Irionitõ Paulo kĩ Barnabath Ikonioma
14
Ma õlõõ ĩcĩ gaalawu ĩcĩ Ikoniomi, ivitia õõt Paulo kĩ Barnabath Ciithẽnẽy ĩcĩk Lawintiak ĩcĩk Yudei, kĩ gõõ ma ngĩ õvvõ. Ma natẽ, õõt iriontĩk nẽẽgẽ eet jurrung, ngaatĩ avvu ẽlẽmĩ Yudei cĩk meelĩk kĩ eet cĩk athii cĩ ẽẽn Yudei thõõth cĩ Yesu Kiristo. 2 Ĩthõng thĩ, Yudei cĩk balna abũrĩ Yesu, ivitia alabtẽk eet õõgĩ cĩk athii cĩ ẽẽn Yudei kaaburyiek lemnyiok cĩk athii cĩ ẽẽn Yudei. 3 Ĩthõng thĩ, balna aatĩ Paulo kĩ Barnabath natẽ kuumuc, aliman nyemut cĩ Makayyiokto tiirion. Ĩthõng balna ẽyẽla Makayyioiti nyemut cĩ bũnnathĩt cĩnnĩ wo kĩĩ dĩdĩ, ngatĩ ẽẽlĩ ĩnõõgõ kĩdĩmanit kaal cĩk eyeliay kĩ kaal cĩk anatti. 4 Ĩthõng thĩ, engeryie balna kẽnnẽ eeta õlõõ cĩ gaalawu thõng. Ẽlẽmĩ balna gwuak thõõth cĩ Yudei, ĩthõng elemit gwuak thõõth cĩ tionniawu. 5 Ma natẽ, ẽtẽrẽktaĩ eeta gwuak cĩk athii cĩ ẽẽn Yudei kĩ eet cĩk ẽẽn Yudei kĩ makayyiok cĩgĩk, othoothitõ thõõth cĩ adĩmanĩ Paulo kĩ Barnabath buth kĩ ngatĩ õvõcĩ ĩnõõgõ bĩĩyẽnĩy kadaaitõ. 6 Ma balna ngĩ umuddia tionniaha thõõth coo, ivitia ivirit õõt korookjiowẽy ĩcĩk gaalawu ĩcĩk Lithtra kĩ Derbe cĩ looc cĩ Likaonia, ĩthõng aatĩ naboo nẽẽgẽ looca ĩcĩ õjõõn natẽ, 7 ngaatĩ balna irionĩcẽ nẽẽgẽ eet Nyemut cĩ Abũnna natẽ.Aavutõ Paulo kĩ Barnabath Lithtra kĩ Derbe
8 Aavĩ balna eeti ĩmma cĩ alalaniay thoona Lithtra, ngõõl balna eeti neccie balna thẽk baa nga arittiay, ĩthõng nga kõtõõ kũdũt. 9 Athĩrar balna eeti coo rion cĩ Paulo. Ma balna ngĩ akannĩ Paulo ĩnõõnõ kẽbẽrẽ wo, acĩn kẽnnẽ ayak eeti neccie leminit ĩcĩ Yesu cĩ woccia anyi ĩnõõnõ kũbũna. 10 Ma natẽ, uduwak Paulo ĩnõõnõ moloowa cobbi ethek ne, “Tĩnga bĩlũ!” Ma tamanoko, õngõth eeti cĩ alalaniay thoona ẽẽ, nĩĩco noko kĩbĩl, ĩthõng ẽtẽrẽhaĩ õtõõwa.
11 Ma balna ngĩ acĩn meelitini thõõth cĩ adĩman Paulo wo, acalcallit Likaonayyiey ĩĩtõ ne, “Utuwuyyie nyekucnya kutuguthõ kĩ eeta, ĩthõng ivitia ĩcĩnac loota!” 12 Ma natẽ, akattiek nẽẽgẽ Barnabath thar cĩk athĩ ne, Theoth, ĩthõng akattiek Paulo thar cĩk athĩ ne, Hermeth,a nyatarka balna ẽẽn Paulo baatĩ thootho. 13 Õjõõn balna ciith cĩ nyekuc Theoth wo, kĩ kõrõõk cĩ gaalawu. Ma natẽ, idiim paadĩrĩ cĩ Theothi kĩ meelitin cĩ eetu, ĩdĩmantek Barnabath kĩ Thaulo kaal cĩk cavawu. Ngaatĩ angĩdanĩ paadĩrĩ tõmõnya õõgĩ ayaha vurẽẽn cĩk aduwõy kĩ pĩĩrẽn araantiok cĩk obbitik cĩk kõrõõk cĩ gaalawu.
14 Ĩthõng thĩ, ma balna ngĩ athĩrar Barnabathĩ kĩ Paulo cĩk ẽẽn tionniak thõõth coo wo, ivitia avaracitõ nẽẽgẽ õrrõt kuumuc kerecitõ ceremua cĩgĩk, ĩthõng ivirit õõt eetĩnẽy kõrgẽna, ĩthõng egerenyit ĩĩtõ ne, 15 “Lõgõth, nyia cĩ adĩmannu niigia ketee wo? Keeginna naaga eet kaganoko kĩ niigia. Kirioniccung naaga agiitia Nyemut cĩ Abũnna, ketheccung ne, ũtũngtek niigia thoothonniok cĩkkõ cĩk gerthek koo, elemit Nyekuc cĩ arũgĩ, cĩ ẽngẽnyca tammutiddin, kĩ looc, kĩ bũlũc, kĩ kaal vẽlẽk cĩk aatĩ ĩcĩnĩng. 16 Aanyĩk baa lõõla Nyekuci loociok vẽlẽk kaavutõ goolliowẽy ĩcĩgĩk mĩn. 17 Ĩthõng thĩ, ẽyẽla Nyekuci ẽla cĩnnĩ, ngatĩ adĩmanĩ kaal cĩk abũnna. Itiona nẽ tammu tammuatiddina, ĩthõng aanyĩk manẽẽn cuguk kukullia. Anyung nẽ agiitia dainit, ĩthõng aanyĩk thinneti cuguk kebelbelit.” 18 Kõdẽ woyyia balna ngĩ õthõõth tionniaha ketee noko, alna adiim eeta ngĩ apaei ĩnõõgõ kaal cĩk cavawu.
19 Ma natẽ, ivitia makayyiowa gwuak cĩk Yudei Antiowa kĩ Ikonioma kivitia kũnũmnũmanit meelitin cĩ eetu. Ovoccit nẽẽgẽ Paulo bĩĩyẽnĩy, ĩthõng utuguryiek ĩnõõnõ õlõõ cĩ gaalawu ngatĩvõrĩ, muwẽẽnta cĩ athĩnnĩ ne, adaak yoko vẽlẽk. 20 Ma balna ngĩ ivitia uluttiothĩk wobjiaha Paulo, ikiyyia ĩtĩnga nẽ imiirie ũũk õlõõ ĩcĩ gaalawu. Ma ngerethietĩn cĩnnĩ, irioit Paulo kĩ Barnabath õõt ĩcĩ Derbe.
Imiiryie Paulo kĩ Barnabath õõt Antiowa Thiriatẽy
21 Iriontĩk balna Paulo kĩ Barnabath eet Nyemut cĩ Abũnna õlõõ cĩ gaalawu ĩcĩ Derbe, ĩthõng elemit eeta cĩk meelĩk ĩĩtõ wobjiak cĩk Yesu. Ma natẽ, imiiryie nẽẽgẽ õõt korookjiowẽy ĩcĩk gaalawu ĩcĩk Lithtra kĩ Ikonioma kĩ Antiowa. 22 Anyi balna nẽẽgẽ thinneti cĩk wobjiawu kokomit, ĩthõng ĩtĩrĩthĩt ĩnõõgõ kuthutti leminit. Ngaatĩ aduwacĩ ĩnõõgõ ẽthẽcĩ ne, “Abũnna thẽk ngĩ kapĩrna naaga õrrõt, kĩĩ katĩ kitioth kabicoc cĩ Nyekuco.” 23 Ma natẽ, eberyia Paulo kĩ Barnabath eet cĩk obbitik cĩk kelethiawak mĩn mĩn. Ma natẽ, edeethito eleeti daintia, ĩthõng alaacõ Makayyioit Yesu cĩ ẽlẽmĩ nẽẽgẽ, kĩĩ katĩ gõõ kũthũtĩ nẽ eet cĩk obbitik cĩkkõ. 24 Ma balna ngĩ ẽdẽẽm Paulo kĩ Barnabath looc cĩ Pithidia, õõt edecciek kõõt kõdõlanit looc cĩ Pamvilia, 25 ngaatĩ balna õvvõ irioni eet õlõõ ĩcĩ gaalawu ĩcĩ Perga. Ma natẽ, ulluccie õõt õlõõ ĩcĩ gaalawu ĩcĩ Attalia.
26 Ma Attalia, ivitia otodit kovowol imiiryie õõt ĩcĩ Antioi looca ĩcĩ Thiiria, ngatĩ balna alawini lemnyiowa, kĩĩ katĩ kũthũtĩ Nyekuci Paulo kĩ Barnabath, nyatarka tiic cĩ ĩdĩmanit yoko nẽẽgẽ edecciak wo. 27 Ma balna ngĩ õdõlanit Paulo kĩ Barnabath Antiok, ivitia ulluttia nẽẽgẽ eet cĩk kelethiawak vẽlẽk ngatĩ odoi, ĩthõng uduktiak ĩnõõgõ thoothonniok vẽlẽk cĩk balna ẽẽlĩ Nyekuci ĩnõõgõ kĩdĩmanit, kĩ gõõl cĩ anyĩcẽ nẽ eet cĩk athii cĩ ẽẽn Yudei kayait leminit. 28 Ngaatĩ arũmẽẽnĩ nẽẽgẽ natẽ kĩ wobjiak wathinniok cĩk meelĩk.