatĩ athĩnnĩ nẽ ne, “Mĩ kõdõlana na Yeruthalẽm kaavu nõõnõ natẽ, ĩthõng thẽk katĩ kẽhẽrõna kõdõlan Rũma buu.” 22 Ma natẽ, ition nẽ elliok cĩgĩnĩk rammatuguan Timoti kĩ Erathtath kõõt Makedonia ngaanĩ balna aavĩ nẽ looca cĩ Athia kĩdĩĩc.
23 Maka balna hecinti õrrõt wathinniok nĩĩkẽ, nyatarka gõõl cĩ Makayyioit Yesu. 24 Aavĩ balna eeti ĩmma cĩ ẽẽn et cĩ nyekiteto cĩ athĩ thar Demetirioth cĩ atur thĩĩk cĩk athĩ kathalkathal. Atura balna nẽ ijjio thĩĩkta kĩĩ nyekuc cĩ ngayyi cĩ athĩ Artemith. Amũda balna eeta cĩk atura thĩĩk wo nyarobinya cĩk meelĩk õrrõt baa ngĩ atura nẽẽgẽ thĩĩk cĩk athĩ kathalkathal. 25 Ma natẽ, ũlũta Demetiriothĩ eet vẽlẽk cĩk atura ijjio kĩ balna gõõ ngĩ adĩman nẽ, ĩthõng ethek ne, “Lõgõth, agayyu niigia ngatĩ kamũdanĩ naaga nyarobinya tiica coo. 26 Ĩthõng yoko, ithiktu, ĩthõng icintu niigia gõõl cĩ anũmnũmmanĩ eeti coo athĩ Paulo wo eeta. Anũmnũmman nẽ eet cĩk meelĩk Ẽvẽthatha kuumuc kĩ looca cĩ Athia vẽlẽk. Athĩ Paulo ne, kaala cĩk ẽngẽnyca eeta kĩĩtõ nyekucnya, athii cĩ ẽẽn nyekucnya cĩk ẽẽn dĩdĩ kũdũt. 27 Aavĩ gerthetini, nyatarka ayak katĩ tiici cĩnac thar cĩk gerthek. Ithii katĩ eeti cĩ nga ongollie ciith cĩ nyekuc cĩnac cĩ ngayyi Artemith, kõdẽ ongollie nyekuc cĩ ngayyi ẽlẽ cĩnnĩ buu, cĩ yoko ala eeta cĩk Athia vẽlẽk kĩ looc tũrũr wo tõ. Erehei katĩ eet nyekuci cĩnac cobbi.”
28 Ma balna ngĩ athĩrar nẽẽgẽ thõõth coo wo, ivitia avaracitõ õrrõt, ĩthõng ẽtẽrẽktaĩ acalcallit ĩĩtõ ne, “Abulie Artemithi nyekuc cĩ ngayyi cĩ eet cĩk Ẽvẽthathĩ!” 29 Ma tamanoko, ivitia avaracitõ eeta õlõõ cĩ gaalawu tũrũr, ngaatĩ agurri nẽẽgẽ Gauth kĩ Arithtarkath, eet cĩk balna iriowa kĩ Paulo looca cĩ Makedonia. Ma natẽ, ũlũnganẽ meelitini ũũk ũũwĩ ĩnõõgõ ngatĩ gõõ arumone eeta õlõõ cĩ gaalawu amĩcĩ aduwa iyiaintiok. 30 Adiim balna Paulo ngĩ õkkõ kũũk kothoothiõy kĩ meelitin, ĩthõng thĩ, kẽnnẽ balna ĩcaac wobjiaha ĩnõõnõ ngatĩ õkõyyĩ. 31 Aatĩ balna makayyiowa gwuak cĩk looc ĩmma cĩk ẽẽn gõõnõgĩ Paulo, ĩthõng itionitõ et ĩmma kũũwĩ nyemut, kũũk kĩlalek nẽ Paulo kithii cĩ õkkõ.
32 Ĩthõng naboo balna atalmanyanẽ meelitini cĩ eetu vẽlẽk kaganoko. Ẽgẽrẽnyõnĩ balna gwuak thõõth codoi, ĩthõng ẽgẽrẽnycõõĩ gwuak gii cĩ ẽẽn nyẽgẽlẽ. Ĩthõng eeta cĩk meelĩk õrrõt, athii gwuak cĩ aga nyia thẽk balna da kõõt nẽẽgẽ natẽ ẽẽ. 33 Ma natẽ, iyiottik Yudei et ĩmma cĩ athĩ Alẽkthanda ĩcĩ owu ĩcĩ meelitin cĩ eetu, ĩthõng uduktiak ĩnõõnõ thõõth cĩ woccia aduwa nẽ. Ĩthõng thĩ, balna õtõmõõĩ nẽ athiit kitivantẽ eeta, kĩĩ katĩ woccia kothoothĩk nẽ ĩnõõgõ. 34 Ĩthõng thĩ, ma balna ngĩ acĩn meelitini ngatĩ ẽnnẽ nẽ Yudenit wo, acalcallit nẽẽgẽ vẽlẽk kõdõwẽ moloowĩ, itinnya ramma athĩ ne, “Abulie Artemithi nyekuc cĩ ngayyi cĩ eet cĩk Ẽvẽthathĩ!”
35 Ma natẽ, anyĩk teheddioiti cĩ kõrõõk cĩ gaalawu meelitin kaavutõ tiv loota, ĩthõng õthõõth ĩĩ ne, “Eeta cĩk Ẽvẽthathĩ, ngẽnẽ looca nĩĩco cĩ athii cĩ aga ngatĩ ẽẽn kõrõõgĩ cĩ gaalawu cĩnac, ẽẽn kilib cobbi cĩ ciith cĩ nyekuc Artemith cĩ ngayyi cĩ makĩ? Ngẽnẽ cĩ athii cĩ aga ngatĩ atdukuanĩ bĩĩ cĩ Artemithi tammuatiddina cĩ yoko aavĩ ngato wo? 36 Ĩthõng thĩna, yoko kĩcĩ ẽẽn thoothiowa cĩkkõ dĩdĩ wo, athii eeti cĩ ẽpẽkan tõ. Adiim thĩ kẽnnẽ woccia ẽlẽmaninu thõng, ĩthõng nyĩ adĩmannu kaal cĩk ẽẽn giithakthẽt. 37 Ayaktawu thĩ yoko eet cĩkkõ ngato kaganoko, kõdẽ woyyia nga balna kogorothit kaal ciithẽnẽy ĩcĩk nyekucnyawu, kõdẽ adaac nyekuc cĩnac cĩ ngayyi wo. 38 Mĩ abĩlnĩ Demetiriothĩ kĩ eet cĩk atura thĩĩk nyekiteta eet cĩkkõ, kayak naaga lokiko kĩ eet cĩk ẽngẽr thoothonniok. Anycĩk niigia ĩnõõgõ kõõt bĩlnẽta lokika. 39 Ĩthõng ma nga aavĩ thõõth ĩmma cĩ nga adiimnyu othooththu, adiim ngĩ ayahanu woccia katĩ kẽtẽdẽ lokika cĩ eetu. 40 Mĩ aavĩ kĩ yoko wo, abilniet katĩ ageeta eeta, nyatarka jore cĩ kĩkõthana naaga kõr coo wo. Athii thẽk katĩ cĩ kuungnothi naaga, nyatarka erekcet thõõth cĩ katĩ kaduwa, nyatarka jore coo kũdũt.” 41 Ma balna ngĩ ẽdẽcak nẽ ngatĩ aduwanĩ thõõth coo wo, uduwak nẽ meelitin kathaantẽ.