Ẽkẽba Pẽtũrũ tiicanẽ cĩgĩnĩk
11
Ĩthĩraritõ balna tionniaha kĩ lemnyiok Yudea tũrũr ngatĩ elemit eeta cĩk athii cĩ ẽẽn Yudei thõõth cĩ Nyekuco. 2 Ma balna ngĩ ũũk Pẽtũrũ ĩcĩ Yeruthalẽmĩ, õõt ẽpẽkantõy lemnyiowa cĩk abũũranni eleeti kĩ ĩnõõnõ, 3 ĩthõng ĩĩtõ ne, “Õkkõ iithio niia ciith cĩ eet cĩk nga kũbũũrantẽ eleeti, ĩthõng uuwu uduktowu kĩ ĩnõõgõ.”4 Ma natẽ, ẽtẽrẽhaĩ Pẽtũrũ ẽkẽbak ĩnõõgõ thoothonniok jurrung gõõla cĩ balna edenyianẽ nẽẽgẽ. 5 Ĩthõng ĩthĩ nẽ ne, “Kalayyie balna na õlõõ ĩcĩ gaalawu ĩcĩ Joopa, ma natẽ kĩcĩna gimma, ĩthõng kõngõnõthẽ, ĩthõng kĩcĩna gimma cĩ õgõõn kĩ mĩlaya, cobbi allucciay tammuatiddina, cĩ ayak kũdũlua wec kikiyyia loota ngatĩ balna kaavẽ nana. 6 Ma balna ngĩ kahamni na jurrung wo, kacini kẽnnẽ kẽlẽgẽ cĩk loocak wũk gõõ ayak thoo wec, kĩ kẽlẽgẽ cĩk muotĩk cĩk bõõnak kĩ kẽlẽgẽ cĩk õvõvõt keengtinẽy kĩ kĩballĩ cĩk tammutiddino. 7 Ma natẽ, kĩthĩrara molook ĩmma cĩ etheca ne, ‘Tĩnga Pẽtũrũ. Ruk kẽlẽgẽ nĩĩko, ĩthõng adawu.’
8 “Kedeci kẽnnẽ na kennei ne, ‘Athii tõ Makayyioit! Cĩ gõõ nga kadak kidi cĩk gerthek cĩk angiranni cĩk ẽẽn riiriny.’
9 “Õbõdẽcĩ moloowĩ neccie õthõõth tammuatiddina ngõnana ramma athĩ ne, ‘Nyĩ athĩ niia gimma ne, ẽẽn riiriny cĩ anyi Nyekuci kũbũna.’ 10 Õbõdẽcĩ balna thõõth coo adĩmanni ngõnana iyyio, ngaatĩ odongini gimma cĩ õgõõn kĩ mĩlaya cobbi õkõyyĩ tammuatiddina naboo.
11 “Abĩlĩ balna eeta cĩk ẽẽn iyyio cĩk balna avvunneca aneeta ĩcĩ kõrõõk cĩ gaalawu cĩ Cithariya ciitha cĩ balna kaavẽ na wo. 12 Ngaatĩ aduwacia Ririwacĩ cĩ Dĩhĩmĩ kiiriokta kĩ ĩnõõgõ, ĩthõng ennea nẽ ne, nyĩ alanglangi. Kiiriokca balna kĩ lemnyiok cĩkkõ ẽẽn tõrkõnõm wo, ĩthõng koottia kitiothia kõrõõk cĩ et wũ balna avvuyyiet ageeta. 13 Ma natẽ, uduwaet nẽ gõõl cĩ balna acĩnĩ nẽ anjĩlõ ngatĩ alibacĩ ĩnõõnõ ciitha cĩnnĩ, ĩthõng ĩĩ ne, ‘Tion eet õõgĩ kõõt Joopa, kõõt kayakta Thimõnẽ wũ athĩ thar õõgĩ Pẽtũrũ. 14 Ayahaci katĩ nẽ aniitia nyemut cĩ elianẽ niia kĩ eet cĩk ciith cunni.’
15 “Ma kẽtẽrẽhanẽ kothoothi wo, ikiyyia Ririwacĩ cĩ Dĩhĩmĩ ĩcĩnĩng kĩ balna ngĩ aku ĩcĩnac ĩcĩ owu. 16 Ngaatĩ kahadanẽ thõõth wũ balna aduwa Makayyioiti Yesu athĩ ne, ‘Agamecung agiitia Yoanẽ batithimo maamĩy kaganoko, ĩthõng thĩ, agamnyu katĩ niigia batithimo Ririwaca cĩ Dĩhĩmĩ.’a 17 Ĩthõng thĩ, mĩ anyi Nyekuci ĩnõõgõ anyinit codoi kĩ balna ngĩ anyet ageeta wũk balna kẽlẽmĩ Makayyioit Yesu Kiristo, aneeta baalia ngẽnẽ cĩ woyyia kabĩlnẽ Nyekuc wo?”
18 Ma balna ngĩ athĩrar nẽẽgẽ thõõth cĩ õthõõth Pẽtũrũ wo, ibilli pẽkan kĩ ĩnõõnõ, ĩthõng ẽtẽrẽktaĩ ubuluthit Nyekuc. Athĩ nẽẽgẽ ne, “Ikiyyia balna aanyĩk Nyekuci eet cĩk athii cĩ ẽẽn Yudei, kũtũngtek gerthetin cĩnĩng, ĩthõng aanyĩk ĩnõõgõ rũgẽt cĩ aavĩ kũdũt!”
Lemnyiok õlõõ ĩcĩ gaalawu ĩcĩ Antioi
19 Athanni balna lemnyiowa gwuak, nyatarka pĩrnanẽt cĩ gerthe õrrõt balna ngĩ ẽtẽrẽhanĩ kõr wũ balna aruwẽẽnĩ Ithtivenĩ. Avir balna nẽẽgẽ õvvõ rẽẽna loociowẽy ĩcĩk Vonithia kĩ Thiporoth kĩ õlõõ ĩcĩ gaalawu cĩ Antioi, ĩthõng thĩ, kẽnnẽ balna õvvõ aduwaai nẽẽgẽ Yudei dõ nyemut cĩ Yesu. 20 Ĩthõng eeta gwuak cĩk Thiporothi kĩ cĩk Cirene, õõt ĩcĩ Antioi, ĩthõng ẽtẽrẽktaĩ othoothiõy kĩ Girik buu, ĩthõng iriontĩk ĩnõõgõ Nyemut cĩ Abũnna cĩ Makayyioit Yesu. 21 Aavĩ balna tiirthẽtĩ cĩ Makayyiokto ĩcĩnĩng, ĩthõng ivitia elemit eeta cĩk meelĩk õrrõt Makayyioit Yesu.
22 Ma natẽ, arawak nyemut cĩ thõõth coo wo, eet cĩk kelethiawak Yeruthalẽma, ngaatĩ itionanẽ nẽẽgẽ Barnabath kikiyyia Antiowa. 23 Ma balna ngĩ arawak Barnabathĩ, ĩthõng ikiyyia ĩcĩn bũnnathĩt cĩ atican Nyekuci wo, ẽbẽlbẽl, ĩthõng irionĩk ĩnõõgõ kallia kĩĩtõ lemnyiok dĩdĩ cĩk Makayyiokto thinnetinẽy ĩcĩgĩk vẽlẽk. 24 Ẽẽn balna Barnabathĩ et cĩ abũnna, cĩ abbĩththĩ Ririwacĩ cĩ Dĩhĩmĩ, ĩthõng ayak nẽ leminit, ngaatĩ avvu ẽlẽmĩ eeta cĩk meelĩk õrrõt Makayyioit.
25 Ma natẽ, ũũk Barnabathĩ ĩcĩ Tarthuthi kũũk kidiima Thaulo, 26 ma balna ngĩ õkkõ amũda ĩnõõnõ wo, ayaha ĩnõõnõ Antiowa. Ivitia Thaulo kĩ Barnabath urumtõy kĩ lemnyiok cĩk kelethiawak, ĩthõng illimanit eet cĩk meelĩk õrrõt erkit tũrũr. Ẽẽn balna Antioi kõrõõk cĩ gaalawu cĩ balna avvũ eeta wobjiak ĩcĩ owu athĩ ne, Kirithtianẽta.b
27 Ma wathinniowẽy nĩĩkẽ, ivitia eeta cĩk õthõõth molook cĩ Nyekuco gwuak cĩk aluciay Yeruthalẽma õvvõ ĩcĩ Antioi. 28 Õthõõth balna eeti ĩmma cĩnĩng cĩ athĩ Agabuth, elintia cĩ Ririwac cĩ Dĩhĩmĩ, uduwa nẽ ngatĩ katĩ akuni butuny cĩ gerthe wak looc cĩ Rũma tũrũr. Ĩthõng balna iliba butuny coo erkinyiay wũk balna ẽnnẽ Kilawudothĩ alaan cobbi cĩ Rũma.c 29 Ma natẽ, idiimitõ wobjiaha cĩk aatĩ Antiowa ngĩ itioni anyinit cĩ ayak nẽẽgẽ codoi codoi lemnyiok cĩk aatĩ Yudea. 30 Ngaatĩ aduwacĩ nẽẽgẽ Barnabath kĩ Thaulo kootti anyinit cĩnĩng kayaktothĩk eet cĩk obbitik cĩk kelethiawak Yeruthalẽma.