Ooguay Pẽtũrũ kĩjana
12
Ma wathinniok nĩĩkẽ, ikiyyia ẽcẽb alaanĩ Ẽrõõdĩa eet õõgĩ cĩk kelethiawak, nyatarka adiim ngĩ adĩman ĩnõõgõ buth. 2 Aduwaai balna nẽ nyĩcẽkẽr keteddia õõ cĩ Jemithib gõtõnĩ Yoanẽ nyetubata. 3 Ma balna ngĩ acĩn Ẽrõõdĩ ngatĩ ebelbelei Yudei thõõth coo wo, ũũk ẽcẽb Pẽtũrũ buu. Aliba balna thõõth coo Peyiana cĩ Ahat cĩ Avaadiay cĩ Kothii Nyĩgĩt.c 4 Ma baa vurtia cĩ agamĩ nẽ Pẽtũrũ, ikiyyia arĩk nẽ ĩnõõnõ kĩjana, ĩthõng aanyĩk nẽ nyĩcẽkẽr cĩk ẽẽn õmmõtõ kĩ tõrkõnõm kebeit ĩnõõnõ. Adiim balna Ẽrõõdĩ ngĩ ẽngẽr thõõth cĩnnĩ lokika vurtia cĩ Kõr cobbi cĩ Ngothio.d5 Balna ma ngĩ aavĩ Pẽtũrũ kĩjana, alayyiek balna eeta cĩk kelethiawak ĩnõõnõ Nyekuc õrrõt.
6 Ma ngerethietĩn cĩnnĩ cĩ adiimi Ẽrõõdĩ ngĩ, õkõyyĩ Pẽtũrũ lokika. Baalin nĩcẽ õõngĩ balna kẽnnẽ Pẽtũrũ kõrgẽna ĩcĩ nyĩcẽkẽr cĩk ẽẽn ramma, ecebjie nẽ ngarikonyay ĩcĩk ẽẽn ramma, ĩthõng ebeit nyĩcẽkẽrĩ katũk. 7 Ma tamanoko, iliba anjĩlõ cĩ Makayyiokto, ĩthõng ũtũkũl lanyĩtĩ kĩjan. Ma natẽ, õtõmõõĩ anjĩlõ kabanyit cĩ ẽlẽ cĩ Pẽtũrũ, ĩthõng uturan ĩnõõnõ, ĩthõng ethek ne, “Tĩnga tamanoko!” Ma natẽ, okolliay ngariko athĩnẽy ĩcĩgĩnĩk.
8 Ma natẽ, ethek anjĩlõ Pẽtũrũ ne, “Tihim ceremua cugunik kĩ caava.” Ma natẽ, ĩdĩman Pẽtũrũ noko. Ngaatĩ ẽthẽcĩ anjĩlõ ĩnõõnõ ne, “Tihim cẽrẽm cunni cĩ lajjo, ĩthõng õwõbahanĩ.” 9 Ngaatĩ õwõbĩ Pẽtũrũ anjĩlõ ẽẽktanẽ kĩjana, ĩthõng thĩ, athii cĩ aga Pẽtũrũ ngatĩ ẽẽn thõõth cĩ adĩman anjĩlõ wo dĩdĩ. Ĩthõng ahad kẽnnẽ nẽ athĩ ne, kongonothie thõng. 10 Ivitia ũtũngtek anjĩlõ kĩ Pẽtũrũ nyĩcẽkẽr cĩk owu kĩ cĩk õwõbẽcĩ buu, ngaatĩ õdõlanĩ araan cĩ ẽẽn thiihit cĩ iithiowĩ gõõl cĩ õkkõ õlõõ ĩcĩ gaalawu cobbi. Oyyi balna araanĩ coo nẽdõ ngaatĩ ẽẽktĩ nẽẽgẽ õvõyyĩ. Ma balna ngĩ õõt nẽẽgẽ ngatĩvõrĩ õõt ũtũnũthõ nyetuluba kĩĩtõ rẽẽntĩ kĩdĩĩc, ikiyyia ithii anjĩlõ noko kagũnũcũk kũtũngek nẽ Pẽtũrũ dõ.
11 Ma natẽ, ikiyyia aga Pẽtũrũ thõõth cĩ atican anjĩlõ wo, ĩthõng ĩĩ ne, “Kagga ngatĩ itionanẽ balna Makayyioiti anjĩlõ cĩnnĩ kikiyyia kẽẽlawa aneeta ĩcĩ Ẽrõõdĩ, kĩ thoothiowẽy vẽlẽk ĩcĩk ahad makayyiowa cĩk Yudei.”
12 Ngaatĩ õkõyyĩ Pẽtũrũ ciitha cĩ Maria yaatĩ Yoanẽ cĩ balna athĩ thar õõgĩ Marĩkõ.e Alũtẽ balna eeta cĩk meelĩk natẽ, ĩthõng alayyiõy. 13 Ma natẽ, ikiyyia uuk Pẽtũrũ katũk cĩ ngĩtĩvõrĩ. Ĩthõng ikiyyia õõwa ĩnõõnõ bũwẽẽcĩ ĩmma cĩ ẽẽn ticciannioit cĩ athĩ thar Rõõda. 14 Ma balna ngĩ aku aga bũwẽẽcĩ coo molook cĩ Pẽtũrũ wo, ikiyyia atal nẽ õrrõt kithii nõ cĩ õõwĩ katũk, ĩthõng ivir imiirie ũũk ciiatõ, ĩthõng ũũk ethek eet ne, “Aavĩ Pẽtũrũ katũga!”
15 Ethei kẽnnẽ balna nẽẽgẽ ĩnõõnõ ne, “Adakci aniitia ngaamõnĩ!” Ĩthõng thĩ, athĩ nẽ noko ne, ẽẽn dĩdĩ. Ĩthõng thĩ, ivitia nẽẽgẽ ĩĩtõ ne, “Ẽẽn koccia nẽ anjĩlõ cĩnnĩ.”
16 Ĩthõng thĩ, balna alna uuk Pẽtũrũ katũk noko, ma balna ngĩ õvvõ õõ nẽẽgẽ katũk koo ĩcĩnĩt nẽẽgẽ Pẽtũrũ, ĩthõng ukulliek jien. 17 Ma natẽ, othoothĩk Pẽtũrũ eet athĩnẽy kitivantẽ, ĩthõng uduwak ĩnõõgõ gõõl cĩ õõganẽ Makayyioiti ĩnõõnõ kĩjana wo. Ĩthõng naboo ethek Pẽtũrũ ĩnõõgõ ne, “Uduktiak Jemithf kĩ lemnyiok õõgĩ vẽlẽk thõõth coo.” Ĩthõng ĩtĩnga nẽ ũũk ngamanĩ.
18 Ma balna ngerethietĩna cĩnnĩ, ivitia õngõtantẽ ooti cĩk nyĩcẽkẽr wũk balna ebekcie õrrõt, nyatarka muwẽẽnĩt cĩ thõõth cĩ athiinni Pẽtũrũ kĩjana wo. 19 Ma natẽ, uduwak Ẽrõõdĩ nyĩcẽkẽr cĩgĩnĩk kẽrẽpanit Pẽtũrũ, ĩthõng thĩ, kẽnnẽ balna athii cĩ amũda kũdũt. Ngaatĩ ajini Ẽrõõdĩ bekciok, ĩthõng aanyĩk ĩnõõgõ kuruktie. Ma vurtia cĩ thõõth coo, ikiyyia ũtũngek Ẽrõõdĩ looc cĩ Yudea, ĩthõng nõõnõ ũũk aavu õlõõ ĩcĩ gaalawu cĩ Cithariya kĩdĩĩc.
Daaĩth cĩ Ẽrõõdĩ
20 Ẽgẽrẽnyõy balna alaanĩ Ẽrõõdĩ kĩ eet cĩk korookjiok cĩk gaalawu cĩk Tire kĩ cĩk Thidonĩ õrrõt. Ĩthõng thĩ, itionitõ nẽẽgẽ eet kõõt kurumtõy kĩ alaan, õvvõ balna eeta cĩkkõ othoothiõy kĩ Balathtuth cĩ balna ẽẽn ticciannioit cĩ athĩhĩ alaanĩ. Ivitia amanymanyanit eeta Balathtuth kayait ganõn kĩ alaan, nyatarka amũda nẽẽgẽ ahat looca ĩcĩ alaano.
21 Ĩthõng thĩ, balna eberiay kõr cĩ avvu arumone nẽẽgẽ kĩ Ẽrõõd. Ma natẽ, itihim Ẽrõõdĩ ceremua cĩgĩnĩk cĩk alaantheto, ĩthõng ikiyyia aavu loota taabawa kĩĩ kirionĩk eeta. 22 Acalcal balna eeta athĩ ne, “Ẽẽn coo molook cĩ nyekuco, athii cĩ ẽẽn cĩ eeto.”
23 Ma tamanoko, nyatarka balna athii cĩ abuluth Ẽrõõdĩ Nyekuc, uuk anjĩlõ cĩ Makayyiokto ĩnõõnõ kuuk looc. Ma vurtia, ivitia adait kulutia Ẽrõõd rũgẽtẽt ngaatĩ adaaknĩ noko thẽl.
24 Ĩthõng thĩ, balna alna ĩtooryi thõõth cĩ Nyekuco athanothi looc.
25 Ma balna ngĩ edecciak Barnabathĩ kĩ Thaulo tiic cĩnĩng cĩ balna itionĩ lemnyiowa ĩnõõgõ kõõt kĩdĩmanit ẽẽ,g ivitia oboddia nẽẽgẽ ĩcĩ Yeruthalẽmĩ oyowotit Yoanẽ buu wũ athĩ thar õõgĩ Marĩkõ.