Rion cĩ makayyiok cĩk Kelethiawak Yeruthalẽma
15
Avvu balna eeta gwuak aluciay ĩcĩ looc cĩ Yudea, õvvõ ĩcĩ kõrõõk cĩ gaalawu cĩ Antioi kõõt kẽtẽrẽktaĩ kilimanit lemnyiok kentek ne, “Athii woccia cĩ ellianu niigia katĩ ngĩ ngaanĩ kũbũũrantẽ eleeti cuguk,a kĩcĩ aduwa Ngiranĩ cĩ Mutha.” 2 Ĩthõng balna aanyĩk thõõth coo Paulo kĩ Barnabath kẽpẽkantõy kĩ ĩnõõgõ õrrõt, nyatarka liman coo. Ma natẽ, ivitia eberyiay Paulo kĩ Barnabath kĩ eet õõgĩ cĩk kĩdĩk cĩk ẽẽn lemnyiok, ĩthõng itiontẽ kõõt Yeruthalẽma kothoothitõ thõõth coo kĩ tionniak kĩ eet cĩk ẽẽn makayyiok cĩk kelethiawak. 3 Ngaatĩ itionĩcẽ lemnyiowa cĩk kelethiawak cĩk Antioi ĩnõõgõ gõõl kõõt. Ma balna ngĩ õdõlanit nẽẽgẽ looc cĩ Vonithia kĩ looc cĩ Thamaria, õõt nẽẽgẽ ẽkẽbtak lemnyiok gõõl cĩ balna ẽlẽmĩ eeta cĩk athii cĩ ẽẽn Yudei Yesu. Aanyĩk balna nyemut coo lemnyiok kebelbelit õrrõt. 4 Ma balna ngĩ õdõlanit Paulo kĩ Barnabath Yeruthalẽm wo, ivitia ĩthaacõ eeta cĩk kelethiawak kĩ tionniak kĩ eet cĩk obbitik ĩnõõgõ. Ma natẽ, uduktiak Paulo kĩ Barnabath eet thõõth vẽlẽk cĩ ẽẽlĩ Nyekuci ĩnõõgõ kĩdĩmanit.5 Ĩthõng thĩ, balna ẽẽn lemnyiowa gwuak cĩk Yesu Varithei. Ma natẽ, ĩtĩngathõ, ĩthõng ĩĩtõ ne, “Eeta cĩk athii cĩ ẽẽn Yudei cĩk ẽlẽmĩ Yesu, anycĩk ĩnõõgõ kũbũũrantẽ eleeti cĩgĩk, kĩĩ kotongollie Ngiran cĩ Mutha.”
6 Urumtõy balna nẽnnẽ tionniaha kĩ eet cĩk obbitik, ĩthõng othoothitõ thõõth cĩ eet cĩk athii cĩ ẽẽn Yudei wo. 7 Ma balna ngĩ othoothiõy nẽẽgẽ dõ kuumuc, ikiyyia ĩtĩnga Pẽtũrũ, ĩthõng õthõõth ĩĩ ne, “Gõtõõnõga, agayyu niigia ũnũũk ngatĩ ẽbẽrania aneeta Nyekuci kõrgẽna cunung, kirionĩk na eet cĩk athii cĩ ẽẽn Yudei Nyemut cĩ Abũnna cĩ Yesu,b kĩĩ katĩ kĩthĩktõy woccia nẽẽgẽ, ĩthõng elemit ĩnõõnõ. 8 Aga Nyekuci thinneti cĩgĩk, ĩthõng ẽlẽm eet cĩk athii cĩ ẽẽn Yudei, ngatĩ anyĩcẽ ĩnõõgõ Ririwac cĩ Dĩhĩmĩ kĩ balna ngĩ anyet ageeta buu. 9 Athii Nyekuci cĩ engeryet ageeta kĩ ĩnõõgõ, anyi nẽ thinneti cĩgĩk kĩĩ callẽ lemintia cĩnĩng. 10 Atĩmannu woccia yoko niigia Nyekuc ngatĩ anyiccu wobjiak tiic cĩ adĩngdĩngĩ cĩ woccia athii cĩ kũũlĩ naaga ngatĩ kadĩmanna, kõdẽ õõ baajigi baajigiet cĩgaac buu nyia? 11 Athii tõ! Kẽlẽmĩ naaga ngatĩ keelianẽ bũnnathĩta ĩcĩ Makayyioit cĩnac Yesu, kĩ yoko eeta cĩk athii cĩ ẽẽn Yudei ẽẽ.”
12 Ma natẽ, itivantẽ eeta vẽlẽk kĩthĩraritõ thõõth cĩ aduwa Barnabathĩ kĩ Paulo. Aduwaai balna nẽẽgẽ eet gõõl cĩ balna anyĩcẽ Nyekuci ĩnõõgõ tiirthẽt cĩ adĩmanĩ thoothonniok cĩk eyeliay kĩ kaal cĩk anaat eeta cĩk athii cĩ ẽẽn Yudei. 13 Ma balna ngĩ edecciak nẽẽgẽ ngatĩ õthõõthĩ wo, ĩtĩnga Jemithi,c õthõõth ĩĩ ne, “Gõtõõnõga, ĩthĩktangũ aneeta. 14 Iyiahecet balna Thimõnẽ Pẽtũrũ gõõl cĩ balna akuni Nyekuci ĩcĩ owu kĩ eet cĩk athii cĩ ẽẽn Yudei, ĩthõng aanyĩk nẽ ĩnõõgõ kĩĩtõ eet cĩgĩnĩk. 15 Aduwõy thoothiowa cĩk eet cĩk õthõõth molook cĩ Nyekuco kĩ thõõth wũ baa eheeddi athĩ ne,
16 “ ‘Ma katĩ vurtia, kõbõda katĩ na Makayyioiti
kikiyyia kẽtẽngẽny ciith cĩ Davide naboo,
wũ balna ẽgẽrẽthanẽ.
Kengenyeti katĩ na ciith cĩ Davide cĩ õyõwẽd ẽẽ,
ĩthõng kõdõnga katĩ na ĩnõõnõ kĩbĩl naboo,
17 kĩĩ katĩ eeta gwuak cĩk loociowu
kivitia woccia kẽrẽppanta aneeta Makayyioit,
kĩ eet vẽlẽk cĩk loocak cĩk ẽlẽmĩ thar cĩganĩk,
Aneeta Makayyioit cĩ kaduwa kaal cĩkkõ,
ĩthõng kĩdĩmana ĩnõõgõ,’e
18 cĩ balna kaanyi kaal cĩkkõ
kagayyie baa lõõla vẽlẽk.
19 “Gõtõõnõga, kamui woccia athii cĩ kahiic eet cĩk athii cĩ ẽẽn Yudei cĩk yoko elemit Nyekuc wo. 20 Ĩthõng thĩ, kẽnnẽ keheedi woccia nõ ĩnõõgõ nyaraga cĩ kaduwacĩ naaga ĩnõõgõ kũtũngtek aheenin wũk balna anyĩwothi nyekucnya, ĩthõng woccia kaduwai ĩnõõgõ kũtũngtek kĩnyak cĩk oginnie eeta kĩ ngaay taktak, kĩ dainit cĩ adaĩ eeta kidi cĩk kẽlẽgẽ cĩk acude, ĩthõng athii cĩ awũdĩ nẽẽgẽ biyyie. 21 Irionni balna gõõ Ngiranĩ cĩ Mutha korookjiowẽy ĩcĩk gaalawu vẽlẽk baa lõõla itinnyiay ĩcĩk rẽẽntĩk, ĩthõng ẽbẽlẽ Ciithẽnẽy ĩcĩk Lawintiak vẽlẽk Kõrra ĩcĩ Yuwuthono.”
Nyaraga cĩ lemnyiok cĩk athii cĩ ẽẽn Yudei
22 Ma natẽ, ummuit tionniaha kĩ eet cĩk obbitik kĩ eet cĩk kelethiawak tũrũr keberyia eet õõgĩ cĩgĩk, ĩthõng itionitõ ĩnõõgõ kõõt Antiowa, kiirioit kĩ Paulo kĩ Barnabath. Ngaatĩ ẽbẽranĩ nẽẽgẽ Yudath cĩ athĩ thar õõgĩ Barthabathf kĩ Thĩlath. Ẽẽn balna nẽẽgẽ ramma makayyiõĩ kõrgẽna cĩ lemnyiowu.
23 Ẽhẽẽd balna nẽẽgẽ nyaraga cĩ athĩ ne, “Kẽhẽdaccung naaga gotoonogu cĩk ẽẽn tionniak kĩ eet cĩk obbitik agiitia lemnyiok cĩk athii cĩ eeginnu Yudei cĩk attiyyu Antiowa kĩ loociowẽy cĩk Thiiria kĩ Cilithia nyaraga.
24 “Kĩthĩraryia balna naaga ngato athĩ ne, avvu balna eeta gwuak eetĩnẽy cĩgaak, kivitia kuduktiawung agiitia thõõth cĩ omothung agiitia. Ĩthõng thĩ, balna athii cĩ kitionana naaga ĩnõõgõ. 25 Ngaatĩ yoko karumonia ngatĩ odoi, ĩthõng kẽlẽmta ngatĩ kẽbẽrania eet õõgĩ, ĩthõng kitiontawung agiitia kiiriokta kĩ Barnabath kĩ Paulo cĩk kamĩnanna naaga, 26 ẽẽn nẽẽgẽ eet cĩk atduk rũgẽt cĩnĩng, nyatarka thar cĩk Makayyioit cĩnac Yesu Kiristo. 27 Kitionana naaga Yudath kĩ Thĩlath buu. Eet cĩk katĩ avvu aduwaccung thõõth cĩ aduwõy kĩ cĩ kẽhẽdaccung naaga nyaragawa wo thõng.
28 “Eyelehet ageeta Ririwacĩ cĩ Dĩhĩmĩ kithii woccia cĩ keheccung agiitia kaalĩy gwantĩk ĩcĩk ijiar thoothonniok cĩk tĩrĩthẽntiok cĩkkõ. 29 Ĩthõng thĩ, nyĩ adakcu gimma cĩ otodongnyi cĩ anyĩwothi nyekucnya cĩk athii cĩ ẽẽn dĩdĩ. Nyĩ awuddu biyyie, kõdẽ nyĩ adakcu kelegit cĩ acude thõng. Nyĩ oginnu kĩ ngaay taktak. Mĩ owobtu tĩrĩthẽntiok cĩkkõ, adĩmannu katĩ thoothonniok cĩk abũnna. Gõtõõnõga, abũnna nõõnõ a.”
30 Ma natẽ, ĩtĩngathõ balna eeta cĩkkõ ẽẽn wec wo ũtũngtek Yeruthalẽm, ĩthõng uluccie õõt Antiowa. Ngaatĩ avaanĩ lemnyiok vẽlẽk ngatĩ odoi, ĩthõng aanycĩk ĩnõõgõ nyaraga. 31 Ma balna ngĩ ẽbẽl nẽẽgẽ nyaraga wo, ivitia ebelbelit õrrõt kũdũt ngatĩ athĩknĩ nyemut cĩnnĩ cĩ dĩhĩthẽntõ. 32 Ẽẽn balna Yudathĩ kĩ Thĩlath eet cĩk õthõõth molook cĩ Nyekuco, ĩthõng othoothitõ thoothonniok cĩk meelĩk cĩk ẽẽl lemnyiok kokomit thinneti cĩgĩk. 33 Ma vurtia cĩ aavutti nẽẽgẽ natẽ kĩdĩĩc ẽẽ, ivitia itiontĩk lemnyiowa ĩnõõgõ gatan cĩ ganono kimiiryie kõõt ĩcĩ eet wũk balna itiona ĩnõõgõ. 34 Ĩthõng thĩ, ikiyyia aavu Thĩlathĩ natẽ. 35 Ĩthõng, balna aavutõ Paulo kĩ Barnabath Antiowa. Aliman nẽẽgẽ kĩ gõtõõnõgĩ õõgĩ cĩk meelĩk eet, ĩthõng iriontĩk ĩnõõgõ, Nyemut cĩ Abũnna cĩ Makayyiokto.
Engeryiõy Paulo kĩ Barnabath
36 Ma vurtia cĩ wathinniok õõgĩ cĩk kĩdĩk, ethek Paulo Barnabath ne, “Kimiiryi thẽk da nõõnõ kõõt kĩcĩnĩt lemnyiok korookjiowẽy ĩcĩk gaalawu vẽlẽk, wũk balna kirionĩcẽ eet thõõth cĩ Makayyioit Yesu. Kõõt da kĩcĩnĩt õgõõn leminti cĩnĩng kuu.” 37 Adiim balna Barnabathĩ ngĩ õkõyyĩ Yoanẽ Marĩkõ kiirioit kĩ ĩnõõgõ. 38 Ĩthõng thĩ, kẽnnẽ balna abũrĩ Paulo, nyatarka balna õkkõ uungni Marĩkõ ĩnõõgõ Pamvilia, ĩthõng athii cĩ aticanni kĩ ĩnõõgõ. 39 Ngaatĩ ẽpẽkanõnĩ nẽẽgẽ kuumuc, ĩthõng engeryiõy. Ũũwĩ balna Barnabathĩ Marĩkõ, ĩthõng otodit kovowol õõt Thiporotha. 40 Ẽbẽra balna Paulo Thĩlath, ĩthõng ũũk nẽ, ĩthõng alayyiõy lemnyiowa, kĩĩ kaanyĩk Makayyioiti ĩnõõgõ bũnnathĩt cĩnnĩ. 41 Ngaatĩ ĩngannĩ õvõyyĩ iithiowĩ looc cĩ Thiiria kĩ cĩ Cilithia, kõõt kaanycĩk tiirthẽt cĩ leminto lemnyiok cĩk kelethianyawu.