Pĩrnanẽt Thẽthalonikawa
17
Ma balna ngĩ õõt itiothõ Paulo kĩ Thĩlath kõrõõk cĩ gaalawu cĩ athĩ Amvipolith kĩ cĩ athĩ Apolonia ẽẽ, õõt edecciek kuumuc kõdõlanit kõrõõk cĩ gaalawu cĩ Thẽthalonika ngatĩ balna aavẽ Ciith cĩ Lawintio cĩ Yudei. 2 Kĩ gõõ dõõkĩthĩ vowotha ĩcĩ Paulo, ũũk ittio nẽ Ciith cĩ Lawintio cĩ Yudei Kõrra ĩcĩ Yuwuthono ngõnana iyyio, ĩthõng othoothiõy kĩ eet, ĩthõng uduwak thoothonniok cĩk avvu Nyaragawa ĩcĩ Nyekuco. 3 Ẽkẽbak, ĩthõng eyelek eet pĩrnanẽt cĩ Kiristo kĩ ngatĩ ũrũgaĩ nẽ daaĩtha. Õthõõth balna Paulo athĩ ne, “Ẽẽn Yesu cĩ kaduwacung na agiitia wo, Kiristo.” 4 Ivitia balna Yudei gwuak ĩĩtõ lemnyiok, ĩthõng ũrũmtẽ kĩ Paulo kĩ Thĩlath, kĩ balna ngĩ ẽlẽmĩ eeta cĩk meelĩk cĩk Girihi cĩk ongollie Nyekuc kĩ ngaay õõgĩ cĩk meelĩk cĩk obbitik.5 Ma natẽ ĩlĩlẽcõ Yudei gwuak, ngaatĩ alũtanĩ eet cĩk gerthek ngatĩ tũwẽnto, ĩthõng ẽtẽrẽktaĩ nẽẽgẽ jore õlõõ cĩ gaalawu. Ma natẽ, utuduyiothĩk ciith cĩ et cĩ athĩ Jathõn kõõt kidiimta Paulo kĩ Thĩlath kayaktak ĩnõõgõ meelitin. 6 Ĩthõng thĩ, ma balna ngĩ athii cĩ amũda nẽẽgẽ ĩnõõgõ wo, utuguryia Jathõn kĩ lemnyiok õõgĩ cĩk Makayyioktak. Agurrei balna nẽẽgẽ ĩnõõgõ makayyiok cĩk kõrõõk cĩ gaalawu, ĩthõng acalcallit ĩĩtõ ne, “Ivitia eeta wũk gõõ amaara thoothonniok cĩk gerthek looca ĩcoo vẽlẽk wo ngato, 7 ĩthõng ikiyyia arĩk Jathõnĩ ĩnõõgõ õlõõ cĩnnĩ. Ẽgẽrẽthan nẽẽgẽ vẽlẽk ngiran cĩ alaan cobbi cĩ Rũmaa ngatĩ athĩnnĩ ne, aavĩ eeti ĩmma cĩ ẽẽn alaan cĩ athĩ Yesu.” 8 Ngaatĩ avvu avaracĩ makayyiowa kĩ eet õrrõt balna ngĩ ivitia ĩthĩraritõ nẽẽgẽ thõõth coo. 9 Ma natẽ, ĩtĩngantek nẽẽgẽ Jathõn kĩ gõtõõnõk õõgĩ kũdũmanit nyarobinya, kĩĩ kũtũngtek ĩnõõgõ kõõt.
Elemit eeta cĩk kõrõõk cĩ gaalawu cĩ Berea Nyemut cĩ Abũnna
10 Ma balna baalin nĩcẽ noko, itionitõ lemnyiowa Paulo kĩ Thĩlath kõõt ĩcĩ kõrõõk cĩ gaalawu cĩ athĩ Berea. Ma balna ngĩ õdõlanit natẽ, õõt itiothõ Ciith cĩ Lawintio cĩ Yudei. 11 Athĩknẽ balna eeta cĩk Berea õrrõt kijiaritõ eet cĩk Thẽthalonika, ĩthõng balna elemit nẽẽgẽ nyemut õrrõt. Wathinniowẽy vẽlẽk, ẽbẽl nẽẽgẽ Nyaraga cĩ Nyekuco, kĩĩ katĩ kumuddia ngĩ ẽẽn thoothiowa cĩk aduwa Paulo wo dĩdĩ. 12 Ivitia balna elemit Yudei cĩk meelĩk kĩ balna thẽk ngĩ ẽlẽmĩ eeta cĩk Girihi cĩk obbitik ngaanẽy noko kĩ eet cĩk maacĩk Makayyioit Yesu.
13 Ma balna ngĩ ĩthĩraritõ Yudei cĩk Thẽthalonika ngatĩ aduwacĩ Paulo eet thõõth cĩ Nyekuco ĩcĩ Berea, õõt nẽẽgẽ buu ĩcĩ Berea kõõt kalabtek meelitin cĩ eetu kaaburyiek Paulo. 14 Ma tamanoko, itionitõ lemnyiowa Paulo kũũk titimma cĩ bũlũco, ĩthõng thĩ, aavutõ Thĩlathĩ kĩ Timoti dõ Berea. 15 Ĩthõng eeta cĩk balna iriok kĩ Paulo, ayait ĩnõõnõ kuumuc kõdõlanit kõrõõk cĩ gaalawu cobbi cĩ athĩ Athen, ĩthõng imiiryie õõt uduktiak tĩrĩthẽnĩt cĩ Paulo Thĩlath kĩ Timoti kivitia kumuddiak ĩnõõnõ tamanoko.
Irion Paulo Athena
16 Ma balna nganĩ ẽrẽ Paulo ĩnõõgõ õlõõ ĩcĩ gaalawu ĩcĩ Athenĩ, avaracĩth balna nẽ, nyatarka acĩn kaal cĩk aar eeta kĩĩtõ nyekucnya abbĩththĩ Athen. 17 Ngaatĩ õkõyyĩ Paulo Ciitha cĩ Lawintio kõõt kothoothiõy kĩ Yudei kĩ Girik cĩk ongollie Nyekuc, õthõõthõy kĩ eet vẽlẽk cĩk amũdothi nẽ aatĩ ngatĩ tũwẽnto buu wathinniok vẽlẽk. 18 Ẽẽn balna eeta cĩkkõ gwuak limanniok cĩk Epikerianĩ,b ĩthõng ĩĩtõ gwuak cĩk Ithtoik,c ngaatĩ ẽtẽrẽhanĩ ẽpẽkanõnĩ kĩ ĩnõõnõ. Õthõõth balna gwuak athĩ ne, “Nyia yoko thẽk cĩ adiim eeti coo aduwacet ageeta wo?” Ĩthõng ĩĩtõ gwuak ne, “Õthõõth nẽ nyekucnya cĩk kĩrẽẽng!” Aduwa balna nẽẽgẽ thoothonniok cĩkkõ, nyatarka balna irion Paulo thõõth cĩ Nyemut cĩ Abũnna cĩ Yesu kĩ thõõth cĩ arũknanĩ nẽ daaĩtha. 19 Ngaatĩ õvõyyĩ nẽẽgẽ Paulo ĩcĩ eet cĩk lokiko cĩ athĩ Areopagath, ĩthõng ĩĩtõ ne, “Duwaet da athĩ limanĩ cunnie cĩ jõr wo ne? 20 Kĩthĩraryia ngatĩ õthõõthẽ niia kaal cĩk ngaanĩ kĩcĩnta kũdũt, ĩthõng yoko kadiimnya kathĩkna athĩ thoothiowa cĩkkõ ne.” 21 Eeta vẽlẽk cĩk Athenĩ kĩ cĩk kĩrẽẽng vẽlẽk cĩk aatĩ kaganoko, idiimitõ ngatĩ athĩknẽnĩ, ĩthõng othoothitõ thoothonniok cĩk jõr.
22 Ngaatĩ ĩngannĩ Paulo kĩbĩl nguuma cĩ eet cĩk lokiko cĩ Areopagathĩ, ĩthõng õthõõth ĩĩ ne, “Eeta cĩk Athenĩ, kĩcĩna na ngatĩ eeginnu niigia eet cĩk amĩnannu thoothonniok cĩk nyekucnyawu. 23 Ma kõwõyyẽ na kõrõõk cĩ gaalawu cunung, ĩthõng kĩcĩna kaal cĩk alayyu niigia, kamũda kẽnnẽ ngĩtĩ todongintio cĩ eheedothi thoothonniowa cĩk athĩ ne, ‘Kĩ Nyekuc cĩ athii cĩ agayyi.’ Alayyu niigia nyekuc coo, ĩthõng thĩ, kẽnnẽ athii cĩ agayyu ĩnõõnõ. Ĩthõng kadiimi yoko kaduwacung na agiitia thõõth cĩnnĩ.
24 “Ẽngẽnyca balna Nyekuci coo looc kĩ kaal vẽlẽk cĩk aatẽ looc. Ẽẽn nẽ Makayyioit cĩ tammutiddino kĩ cĩ loocu, ĩthõng athii cĩ aavĩ ciithẽnẽy ĩcĩk ẽngẽnyca eeta. 25 Athii Nyekuci cĩ adiim elinit cĩ et ĩmma. Anyĩk nẽ eet vẽlẽk rũgẽt, kĩ tivongi, kĩ kaal õõgĩ vẽlẽk buu. 26 Ẽngẽnyca balna Nyekuci loociok vẽlẽk eta ĩcĩ odoi. Ĩthõng yoko abaak nẽẽgẽ looca ĩcoo vẽlẽk, ĩthõng uduwa nẽ itinnya kĩ vatĩk cĩk abaaĩ eeta. 27 Atican balna Nyekuci thoothonniok cĩkkõ vẽlẽk, kĩĩ katĩ kidiimitõ woccia eeta ĩnõõnõ, ĩthõng umuddia ĩnõõnõ. Athii nẽ cĩ rẽẽn ĩcĩnac codoi codoi. 28 Ĩthõng anyet nẽ ageeta tiirthẽt cĩ karũgnĩ, kĩ cĩ kõwõyyĩ, kĩ cĩ keeginnie eet wo. Kaavu kĩcĩ aduwa teheddiowa cuguk, athĩ ne, ‘Keegin naaga dõõlĩ cĩgĩnĩk.’
29 “Ĩthõng thĩna, kĩcĩ yoko keegin naaga dõõlĩ cĩk Nyekucak wo, athii woccia cĩ keyehetheei naaga ĩnõõnõ nyekucnya cĩk ẽngẽnyca eeta daaba, kõdẽ thiihita cĩ athĩ kathalkathal, kõdẽ bĩĩya. 30 Baa lõõla, ũtũngek balna Nyekuci giithakthẽt cĩ alawĩ eeta nyekucnya cĩk athii cĩ ẽẽn dĩdĩ, nyatarka balna athii cĩ aga eeta thoothonniok cĩk balna atican nẽẽgẽ. Ĩthõng thĩ, yoko aduwaai Nyekuci eet cĩk loociok vẽlẽk kũtũngtek gerthetin cĩnĩng. 31 Arĩk nẽ kõr cĩ katĩ ẽtẽdĩcẽ nẽ eet cĩk loocak thoothonniok cĩgĩk gõõla cĩ edeemothi eta ĩcĩ balna ẽbẽra nẽ. Eyelek nẽ eet vẽlẽk thõõth cĩnnĩ cĩ ẽẽn dĩdĩ, gõõla ĩcĩ arũknanĩ nẽ et coo daaĩtha.”
32 Ma balna ngĩ athĩrar eeta thõõth cĩ arũknanĩ eeti daaĩtha wo, ẽtẽrẽktaĩ gwuak atararit nĩĩco noko. Athĩ balna gwuak ne, “Kadiimnya katĩ kavvunna kathĩkna thõõth coo ĩcunni naboo kõr ĩmma.” 33 Ma vurtia cĩ ẽdẽcaaĩ Paulo rion, ikiyyia ĩtĩnga ũtũngek meelitin cĩ eetu. 34 Ivitia balna eeta cĩk kĩdĩk irioit kĩ Paulo, ĩthõng elemit Makayyioit Yesu. Kõrgẽna cĩnĩng, aavĩ balna eeti ĩmma cĩ athĩ Donithioth, ẽẽn balna nẽ et cĩ lokiko cĩ Areopagathĩ. Ĩthõng balna aavĩ ngaa ĩmma buu cĩ athĩ Damarith kĩ eet õõgĩ buu cĩk balna avvu ẽlẽmĩ Yesu.