Irion Paulo thõõth cĩ Yesu Korintowa
18
Ma balna ngĩ ũtũngek Paulo kõrõõk cĩ gaalawu cĩ Athenĩ, ĩthõng ũũk õlõõ ĩcĩ gaalawu ĩcĩ Korinto, 2 ngaatĩ balna arumone kĩ et cĩ athĩ Akwila cĩ balna ẽẽn Yudenit cĩ looc cĩ Pontuthi. Nga balna avvu Akwila kĩ ngaa cĩnnĩ Pirithila looca cĩ Ĩtali thõng, nyatarka balna aduwaai Kilawudothĩ alaanĩ cobbi cĩ Rũma thõõth tiirion Yudei kũtũngtek thẽk nẽẽgẽ Rũma. Ma natẽ, ĩtĩnga Paulo ũũk ĩcĩn Akwila kĩ Pirithila, 3 nyatarka balna ẽẽn nẽ et cĩ ẽngẽnyca tuggueta, aticanni nẽ kĩ ĩnõõgõ ẽngẽnyca tugguet cĩk adĩmaniay ceremuanĩy. 4 Õkkõ balna gõõ Paulo Ciitha cĩ Lawintio, ĩthõng othoothiõy kĩ eet cĩk Yudei kĩ Girik, atĩman ngatĩ ĩlalẽcĩ ĩnõõgõ kĩĩtõ lemnyiok cĩk Yesu Kõrra ĩcĩ Yuwuthono vẽlẽk.5 Ma balna ngĩ avvu Thĩlathĩ kĩ Timoti looca cĩ Makedonia, ikiyyia Paulo irionĩk Yudei, ĩthõng eyelek thõõth wũ baa ẽnnẽ Yesu Kiristo. 6 Ma balna ngĩ ivitia ũtũbũrĩt Yudei Paulo, ĩthõng adaaccitõ ĩnõõnõ thõng, ikiyyia utuddung nẽ tuduwac ceremuanĩy ĩcĩgĩnĩk, ĩthõng ethek ĩnõõgõ ne, “Adakcung katĩ biyyieta cuguk agiitia! Athii katĩ cĩ kanganyie na. Ẽtẽrẽhanĩ yoko kõr coo, kũwa kirionĩha na eet cĩk athii cĩ ẽẽn Yudei.”
7 Ma natẽ, ũũk Paulo õlõõtõtõ cĩ et ĩmma cĩ athĩ Tiito Juthtuth cĩ athii cĩ ẽẽn Yudenit. Ala nẽ Nyekuc, ĩthõng balna õjõõn kõrõõgĩ cĩnnẽ kĩ Ciith cĩ Lawintio. 8 Ẽẽn balna eeti ĩmma cĩ athĩ Kirithpoth makayyioit cĩ Ciith cĩ Lawintio. Ma natẽ, ikiyyia ẽlẽm nẽ kĩ eet cĩk kõrõõk cĩnnĩ vẽlẽk Makayyioit Yesu. Ngaatĩ avvu athĩknĩ eeta cĩk meelĩk cĩk Korinto nyemut coo, ĩthõng elemit nẽẽgẽ Yesu, ĩthõng agamit batithimo.
9 Ma baalin ĩmma, ikiyyia uduwak Makayyioiti Paulo ngonothintia ethek ne, “Nyĩ ongollie niia, thõõth nẽnnẽ niia noko, nyĩ ĩjakcie, 10 nyatarka kaavẽ na ĩcunni, ĩthõng athii eeti cĩ uukci aniitia tõ, nyatarka kayai na eet cĩk meelĩk õlõõ cĩ gaalawu ĩcoo õrrõt.” 11 Ngaatĩ aavẽ Paulo natẽ erkit codoi kĩ nyĩĩlõwẽ tõrkõnõm, alimaneei eet thõõth cĩ Nyekuco.
12 Nga balna ẽẽn eeti cĩ athĩ Gallio gaalinit cobbi cĩ agam looc cĩ Akeyyia,a ĩtĩngathõ Yudei agamit Paulo, ĩthõng ootti ĩnõõnõ lokika, 13 ĩthõng ĩĩtõ ne, “Adiim eeti coo ngĩ ũũwũ eet cĩgaac kalaacõ Nyekuc gõõla cĩ abũrĩ Ngiranĩ cĩnang!”
14 Ma balna nga kõthõõth Paulo, ĩngathĩ kẽnnẽ Gallio, ĩthõng ethek Yudei ne, “Mĩ abilnuu niigia et coo thoothonniowẽy ĩcĩk abaca nẽ, kõdẽ thoothiowẽy gwantĩk ĩcĩk gerthek, ẽẽn woccia katĩ hadinit cannĩ cĩ kathiknung agiitia. 15 Ĩthõng thĩ, nyatarka ẽẽn jinẽntĩ coo cĩ thoothonniok kĩ thaaryiok kĩ ngiran cunung, agayyiek niigia mĩn. Kaburi na ngatĩ kẽtẽdẽ thoothonniok cĩk aatĩ ketee.” 16 Ngaatĩ ingkawecĩ Gallio ĩnõõgõ ngatĩvõrĩ lokika. 17 Ma natẽ, ĩtĩnga meelitini agamit et ĩmma cĩ athĩ Thõththẽnẽth, cĩ balna ẽẽn makayyioit cĩ Ciith cĩ Lawintio, ĩthõng uukitõ ngatĩ lokiko. Athii balna nẽnnẽ naboo cĩ alnai Gallio thõõth coo kũdũt.
Imiirie Paulo ũũk ĩcĩ Antioi Thiriatẽy
18 Aavĩ balna Paulo Korintowa wathinniok cĩk meelĩk. Ma natẽ, ũtũngek nẽ lemnyiok looc, ĩthõng ĩtĩnga ũũk õtõd kovowol ũũk looca cĩ Thiiria. Iriok balna Paulo kĩ Pirithila kĩ Akwila. Ma balna nga kõtõd nẽ kovowol, õdõõt nõõnõ nẽ õõ cĩnnĩ õlõõ ĩcĩ gaalawu ĩcĩ athĩ Thenceria, nyatarka kõngan cĩ balna õkõnganei nẽ Nyekuc. 19 Ivitia balna õdõlanit nẽẽgẽ kõrõõk cĩ gaalawu cĩ athĩ, Ẽvẽthath cĩ balna ũũngnĩcẽ Paulo Pirithila kĩ Akwila. Ma natẽ, ũũk nẽ Ciitha cĩ Lawintio, ĩthõng othoothiõy kĩ Yudei. 20 Ma balna ngĩ ajin nẽẽgẽ ĩnõõnõ kũrũmtẽ kĩ ĩnõõgõ kuumuc, abũrĩ balna kẽnnẽ nẽ. 21 Ĩthõng thĩ, ma balna ngĩ ĩtĩnga nẽ ũũk, uduwak ĩnõõgõ ethek ne, “Mĩ ẽlẽmahia Nyekuci, kõbõda katĩna.” Ngaatĩ õtõdĩ Paulo kovowol Ẽvẽthatha, ĩthõng ũũwa.
22 Ma balna ngĩ ikiyyia arawak Paulo kõrõõk cĩ gaalawu cĩ Cithariya, ũũk nõ nẽ ĩthaa lemnyiok cĩk kelethiawak, ĩthõng thĩ, edecek ũũk õlõõ ĩcĩ gaalawu ĩcĩ Antioi.b
23 Ma vurtia cĩ avvue natẽ kĩdĩĩc, ĩtĩnga eheronothĩk nẽ vatĩk cĩk loociok cĩk Galathia kĩ Virigia. Õkkõ balna ẽẽl nẽ wobjiak kuthutti leminit cĩnĩng jurrung.
Irion Apolothĩ Ẽvẽthatha
24 Õkkõ balna eeti ĩmma cĩ ẽẽn Yudenit cĩ athĩ Apolothc õlõõ ĩcĩ gaalawu ĩcĩ Ẽvẽthathĩ. Arittiay balna Apolothĩ õlõõ ĩcĩ gaalawu cobbi ĩcĩ Alẽkthanderia. Ẽẽn nẽ et cĩ ilimanẽ õrrõt, ĩthõng aga thõõth cĩ Nyaraga cĩ Nyekuco õrrõt. 25 Alimanothi balna ĩnõõnõ thõõth cĩ gõõl cĩ Makayyiokto, ĩthõng atalneei balna nẽ thõõth cĩ õthõõth nẽ õrrõt, ĩthõng illiman thõõth cĩ Yesu jurrung, kõdẽ woyyia ngĩ aga nẽ thõõth cĩ batithimo cĩ Yoanẽ dõ. 26 Õthõõth balna Apolothĩ Ciitha cĩ Lawintio tiirion. Ma balna ngĩ athĩrar Akwila kĩ Pirithila wo, ivitia ootti Apoloth õlõõ ĩcĩnĩng, ĩthõng ellia ĩnõõnõ kagga thõõth cĩ Nyekuco õrrõt.
27 Ngaatĩ adiim õkõyyĩ Apolothĩ looca cĩ Akeyyia. Ma natẽ, etheritõ ĩnõõnõ lemnyiowa gõõla cĩ õkõyyĩ, ĩthõng eteheeditõ nẽẽgẽ nyaraga cĩ aduwacĩ wobjiak kivitia kurumtõy kĩ ĩnõõnõ. Ma balna vurtia cĩ õdõlanĩ Apolothĩ Akeyyia, ikiyyia nẽ ẽẽl lemnyiok õrrõt cĩk balna ẽlẽmĩ Makayyioit Yesu, nyatarka bũnnathĩt cĩ Nyekuco. 28 Ẽpẽkantõy balna nẽ kĩ Yudei õrrõt meelitina ĩcĩ eetu, ĩthõng uduwa nẽ thoothonniok cĩk avvu Nyaragawa ĩcĩ Nyekuco kudukta dĩdĩ ngatĩ ẽnnẽ balna Yesu Kiristo.